Nɩ-toni 16
16
Timote páw nɩ a Pol nɩ a Sɩlasɩ
1A Pol tɩ ta n Dɛrbe, al pùorí ʋ ta Lɩsɩtɩr. Po-tuure kãw na dɩ Timote a tɩ be n be. A mã tɩ ɩ n Zifʋ na sàw de a Yeezu yele a, ɛ́ a sãà ɩ Gɩrɛkɩ. 2A yɛbr na tɩ kpɩɛr a Lɩsɩtɩr nɩ a Ɩkonɩɔm a tɩ pore nɩ a ʋ yúor yo-vla. 3A Pol tɩ bɔbr'a k'ʋʋ tɛr ʋ cen nɩ, lɛ n'a ʋ tɩ de ʋ ŋmãa a yʋ̀ɔr, a Zifʋ mɩnɛ na tɩ kpɩɛr a alɩ voru nɛ pʋɔ a ƴãw. Bʋ̃ʋ n'ʋ vɛ̃, bɛ za tɩ bãwnɩ a na a ʋ sãà na ɩ Gɩrɛkɩ a. 4A ten al za pʋɔ a Pol nɩ a Sɩlasɩ na mɩ́ tɩ tɔlɛ a, bɛ mɩ́ tɩ manɛ nɩ a nɛ́ɛ al za a nɩ-toni nɩ a Zerizalɛm nɩ-kore na ƴãw a, kʋ̀rɛ a nɩbɛ, ɛ́ yere kʋ̀rɛ bɛ kɛ́ bɛ tuur. 5A Lãw-yie naaŋmɩn-sàwfʋ tɩ bɩrɛ na, ɛ́ a nɩbɛ na tɩ kpɩɛr pʋɔrɛ a Lãw-yie pʋɔ a tɩ yãwmɛ na dɔwlɛ bibie za.
Nyɛ́b kãw a Pol na nyɛ̃ Tʋrʋwasɩ a
6A Pol nɩ a Sɩlasɩ tɩ cɔlɩ nɩ a Firizi nɩ a Galasi vuo. Bʋ̃ʋ n'ʋ vɛ̃, a Vʋʋrʋ Sõw bɛ tɩ sàw bɛ na hieri a Naaŋmɩn ƴɛ̀rʋ a Azi ɛ. 7Bɛ na tɩ ta a Mizi tʋr-bɔw ƴãw a, bɛ tɩ tɩɛrɛ na kɛ́ bɛ tɔl Bitini, ɛcɛ a Yeezu Vʋʋrʋ tɩ piw bɛ nɩ sɔ́r. 8Lɛ n'a bɛ tɩ tu tɔl a Mizi siw Tʋrʋwasɩ. 9Tɩ̃ɩsɔw kãw, a Pol tɩ nyɛ̃ nɩ Masedʋan nɩr, ʋ àr zɛlɛ ʋ yere nɩ: «Gãw wa a Masedʋan wa sõw tɩ!» 10A yel ŋa a Pol na tɩ nyɛ̃ a pùorí, tɩ tɩ ìr'ɩ daadaalɛ bɔbr kɛ́ tɩ lo a Masedʋan sɔ́r. Tɩɩm zie a, bʋnʋ bɛ tɩ ka be ɩ, Naaŋmɩn n'ʋ tɩ bʋɔlɛ tɩ kɛ́ tɩ cen tɩ hieri a Yel-nʋ̃ɔ̀ a be.
Lidi sàw na de a Sore Filib tẽw
11Tɩ tɩ kpɛ n gbor a Tʋrʋwasɩ, lɩɛbɩ daadaalɛ tu Samɔtɩrasɩ sɔ́r, ɛ́ a bio daarɩ́ tɩ lɩɛbɩ tu a Neyapolisɩ sɔ́r. 12Be n'a tɩ tɩ yi ɛ́ cen a Filib tẽw, na ɩ a Masedʋan tẽw vuo pʋɔ tẽ-kpɛ̃ɛ za, ɛ́ ɩ Ʋrɔm tẽw nɩbɛ zi-sóra a. Tɩ tɩ kpɛ n a tẽw ʋl pʋɔ kɔwrɩ blã. 13A Zifʋ mɩnɛ pɩ̃ɛnʋ-bibir na wa vɩɛ a, tɩ yi n a tẽw pʋɔ lanɩ bàa kãw cen zie kãw tɩ na tɩɛrɛ kɛ́ puoru zie be n a be a. Tɩ tɩ zɩ̃ na ƴɛ̀r'ɩ pɔwbɛ na tɩ ɓã taa a be a. 14A bɛ ƴen sob kãw, na dɩ kɛ́ Lidi a, tɩ ɩ n yɛ-yɛrɛ na kʋɔrɛ pɛn-zɩɩr, pɛn-vɩɛlɩ vɩɛlɩ a. Tɩatɩɩr'a ʋ tɩ yi, ɛ́ tu a Naaŋmɩn puoru sɔ́r. Ʋ tɩ ƴãw nɩ tobr a ƴɛ̀rʋ ƴãw, a Sore tɩ sɩrɩ na ɩ ʋ cɛlɛ a Pol ƴɛ̀rʋ zie vla. 15Ʋ na wa de a suob, ʋlɛ nɩ a ʋ yir dem za a, ʋ bʋɔlɩ tɩ na yere nɩ: «Nyɩ na tɩɛr bãw k'ɩ̃ɩ sàw na de a Sore a, nyɩ wa kpɩɛr a ɩ̃ yir.» Ɛ́ tɩ fɛr tɩ ƴãw tɩ sàw a ʋ bʋɔlʋ.
