Markɩ Sɛbɛ 15
15
A JEEJU A PƖLATƖ NII-SƆW
(Mat 27.1-2,11-14, Lu 23.1-5, Jã 18.28-38)
1A dʋ̃ꞌwʋlɩ̃ ɓaaraa pipi, a *baar-lo-nɩ-bɛrɛ nɩ a ni-dierbe nɩ a *ƴɛr-kpɛn-bɔɔnbɔ, nɩ a *ƴɛr-guor-nɩ-bɛrɛ ba jaa duo na ɩ̃ mana taa. A ala ɩ̃ baar, ba ƴɔ̃w na a ba lũ a *Jeeju cenʼɩ̃ na kʋ a *Pɩlatɩ. 2A Pɩlatɩ soor ʋ:
“Fʋ̃ʋ ɩ̃ ɩ a Jufisɩ jamana?” A Jeeju yel ʋ:
“A lɛ fʋ yel.”
3A baar-lo-nɩ-bɛrɛ ƴɛrɛ na ƴɛr-faar yaw dɔɔlɔ a ʋ juu, 4ala-ɩ̃-sɔ a Pɩlatɩ lɛ bɔ̃w soor ʋ:
“Faa ƴɛrɛ ƴɛrɩ̃ wa? Fʋ wõ na a ƴɛr-faar ala ba na dɔɔlɔ a fʋ juu!” 5Ɩ̃ a Jeeju ma lɛ ƴɛr ƴɛrɩ̃ fɩ̃ɩ wa, a ko a Pɩlatɩ nʋɔr.
A JEEJU BA NA ƳƆ̃W A KŨU ƳƐRĨ
(Mat 27.15-26, Lu 23.13-25, Jã 18.39—19.16)
6A *Pakɩ fɛtɩ daar, a *Pɩlatɩ ma barʼã a kasu nɩrɛ ʋlɔ a nɩbɛ na ma sʋɔr ʋ. 7Daba dãa na be be a kasu pʋɔ ɩ̃ dɩ Barabasɩ. Ba lũ na a ʋlɔ nɩ a ʋ tɔ deme ƴɔ̃w a kasu pʋɔ a-na-ɩ ba kú na nɩrɛ a lɛdaar ba na ir jɛbɛ nɩ a fãgã deme. 8A nɩbɛ cenʼã a Pɩlatɩ sɛ̃ na ba nyɔw ɩ̃ sʋɔrɔ ʋ a ʋ maal ba a ala ʋ na ma dãa maala ba. 9A Pɩlatɩ soor ba:
“Nyɩ bʋɔrɔ na ɩ̃ bar a Jufisɩ jamana kʋ nyɩ mɩɩ?”
10A-na-ɩ ʋ bɔ̃w ka nyube be na a *baar-lo-nɩ-bɛrɛ jie, ala-ɩ̃-sɔ a ba nyɔw a *Jeeju wɩ nɩ a ʋ sɛ̃. 11Ɩ̃-cɛ a baar-lo-nɩ-bɛrɛ tɔ na a nɩbɛ ƴɔ̃w a ba sʋɔr a Pɩlatɩ a ʋ ɛ̃ɛ bar a Barabasɩ kʋ ba, 12a Pɩlatɩ lɛ soor ba:
“A ala ɩ̃ ɩ a lɛ ʋ, bõ nyɩ bʋɔrɔ ɩ̃ ɩ nɩ a ʋlɔ nyɩ na bʋɔlɔ a Jufisɩ jamana?” 13A ba wuur ɩ̃ yel ʋ:
“Kpa ʋ yaal a nɩ-kʋ-daa juu!” 14A Pɩlatɩ soor ba:
“Mɩnɛ? Fãa buor ʋ maal?”
A ba lɛ bɔ̃w wuurʼɩ̃ kpɛ̃w:
“Kpa ʋ yaal a nɩ-kʋ-daa juu!”
15A Pɩlatɩ bʋɔrɔ na ʋ maal a nʋmɔ a nɩbɛ bala, ala-ɩ̃-sɔ ʋ bar a Barabasɩ kʋ ba, ɩ̃ ɩ a sɔdaalsɩ a ba fɔb a Jeeju, ɩ̃ cɛ cenʼɩ̃ a nɩ-kʋ-daa juu a kpafʋ jie.
