Nɩ-toni 15
15
A Zerizalɛm kpaa-ta-kpɛ̃ɛ yele
1Nɩbɛ bɛ mɩnɛ kãw na tɩ yi a Zude siw wa a Ãtɩɔsɩ a tɩ tĩ na kanɛ nɩ a yɛbr yere à ŋá: «Nyɩmɛ bɛ wa ƴãw bɛ ŋma nyɩ a yɛɛ, mɛ̃ a lɛ a Moyiir nʋɔr na ƴãw a, nyɩ kʋ̃ tʋ̃ɔ́ nyɛ̃ a faafʋ ɛ.» 2A tɩ ɩ n taw-taa gã, ɛ́ nɔkpɛn na bɛ vɩɛl a be a Pol nɩ a Banabasɩ nɩ a nɩbɛ bɛl cara pʋɔ. Lɛ n'a bɛ pãa tɩ wõ taa, ɛ́ yel kɛ́ a Pol nɩ a Banabasɩ nɩ nɩbɛ bɛ mɩnɛ na do n a Zerizalɛm, tɩ páw a nɩ-toni nɩ a nɩ-kore a taw-taa ŋa ƴãw. 3A Ãtɩɔsɩ tẽw Lãw-yir tɩ sõw bɛ na bɛ cen. Bɛ tɩ tu na tɔl a Fenisi nɩ a Samaari ten pʋɔ, manɛ kʋ̀rɛ a nɩbɛ a be, a lɛ a nɩ-bʋʋr-yoru na sàw de a Sore a. A mɩ́ tɩ ɩ n nʋ̃ɔ̀ kpɛ̃ɛ a yɛbr zie. 4Bɛ na tɩ ta a Zerizalɛm a, a Lãw-yir nɩ a nɩ-toni nɩ a nɩ-kore tɩ de bɛ nɩ a sãanʋ, ɛ́ bɛ tɩ manɩ a alɩ bome nɛ za a Naaŋmɩn na tɩ lãw nɩ bɛ maalɩ a kʋ̀ bɛ. 5A Faarizɩ̃ɛ mɩnɛ lãw nɩbɛ bɛ mɩnɛ, na tɩ sàw de a Yeezu yele a, tɩ ìr'a yel: «A fɛr'a kɛ́ bɛ ŋma a nɩ-bʋʋr-yoru bɛl na sàw de a Yeezu yele a yɛɛ, ɛ́ ƴãw bɛ tuur a Moyiir wulu.» 6A nɩ-toni nɩ a nɩ-kore tɩ kpaar'ɩ taa kɛ́ bɛ jɛl a yel ŋa kaa. 7Bɛ na tɩ ŋmɛ a nɔkpɛn a tɩ cɛlɩ a, Pɩɛr tɩ ìr'a yel: «Yɛbr i, nyɩ bãwnɩ a na a Naaŋmɩn na kaa ír mɛ̃ koro za a nyɩ pʋɔ, k'aa nɩ-bʋʋr-yoru tʋ̃ɔ́ wõ a Yel-nʋ̃ɔ̀ a ɩ̃ nʋɔrɩ́ ɛ́ sàw de a. 8A Naaŋmɩn na bãw a nɩsaalbɛ socie a tɩ dɩ n a bɛ dãsɩɛ, a lɛn daar ʋ na tɩ kʋ̀ bɛ a Vʋʋrʋ Sõw mɛ̃ a tɩɩm a. 9A Naaŋmɩn bɛ owri owru kãw za tɩɩm nɩ a bɛl ɛ, a bɛ naaŋmɩn-sàw-deb zũú n'a ʋ pɛ́w a bɛ socie a vɩɛl. 10A na ɩ à ŋá a, bʋnʋ ƴãw n'a nyɩ yel kɛ́ nyɩ ɩ a Naaŋmɩn kaa? Nyɩ na de tuor, tɩɩm nɩ a tɩ sãàkʋm-kore na bɛ tʋ̃ɔ́ tuo a, bɔbr kɛ́ nyɩ tuo a po-tuurbɛ a? 11Ɩ̃ lɛb maal yel: tɩ tɩɛrɛ na k'aa Sore Yeezu maalʋ zũú n'a tɩ páw a faafʋ mɛ̃ a lɛ tɔr za bɛ na páw a.»
