Markɩ Sɛbɛ 8
8
A BUR-BIE ANUU-NʼAYI A NƖBƐ TURE ANAAN NA ꞌWƆB
(Mat 15.32-39)
1A bibie ala pʋɔ, nɩ-yaw lɛ bɔ̃w na kpaarɩ̃ taa a *Jeeju sɛ̃ go, ɩ̃ a bom ma dãa be be a ba dɩrɛ wa, a Jeeju bʋɔl a ʋ *par-tuurbe ɩ̃ yel ba:
2“Nãw nyɔw ma na a nɩbɛ basɩmɛ ɩnɛ, a-na-ɩ bibie ata nɩ a dɩnaa ba na maal a ka a ɩ̃ sɛ̃, ɩ̃ a dɩb ma cãa be a ba dɩrɛ wa. 3Maa wɛl ba bar a ba kule nɩ a kɔ̃ a lɛ, ba na faa na lo a sɔr juu, a-na-ɩ a ŋmɛɛ a ba sɔ̃w yi na nɩdaa.” 4A ʋ par-tuurbe soor ʋ:
“Nyɩnɛ nɩrɛ na pɔw a buru ka a wɛkarʼãa pʋɔ, kʋ a nɩ-yaw basɩmɛ a ba wa ꞌwɔb pi?” 5A Jeeju lɛ soor ba:
“Bur-bie amɩnɛ nyɩ tɛrɛ?”
A ba yel ʋ:
“Anuu-nʼayi ʋ.”
6A lɛ, a Jeeju ɩ na a nɩbɛ a ba jɛ, ɩ̃ ʋ de a bur-bie anuu-nʼayi puor a Naaŋmɩn ƴɔ̃w, ɩ̃ nyɔw ŋma ŋma kʋ a ʋ par-tuurbe a ba de po a nɩbɛ, a ba de po ba. 7Ba mɩ dãa na tɛrɛ jɩ̃-bie fɩ̃ɩ, ʋ puor a Naaŋmɩn ƴɔ̃w, ɩ̃ yel a ʋ par-tuurbe a ba mɩ de po a nɩbɛ, 8a ba ꞌwɔb pi ɩ̃ cãa cɛ bõ-ŋmara a ba woor sɛɛr pɩɩr anuu-nʼayi. 9A bala na ꞌwɔb a buru ala tara na nɩbɛ ture anaan. A ala ɩ̃ baar, a Jeeju pãa na wɛl ba bar, 10ɩ̃ kpɛ a gbor pʋɔ, ʋlɔ nɩ a ʋ par-tuurbe, cere a Damanuta wɩɛr.
A FARƖSƖ NƖBƐ NA BƲƆRƆ BÕ-MIILAA
(Mat 16.1-4)
11A *Farɩsɩ nɩbɛ ta na ɩ̃ nyɔw nɩ a *Jeeju a cɩɩrɩ̃fʋ, bʋɔrɔ ba jʋʋr ʋ bɔ̃w a ʋ tɛw. Ba sʋɔr ʋ na a ʋ maal bom miilʼɩ̃ ba, a ba bɔ̃w ka a ʋ fãw yi na a Naaŋmɩn jie. 12A Jeeju hʋʋn a ʋ suur pʋɔ ɩ̃ yel:
“Bõ ɩ̃ tɛrɛ a dɩnaa nɩbɛ a ba bʋɔrɔ bõ-miilaa? Yel-mɩ̃ɛ ɩ̃ yele nyɩ: bõ-miilaa ma be na maal a ba nyɛ wa”, 13ɩ̃ na ʋ bar ba a be, ɩ̃ lɛ kpɛ a gbor pʋɔ gãwna a man gaan.