A JEEJU A SƆDAALSƖ NA KPƐRƐ
(Mat 27.27-31, Jã 19.2-3)
16A sɔdaalsɩ taw na a *Jeeju cen na kpɛ nɩ a gbalɩ̃ pʋɔ, a lɛ yelʼã áa jamana yir ba cenʼɩ̃ ʋ, ɩ̃ na ba bʋɔl a ba sɔdaal-taar ba jaa. 17Ba su na a Jeeju a kpar-jɩ̃ɛw, ɩ̃ vilĩ gʋʋr sapi kpa ʋ a juumɩ, 18ɩ̃ nyɔw ɩ̃ puoro ʋ yele nɩ:
“Jufisɩ jamana yaa! Sɩ puor fʋ na.” 19Ɩ̃ na ba ŋmeere ʋ a juu nɩ a pã-bir ɩ̃ pʋʋrɔ a natɛɛr ƴɔnɔ ʋ, ɩ̃ loro gbure a dume a ʋ nii-sɔw. 20A lɛ ba na la la ʋ baar, ba yaa na a kpar-jɩ̃ɛw, ɩ̃ lɛ su ʋ a ʋ mɩ̃ɛ cẽcene. A ala ɩ̃ baar ba pãa na taw ʋ yi cenʼɩ̃ a nɩ-kʋ-daa juu a kpafʋ jie.
A JEEJU BA NA KPA YAAL A NƖ-KƲ-DAA JUU
(Mat 27.32-44, Lu 23.26-43, Jã 19.17-27)
21A Sɩɩrɛn-tẽw nɩrɛ kãw na dɩ Sɩmɔ̃, na ɩ a Alɛsãdɩrɛ nɩ a Urufusi sãa, tɔlʼã cen a puo pʋɔ, ɩ̃ waara, a sɔdaalsɩ fɛr ʋ ƴɔ̃wʋ de a *Jeeju nɩ-kʋ-daa tuo. 22Ba taw na a Jeeju cenʼɩ̃ a jie ʋlɔ ba na bʋɔlɔ a Gɔlgɔta, a lɛ yelʼã a “Ju-ŋman jie”. 23A be, ba dãa na bʋɔrɔ ba kʋ ʋ a dɩvɛ̃ ba na nyakarɩ̃ nɩ a tɩ̃ɩ ba na bʋɔlɔ *mɩɩr, ɩ̃ a Jeeju ma sɔw nyu wa. 24Ba kpa ʋ na yaal a nɩ-kʋ-daa juu, ɩ̃ de a ʋ cẽcene po. Gbãbie ba dãa lɔbɔ bɔ̃wnɔ nɩ a bala na diere a cẽcene. 25A dʋ̃ꞌwʋlɩ̃ ɓaaraa, a lɛ a mɔtɔ̃w na cãa pur duoro, lɛdaar ba kpa ʋ yaal a nɩ-kʋ-daa juu. 26Ba sɛbʼã sɛbɛ yaal a ʋ ju-sɔ̃w, na miile a ʋ ꞌlaarfʋ par. Nyɛ a mɩnɛ ba na sɛb: A Jufisɩ jamana ʋ. 27Ba mɩ kpa na nyanyube ayi a nɩ-kʋ-dar jur a Jeeju lõbobo pʋɔ, bõ-ƴen a ʋ dʋrɩ̃ loor, a kãw a ʋ gʋbaa loor. [ 28A maalʼã a lɛ tuure nɩ a mɩnɛ a na sɛb a Naaŋmɩn Sɛbɛ pʋɔ: “Ba sɔr ʋ na ƴɔ̃w a nɩ-faar pʋɔ.”]
29A sɔ-tɔlbɔ gɔɔrɔ na a jur, tʋrɔ nɩ ʋ yele:
“A fʋ̃ʋ na bʋɔrɔ fʋ wɛl a Naaŋmɩn puor-yir kpɛ̃ɛ, ɩ̃ lɛ mɛ a bõ-kpee a bibie ata pʋɔ! 30Fáa a fʋ mɩ̃ɛ, suu a nɩ-kʋ-daa juu.”
31A lɛ naan, a *baar-lo-nɩ-bɛrɛ nɩ a *ƴɛr-kpɛn-bɔɔnbɔ mɩ kpɛrɛ ʋ, na ba yele nɩ taa:
“Ʋ fãa na a nɩŋmɛɛ, ɩ̃ ma lɛ tʋɔrɔ faara a ʋ mɩ̃ɛ wa. 32A fʋ̃ʋ *Kirisi, na ɩ a *Ɩsɩrayɛl jamana! Suu a nɩ-kʋ-daa juu a ƴɛ̃ƴɛrɩ̃, a sɩ na nyɛ ɩ̃ sɔw de fʋ.”
A bala ba na lãa kpa yaalʼɩ̃ a Jeeju mɩ tʋrɔ ʋ na.
