Markɩ Sɛbɛ 10
10
A KUL-TAA ŊMAFƲ ƳƐRƖ̃
(Mat 19.1-12, Lu 16.18)
1A *Jeeju yi na a be ɩ̃ cen a Jude wɩɛr na ʋ tɔl gãw a
Jʋrdɛ̃ man gaan, a nɩ-yaw lɛ bɔ̃w tiw taa a ʋ sɛ̃, ʋ nyɔw ɩ̃ jaana ba a mɩnɛ ʋ na mɩlɩ̃ nɩ. 2A *Farɩsɩ nɩbɛ taw ta ʋ, bʋɔrɔ ba jʋʋr ʋ, bɔ̃w a ʋ tɛw, ɩ̃ na ba soor ʋ, á sɔr be na be a daba na diw a ʋ pɔw bar mɩɩ? 3Ʋ mɩ lɩɛb soor ba:
“Bõ a Mowisi ƴɔ̃w a nyɩ maal?” 4A ba yel:
“A Mowisi kʋ sɩ na a sɔr a sɩ na sɛb kul-taa ŋmafʋ sɛbɛ kʋ a sɩ pɔw ɩ̃ bar ʋ.” 5A be jie, a Jeeju yel ba:
“A nyɩ sube kpɛmɛfʋ ɩnɛ a Mowisi ƴɔ̃w a nyɩ maala a lɛ. 6A ala ma ɩ lɛ ʋ wa, a tẽw nyɔwfʋ daar, a Naaŋmɩn irʼã a daba nɩ a pɔw. 7Ala-ɩ̃-sɔ a daba na yi na a ʋ sãa nɩ a ʋ mã nuumɩ na ʋ mar taa nɩ a ʋ pɔw, 8a ba jaa ayi ɓã taa lɩɛb ɩ ɩ̃gan bõ-ƴen. A lɛ, baa lɛ cãa ɩ nɩbɛ ayi wa, ɩ̃gan bõ-ƴen ba lɩɛb ɩ. 9Ala-ɩ̃-sɔ, nɩrɛ ʋ taa wa ŋma a ala a Naaŋmɩn na ɓã taa wa.”
10A lɛ ba na lɩɛb kul a yir, a Jeeju *par-tuurbe lɛ sooro ʋ na a ƴɛr-bir ʋlɔ naa, 11ʋ yel ba:
“A ala ɩ̃ ɩ nɩrɛ barʼã a ʋ pɔw ɩ̃ lɛ de pɔw kpee, ʋ sãw na a kul-taa bar. 12A lɛ ʋ mɩ, a ala ɩ a pɔw barʼã a ʋ sɩrɛ ɩ̃ jɔ de dab-kpee, ʋ mɩ sãw na a kul-taa bar.”
A JEEJU NA BƲƆLƆ A Ʋ SÃA SŨOFƲ ƳƆNƆ A BIBIIR
(Mat 19.13-15, Lu 18.15-17)
13A nɩbɛ taw na a bibiir wɩɛrɛ nɩ a *Jeeju sɛ̃ a ʋ sɩɩr ba, ɩ̃ a *par-tuurbe tana ba. 14A mɩnɛ a Jeeju na nyɛ a lɛ, suur nyɔw ʋ na ʋ yel a ʋ par-tuurbe:
“Nyɩ́ bar a bibiir a ba wa a ɩ̃ sɛ̃. Nyɩ taa vara ba bara wa, a-na-ɩ a bala na wɔ̃ a bibiirʼã kaarɩ̃, bala ɩ̃ sɔ a Naaŋmɩn fãw. 15Yel-mɩ̃ɛ ɩ̃ yele nyɩ, a ʋlɔ na ma sɔw a Naaŋmɩn ʋ tɛrɛ ʋ a bibile kaarɩ̃ wa, ꞌwaa tʋɔrɔ kpɛɛrɛ be fɩ̃ɩ wa.”
16A mɩnɛ ʋ na ƴɛr a lɛ baar, ʋ de na a bibiir ƴɔ̃w a ʋ nur pʋɔ, ɩ̃ bʋɔlɔ a ʋ Sãa sũofʋ ƴɔnɔ ba, dɔɔlɔ nɩ ba a ʋ nur.
