Markɩ Sɛbɛ 12
12
A TƲ̃TƲ̃-FAAR NA ꞌWUORO A DƖVƐ̃-TƖƖR PUO
(Mat 21.33-46, Lu 20.9-19)
1A *Jeeju de na a sʋkpar lɔbɔ kʋrɔ ba, na ʋ yele:
“Daba kãw sɛlʼã dɩvɛ̃-tɩɩr a ʋ puo pʋɔ, ɩ̃ wɔw kolĩ. Ʋ mɩ lãa na tuu nɩ a tɩɩr ala wɔmɔ nɛbfʋ jie, mɛ nɩ a yel-gure jaajie, ɩ̃ pãa de kʋ a po-ꞌwuorbo ɩ̃ yɔ cen a jie. 2A lɛ a tɩ-wɔmɔ daar na ta, ʋ tʋ̃ na a ʋ tʋ̃tʋnɔ a po-ꞌwuorbo bala jie, a ʋ cen a ba kʋ ʋ a dɩvɛ̃-tɩɩr wɔmɔ ala na ɩ a ʋ ben, ʋ wa nɩ, 3ɩ̃-cɛ a ba nyɔw ʋ fɔb, ɩ̃ cɛ ʋ bar ʋ kulʼɩ̃ nu-jaala. 4Ʋ lɛ tʋ̃ a ʋ tʋ̃tʋnɔ ƴen-sʋbɔ, ɩ̃ a ʋlɔ mɩ, ba nar ʋ na a juu puo, ɩ̃ tʋ tʋ ʋ. 5Ʋ lɛ tʋ̃ na tʋ̃tʋnɔ ƴen-sʋbɔ a ba jie go. A ʋlɔ ʋlɔ, ba kú ʋ na. Lɛ ba mɩ maal a tʋ̃tʋnbɔ yaw jie. Ba pɔbʼã a nɩŋmɛɛ ɩ̃ kú a nɩŋmɛɛ. 6A bõ-ƴen cãa na be a ʋ jie na ɩ a ʋ bi-nʋnaa. Ʋ baarʼã tʋ̃ ʋ a ba jie ɩ̃ yel: ‘Ba na jɔ na a ɩ̃ bie ʋlɔ.’ 7Ɩ̃-cɛ a po-ꞌwuorbo yele na taa: ‘Nyɛ! A naa ɩ̃ ɩ a gã-diere. Nyɩ́ ɩ a sɩ kú ʋ bar, ɩ̃ de a gãw.’ 8Ba nyɔw na a ʋ bie kú lɔb bar a puo cɛ̃cɛ̃w.”
9A Jeeju soorʼã:
“Bõ a dɩvɛ̃-tɩɩr nɩ-kpɛ̃ɛ na pãa maal? Ʋ na wa na na kú a po-ꞌwuorbo bala bar, ɩ̃ de a puo kʋ nɩ-kpeesɩ. 10Nyaa dãa ꞌwuor a ƴɛr-birʼãa a Naaŋmin Sɛbɛ pʋɔ wa?
‘A kubir ʋlɔ a dacin-mɩɛrbɛ na dãa jaar bar,
lɛ lɩɛbʼã ɩ a kubir ʋlɔ ba na de
ƴɔ̃w a dacin gbɛr pʋɔ.
11A Nɩ-kpɛ̃ɛ ɩ̃ maal a lɛ,
a sɩ na nyɛ a nyɩrɩ̃ vɩɛlɛ.’ ”
12A mɩnɛ a Jufisɩ nɩ-bɛrɛ na bɔ̃w ka bala a Jeeju lɔbɔ nɩ a sʋkpa, ba bʋɔrɔ na sɔr a ʋ nyɔwfʋ. Ɩ̃-cɛ ba dãa na jɔ a nɩbɛ a dãbɩ̃ɛ, ɩ̃ bar ʋ ɩ̃ cen.
