1 Korɛ̃tɩ 11
11
1Nyɩ cɔwrɛ mɛ̃, mɛ̃ a lɛ mãa mɩŋa na cɔwrɛ a Kɩrɩta a.
A puoru zie, a pɔw, ʋ mɩ́ 'lẽ a ʋ zu pàw
2Ɩ̃ mʋʋrɛ nyɩ na nyɩ na tɛr a ɩ̃ tɩɛrʋ a yele za pʋɔ a, ɛ́ maal tuur a wulu ɩ̃ na lʋɔrɩ kʋ̀ nyɩ a. 3Ɛcɛ, ɩ̃ bɔbr'a kɛ́ nyɩ bãw a yel ŋa pɛr vla: dɛb za zu-sob'ɩ a Kɩrɩta, a pɔw zu-sob'ɩ a dɛb, ɛ́ a Kɩrɩta zu-sob'ɩ a Naaŋmɩn. 4Dɛb za na puore bɩɩ ƴɛ̀rɛ naaŋmɩn-ƴɛ̀r-manɛ ƴɛ̀rʋ ɛ́ 'lẽ a ʋ zu pàw a, ʋ bɛ ƴãwnɛ a ʋ zu-sob ɛ. 5Ɛcɛ pɔw za na puore bɩɩ ƴɛ̀rɛ naaŋmɩn-ƴɛ̀r-manɛ ƴɛ̀rʋ ɛ́ bɛ 'lẽ bom pàw a ʋ zu a, ʋ bɛ ƴãwnɛ a ʋ zu-sob ɛ, bʋ̃ʋ n'ʋ vɛ̃, a ɩ na mɛ̃ ʋ fɔr'ɩ a zu a. 6A pɔw bɛ wa 'lene fãtara a, ʋʋ ƴãw bɛ põ ʋ a zu. Ɛcɛ a zu pob bɩɩ a zu fɔrʋ wa ɩrɛ vĩ pɔw zie a, ʋ̃ʋ 'lẽ fãtara. 7Dɛb ʋl a, ʋ bɛ tɛr sɔ́r na 'lẽ a ʋ zu pàw ɛ, ʋ ɩ n a Naaŋmɩn ŋmaarʋ nɩ a ʋ yúor-vɩɛlʋ-danʋ, ɛ́ a pɔw ɩ a dɛb yúor-vɩɛlʋ-danʋ. 8Bʋ̃ʋ n'ʋ vɛ̃, dɛb bɛ n'ʋ bɛ ír a pɔw pʋɔ ɩ, pɔw n'ʋ bɛ ír a dɛb pʋɔ. 9Ɛ́ pɔw ƴãw bɛ n'a bɛ ír a dɛb ɛ, dɛb ƴãw n'a bɛ ír a pɔw. 10Alɛ so a fɛr kɛ́ a pɔw ƴãw a ʋl mɩŋa nɩ-kpɛ̃ɛnʋ bãwfʋ a ʋ zũú, a malkɩ mɩnɛ ƴãw. 11Ɛcɛ tɩɩm nɩ a Sore lãw-taa pʋɔ a, a dɛb nɩ a pɔw bɛ be za na bʋ́r taa ɩ. 12Bʋ̃ʋ n'ʋ vɛ̃, mɛ̃ a lɛ a pɔw na yi a dɛb zie a, lɛ mɩ̀ n'a a pɔw mɩ̀ dɔw a dɛb, ɛ́ a za yi a Naaŋmɩn zie#11:12 A kan-nɛ́ɛ 7 tɩ tɔ a 12 ƴãw a, nyɛ̃ Yzt 1.26-27, 2.18-23..
13Nyɩɩm tɛɛ za nyɩ jieli nyɛ̃ a: a sɛw na kɛ́ pɔw puore Naaŋmɩn ɛ́ bɛ 'lẽ a ʋ zu pàw bɩɩ? 14A yele na ɩrɛ a lɛ a bɛ tʋ̃ɔ́ wule nyɩ kɛ́ dɛb na tɛr zukɔbr wowr a, bɛ ƴãwnɛ ʋ tʋɔra ɩ, 15ɛcɛ a pɔw zie, a ɩ dɛpaalʋ ɛ? Bʋ̃ʋ n'ʋ vɛ̃, bɛ kʋ̀ ʋ nɩ a zukɔbr wowr k'aa ɩ a ʋ fãtara. 16Ɛ́ nɩr wa cãà bɔbr k'ʋʋ ŋmɩɛr nɔkpɛn a yel ŋa ƴãw a, ʋ̃ʋ bãw k'aa tɩɩm nɩ a Naaŋmɩn Lãw-yie bɛ lɛb tɛr tub a mɩnɛ kãw a puoru yele ƴãw ɛ.