A DAB-NAABA ƳƐRƖ̃
(Mat 19.16-30, Lu 18.18-30)
17A mɩnɛ a *Jeeju na de a sɔr cere, a daba jɔ na wɩ na lo gburĩ a dume a ʋ nii-sɔw ɩ̃ soor ʋ:
“Jãjaan-son! Bõ ɩ̃ na maal wa pɔw a baa-kɔ̃-tɛw?” 18A Jeeju yel ʋ:
“Bõ ɩ̃ ɩ a fʋ bʋɔl ma a nɩ-son? Nɩ-son ma be ɩ̃ a ala ma ɩ a Naaŋmɩn tɛw ʋ wa. 19Fʋ bɔ̃w na a *Naaŋmɩn ƴɛr-kpɛn: ‘Taa wa kúrɔ nɩrɛ wa; taa wa bʋɔrɔ pɔw kpee wa; taa wa jure wa; taa wa ŋmara jir-kara ƴɔnɔ nɩrɛ wa; taa wa bɛlɛ nɩrɛ bom diere wa; jɔrɔ a fʋ sãa nɩ a fʋ mã.’ ” 20A daba yel ʋ:
“Jãjaana, ɩ̃ maalʼã a ana ƴɛr-kpɛn a jaa, a ɩ̃ bibile daar wa ta nɩ a dɩnaa.” 21A Jeeju ꞌwuor ʋ nɩ nʋfʋ, ɩ̃ yel ʋ:
“Bom bõ-ƴen cɛ fʋ na. Cen na da a fʋ yele a jaa fʋ na tɛrɛ, de a libie po a nãw deme, ɩ̃ fʋ na pɔw na a na-yele a Naaŋmɩn tẽw, ɩ̃ na fʋ wa tuure ma.” 22Ɩ̃ a lɛ a daba na wõ a ʋna ƴɛrɩ̃, ʋ sãw na nii-sɔw ɩ̃ tɩɛrɛ kule nɩ, a-na-ɩ ʋ sɩrɩ̃ na le.
23A Jeeju ꞌwuorʼã a ʋ *par-tuurbe na tiw kolĩ ʋ, ɩ̃ yel ba áa kpɛmɛ na a nɩ-leraa na kpɛɛrɛ a Naaŋmɩn fãw pʋɔ. 24A ʋ par-tuurbe nɔɛ ko ba a ʋna ƴɛrɩ̃ ɩnɛ, ɩ̃ a Jeeju lɛ yel ba:
“Ɩ̃ bibiir! A Naaŋmɩn fãw pʋɔ kpɛfʋ kpɛmɛ na ma ɩ wa. 25A yɔw na a nyʋɔmɩ na kpɛɛrɛ a mɩsɩn bɔw pʋɔ gãw a naaba na kpɛɛrɛ a Naaŋmɩn fãw pʋɔ”, 26a kpal a par-tuurbe nɔɛ a ƴɛrɩ̃ ʋlɔ ɩnɛ, a ba sooro taa:
“A ala ɩ̃ ɩ lɛ ʋ, ala ɩ̃ na tʋɔ pɔw a faafʋ?” 27A Jeeju ꞌwuor ba ɩ̃ yel:
“A gãw na a nɩbɛ tʋɔfʋ; ɩ̃-cɛ aa gãw a Naaŋmɩn tʋɔfʋ wa, a-na-ɩ a Naaŋmɩn tʋɔ na a yele a jaa.”