A BƐLƖ̃FƲ NA WƆ̃ A TABƖR KAARƖ̃
(Mat 16.5-12)
14A *Jeeju *par-tuurbe dãa na hiin a bõ-dɩraa defʋ. Bur-bir bõ-ƴen tɛw ba dãa tɛrɛ a be a gbor pʋɔ. 15A Jeeju kpãkpan ba yel ba:
“Nyɩ́ bɔ̃w yuo mimie ɩ̃ tɛrɛ nyɩ mɩ̃ɛ a *Farɩsɩ nɩbɛ nɩ a *Ɛrɔdɩ tabɩr ɩnɛ.” 16A ʋ par-tuurbe lɩɛb yele taa a ba nɩ̃ɛ:
“A buru sɩ na ma tɛrɛ wa, ala ɩnɛ ʋ ƴɛrɛ a lɛ.” 17A Jeeju bɔ̃wnaa ɩ̃ soor ba:
“Bõ ɩnɛ nyɩ ƴɛrɛ taa áa buru nyɩ na ma tɛrɛ ʋ wa? Mɩnɛ! Nyaa bɔ̃w a par sɛr wa? Aa caarɩ̃ nyɩ sɛr wa? A yɛ̃ ɓɔr nyɩ na mɩɩ? 18-19Mɩnɛ nyɩ tɛrɛ a mimie ɩ̃ ma nyɛrɛ wa? Nɩ a tobo ɩ̃ ma wono wa? Nyaa lɛ cãa bɔ̃w nɩ a daar ʋlɔ ɩ̃ na de a bur-bie anuu ŋma ŋma kʋ a dabsɩ ture anuu wa? Pɩɩr amɩnɛ nyɩ woor a bõ-ŋmara sɛɛr?”
A ba yel ʋ:
“Pɩɩr pie-nʼayi ʋ.”
20“Ɩ̃ a daar ʋlɔ ɩ̃ na ŋma ŋma a bur-bie anuu-nʼayi kʋ a nɩbɛ ture anaan, pɩɩr amɩnɛ nyɩ woor a bõ-ŋmara sɛɛr?”
A ba yel ʋ:
“Pɩɩr anuu-nʼayi ʋ.” 21A Jeeju yel a ʋ par-tuurbe:
“Lɛ ʋ, ɩ̃ a nyaa cãa bɔ̃w a par sɛr wa?”
A JƆ̃W MIMIE A JEEJU NA YUO
22Ba ta na a Bɛsada-tẽw pʋɔ a ba wɩ nɩ jɔ̃w a *Jeeju sɛ̃, ɩ̃ sʋɔrɔ ʋ a ʋ sɩɩr ʋ. 23A Jeeju nyɔw na a jɔ̃w nuu taw ʋ yi nɩ a tẽw pʋɔ, ɩ̃ pʋʋr a natɛɛr ƴɔ̃w ʋ a mimie pʋɔ. A ala ɩ̃ baar, ʋ dɔɔl ʋ na a nur ɩ̃ soor ʋ, á ʋ nyɛ na bom mɩɩ? 24A jɔ̃w caarɩ̃ a mimie ɩ̃ yel:
“Ɩ̃ nyɛ na nɩbɛ, ɩ̃-cɛ tɩɩr kaarɩ̃ ba wɔ̃, ɩ̃ cere.”
25A Jeeju lɛ bɔ̃w sɩɩr ʋ a mimie, ɩ̃ a mɩnɛ a jɔ̃w na ꞌwuor a kir-kir-kir, a mimie yuo ʋ na, ʋ nyɛ a yele a jaa gbelẽgbelẽ. 26A Jeeju ƴɔ̃w a ʋ kul a ʋ yir, ɩ̃ yel ʋ á ʋ taa kpɛɛrɛ a tẽw pʋɔ wa.
A PƖƐR NA BƆ̃W A JEEJU Ʋ Ɩ A KIRISI
(Mat 16.13-20, Lu 9.18-21)
27A *Jeeju cenʼɩ̃ na a ʋ *par-tuurbe a tẽ-bil ala na be a
Fɩlɩpɩ-Sejare wɩɛr pʋɔ. A mɩnɛ ba na de a sɔr cere, ʋ sooro na a ʋ par-tuurbe:
“Ala ʋlɔ a nɩbɛ ma de ma ɩ̃ ɩ?” 28A ba yel ʋ:
“A ŋmɛɛ ma yelʼã á Jã-Batii fʋ ɩ, a ŋmɛɛ ma lɛ yel, á Eli fʋ ɩ, a ŋmɛɛ go, á ƴɛr-hiere ƴen sʋbɔ fʋ ɩ.” 29A Jeeju soor ba:
“Ɩ̃ a nyɩmɩ, ala ʋlɔ tɔr nyɩ de ma ɩ̃ ɩ?”
