Markɩ Sɛbɛ 9
9
1Ʋ lɛ yel ba na:
“Yel-mɩ̃ɛ ɩ̃ yele nyɩ, a bala na be a ka, a ŋmɛɛ na nyɛ na a mɩnɛ a Naaŋmɩn na diere a tẽw nɩ a fãw, ɩ̃ wa pãa bɩɛr kpi.”
A JEEJU NALƖ̃FƲ
(Mat 17.1-13, Lu 9.28-36)
2A lɛ a bibie ayʋɔb na tɔl baar, a *Jeeju taw na a Pɩɛr nɩ a Jakɩ nɩ a Jã, bala ba tɛw, cenʼɩ̃ a tã-kpɛ̃ɛ kãw juu. A be, ʋ nalɩ̃ na a ba nii-sɔw, 3a ʋ cẽcene lɩɛb nyɩlɛ ƴala-ƴala-ƴala ɩ̃ pɛlɩ̃ a pɛlɩ̃fʋ bar, a mɩnɛ a cẽcen-mʋɔlɔ ma be ka a tẽw na juu tʋɔrɔ mʋɔlɔ ʋ a pɛlɛɛ a lɛ wa. 4A be a Eli nɩ a Mowisi nyɩr ba, na ba ɩraa bʋrɔ nɩ a Jeeju. 5A be jie, a Pɩɛr yel a Jeeju:
“Jãjaana, a vɩɛlɛ na sɩ na be a ka. Sɩ na ƴɔ̃w na sɛɛr ata; a bõ-ƴen na ɩ na a fʋ ben, a kãw ɩ a Mowisi ben, ɩ̃ a bõ-ƴen ɩ a Eli ben.”
6A-na-ɩ a pʋlɩ̃nyɛ dãa na vʋ̃ɔ ba, ʋlɔ nɩ a ʋ tɔ deme, ꞌwaa bɔ̃w a ala na sɛw ʋ yel wa. 7Dɔ̃dɔrɩ̃ma suu na pɔw ba, ɩ̃ a ƴɛrɩ̃sɩ yi na be a dɔ̃dɔrɩ̃ma pʋɔ yele:
“A ɩ̃ Bi-nʋnaa nɩ a naa. Nyɩ́ cɛlɛ ʋ.”
8A jie naan, a Jeeju *par-tuurbe ꞌwuorʼã kolĩ nɩ a lõbobo a jaa, ma lɛ nyɛ nɩrɛ wa, a ala ma ɩ a Jeeju tɛw na be nɩ ba ʋ wa.
9A lɛ ba na yi a tãw juu suure, a Jeeju kpãkpan ba na, a ba taa wa de a ala ba na nyɛ ƴɛrɛ kʋrɔ nɩrɛ, wa tara nɩ a daar ʋlɔ a *Nɩbɛ Bie na ire a kũu pʋɔ wa. 10Ba nyɔw na a ƴɛrɩ̃ ʋlɔ tɛrɛ a ba pʋ̃ɔ, ɩ̃ sooro taa:
“A ʼir a kũu pʋɔꞌ, bõ a bʋɔrɔ a yel?” 11Ba lɛ soor ʋ na a soorfʋ na:
“Bõ ɩnɛ a *ƴɛr-kpɛn-bɔɔnbɔ ma yel á Eli sɛw na ʋ de nĩe wa?” 12Ʋ yel ba:
“Lɛ ʋ! A Eli sɩrɩ̃ na sɛw ʋ de nĩe wa, gbɛɛrɩ̃ a yele a jaa baar, ɩ̃ bõ ɩnɛ a mɩ sɛb a Naaŋmin Sɛbɛ pʋɔ áa Nɩbɛ Bie na nyɛ na won yaw a bɛlɩ̃ ʋ, ɩ̃ a ba na kpɛ ʋ na? 13Ɩ̃-cɛ ɩ̃ yele nyɩ na, a Eli wa na, ɩ̃ ba maal ʋ na a mɩnɛ ba na bʋɔrɔ tu nɩ a mɩnɛ a na sɛb a Naaŋmin Sɛbɛ pʋɔ a ʋ ɩnɛ.”