Bɛ nyɔw nɩ a Pol nɩ a Sɩlasɩ pàw a Filib tẽw
16Bibir kãw tɩ na tɩ cere a puoru zie a, tõ-tõ-bi-pɔwle kãw tɩ cen na tuori tɩ: Kɔ̃tɔ̃-faa na ɩ ʋ bãwnɛ nɩdaar yele a, tɩ nyɔw ʋ na, ʋʋ tɩ páwr libie yaga kʋ̀rɛ a ʋ nɩ-bɛrɛ, nɩ a nɩdaar yele ʋ na mɩ́ tɩ manɛ a. 17Ʋ tɩ ta na tu tɩɩm nɩ a Pol, ɛ́ ŋmɩɛr cɛlsɩ yere nɩ: «Naaŋmɩn-na-do-saa-bɛ-pɩɛl-a tõ-tõ-biir'ɩ a nɩbɛ bɛ ŋa, a faafʋ sɔr'ʋ bɛ hiere kʋ̀rɛ nyɩ.» 18Bibi-yaga n'a ʋ tɩ ɩ à à ŋá. A wa tɩ zuo nɩ a Pol ʋ lɩɛb yel a kɔ̃tɔn: «A Yeezu Kɩrɩta yúor ƴãw, ɩ̃ ƴãwnɛ nɩ nʋɔr kʋ̀rɛ fʋ: yi zaa a powle ŋa pʋɔ!» A kɔ̃tɔn tɩ yi n a pɛr nɛ pʋɔ. 19A powle ʋl nɩ-bɛrɛ na tɩ nyɛ̃ bɛ kʋ̃ cãà páwr tɔnɛ a, bɛ nyɔw nɩ a Pol nɩ a Sɩlasɩ taw cen nɩ a nɩbɛ tuor-taa zie, a nɩ-bɛrɛ niŋé. 20Bɛ tɩ tɛr bɛ na tɩ wul a Ʋrɔm tẽw ƴɛ̀r-dɩrbɛ ɛ́ yel: «A nɩbɛ bɛ ŋa ƴãwnɛ nɩ damnʋ a tɩ tẽw pʋɔ. Bɛ ɩ n Zifʋ bʋʋrɛ, 21ɛ́ wule a nɩbɛ kɛ́ bɛ tuur ɩ-ɩrɩ tɩɩm Ʋrɔm tẽw nɩbɛ na kʋ̃ tʋ̃ɔ́ sàw ɛ́ mɩ̀ kʋ̃ tʋ̃ɔ́ tuur a.»