A JEEJU KŨU
(Mat 27.45-56, Lu 23.44-49, Jã 19.28-30)
33A mɔtɔ̃-tuo daar, a wɩɛr liw na pɔw a jiir a jaa, lɛɛ wa ta nɩ a mɔtɔ̃w gɔrfʋ daar. 34Ɩ̃ a mɔtɔ̃w gɔrfʋ daar, a *Jeeju wuurʼã nɩ kpɛ̃w:
“Elo! Elo! Lama sabatanɩ?” A lɛ yelʼã: “Ɩ̃ Naaŋmɩn! ĩ Naaŋmɩn! Bõ ɩ a fʋ jaar ma bar?”
35A nɩbɛ nɩŋmɛɛ na ɩraa a be wonaa na, ɩ̃ na ba yel:
“Nyɩ́ cɛlɛ! A ƴɛr-hiere Eli ʋ bʋɔlɔ.” 36A ƴen sʋbɔ a ba pʋɔ jɔ na cen na ɓĩ a tabi-ꞌlʋɔrɔ nɩ a bom *mɩɩrʋ̃, kurʼɩ̃ a ɓɛ̃ɓɛmɛ tur a Jeeju a ʋ nyu, ɩ̃ yel:
“Nyɩ́ ɩraa lɛ, a sɩ je kãa ala ɩ a Eli na wa na yaw ʋ a nɩ-kʋ-daa juu suu nɩ.”
37Ɩ̃ a Jeeju wuurʼã nɩ kpɛ̃w, ɩ̃ ŋmaa a vʋʋrʋ̃.
38A Naaŋmɩn puor-yir kpɛ̃ɛ cẽcen ɓerʼã ayi, a saꞌlon wa ta nɩ a tene. 39A Orom sɔdaal-nɩ-kpɛ̃ɛ na dãa ɩraa a Jeeju nii-sɔw, nyɛ na a mɩnɛ ʋ na kpi, ɩ̃ yel:
“Sɩrɛ jaa! A daba na dãa na sɩrɩ̃ ɩ a Naaŋmɩn Bie.”
40A pɔɔbɔ ŋmɛɛ mɩ dãa na be be ɩraa a nɩdaa ɩ̃ ꞌwuoro. A bana pɔɔbɔ sɔ̃w, a Madala Maarɩɩ be na be, nɩ a Maarɩɩ ʋlɔ na ɩ a Jakɩ bile nɩ a Jojɛsɩ mã, nɩ a Salome. 41Ba dãa na tuure a Jeeju a lɛdaar ʋ na be a Galile, na ba sũono ʋ. A pɔɔ-yaw ŋmɛɛ mɩ be na be na dãa pɔw ʋ do nɩ a Jerujalɛm.
A JEEJU BA NA ŨU
(Mat 27.57-61, Lu 23.50-56, Jã 19.38-42)
42A jaanʋɔr ta na na ɩ a gbɛɛrɩ̃fʋ bibir. A lɛ yelʼã, áa *bibi-ciiraa walfʋ dayen. 43A Jojɛfʋ, na ɩ a Arimate-tẽw nɩrɛ ta na. Ʋ be na a Jufisɩ *ƴɛr-guor-nɩ-bɛrɛ sɔ̃w a ba ƴɔnɔ ʋ, ɩ̃ ʋ mɩ dãa cɛlɛ a Naaŋmɩn fãw waa. Ʋ nyɔw na nyãa ɩ̃ cen a *Pɩlatɩ sɛ̃, na ʋ sʋɔr a kũu. 44A nʋɔr ko na a Pɩlatɩ a mɩnɛ a *Jeeju na kpi a lɛ a fɔfɔw, ʋ bʋɔl a sɔdaal-nɩ-kpɛ̃ɛ, na ʋ soor ʋ áa kamʼã a Jeeju na kpi mɩɩ? 45A lɛ a sɔdaal-nɩ-kpɛ̃ɛ na miil ʋ ʋ bɔ̃w a par, ʋ kʋ na a Jojɛfʋ sɔr ʋ de a Jeeju. 46A Jojɛfʋ da na cẽcen, cenʼɩ̃ na yaw nɩ a kũu a nɩ-kʋ-daa juu suu nɩ, ɩ̃ de a cẽcen vilĩ pɔw ʋ, cenʼɩ̃ ũu a yaa kãw pʋɔ ba na kpu a kubir pʋɔ, ɩ̃ bilĩ a kubir kpɛ̃ɛ pɔw a yaa nʋɔr. 47A Madala Maarɩɩ nɩ a Maarɩɩ ʋlɔ na ɩ a Jojɛsɩ mã, ꞌwuoro na a jie ʋlɔ ba na uune ʋ.
Đang chọn:
Markɩ Sɛbɛ 15: BNT93
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
