Nɩ-toni 14
14
A Pol nɩ a Banabasɩ hiere nɩ a Yel-nʋ̃ɔ̀ a Ɩkonɩɔm
1A Ɩkonɩɔm a, a Pol nɩ a Banabasɩ mɩ́ tɩ kpɛ n a Zifʋ mɩnɛ puoru-dĩó tɩ ƴɛ̀r a ƴɛ̀rʋ vla, kɛ̀ Zifʋ yaga nɩ Gɩrɛkɩ yaga sàw de a Yeezu yele. 2Ɛcɛ a bɛlɩ Zifʋ nɛ na bɛ tɩ sàw de a Yeezu a, tɩ ɩ na a nɩ-bʋʋr-yoru tɩɛrʋ bɛ vɩɛl a yɛbr ƴãw ɛ. 3A na saa tɩ ɩ à ŋá a, a Pol nɩ a Banabasɩ tɩ kpɛ n a Ɩkonɩɔm kɔwrɩ. Bɛ bɛ tɩ bʋ́nɛ a bɛ ƴɛ̀rʋ pʋɔ ɩ. Bɛ tɩ ƴãw nɩ a bɛ tɩɛrʋ za a Sore ƴãw. A Sore mɩ́ tɩ kʋ̀ bɛ nɩ fãw bɛ maalɛ nɔ-ɓãa-yele nɩ yel-bãw-guuri, ʋʋ dɩrɛ a dãsɩɛ kɛ́ a kanʋ bɛ na kanɛ càarɛ nɩ a ʋ maalʋ a ɩ n sɩza. 4A tẽw nɩbɛ tɩ bʋ́r a: bɛ mɩnɛ tɩ tu n a Zifʋ mɩnɛ, ɛ́ ŋmaarɛ tu a nɩ-toni. 5A nɩ-bʋʋr-yoru nɩ a Zifʋ mɩnɛ, lãwnɩ a bɛ nɩ-bɛrɛ, tɩ bɔbr'a kɛ́ bɛ dɔwrɩ a Pol nɩ a Banabasɩ, ɛ́ lɔb'ɩ bɛ kʋsɛbɛ kʋ. 6A Pol nɩ a Banabasɩ na wa bãwnɩ a, bɛ zɔ na cen Likaoni lowr, Lɩsɩtɩr nɩ Dɛrbe ten nɩ a tẽ-kõkowe pʋɔ. 7A be a, bɛ mɩ̀ tɩ hiere nɩ a Yel-nʋ̃ɔ̀.
A Pol nɩ a Banabasɩ sanɩ nɩ gbɛr a Lɩsɩtɩr
8A Lɩsɩtɩr tẽw be a, nɩr kãw tɩ be n be gbɛ̀r zɩ̃. A ʋ dɔwfʋ daar za n'a ʋ tɩ ɩ a nɩ-kɔw, ɛ́ bɛ dãw cen towtow ɛ. 9Ʋ tɩ bɛrɛ na wone a Pol ƴɛ̀rʋ. A Pol tɩ jɩ́r ʋ nɩ gbẽgbẽ, ɛ́ nyɛ̃ ʋ tɛr a naaŋmɩn-sàwfʋ a na tʋ̃ɔ́ faa ʋ. 10A Pol tɩ zɛw nɩ kɔkɔr yel ʋ: «Ìr àr dẽdẽ!» Ʋ tɩ vaa na ìr cere. 11A zu-sɛbla na tɩ nyɛ̃ à à ŋá a Pol na ɩ a, bɛ tɩ yere na nɩ a Likaoni tẽw nɩbɛ ƴɛ̀rʋ: «A ŋmɩmɛ lɩɛb'a ŋmɛ̃ taa nɩ a nɩsaalbɛ, ɛ́ siw wa a tɩ zie.» 12Bɛ tɩ bʋɔlɛ nɩ a Banabasɩ Zesɩ, ɛ́ bʋɔlɛ a Pol Ɛrmɛsɩ, ʋlɛ na n'ʋ mɩ́ tɩ de a ƴɛ̀rʋ a. 13A Zesɩ puoru yir tɩ be n a tẽw dɩ̃dɔ-nʋɔr. A Zesɩ bàwr-maalɛ tɩ ƴãw na bɛ nyɔw nadɛɛ, bɛ na ƴãw tɩ-puuru pɩ̃ɛmɛ a, wa n ʋ wa wõ taa nɩ a zu-sɛbla kɛ́ bɛ maal'ɩ bàwr kʋ̀ a Pol nɩ a Banabasɩ. 14A nɩ-toni Banabasɩ nɩ Pol na wa wõ a a, bɛ taw nɩ a bɛ bʋ̃-suuri cɩɛrɩ, ɛ́ ŋmɛ cɛlsɩ zɔ cen nɩ a zu-sɛbla zie, 15tɩ yel: «Alɛ! Bá-mɩnɛ ɛ, bʋ̃ʋ n'ʋ so nyɩ ɩrɛ à à ŋá? Tɩ mɩ̀ ɩ n nɩsaalbɛ mɛ̃ a nyɩɩm a! A Yel-nʋ̃ɔ̀ tɩ na hiere kʋ̀rɛ nyɩ a, ʋlɛ n'ɩ kɛ́ nyɩ bɛr a bʋ̃-zawlɛ á ŋá ɛ́ sàw de a Naaŋmɩn na vʋʋrɛ a. Ʋlɛ n'ʋ ír a salom, a tẽw, a kʋ̃ɔ-kpɛ̃ɛ nɩ a bome za na be a pʋɔ a. 16A koro za, ʋ tɩ bɛr'ɩ a nɩ-bʋʋrɛ za bɛ tuur a bɛ sɛ́ɛ. 17Ɛcɛ ʋ tɩ cãà na wule bɛ a ʋ ɩ-vɩɛlɩ: mɩ́ kʋ̀ nyɩ a saa ɛ́ ɩ a bʋ̃-kʋ́ɔrɩ a maalɩ a daar. Ʋ mɩ́ kʋ̀ nyɩ nɩ bʋ̃-dɩrɩ ɛ́ ɩ kɛ̀ nʋ̃ɔ̀ ɩrɛ nyɩ yaga za.» 18Bɛ na saa tɩ ƴɛ̀r à à ŋá a, bɛ tɩ diw nɩ a zu-sɛbla bɛr hanɩ nɩ kɛ́ bɛ ta maalɩ bàwr kʋ̀ bɛ ɩ.