A Pɩɛr yel ʋ:
“Fʋ ɩ na a *Kirisi.” 30A be jie, a Jeeju bɔ̃w kpãkpan ba ɩ̃ yel a ba taa wa diere a ʋ yel, na ƴɛrɛ kʋrɔ nɩrɛ wa.
A JEEJU DÃDÃW ƳƐRƖ̃ A Ʋ KŨU ƖNƐ
(Mat 16.21-28, Lu 9.22-27)
31A ala ɩ̃ baar, a *Jeeju nyɔw na ɩ̃ jaana a ʋ *par-tuurbe áa sɛw na a *Nɩbɛ Bie na nyɛ a won yaw a bɛlɩ̃, áa ni-dierbe nɩ a *baar-lo-nɩ-bɛrɛ nɩ a *ƴɛr-kpɛn-bɔɔnbɔ na jɛ ʋ na bar, á ba na kú ʋ na, ɩ̃ a lɛ a bibie ata na tɔl baar á ʋ na irʼã a kũu pʋɔ.
32Cãa pʋɔ ʋ dãa mana ba a ƴɛrɩ̃ ʋlɔ a lɛ. A be juumɩ, a Pɩɛr bʋɔl ʋ, yi nɩ cɛ̃cɛ̃w, nyɔw ʋ fule. 33A Jeeju ŋmelɩ̃ ꞌwuor a ʋ par-tuurbe, ɩ̃ tan a Pɩɛr ɩ̃ yel ʋ:
“Taw yi ka a ɩ̃ nii-sɔw Satã! A-na-ɩ faa tɩɛrɛ a Naaŋmɩn kaarɩ̃ wa, ɩ̃-cɛ nɩrɛ kaarɩ̃ fʋ tɩɛrɛ.”
34A Jeeju bʋɔlʼã a nɩbɛ nɩ a ʋ par-tuurbe a ba wɩ a ʋ jie ʋ yel ba:
“A ala ɩ nɩrɛ bʋɔrɔ na ʋ tuure ma, ú jɛ a ʋ mɩ̃ɛ bar, ɩ̃ na ʋ tuo a ʋ nɩ-kʋ-daa tuure nɩ ma. 35A nɩrɛ lɛ na bʋɔrɔ ʋ faa a ʋ mɩ̃ɛ, a ʋ baafʋ na bɔrʼã; ɩ̃ a nɩrɛ lɛ na bara a ʋ baafʋ ʋ bɔrɔ a ɩ̃ ɩnɛ nɩ a Naaŋmɩn ƴɛr-son ɩnɛ, a ʋ baafʋ na cɩ̃ɛ na. 36Ɩ̃ a ala ɩ a nɩrɛ pɔw na a tẽw na yele a jaa, ɩ̃-cɛ a ʋ baafʋ sãw, bõ a na kʋ ʋ? 37Bõ a nɩrɛ na tʋɔ de tɛw nɩ a ʋ baafʋ? 38A-na-ɩ a nɩrɛ lɛ na jɔ a vĩ a maa nɩ a ɩ̃ ƴɛrɩ̃sɩ a dɩnaa nɩbɛ sɔ̃w na bar a Naaŋmɩn ɩ̃ maala a burbur, a Nɩbɛ Bie na mɩ jɔ na a vĩ a ʋ ɩnɛ, a lɛdaar ʋ nɔɔ waara a ʋ Sãa yo-yifʋ pʋɔ, nɩ a ʋ sɩ-tʋnɩsɩ na ɩ a cɛcɛ.”
Đang chọn:
Markɩ Sɛbɛ 8: BNT93
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
