Markɩ Sɛbɛ 14
14
A JUFISƖ NƖ-BƐRƐ NA MANA TAA A JEEJU NYƆWFƲ ƖNƐ
(Mat 26.1-5, Lu 22.1-2, Jã 11.45-53)
1A Pakɩ nɩ a Bur-Pʋɔr Fɛtɩ dãa na cɛ bibie ayi. A *baar-lo-nɩ-bɛrɛ nɩ a *ƴɛr-kpɛn-bɔɔnbɔ bʋɔrɔ na a mɩnɛ ba na ɩrɛ ɩ̃ sɔɔlɔ nyɔwrɔ a *Jeeju kúrɔ. 2A-na-ɩ ba dãa na yele taa:
“A taa ɩ a fɛtɩ daar wa. A ala ma ɩ lɛ ʋ wa, a nɩbɛ na irʼã dama a tẽw.”
A PƆW NA KPAAR A KÃA ƳƆ̃W A JEEJU
(Mat 26.6-13, Jã 12.1-8)
3A mɩnɛ a *Jeeju na be a Betani, a Sɩmɔ̃ ʋlɔ na ɩ a kɔ̃w yir, na ʋ jɛ a dɩb par, pɔw kãw wɩ nɩ na a kã-nyu-vɩlaa na ma kpɛmɛ a dafʋ ɩɛ wa, ba na bʋɔlɔ a *naar na sɛw a kubir yole, na ʋ ŋme a yole puo ɩ̃ kpaar a kãa ƴɔnɔ a Jeeju juumɩ. 4A nɩbɛ bala na be a be, a ŋmɛɛ nyɛ na suur ɩ̃ yele taa:
“Bõ ɩ a ba de a kãa sãw bar a lɛ? 5A-na-ɩ ʋ naa tʋɔ na de a ʋna kã-nyu-vɩlaa da war ture lɩjaata nɩ dɔɔlaa, ɩ̃ de a libie kʋ a nãw deme,” ɩ̃ na ba vavire a jur ƴɔnɔ a pɔw. 6Ɩ̃-cɛ a Jeeju yel:
“Nyɩ́ bar ʋ. Bõ ɩnɛ nyɩ dama ʋ a lɛ? Ʋ maalʼã vɩlaa a ɩ̃ jie. 7A-na-ɩ nyɩ lãa na be taa nɩ a nãw deme a daar a jaa, ɩ̃ nyɩ na tʋɔ na maal ba a vɩlaa a daar lɛ nyɩ na bʋɔrɔ, ɩ̃-cɛ a maa, maa beree a nyɩ sɔ̃w a daar a jaa wa. 8A pɔw naa maalʼã a ala ʋ na dãa tʋɔrɔ maala. Ʋ gɔrʼã jɛ ma a kãa gbɛɛrɩ̃ a ɩ̃ ɩ̃gan a ũufʋ ɩnɛ. 9Yel-mɩ̃ɛ ɩ̃ yele nyɩ, a lɛ ba nɔɔ mana a ƴɛr-son naa a jiir a jaa, ba nɔɔ mɩ manʼã a ala a pɔw na na maal, a ba kɔ̃ wa hiin ʋ wa.”
A JUDASƖ BƲƆRƆ NA A JEEJU JUU DEFƲ
(Mat 26.14-16, Lu 22.3-6)
10A Judasɩ Isikaryɔtɩ na ɩ a *Jeeju *par-tuurbe pie-nʼayi ƴen sʋbɔ cenʼã a *baar-lo-nɩ-bɛrɛ sɛ̃ a Jeeju juu defʋ. 11A mɩnɛ ba na wõ a lɛ, a nʋmɔ ba na a ba pʋlɩ̃ yel a ba na kʋ ʋ na libie, ʋ nyɔw ɩ̃ bʋɔrɔ a mɩnɛ ʋ na ɩrɛ ɩ̃ ƴɔnɔ ʋ a ba nuumɩ.