A JEEJU NA KPAAR A BIE A KƆ̃TƆN NA VƆWRƆ
(Mat 17.14-21, Lu 9.37-43)
14A lɛ ba na tara a *par-tuurbe bala na cɛ, ba nyɛ na a nɩ-yaw a ba jilĩ kolĩ ba, ɩ̃ a *ƴɛr-kpɛn-bɔɔnbɔ iraa a ba cɩɩrɛ taa. 15A mɩnɛ a nɩbɛ na nyɛ a *Jeeju, a puurĩ ba na ba jaa, a ba jɔ cen a ʋ puorfʋ jie. 16Ʋ soor ba:
“Bõ ɩ̃ wa nɩ a cɩɩrɩ̃-taa a nyɩ sɔ̃w?” 17A daba kãw iraa be a nɩbɛ sɔ̃w ɩ̃ ŋmaa yel ʋ:
“Jãjaana, a ɩ̃ bi-daba kɔ̃tɔn nɔ-mu na tɛrɛ ɩ̃ wa nɩ a fʋ sɛ̃. 18A jiir a jaa, a ala ɩ̃ wa ir ʋ, a ma ŋme ʋ na lɔb a tene, ʋ fure a natɛ-fube ꞌwɔbɔ nɩ a nyɩmɛ, ɩ̃ ma tãgarɩ̃ ʋ jaa. Ɩ̃ sʋɔr a fʋ par-tuurbe a ba diw a ʋna kɔ̃tɔn bar, ɩ̃ a baa tʋɔ wa.” 19A Jeeju yel ba:
“A nyɩna ƴɛ̃ƴɛrɩ̃ nɩbɛ na ma tɛrɛ ƴɔ̃w-nyãa wa, ɩ̃ be nɩ nyɩ wa ta nɩ dabor? Ɩ̃ dɩ nɩ nyɩ a tuo wa ta nɩ dabor? Nyɩ́ taw a bile wa nɩ ka”, 20a ba taw ʋ wa nɩ. A lɛ a kɔ̃tɔn na tɔ̃ɔ nyɛ a Jeeju, ʋ damʼã a bile nɩ kpɛ̃w lɔb a tene, a bile yʋɔrɔ fure nɩ a natɛ-fube. 21A Jeeju soor a bile sãa:
“Dabor a bom be ʋ a lɛ?”
A sãa yel ʋ:
“Wa nyɔw nɩ a ʋ bibile daar ʋ. 22A kɔ̃tɔn lɔb ʋ na gbɛɛ amɩnɛ jaa a vũumɩ nɩ a kʋ̃ɔmɩ, bʋɔrɔ ʋ kú ʋ. Ɩ̃-cɛ a ala ɩ fʋ na tʋɔ na maal bom, bɔ̃w sɩ nãw ɩ̃ wa sũo sɩ bɩlɛ.” 23A Jeeju yel ʋ:
“Bõ ɩnɛ fʋ yel, a ala ɩ fʋ na tʋɔ na? A-na-ɩ a ʋlɔ na tɛrɛ a ƴɔ̃w-nyãa tʋɔrɔ na maala a yele a jaa.” 24A be naan, a bile sãa wuurʼã yel:
“Ɩ̃ tɛrɛ na ƴɔ̃w-nyãa. Wa sũo ma a jie a ɩ̃ ƴɔ̃w-nyãa na bɔr!”
25A lɛ a Jeeju na nyɛ a nɩbɛ a ba kaal taa waara, ʋ mʋ̃ɔ na mimir ƴɔ̃w a kɔ̃tɔn bier ɩ̃ yel:
“A fʋna kɔ̃tɔn nɔ-mu nɩ kɔ̃tɔn wõw naa, maa ɩ̃ yele fʋ, yi ɩ̃ cɛ a bile na, ɩ̃ taa wa lɛ kpɛɛrɛ ʋ go wa!” 26A kɔ̃tɔn wuur ɩ̃ dam a bile nɩ kpɛ̃w ɩ̃ yi, a bile lɩɛb wɔ̃ taa nɩ kũu, a nɩbɛ bala na ɩraa a be, a ba yaw jie yele á ʋ kpi na. 27Ɩ̃ a Jeeju nyɔw ʋ a nuu ɩ̃ ɩ ʋ ir, ʋ na ʋ ir ɩraa.