12Lɛ n'a a kpaa-ta-kpɛ̃ɛ dem za tɩ ŋmãa vʋʋrʋ, ɛ́ bɛ bɛr wõ a Pol nɩ a Banabasɩ manɩ a nɔ-ɓãa-yele nɩ a yel-bãw-guuri al za a Naaŋmɩn na tɩ ƴãw bɛ maalɩ a nɩ-bʋʋr-yoru zie a. 13Bɛ na wa ƴɛ̀r baar'a, Zakɩ mɩ̀ tɩ de nɩ a ƴɛ̀rʋ yel: «Yɛbr i, nyɩ bɛrɛ wone. 14A Sɩmɩ̃ɔ lɛb'a manɩ kʋ̀ tɩ a ƴɛrɛŋa, a lɛ a pɛr-tib daar, a Naaŋmɩn na kaa a nɩ-bʋʋr-yoru zie, ɛ́ kaa ír nɩ-bʋʋrɛ a bɛ pʋɔ kɛ́ bɛ ɩ a ʋ nɩbɛ a. 15A yel ŋa nɩ a naaŋmɩn-ƴɛ̀r-manbɛ ƴɛ̀rʋ de nɩ taa, bɛ na sɛb yel kɛ́:
16“Al pùorí, ɩ̃ na lɛb'a wa
wa mɛ a Daviir yir na lo a,
ɩ̃ na lɛb'a libri a ʋ deboru, ɛ́ ɩ ʋ lɛ àr.
17Lɛ n'a a nɩsaalbɛ bɛl na cɛ a
na bɔbr a Sore,
a nɩ-bʋʋrɛ bɛl za ɩ̃ na bʋɔlɩ
kɛ́ bɛ wa ɩ a ɩ̃ nɩ-sori a#15:17 A kan-nɛ́ɛ 16 nɩ a 17 ƴãw a, nyɛ̃ Am 9.11-12..
À ŋá n'a a Sore yere,
18ʋl na ɩ bɛ bãw
a ʋ pʋ-tɩɛrʋ yele a koro za a.”
19Lɛ so, mãa sàw na k'aa nɩ-bʋʋr-yoru nɩbɛ bɛl na sàw de a Naaŋmɩn a, tɩ ta bàlɛ bɛ zawlalɛ ɩ. 20Ɛcɛ tɩ sɛb yel kʋ̀ bɛ kɛ́ bɛ ciir a bàwr nɛnɛ, nɩ a pɩ̃ɔ-yele, bɛ taa 'wɔbr dʋ̃w bɛ na bɛ ŋmãa a kɔkɔr a nɛn ɛ, bɛ taa 'wɔbr a zɩ̃ɩ ɛ#15:20 Nyɛ̃ Lev 18.6-18.. 21Bʋ̃ʋ n'ʋ vɛ̃, a tẽ-kor daar za wa tɔ a dɩ̃a a, nɩbɛ be n a ten za manɛ a Moyiir wulu yele, ɛ́ pɩ̃ɛnʋ-bibir za, bɛ mɩ́ kanɩ ʋ nɩ a puoru-diru pʋɔ.»
A kpaa-ta-kpɛ̃ɛ dem tɩr'ɩ sɛbɛ kʋ̀ a kɩrɩta-nɩbɛ bɛl na bɛ ɩ a Zifʋ bʋʋrɛ a
22A Yeezu nɩ-toni nɩ a nɩ-kore, nɩ a Lãw-yir za, tɩ wõ n taa yel kɛ́ bɛ na kaa na ír nɩbɛ a bɛ pʋɔ tõ a Ãtɩɔsɩ, bɛlɛ nɩ a Pol nɩ a Banabasɩ. A bɛlɩ nɩbɛ nɛ tɩ ɩ n nɩ-yée a yɛbr pʋɔ: Zuda bɛ na bʋɔlɛ Barsabasɩ a nɩ Sɩlasɩ#15:22 Sɩlasɩ: A mɩnɛ kãw, ʋlɛ mɩ̀ cãà n'ɩ a Sɩlvɛ̃ bɛ na yere a sɛbr a mɩnɛ pʋɔ a: 2Ko 1.19, 1Te 1.1, 2Te 1.1, 1Pɩ 5.12. tɩ nɛbɛ. 23Sɛbɛ ŋa n'ʋ bɛ tɩ kʋ̀ bɛ kɛ́ bɛ cen nɩ:
«A Yeezu nɩ-toni nɩ a nɩ-kore, nyɩ yɛbr, puore nɩ a bɛ yɛbr bɛl na ɩ a nɩ-bʋʋr-yoru nɩbɛ ɛ́ be a Ãtɩɔsɩ, nɩ a Siiri nɩ a Silisi ten pʋɔ a. 24Tɩ wõ na k'aa tɩ nɩbɛ bɛ mɩnɛ, tɩ na bɛ tõ a, wa na wa ƴãw bʋnʋ a nyɩ zie, ɛ́ dam a nyɩ tɩɛrʋ nɩ a bɛ ƴɛ̀rʋ. 25Tɩ wõ n taa lãw nɔ-been, kaa ír nɩbɛ tone a nyɩ zie, bɛlɛ nɩ a tɩ yɛb-nɔnɩ Banabasɩ nɩ Pol, 26na de a bɛ nyɔ-vʋʋrʋ za kʋ̀ a tɩ Sore Yeezu Kɩrɩta a. 27A na ɩ lɛ a, Zuda nɩ Sɩlasɩ nɛbɛ tɩ tone a nyɩ zie, kɛ́ bɛ wa háa nʋɔr yel a yele á ŋá kʋ̀ nyɩ. 28A Vʋʋrʋ Sõw nɩ a tɩɩm tɛɛ za sɩrɩ na yel kɛ́ tɩ kʋ̃ tʋ̃ɔ́ lɛb ƴãw fɛrʋ kãw za dɔwlɩ a nyɩ zu, a bɛ ɩ a yel-fɛrɩ á ŋá na bɛ tɛr nɩɩr-bɛrʋ a ɩ: 29nyɩ ta 'wɔbr a bàwr-maal-nɛnɛ ɩ, nɩ a zɩ̃ɩ nɩ dʋ̃w bɛ na bɛ ŋmãa a kɔkɔr a nɛn ɛ, nyɩ bɛr a pɩ̃ɔ-yele. Nyɩmɛ wa ƴãw fãw bɛr à á ŋá za a, nyɩ na maal'ɩ vla. Nyɩ zɩ̃ vla.»