19Ɛcɛ a Ãtɩɔsɩ nɩ a Ɩkonɩɔm tẽw Zifʋ mɩnɛ tɩ wa na wa lɩɛbɩ a zu-sɛbla tɩɛrʋ, ƴãw bɛ tu bɛ, ɛ́ lɔb a Pol nɩ kʋsɛbɛ, ɛ́ nyɔw ʋ vu yi n bɛr a tẽw pʋɔ, ɛ́ tɩɛrɛ k'ʋʋ kpi na. 20Ɛcɛ a po-tuurbɛ na tɩ wa gbõ taa ŋmãa viiri koli ʋ a, ʋ tɩ lɛb'a ìr kpɛ a tẽw pʋɔ. A bio daarɩ́, ʋ tɩ tɔl'a cen Dɛrbe, ʋlɛ nɩ a Banabasɩ.
A Pol nɩ a Banabasɩ lɛb'a wa a Ãtɩɔsɩ na be Siiri a
21A Pol nɩ a Banabasɩ tɩ hier'ɩ a Yel-nʋ̃ɔ̀ a Dɛrbe, páw po-tuurbɛ yaga a be. Al pùorí, bɛ tɩ lɛb'a cen a Lɩsɩtɩr nɩ a Ɩkonɩɔm nɩ a Ãtɩɔsɩ ʋl na be a Pisidi a. 22Bɛ tɩ ɩ na a po-tuurbɛ kpɛ socie ɛ́ bɛr dɛ̃bɩ̃ɛ. Bɛ tɩ kanɛ nɩ bɛ na yere kɛ́ bɛ ƴãw fãw tɛr a naaŋmɩn-sàwfʋ kʋralɛ, bɛ mɩ̀ tɩ yere nɩ à ŋá kʋ̀rɛ bɛ: «A fɛr'a kɛ́ tɩ nyɛ̃ dɔwrʋ yaga a Naaŋmɩn Naalʋ pʋɔ kpɛb ƴãw.» 23Bɛ tɩ kaa na ír nɩ-kore a Lãw-yie been been kaafʋ ƴãw, ɛ́ bɛ na tɩ puori tɛr'ɩ mʋta-tuo wa baar'a, bɛ de nɩ a nɩbɛ bɛ ŋa, na tɩ ƴãw a bɛ tɩɛrʋ a Sore ƴãw a, kʋ̀ ʋ.
24Lɛ n'a bɛ tɩ tu tɔl a Pisidi cen Pãfili. 25Bɛ na wa manɩ a Naaŋmɩn ƴɛ̀rʋ kʋ̀ a Pɛrze tẽw dem baar'a, bɛ siw nɩ Atalɩa. 26Be n'a bɛ tɩ kpɛ a gbor cen a Ãtɩɔsɩ ʋl na be a Siiri a, a be a nɩbɛ na tɩ dãw zɛlɩ kɛ́ a Naaŋmɩn maalʋ tu bɛ, a tome á ŋá bɛ na tõ baarɩ a ƴɛrɛŋa a ƴãw a. 27Bɛ na tɩ ta a daadaalɛ a, bɛ bʋɔl'ɩ a Lãw-yir dem ɓã taa, ɛ́ manɩ a yele al za a Naaŋmɩn na tɩ lãw nɩ bɛ maalɩ a, nɩ a lɛ ʋ na yuo a ʋ sàw-deb dɩ̃dɔr kʋ̀ a nɩ-bʋʋr-yoru a. 28A Pol nɩ a Banabasɩ tɩ kpɛ n a po-tuurbɛ zie be kɔwrɩ.
Đang chọn:
Nɩ-toni 14: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