28A lɛ a Jeeju na kul a yir, a ba be taa a bala tɛw nɩ a ʋ par-tuurbe, ba soor ʋ na:
“Bõ ɩnɛ saa tʋɔ diw a kɔ̃tɔn ʋlɔ bar wa?” 29A Jeeju yel ba:
“A ala ma ɩ a Naaŋmɩn sʋɔrfʋ pʋɔ tɛw ʋ wa, a kɔ̃tɔn par bʋrɔ Ra maa tʋɔ diw bar lɛ wa.”
A JEEJU LƐ BƆ̃W NA MANA A Ʋ KŨU ƳƐRƖ̃
(Mat 17.22-23, Lu 9.43-45)
30Ba yi na a jie ʋlɔ ba na dãa be, ɩ̃ na ba tɔl gãw a Galile wɩɛr, a ꞌwaa dãa bʋɔrɔ nɩrɛ ʋ bɔ̃w nɩ ba wa, 31a-na-ɩ ʋ dãa na jaana a ʋ *par-tuurbe yele nɩ ba:
“Ba na nyɔw na a *Nɩbɛ Bie ƴɔ̃w a nɩbɛ nuu pʋɔ, a ba kú ʋ, ɩ̃ ʋ na irʼã a kũu pʋɔ a bibie ata dayen.” 32A ʋ parturbe ma dãa bɔ̃w a ƴɛrɩ̃ ʋlɔ par wa, ɩ̃ baa ꞌla soor ʋ ƴɛrɩ̃ wa.
ALA Ɩ̃ Ɩ A KPƐ̃Ɛ?
(Mat 18.1-5, Lu 9.46-48)
33Ba cenʼã na ta a Kapɛɛnam; a mɩnɛ a *Jeeju na kpɛ a die pʋɔ baar, ʋ soorʼã a ʋ *par-tuurbe:
“Yɛr-bõ nyɩ dãa guoro taa be a sɔr juu?” 34A ba ŋma vʋʋrɩ̃sɩ, a-na-ɩ a be a sɔr juu, ba dãa na guoro taa, bʋɔrɔ ba bɔ̃w a ʋlɔ na ɩ a nɩ-kpɛ̃ɛ a ba sɔ̃w. 35A be jie, a Jeeju jɛ ɩ̃ bʋɔl a ʋ par-tuurbe pie-nʼayi, a ba wa ʋ yel ba:
“A ala ɩ a nɩrɛ bʋɔrɔ na ʋ ɩ a ni-diere, ʋ sɛw na ʋ ɩ a nɩbɛ ba jaa par-pɔɔrɔ nɩ a ba tʋtʋnɔ.”
36Ɩ̃ ʋ taw na bibile wa nɩ ƴɔ̃w a ba sɔ̃w, ɩ̃ na ʋ worĩ ʋ ɩ̃ yel:
37“A nɩrɛ lɛ na sɔw de a bibi-bil basɩmɛ ƴen sʋbɔ a maa ɩnɛ, a maa mɩ̃ɛ ʋ sɔw de, ɩ̃ a ʋlɔ na sɔw de ma, aa ɩ a maa tɛw ʋ sɔw de wa, ɩ̃ ʋ mɩ sɔw na de a ʋlɔ na tʋ̃ ma.”