22Lɛ n'a a zu-sɛbla tɩ ìr lo a Pol nɩ a Sɩlasɩ zu. A ƴɛ̀r-dɩrbɛ tɩ ƴãw na bɛ yaarɩ a bɛ fɔbr ɛ́ fɔb'ɩ bɛ fʋbr. 23Bɛ na wa fɔb bɛ vla vla a, bɛ nyɔw bɛ na lɔb ƴãw gaso pʋɔ ɛ́ yel a gaso-gùre k'ʋʋ taa yire bɛ pùor ɛ. 24A kpãàfʋ ŋa zũú, a gaso-gùre tɩ ƴãw bɛ nɩ a gaso di-pɛ-baara pʋɔ, ɛ́ ƴãw bɛ kpule a gbɛ́ɛ ƴãw. 25A tɩ̃ɩsɔw zi-põ-zɛ̃-taa vuo pʋɔ, a Pol nɩ a Sɩlasɩ tɩ puore na yiele danɛ nɩ a Naaŋmɩn, ɛ́ a nɩ-pàwrɩ ŋmaarɛ bɛl bɛrɛ wone. 26Bɛ wa bere na a tẽsɔw kɔbr dam kpɛ̃w kpɛ̃w za, dam a gaso yir pɛr. A gaso yir pamɛ za tɩ yuori nɩ a pɛr nɛ pʋɔ, ɛ́ a nɩ-pàwrɩ za bamɛ kpa lo. 27A gaso-gùre na wa zaw ìr a, ʋ nyɛ̃ nɩ a gaso dɩ̃dɛɛ pamɛ na yuori a, lɛ n'a ʋ tɩɛr kɛ́ a nɩ-pàwrɩ yi na zɔ, ɛ́ tɩ vʋ̃ɔ a ʋ sʋɔ k'ʋʋ kʋ n ʋ tʋɔra. 28Ɛcɛ a Pol tɩ tanɩ na nɩ kɔkɔr-kpɛ̃w yel ʋ: «Taa wa nanɩ kʋrɛ fʋ tʋɔra ɩ, tɩ za be n ka!» 29A gaso-gùre tɩ ƴãw na bɛ kʋ̀ ʋ vũu, ʋ caalɩ zɔ tɩ kpɛ n a gaso pʋ̃ɔmɩ, tɩ lo gbĩ dume a Pol nɩ a Sɩlasɩ pile ɛ́ màwr ʋ za. 30Al pùorí, ʋ tɩ tɛr bɛ na yi n ɛ́ sowri bɛ: «Ɩ̃ bá mɩnɛ ɛ, bʋ̃ʋ n'ʋ a fɛr k'ɩ̃ɩ ɩ páw a faafʋ?» 31Bɛ tɩ sɔw ʋ na: «Sàw de a Sore Yeezu ɛ́ fʋ na páw nɩ a faafʋ, fʋ̃ʋ nɩ a fʋ yir dem za.» 32Lɛ n'a bɛ tɩ hieri a Sore ƴɛ̀rʋ kʋ̀ ʋ, lãwnɩ a nɩbɛ bɛl za na tɩ kpɩɛr a ʋ yir a. 33A ʋlɩ pɛr nɛ pʋɔ, a tɩ̃ɩsɔw-bɩ̃ɩn, a gaso-gùre tɩ tɛr bɛ na cen nɩ k'ʋʋ tɩ pɛ́w a bɛ natɩɛ. Al pùorí, ʋ tɩ de nɩ a suob daadaalɛ, ʋlɛ nɩ a ʋ nɩbɛ za. 34Ʋ tɩ tɛr'ɩ a Pol nɩ a Sɩlasɩ do n a ʋ yir tɩ ɩ bʋ̃-dɩrɩ kʋ̀ bɛ, ɛ́ ʋlɛ nɩ a ʋ yir dem za tɩ cɩlɛ, bɛ na sàw de a Naaŋmɩn a.
35A zie na wa vɩɛ a, a ƴɛ̀r-dɩrbɛ tɩ tõ n a bɛ sõw-sõwnbɛ kɛ́ bɛ tɩ yel a gaso-gùre: «Yuo a nɩbɛ bɛl bɛr!» 36A gaso-gùre tɩ yel'ɩ à ŋá kʋ̀ a Pol: «A ƴɛ̀r-dɩrbɛ tõ na yel kɛ́ bɛ yuo nyɩ bɛr. A na ɩ à ŋá a, nyɩ yi cere nɩ ƴã-ɓaarʋ!» 37Ɛcɛ a Pol tɩ sɔw na: «Tɩɩm na ɩ Ʋrɔm tẽ-biir a, nɩ-yaga niŋé n'a bɛ fɔb tɩ, ɛ́ bɛ maal'ɩ tɩ ƴɛ̀rʋ wul a tɩ sãwna ɩ, ɛ́ nyɔw tɩ pàw. Ɛ́ ƴɛrɛŋa bɛ bɔbr kɛ́ bɛ pãa sɔwlɩ yuo tɩ bɛr ɩ? A lɛ kʋ̃ ɩ ɛ! A bɛl tɛɛ za, bɛ wa yuo tɩ bɛr!» 38A ƴɛ̀r-dɩrbɛ sõw-sõwnbɛ tɩ cen na tɩ manɩ kʋ̀ a ƴɛ̀r-dɩrbɛ. Bɛ na tɩ wõ kɛ́ Ʋrɔm tẽ-biir nɛbɛ a, dɛ̃bɩ̃ɛ nyɔw bɛ na. 39Lɛ n'a bɛ tɩ wa wa yel kɛ́ bɛ sãw na. Al pùorí bɛ tɩ yuo bɛ na bɛr, ɛ́ zɛlɛ kɛ́ bɛ yi zaa a tẽw pʋɔ. 40A Pol nɩ a Sɩlasɩ na wa yi a gaso pʋɔ a, bɛ cen na tɩ páw a Lidi, ɛ́ nyɛ̃ a yɛbr puori bɛ ɛ́ yel kʋ̀ bɛ kɛ́ bɛ cãà ƴãw fãw. Al pùorí, bɛ tɩ lɛb'a yi cere.
Đang chọn:
Nɩ-toni 16: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