Tõ-toni na bɛ sɛw taa nɩ a Sore dɩb-sõw zie a
(Mat 26:26-29, Mark 14:22-25, Luk 22:15-20)
17A yel ŋa na gã zi-been baar'a, a nyɩ kpaa-taar ƴãw a, ɩ̃ bɛ mʋʋrɛ nyɩ ɛ. Bʋ̃ʋ n'ʋ vɛ̃, a sɛw na k'aa maalɛ nyɩ, ɛcɛ a nɩ̃ɛ na sãwnɛ nyɩ bɛ dɩ vuo ɩ. 18A yel dãw-niwn sob'ɩ ŋa: bɛ yel'a kʋ̀ m kɛ́ nyɩ na mɩ́ wa ɓã taa a, ɛ́ bʋ́r-taa mɩ́ be n a nyɩ cara pʋɔ, ɩ̃ɩ tɩɛr kɛ́ à à ŋá bɛ na yel a, a mɩnɛ ɩ n yel-mɩŋa. 19Mɔ̃ mɩ̀, a sɛw na kɛ́ bʋ́r-taa be a nyɩ sɔgɔ, kɛ̀ bɛ tʋ̃ɔ́ bãw a bɛlɩ dem na sɩrɩ bɛ lɛbr pùor a nyɩ pʋɔ a. 20Nyɩ na mɩ́ wa ɓã taa a, a Sore dɩb bɛ n'ʋ nyɩ mɩ́ dɩrɛ ɩ. 21Bʋ̃ʋ n'ʋ vɛ̃, a dɩb daar na mɩ́ wa ta a, ŋa za mɩ́ màw na dɩ a ʋ dem, kɛ̀ kɔ̃ mɩ́ kpɩɛr kãw ɛ́ ƴen sob kuole. 22A ɩ lɛ nyɩ dɛ bɛ tɛr yie na mɩ́ zɩ̃ a be dɩrɛ ɛ́ nyúur bɩɩ? Bɩɩ a Naaŋmɩn Lãw-yir'ʋ nyɩ bɛ bʋɔlɛ bom, ɛ́ bɔbr kɛ́ nyɩ tʋʋr a bɛlɩ dem na bɛ tɛr bom a? Ɩ̃ pãa yel kɛ́ bʋnʋ kʋ̀ nyɩ a? Ɩ̃ mʋʋrɩ nyɩ bɩɩ? Towtow! À á ŋá ƴãw a, ɩ̃ bɛ mʋʋrɛ nyɩ ɛ.
23Bʋ̃ʋ n'ʋ vɛ̃, yel ŋa n'ʋ ɩ̃ páw a Sore zie ɛ́ mɩ̀ lʋɔrɩ kʋ̀ nyɩ: a ʋlɩ tɩ̃ɩsɔw nɛ bɛ na tɩ nyɔw a Sore Yeezu tɩr a, ʋ tɩ de nɩ dipɛ̃, 24ʋʋ na wa puori a Naaŋmɩn yãanɩ baar'a, ʋ nyɔw ʋ na ŋma ɛ́ yel: «À ŋà ɩ n a ɩ̃ ƴã-gan a nyɩ ƴãw, nyɩ maalɛ à á ŋá tɩɛrɛ nɩ a ɩ̃ yele.» 25A dɩb pùorí, ʋ mɩ̀ tɩ ɩ n a lɛ a koli-nyúura ƴãw yere nɩ: «A koli-nyúura ŋa ɩ n a Wõ-ta-paala na bin nɩ a ɩ̃ zɩ̃ɩ a, nyɩ mɩ́ maalɛ à á ŋá tɩɛrɛ nɩ a ɩ̃ yele, lɛn daar za nyɩ na mɩ́ wa nyúur a a.» 26Bʋ̃ʋ n'ʋ vɛ̃, lɛn daar za nyɩ na mɩ́ 'wɔbr a dipɛ̃ ŋa ɛ́ nyúur a koli-nyúura ŋa pʋɔ divɛ̃ a, a Sore kũu n'a nyɩ mɩ́ yere gùre nɩ a ʋ waa.
27Alɛ so, sob nɛ nãà wa 'wɔbr a Sore dipɛ̃, 'wɔbrʋ na bɛ sɛw a, ɛ́ nyúur a koli-nyúura pʋɔ divɛ̃, nyub na bɛ sɛw taa nɩ a, na ƴãw na ʋ mɩŋa ɩ sãwna sob a Sore ƴã-gan nɩ a ʋ zɩ̃ɩ ƴãw. 28A na ɩ à ŋá a, ŋa za, ʋ mɩ́ sowr'ʋ tʋɔra kaa ɛ́ bãw 'wɔb a dipɛ̃ ŋa, ɛ́ nyũ a divɛ̃ à ŋá, 29bʋ̃ʋ n'ʋ vɛ̃, sob nɛ na 'wɔbr a dipɛ̃ ɛ́ nyúur a koli-nyúura pʋɔ divɛ̃, ɛ́ bɛ tɩɛrɩ bãw k'aa Sore ƴã-gan n'ʋ a, a ʋ sob bɔbr'ɩ ƴɛ̀rʋ ƴãwnɛ ʋ tʋɔra. 30Alɛ n'a so a bàalbɛ nɩ a nɩ-kɔwr bɛ dɩ vuo a nyɩ pʋɔ ɩ, ɛ́ yaga kpi. 31Tɩmɛ mɩ́ tɩ sowri tɩ tʋɔra kaa a, bɛ kʋ̃ʋ wa tɩ maalɛ nɩ tɩ ƴɛ̀rʋ ɛ. 32Ɛcɛ a Sore mɩ́ maal'ɩ tɩ nɩ ƴɛ̀rʋ ɛ́ kpãa tɩ, kɛ́ tɩ taa wa lãwnɩ a tẽ-daa nyɛ̃ dɔwrʋ ɛ.
33A na ɩ à ŋá a, yɛbr i, nyɩmɛ mɩ́ wa ɓã taa a Sore dɩb ƴãw a, nyɩ mɩ́ zɩ̃ gù taa. 34Kɔ̃ wa kpɩɛr nɩr a, ʋ̃ʋ dɩ a ʋ yir, a nyɩ ɓã-taa ta mɩ́ ɩ a nyɩ dɔwrʋ ƴãw ɛ. Ɛ́ a yele al na cɛ a, ɩ̃ na maal'a na mãa wa ta a nyɩ zie a.
Đang chọn:
1 Korɛ̃tɩ 11: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.