A JEEJU NA LÃA DƖRƐ NƖ A Ʋ PAR-TUURBE A FƐTƖ DƖB
(Mat 26.17-25, Lu 22.7-14,21-23, Jã 13.21-30)
12A *Bur-Pʋɔr fɛtɩ bibir dãdãw, a mɩnɛ ba na kúrɔ a Pakɩ peli, a *Jeeju *par-tuurbe soor ʋ na:
“Nyɩnɛ jie fʋ bʋɔrɔ sɩ cen na gbɛɛrɩ̃ fʋ a *Pakɩ fɛtɩ dɩb?” 13Ʋ tʋ na a ʋ par-tuurbe ayi ɩ̃ yel ba:
“Nyɩ́ cen a tẽw pʋɔ; nyɩ na tuorʼɩ̃ na daba kãw na tuo kʋ̃ɔ nɩ yuor. Nyɩ́ tuure ʋ, 14ɩ̃ a jie ʋlɔ ʋ na wa kpɛɛrɛ, nyɩ́ yel a yir sʋbɔ: A jãjaana yelʼã a sɩ soor fʋ á nyɩnɛ a die be, áa jie ʋlɔ ʋ na dɩrɛ a Pakɩ Fɛtɩ dɩb nɩ a ʋ par-tuurbe. 15Ʋ na miil nyɩ na bɔɔpɩɛn die ba na bɔ̃w gbɛɛrɩ̃ vɩlaa. A be nyɩ na maal a dɩb a sɩ ɩnɛ.”
16A ʋ par-tuurbe bala cenʼã a tẽw pʋɔ na ba nyɛ a yele a be a mɩnɛ ʋ na dãa yel ba, ɩ̃ na ba maal a Pakɩ fɛtɩ dɩb.
17A jaanʋɔr, a Jeeju nɩ a ʋ par-tuurbe pie-nʼayi ta na a be. 18Ɩ̃ a mɩnɛ ba na jɛ dɩrɛ a dɩb, a Jeeju yel ba na:
“Yel-mɩ̃ɛ ɩ̃ yele nyɩ, a nyɩmɩ na dɩrɛ nɩ ma a dɩb, bõ-ƴen be na a nyɩ sɔ̃w nɔɔ diere ma a juu.” 19A sube sãw na a ʋ par-tuurbe a ba nyɔw ɩ̃ sooro ʋ bõ-ƴene-ƴene:
“Maa ʋ mɩɩ?” 20Ʋ yel ba:
“A nɩrɛ ʋlɔ be na a nyɩmɩ pie-nʼayi sɔ̃w, a ʋlɔ na tune ɓara nɩ ma a laa pʋɔ. 21A *Nɩbɛ Bie na kpi na tu nɩ a mɩnɛ a na dãa sɛb a Naaŋmin Sɛbɛ pʋɔ a ʋ ɩnɛ. Ɩ̃-cɛ nabier na pɔw na a ʋna nɩrɛ na diere a Nɩbɛ Bie juu. A nɩrɛ ʋlɔ, a bala ma dãa dɔw ʋ wa, a naa sa ʋ na.”
A NƖ-KPƐ̃Ɛ DƖB
(Mat 26.26-30, Lu 22.15-20, 1 Kɔr 11.23-25)
22A lɛ ba na cãa be a dɩb juu, a *Jeeju de na a buru puor a Naaŋmɩn ƴɔ̃w, ɩ̃ kʋ a ʋ *par-tuurbe ɩ̃ yel ba:
“Nyɩ́ de ꞌwɔb. A naa ɩ̃ ɩ a ɩ̃ ɩ̃gan.” 23A lɛ ʋ mɩ de a dɩvɛ̃ nɩ a ŋman puor a Naaŋmɩn ƴɔ̃w, ɩ̃ de kʋ ba a ba nyu ba jaa. 24A Jeeju yel ba:
“A naa ɩ̃ ɩ a ɩ̃ jɩ̃ɩ, a jɩ̃ɩ ala nɔɔ cire cɔɔrɔ a *pʋlɩ̃-taa a Naaŋmɩn na pʋlɩ̃ nɩ a nɩ-yaw. 25Yel-mɩ̃ɛ ɩ̃ yele nyɩ, maa be na lɛ nyu a dɩvɛ̃ wa tara nɩ a bibir ʋlɔ ɩ̃ nɔɔ nyuure a dɩvɛ̃ paalaa a Naaŋmɩn fãw pʋɔ wa.” 26Ɩ̃ a lɛ ba na cɛ a puorfʋ fɛtɩ yele baar, ba yi na cen a *Olivi-tɩɩr tãw juu.