A ƲLƆ NA Ɩ A SƖ NƖRƐ
(Lu 9.49-50)
38A Jã yelʼã a *Jeeju:
“Jãjaana, sɩ nyɛ na nɩrɛ kãw ʋ de a fʋ yuor diwre nɩ a kɔ̃tɔnsɩ, a sɩ dãa bʋɔrɔ sɩ pɩɛrɩ̃ ʋ bar, a-na-ɩ ꞌwaa be a sɩ pʋɔ wa.” 39A Jeeju yel:
“Nyɩ taa pɩɛrɛ ʋ bara wa. A-na-ɩ nɩrɛ ma tʋɔrɔ diere a ɩ̃ yuor tʋnɔ nɩ nɔ-kofʋ tʋn, ɩ̃ lɛ lɩɛbɛ a be a jie naan bʋɔlɔ a ɩ̃ yo-fãa wa. 40A-na-ɩ a nɩrɛ ʋlɔ na maa jaar a sɩ ƴɛrɩ̃ wa, sɩ nɩrɛ ʋ ɩ. 41Ɩ̃ a nɩrɛ lɛ na ꞌwɔ̃wnɔ kʋ̃ɔ kʋrɔ nyɩ a nyɩ nyuure, a-na-ɩ a *Kirisi ɩ̃ sɔ nyɩ, yel-mɩ̃ɛ ɩ̃ yele nyɩ, ʋ nɔɔ pɔw na a ʋ yar.
A TULE PƲƆ KPƐFƲ
(Mat 18.6-9, Lu 17.1-2)
42“A nɛ-kpɛ̃ɛ ba na luure yara a nɩrɛ nyɩɩmɩ ɩ̃ lɔbɔ ʋ ƴɔnɔ a man kʋ̃ɔmɩ, a na sa ʋ na, ʋ na wa maala a bibi-bil basɩmɛ na sɔw de ma ƴen sʋbɔ, ʋ kpɛɛrɛ a tule pʋɔ. 43A ala ɩ̃ ɩ a fʋ nuu ɩ na bom na maala fʋ a fʋ kpɛɛrɛ a tule pʋɔ, fú ŋmaa ʋ bar. Fʋ̃ʋ kpɛ a baafʋ pʋɔ nɩ a nu-gãw, a sa na fʋ na tɛrɛɛ a nur a jaa ayi, ɩ̃ na fʋ cere a wɛfʋ vũu pʋɔ na ma be a kpiinfʋ wa, [ 44a jie ʋlɔ a jãjule bala na vʋrɔ ba, na ma be kũu jie wa, ɩ̃ a vũu ma mɩ be kpiinfʋ wa.] 45Ɩ̃ a ala ɩ̃ ɩ a fʋ gbɛr ɩ̃ maala fʋ a fʋ kpɛɛrɛ a tule pʋɔ, fú ŋmaa ʋ bar. Fʋ̃ʋ kpɛ a baafʋ pʋɔ nɩ gbɛr gãw, a sa na fʋ na tɛrɛɛ a gbɛɛ a jaa ayi ɩ̃ na fʋ cere a wɛfʋ vũu pʋɔ, [ 46a jie ʋlɔ a jãjule bala na vʋrɔ ba, na ma be kũu jie wa, ɩ̃ a vũu ma mɩ be kpiinfʋ wa.] 47Ɩ̃ a ala ɩ̃ ɩ a fʋ mimir ɩ̃ mɩ maala fʋ a fʋ kpɛɛrɛ a tule pʋɔ, fʋ ꞌlow ʋ bar. Fʋ̃ʋ kpɛ a Naaŋmɩn fãw tẽw pʋɔ nɩ mimir gãw, a sa na fʋ na tɛrɛɛ a mimie a jaa ayi ɩ̃ cere a wɛfʋ vũu pʋɔ, 48a jie ʋlɔ a jãjule bala na vʋrɔ ba, na ma be kũu jie wa, ɩ̃ a vũu ma mɩ be kpiinfʋ wa. 49A-na-ɩ a vũu na maalʼã a nɩbɛ ba jaa a ba tɛrɛ a nasõ nũɔ.
50“A nasõ ɩ na bõ-son. Ɩ̃ a ala ɩ a ʋ nũɔ yi na, mɩnɛ fʋ na maal ʋ, ʋ lɛ bɔ̃w nʋmɔ? Nyɩ́ tɛrɛ nasõ a nyɩ pʋ̃ɔ, nyɩ́ bɔ̃w nyɔw taa bõ-ƴene-ƴene.”
Đang chọn:
Markɩ Sɛbɛ 9: BNT93
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