28A Pɩɛr yel ʋ:
“ꞌWuor nyɛ a sɩmɩ, sɩ barʼã a yele a jaa ɩ̃ tuure fʋ.” 29A Jeeju yel ʋ:
“Yel-mɩ̃ɛ ɩ̃ yele nyɩ, a ala ɩ̃ ɩ a nɩrɛ barʼã a ʋ yir, mɩɩ a ʋ yɛɛr, nɩ a ʋ yɛ-pɔɔbɔ, nɩ a ʋ mã, nɩ a ʋ sãa, nɩ a ʋ bibiir, nɩ a ʋ por a maa ɩnɛ nɩ a ƴɛr-son ɩnɛ, 30ʋ na pɔw na a dɔɔlaa gbɛɛ kʋbaa, a daarʼã pʋɔ sɩ na be a ƴɛ̃ƴɛrɩ̃; ʋ na pɔw na a yie, nɩ a yɛɛr, nɩ a yɛ-pɔɔbɔ, nɩ a mã nʋmɔ, nɩ a bibiir, nɩ a por, ɓã taa nɩ a hʋɔlfʋ mɩ. Ɩ̃ a daar ʋlɔ na be a puo-sɔw waara, ʋ na pɔw na a baa-kɔ̃-tɛw. 31Ɩ̃ a yaw jie na ɩ a ni-dierbe nɔɔ ɩ na a par-pɔɔrbɔ, ɩ̃ a bala na ɩ a par-pɔɔrbɔ nɔɔ lɩɛbʼã ɩ a ni-dierbe.”
A JEEJU ƳƐR-BAARAA A Ʋ KŨU ƖNƐ
(Mat 20.17-19, Lu 18.31-34)
32Ba be na a sɔr juu cere a Jerujalɛm, a *Jeeju de nĩe a ba tuure. A nɔɛ ko a ʋ *par-tuurbe, ɩ̃ a dãbɩ̃ɛ nyɔw a bala na dãa bɩɛrɛ tuure ba. A Jeeju lɛ bɔ̃w kpaarɩ̃ a ʋ par-tuurbe pie-nʼayi a ʋ pulẽe, ɩ̃ nyɔw ɩ̃ mana ba a ala na wa tara ʋ. 33Ʋ yele ba na:
“Nyɩ́ nyɛ, sɩ cere na a Jerujalɛm. A be, ba na nyɔw na a *Nɩbɛ Bie ƴɔ̃w a *baar-lo-nɩ-bɛrɛ nɩ a *ƴɛr-kpɛn-bɔɔnbɔ nuu pʋɔ. Ba na ƴɔ̃w ʋ na a yel ɩ̃ de ʋ kʋ a nɩ-bʋlsɩ 34a ba la ʋ pʋʋrʼɩ̃ a natɛɛr ƴɔ̃w ʋ, ɩ̃ fɔbʼɩ̃ ʋ a kpaara, ɩ̃ cɛ ʋ, na ba kú. Ɩ̃ a bibie ata dayen ʋ na irʼã a kũu pʋɔ.”
ALA NA Ɩ A KPƐ̃Ɛ?
(Mat 20.20-28)
35A Jebede bi-dabsɩ Jakɩ nɩ a Jã wɩ na a *Jeeju sɛ̃ na yel ʋ:
“Jãjaana! Bom be na be sɩ na bʋɔrɔ sɩ sʋɔr fʋ a fʋ maal kʋ sɩ.” 36A Jeeju soor ba:
“Bõ nyɩ bʋɔrɔ ɩ̃ maal kʋ nyɩ?” 37A ba yel ʋ:
“Sɩ bʋɔrɔ na á fʋ̃ʋ wa jɛ a naa-dakɔw juu a fʋ yo-yifʋ daar, a sɩmɩ ayi, bõ-ƴen ʋ jɛ a fʋ dʋrɩ̃ loor ɩ̃ a kãw mɩ jɛ a fʋ gʋbaa loor.” 38A Jeeju yel ba:
“Nyaa bɔ̃w a ala nyɩ na sʋɔrɔ wa. Nyɩ na tʋɔ na nyu nɩ a ŋman tuo ʋlɔ ɩ̃ nɔɔ nyuure nɩ, mɩɩ nyɩ na mɩ tʋɔ na kpɛ a tuo dɩfʋ pʋɔ ɩ̃ nɔɔ kpɛɛrɛ a kʋ̃ɔ mʋrfʋ kaarɩ̃?” 39A ba yel ʋ:
“Sɩ na tʋɔ na.”