A JEEJU NA MANA A MƖNƐ A PƖƐR NƆƆ CƖƖRƐ Ʋ
(Mat 26.31-35, Lu 22.31-34, Jã 13.36-38)
27A *Jeeju yelʼã a ʋ *par-tuurbe:
“Nyɩ na bɩlʼã faa nyɩ jaa ɩ̃ jɔ ɩ̃ cɛ ma, a-na-ɩ a sɛbʼã a Naaŋmɩn Sɛbɛ pʋɔ: ‘Ɩ̃ na ŋme na a dɔ-cɩɩnaa kú, ɩ̃ a piir jɔ yaarɩ̃.’ 28Ɩ̃-cɛ a maa wa ir a kũu pʋɔ, ɩ̃ na de nyɩ na nĩe cen na gu nyɩ a Galile.”
29A Pɩɛr yel ʋ:
“A ala saarɩ̃ ɩ a ba jaa na bɩlʼã faa ɩ̃ jɔ, a maa, maa be na jɔ wa!”
30A Jeeju yel ʋ:
“Yel-mɩ̃ɛ ɩ̃ yele fʋ, a dɩnaa tɩsɔw naa, a nɔraa kɔ̃ kõ gbɛɛ ayi sɛr wa, ɩ̃ fʋ na gɔrʼã cɩɩrɩ̃ gbɛɛ ata á faa bɔ̃w ma wa.” 31A Pɩɛr lɛ bɔ̃w yelʼɩ̃ kpɛ̃w:
“A ala saarɩ̃ ɩ a sɛw na ɩ̃ na lãa kpi nɩ fʋ, aa be ɩ̃ na cɩɩrɩ̃ fʋ wa.” Ɩ̃ a par-tuurbe ba jaa mɩ yel a lɛ.
A JEEJU NA BE A JESEMANE NAKƲƆ PƲƆ
(Mat 26.36-46, Lu 22.39-46)
32Ba cenʼã na ta a jie ʋlɔ ba na bʋɔlɔ a Jesemane, ʋ yel a ʋ *par-tuurbe:
“Nyɩ́ jɛ a ka, ɩ̃ ɩ̃ cen na sʋɔr a Naaŋmɩn.” 33Ɩ̃ na ʋ tɛrɛ a Pɩɛr nɩ a Jakɩ nɩ a Jã cenʼɩ̃ a nii-sɔw, a pʋlɩ̃nyɛ nyɔw ɩ̃ vʋ̃ɔnɔ ʋ, lãa nyɩrɩ̃ dama nɩ ʋ a tɩɛrɩ̃sɩ, 34ʋ yel ba:
“Ni-sɔbaa nyɩrɩ̃ na kpɛ ma wɔ̃ taa nɩ ɩ̃ na kpi na. Nyɩ́ ɩraa a ka; nyɩ taa wa gure wa.” 35Ɩ̃ na ʋ taw jãa fɩ̃ɩ, ɩ̃ kpa pɔw a nii-sɔw a tene, ɩ̃ sʋɔr a Naaŋmɩn, a ala ɩ a na tʋɔ na, ú ɩ a won ʋlɔ ʋ tɔl, ɩ̃ cɛ ʋ bar. 36Ʋ yelʼã:
“Ɩ̃ Sãa, fʋ tʋɔ na a yele a jaa. Ɩ a tuo ŋman na ʋ na jãa nɩ ma, ɩ̃ a taa ɩ a mɩnɛ ɩ̃ na bʋɔrɔ wa, ɩ̃-cɛ a ɩ a mɩnɛ fʋ na bʋɔrɔ.” 37Ʋ lɩɛbʼã wa a ʋ par-tuurbe ata jie, na ʋ nyɛ ba a ba gure, ʋ yel a Pɩɛr:
“Sɩmɔ̃, fʋ gure na? Faa tʋɔ jɛ nɩ mimir lɛɛr-bõ-ƴen wa? 38Nyɩ taa gure wa. Nyɩ́ sʋɔrɔ a Naaŋmɩn, kɔ̃ wa kpɛ a bɩɩrfʋ pʋɔ wa. A nɩrɛ sɩɛ bʋɔrɔ na a son maalfʋ, ɩ̃-cɛ a ɩ̃gan balʼã.” 39Ɩ̃ na ʋ lɛ cen ɩ̃ sʋɔr a Naaŋmɩn, na ʋ lɛ bɔ̃w ƴɛr a ƴɛrɩ̃ ʋlɔ naa. 40Ʋ lɛ lɩɛbʼã wa a ba jie, na ʋ nyɛ ba a ba gur, a-na-ɩ a gʋ̃ɔ dãa na nyɩrɩ̃ tɛrɛ ba; a baa dãa bɔ̃w a ala ba na yele ʋ wa. 41Ʋ lɛ lɩɛbʼã wa a gbɛɛ ata ɩnɛ na ʋ yel ba:
“Nyɩ cãa na be tɔ a gʋ̃ɔ pʋɔ? A baarʼã! A daar ta na. Nyɩ́ nyɛ! Ba na nyɔw na a *Nɩbɛ Bie ƴɔ̃w a maal-faar deme nuumɩ. 42Nyɩ́ ir a sɩ cen! A ʋlɔ na diere ma a juu tara na ka.”
A JEEJU NYƆWFƲ
(Mat 26.47-56, Lu 22.47-53, Jã 18.3-12)
43A lɛ a *Jeeju na cãa ƴɛrɛ, a Judasɩ na ɩ a ʋ *par-tuurbe pie-nʼayi ƴen sʋbɔ ta na a be, ɩ̃ lãa be nɩ nɩbɛ na tɛrɛ bãjɩnsɩ nɩ gʋdɛɛ, a *baar-lo-nɩ-bɛrɛ nɩ a *ƴɛr-kpɛn-bɔɔnbɔ nɩ a ni-dierbe na tʋ̃. 44A ʋlɔ na diere a Jeeju a juu dãa na miil a nɩbɛ bala a jɩmɛ ʋlɔ ba na bɔ̃wnɔ nɩ a Jeeju. Ʋ yelʼã: “A ʋlɔ ɩ nɔɔ worĩ, ʋlɔ ʋ. Nyɩ́ nyɔw ʋ na nyɩ bɔ̃w tɛrɛ ʋ cenʼɩ̃.” 45A lɛ a Judasɩ na tɔ̃ɔ cãa ta, ʋ taw na gbʋr a Jeeju, ɩ̃ yel ʋ:
“Jãjaana!” ɩ̃ na ʋ worĩ ʋ, 46a nɩbɛ bala ta nyɔw ʋ. 47Ɩ̃-cɛ a nɩrɛ kãw na be a be vʋ̃ɔ na a ʋ bãjɩnɛ cɛ nɩ a *baar-lo-nɩ-kpɛ̃ɛ tʋ̃tʋnɔ toor ŋmaa bar. 48A Jeeju lɩɛb yel a nɩbɛ:
“Nyanyuur ɩ̃ ɩ a nyɩ wa nɩ a bãjɩnsɩ nɩ a gʋdɛɛ na nyɔwrɔ nɩ ma mɩɩ? 49A bibie a jaa ɩ̃ ma dãa na be be a Naaŋmɩn puor-yir kpɛ̃ɛ pʋɔ mana nyɩ a Naaŋmɩn ƴɛrɩ̃, ɩ̃ nyaa dãa nyɔw ma wa. Ɩ̃-cɛ a ala ta na a na ɩ a mɩnɛ a Naaŋmɩn ƴɛrɩ̃ na dãa yel.” 50A ʋ par-tuurbe ba jaa bar ʋ a be ɩ̃ jɔ.