30A nɩbɛ bɛl bɛ na tɩ kaa ír a, bɛ tɩ bɛr bɛ nɩ sɔ́r bɛ tɔl siw a Ãtɩɔsɩ, tɩ bʋɔlɩ a Lãw-yir nɩbɛ ɓã taa ɛ́ de a sɛbɛ kʋ̀ bɛ. 31A ʋ kanʋ tɩ ɩ bɛ nɩ nʋ̃ɔ̀, a sõwfʋ ʋ na tɩ wa n a bɛ zie a ƴãw. 32A Zuda nɩ a Sɩlasɩ mɩ̀ na tɩ ɩ naaŋmɩn-ƴɛ̀r-manbɛ a, bɛ tɩ ƴɛ̀r'ɩ yaga a bɛ zie, kɛ́ bɛ tʋ̃ɔ́ sõw bɛ ɛ́ tɩɛ bɛ a naaŋmɩn-sàw-deb pʋɔ. 33Bɛ tɩ kpɛ n a bɛ zie kɔwrɩ blã. Al pùorí, a yɛbr tɩ tɛr bɛ na ƴãw sɔ́rɩ́ puori bɛ, kɛ́ bɛ lɛb kul vla a bɛlɩ dem na tɩ tõ bɛ a zie. [ 34Ɛcɛ a Sɩlasɩ tɩ yel'a k'ʋʋ na kpɩɛr'ɩ a be.] 35A Pol nɩ a Banabasɩ bɛl tɩ kpɩɛr'ɩ a Ãtɩɔsɩ. Bɛlɛ nɩ nɩ-yaga bɛ mɩnɛ tɩ kanɛ nɩ nɩ a nɩbɛ, ɛ́ hiere a Yel-nʋ̃ɔ̀ na ɩ a Sore ƴɛ̀rʋ a.
A Pol nɩ a Banabasɩ bʋ́r'ɩ taa
36A na wa kɔwrɩ blã a, a Pol tɩ yel'ɩ a Banabasɩ: «Ɩ tɩ lɛb cen tɩ nyɛ̃ a yɛbr a ten al za pʋɔ tɩ na hieri a Sore ƴɛ̀rʋ a, tɩ tɩ nyɛ̃, ŋmɩŋmɩn n'a a ŋmɛ̃ a bɛ zie.» 37A Banabasɩ tɩ bɔbr'a kɛ́ bɛ mɩ̀ tɛr a Zã, bɛ na bʋɔlɛ Markɩ a, cen nɩ. 38Ɛcɛ a Pol bɛ tɩ bɔbr k'ʋʋ lɛb tɛr nɩr, na tɩ zawrɩ bɛ bɛr Pãfili ɛ́ bɛ pʋɔ a bɛ tome pʋɔ a, ʋ bɩɛl'ʋ ɛ. 39Bɛ tɩ ŋmɛ n a nɔkpɛn faa faa tɩ bʋ́r'ɩ taa. A Banabasɩ tɩ tɛr'ɩ a Markɩ kpɛ n gbor cere Sɩɩpʋr. 40A Pol ʋl tɩ tɛr'ɩ a Sɩlasɩ, ɛ́ a yɛbr na wa zɛlɩ a Sore maalʋ kʋ̀ ʋ baar'a, ʋ cen na. 41Ʋ tɩ cɔlɛ nɩ a Siiri nɩ a Silisi ten nyuwle a Lãw-yie naaŋmɩn-sàw-deb.
Đang chọn:
Nɩ-toni 15: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