A Jeeju yel ba:
“Nyɩ na sɩrɩ̃ na nyu nɩ a ŋman ʋlɔ ɩ̃ nɔɔ nyuure nɩ, ɩ̃ mɩ mʋrɔ a kʋ̃ɔ mʋrfʋ ʋlɔ ɩ̃ nɔɔ mʋrɔ, 40ɩ̃-cɛ, a ɩ̃ dʋrɩ̃ loor jɛfʋ, nɩ a ɩ̃ gʋbaa loor jɛfʋ, aa ɩ a ɩ̃ jie a ala yire wa, ɩ̃ a na ɩ na a bala ɩnɛ a Naaŋmɩn na dãa gbɛɛrɩ̃.”
41A mɩnɛ a *par-tuurbe pie na wõ a ʋna ƴɛrɩ̃, ba nyɛ na suur ƴɔ̃w a Jakɩ nɩ a Jã. 42A Jeeju bʋɔl ba a ba wɩ, ʋ yel ba:
“Nyɩ bɔ̃w ka a bala ba na bʋɔlɔ a jamansɩ a tẽ-bʋrɔ bʋrɔ pʋʋr ma fɛrɛ na a ba nɩbɛ, ɩ̃ a ten nɩ-bɛrɛ ma fule ba na. 43Aa ɩ lɛ a be a nyɩ jie wa. A ʋlɔ na bʋɔrɔ ʋ ɩ a kpɛ̃ɛ a nyɩ sɔ̃w, ú ɛ̃ɛ ɩ a nyɩ tʋ̃tʋnɔ, 44ɩ̃ a ʋlɔ na bʋɔrɔ ʋ ɩ a ni-diere a nyɩ sɔ̃w, ú ɩ a nyɩ jaa gbãgbaa. 45A-na-ɩ a *Nɩbɛ Bie mɩ̃ɛ ma wa a nɩbɛ na tʋnɔ kʋrɔ ʋ wa, ɩ̃ ʋ wa na tʋnɔ kʋrɔ a nɩbɛ, ɩ̃ na ʋ tɩɩr a ʋ baafʋ tɛw nɩ a nɩ-yaw baafʋ.”
A JƆ̃W MIMIE A JEEJU NA YUO
(Mat 20.29-34, Lu 18.35-43)
46A *Jeeju ta na a Jeriko, ɩ̃ a lɛ ʋ na yire a ʋna tẽw pʋɔ nɩ a ʋ *par-tuurbe nɩ a nɩ-yaw, a jɔ̃w ba na bʋɔlɔ Batime (a lɛ yelʼã, a Time bie ʋ) jɛ na be a sɔr nʋɔr sʋɔrɔ a yele. 47A mɩnɛ ʋ na wõ áa Najarɛtɩ Jeeju ɩ̃ waara, ʋ nyɔw na ɩ̃ wuure:
“*Davɩtɩ Bie Jeeju yaa, bɔ̃w ma nãw!” 48Ɩ a nɩbɛ yaw jie tana ʋ na a ʋ sine; ʋ pãa lɛ bɔ̃w nyɩrɩ̃ wuurʼɩ̃ kpɛ̃w:
“Davɩtɩ Bie, bɔ̃w ma nãw!” 49A Jeeju ɩraa ɩ̃ yel:
“Nyɩ́ bʋɔl ʋ,” a ba bʋɔl a jɔ̃w ɩ̃ yel ʋ:
“Ɓãa suur ɩ̃ ir. Ʋ bʋɔlɔ fʋ na,” 50ʋ lɔb a ʋ cẽcen bar ɩ̃ aw ir wɩɛrɛ a Jeeju sɛ̃, 51a Jeeju soor ʋ:
“Bõ fʋ bʋɔrɔ ɩ̃ maal fʋ?” A jɔ̃w yel ʋ:
“Jãjaana! Maal ma ɩ̃ lɛ nyɛrɛ.” 52A Jeeju yel ʋ:
“Cere. A fʋ ƴɔ̃w-nyãa faa fʋ na.”
A jie naan ʋ lɛ nyɛrɛ na, na ʋ pɔw a Jeeju cere nɩ.
Đang chọn:
Markɩ Sɛbɛ 10: BNT93
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