51Polbile kãw dãa na tuure ʋ ɩ̃ vaar gãw tɛw, a ba nyɔw ʋ, 52ʋ mɩr a gãw bar ɩ̃ jɔ nɩ ɩ̃gan ɓãɓuol.
A JEEJU NA BE A JUFISƖ NƖ-BƐRƐ NII-SƆW
(Mat 26.57-68, Lu 22.54-55,63-71, Jã 18.13-14,19-24)
53Ba taw na a *Jeeju cenʼɩ̃ a *baar-lo-nɩ-kpɛ̃ɛ jie. A be a *baar-lo-nɩ-bɛrɛ nɩ a Jufisɩ ni-dierbe nɩ a *ƴɛr-kpɛn-bɔɔnbɔ ba jaa na kpaarɩ̃ taa. 54A Pɩɛr bɩɛrʼã tu a Jeeju na ʋ cen na ta kpɛ a baar-lo-nɩ-kpɛ̃ɛ yir gbalɩ̃ pʋɔ, na ʋ lãa jɛ nɩ a tʋ̃tʋnbɔ ꞌwuoro a vũu.
55A baar-lo-nɩ-bɛrɛ nɩ a *ƴɛr-guor-nɩ-bɛrɛ ba jaa bʋɔrɔ na ƴɛrɩ̃ ba na dɔɔlɔ a Jeeju juu, ɩ̃ tʋɔrɔ nyɛrɛ a sɔr kúrɔ ʋ, ɩ̃ ba bɔ na faa. 56A-na-ɩ a nɩ-yaw dãa na ŋmara a jir-kara ƴɔnɔ ʋ, ɩ̃ a ba ƴɛrɩ̃sɩ ma dãa tuure taa wa. 57A nɩbɛ ŋmɛɛ pãa ir ŋma jir-kara ƴɔ̃w a Jeeju, na ba yel:
58“Sɩ wõ na ʋ yel á ʋ na wɛlʼã a Naaŋmɩn puor-yir kpɛ̃ɛ na bar a nɩbɛ na mɛ, ɩ̃ a bibie ata sɔ̃w, ʋ na lɛ mɛ na bõ-kpee a nɩrɛ na ma maal wa.” 59Ba saarɩ̃ na yele a lɛ, ɩ̃ a ba ƴɛrɩ̃sɩ ma dãa tuure taa wa. 60A baar-lo-nɩ-kpɛ̃ɛ pãa ir ɩraa a nɩbɛ ba jaa nii-sɔw ɩ̃ soor a Jeeju:
“Faa yele bom wa? Bõ ƴɛrɩ̃ a nɩbɛ basɩmɛ dɔɔlɔ fʋ a lɛ?” 61Ɩ̃ a Jeeju sine. ꞌWaa haa nʋɔr ƴɛr ƴɛrɩ̃ fɩ̃ɩ wa. A baar-lo-nɩ-kpɛ̃ɛ lɛ bɔ̃w soor ʋ:
“Fʋ̃ʋ ɩ a *Kirisi na ɩ a Naaŋmɩn ʋlɔ sɩ na puoro Bi-daba?” 62A Jeeju yel:
“Ɔɔ, maa ʋ. Nyɩ nɔɔ nyɛ na a *Nɩbɛ Bie ʋ jɛ a Fãw Sʋbɔ dʋrɩ̃ loor, ɩ̃ nyɩ nɔɔ mɩ nyɛ ʋ na ʋ be a dɔ̃dɔrɩ̃sɩ pʋɔ waara.” 63A ala ɩnɛ, a baar-lo-nɩ-kpɛ̃ɛ ɓer a ʋ cẽcene#14.63 Cẽcen ɓerfʋ: A *Ɩsɩrayɛl nɩbɛ jie a korĩ-cɛ, a ala ĩ wa ɩ a nabier ta ba na, a ni-sɔbaa, mɩɩ a won, ba ma ɓerʼã a ba cẽcen ba na su miilʼɩ̃ a ba su-sãwfʋ. bar ɩ̃ yel:
“Bõ ɩnɛ sɩ lɛ cãa bʋɔrɔ ƴɛr-manba go? 64Nyɩ wõ na a mɩnɛ ʋ na sãw a Naaŋmɩn yuor. Mɩnɛ nyɩ tɩɛrɛ?” A ba jaa yel á ʋ sɛw na na kpi.
65A bana nɩbɛ ŋmɛɛ nyɔw ɩ̃ pʋʋrɔ a natɛɛr ƴɔnɔ ʋ, ɩ̃ pɔw ʋ a nii-sɔw, tʋɔrɔ tʋɔrɔ nɩ ʋ a nu-gbule yele nɩ ʋ:
“Bɔ̃w a bala na ŋme fʋ,” ɩ̃ cɛ ʋ kʋ a parsãdiele a ba ɓa ɓa ʋ.
A PƖƐR CƖƖRƖ̃ NA A ꞌWAA BƆ̃W A JEEJU WA
(Mat 26.69-75, Lu 22.56-62, Jã 18.15-18,25-27)
66A lɛ a Pɩɛr na dãa cãa be a pulẽe a gbalɩ̃ pʋɔ, a *baar-lo-nɩ-kpɛ̃ɛ tʋ̃tʋ-poole kãw ta na nyɛ ʋ na ꞌwuoro a vũu, 67ɩ̃ ꞌwuor ʋ bɔ̃w ɩ̃ yel ʋ:
“A fʋ̃ʋ, fʋ mɩ dãa na lãa be nɩ a ʋna Najarɛtɩ *Jeeju.” 68A Pɩɛr cɩɩrɩ̃ ɩ̃ yel:
“Maa bɔ̃w a tɛw wa. Maa bɔ̃w a ala fʋ na bʋɔrɔ fʋ yel wa,” ɩ̃ na ʋ cen yi a yẽw a dɔ̃dɔr nʋɔr par, a nɔraa kokolĩ. 69A tʋtʋ̃-poole nyɛ ʋ, ɩ̃ lɛ bɔ̃w mana kʋrɔ a nɩbɛ bala na ɩraa a be yele nɩ:
“A daba na ɩ na a ba tɔ sʋbɔ,” 70a Pɩɛr lɛ bɔ̃w cɩɩrɩ̃. A ɩ na fɩ̃ɩ, a nɩbɛ bala na be a be yel ʋ:
“Yel-mɩ̃ɛ ʋ, fʋ sɩrɩ̃ na ɩ a ba tɔ sʋbɔ, a-na-ɩ fʋ ɩ na a Galile nɩrɛ.” 71A Pɩɛr nyɔw ɩ̃ pɔrɔ ƴɔnɔ a ʋ mɩ̃ɛ bʋɔlɔ nɩ a Naaŋmɩn yuor yele nɩ:
“Maa bɔ̃w a daba ʋlɔ nyɩ na yele wa.” 72A jie naan, a nɔraa lɛ tu na kõ a ɩ gbɛɛ ayi, a Pɩɛr tɩɛr bɔ̃w nɩ a ala a Jeeju na dãa yel ʋ: “A nɔraa kɔ̃ kõ gbɛɛ ayi sɛr wa, ɩ̃ fʋ na gɔrʼã cɩɩrɩ̃ gbɛɛ ata a faa bɔ̃w ma wa.” A Pɩɛr tɔ̃ɔ cɛ a kuon.
Đang chọn:
Markɩ Sɛbɛ 14: BNT93
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