A OROM JAMAN-KPƐ̃Ɛ LÃPO ƳƐRƖ̃
(Mat 22.15-22, Lu 20.20-26)
13Ba tʋ̃ na a *Farɩsɩ nɩbɛ ŋmɛɛ nɩ a jamana *Ɛrɔdɩ nɩbɛ banʋmɔ a *Jeeju sɛ̃, a ba gu ʋ nyɔw a ʋ nʋɔr ƴɛrɩ̃sɩ pʋɔ. 14A ba cen na yel ʋ:
“Jãjaana, sɩ bɔ̃w ka yel-mɩ̃ɛ sʋbɔ fʋ ɩ. Faa ꞌwuoro a nɩbɛ kpee kpee wa, a-na-ɩ fʋ maa ꞌwuor a ala a nɩrɛ na ɩ wa, ɩ̃-cɛ fʋ ma jaana na a nɩbɛ a Naaŋmɩn sɔr a yel-mɩ̃ɛ pʋɔ. Sɔr be na be a sɩ na ya a lãpo kʋ a Orom jaman-kpɛ̃ɛ mɩɩ sɔr ma be be wa? Sɩ sɛw na sɩ ma ya, mɩɩ sɩ taa ma ya wa?” 15Ɩ̃ a Jeeju bɔ̃w nɩ ba a poe ayi ba na tɛrɛ, ɩ̃ yel:
“Bõ ɩnɛ nyɩ bɩɩrɛ ma a lɛ? Nyɩ́ wa nɩ libi-kur kʋ ma ɩ̃ je kãa.” 16Ba wa nɩ na kʋ ʋ, ʋ lɩɛb soorʼɩ̃ ba:
“Ala nii-sɔw nɩ ala yuor ɩ̃ be tɔ?” A ba yel ʋ:
“A Orom jaman-kpɛ̃ɛ ʋ.” 17A be jie, a Jeeju yel ba:
“Nyɩ lɩɛb kʋ a Orom jaman-kpɛ̃ɛ a ala na ɩ a Orom jaman-kpɛ̃ɛ ben, ɩ̃ mɩ kʋ a Naaŋmɩn a ala na ɩ a Naaŋmɩn ben.” A nɔɛ ko ba a ʋ ɩnɛ.
A KŨU-PƲƆ-IRFƲ ƳƐRƖ̃
(Mat 22.23-33, Lu 20.27-40)
18A Saduse bala na yel áa kũu-pʋɔ-irfʋ ma be be wa, a ba ŋmɛɛ wa na a *Jeeju sɛ̃, ɩ̃ soor ʋ:
19“Jãjaana, a Mowisi sɛbʼã a ʋ sɛbɛ pʋɔ yel sɩ, a ala ɩ a nɩrɛ kãw yɛbɛ wa kpi na ɩ̃ cɛ a ʋ pɔw bar a ꞌwaa tɛrɛ bibiir wa, áa ʋ yɛbɛ ú de a pɔw dɔw a bibiir a ʋ yɛbɛ ʋlɔ yuor ɩnɛ. 20Yɛɛr anuu-nʼayi dãa na be be, a ba kpɛ̃ɛ kulʼã pɔw ma dɔw bie wa ɩ̃ kpi, 21a ʋ tuuraa de a kpɩ̃ɩ-pɔw ma mɩ dɔw bie wa ɩ̃ kpi. A lɛ a mɩ wɔ̃ nɩ a ata sʋbɔ. 22A yɛɛr anuu-nʼayi bala ba jaa ma tʋɔ dɔw bie a ba yɛbɛ yuor ɩnɛ wa. Ba kpi na ba jaa, ɩ̃ a pɔw wa pãa bɩɛr kpi. 23A kũusɩ irfʋ daar, bala wa ir a kũu pʋɔ, buor sʋbɔ ɩ̃ na sɔ a pɔw? A-na-ɩ a ba jaa anuu-nʼayi dãa na kul ʋ.”
24A Jeeju yel ba:
“Nyɩ bɔrʼã. Bõ ɩnɛ? A-na-ɩ nyaa bɔ̃w a Naaŋmin Sɛbɛ ƴɛrɩ̃sɩ par nɩ a Naaŋmɩn tʋɔfʋ wa. 25A lɛdaar ba na ire a kũu pʋɔ, a dabsɩ nɩ a pɔɔbɔ ma lɛ kule taa wa, ɩ̃-cɛ ba na wɔ̃ na a saa juu sɩ-tʋnɩsɩ kaarɩ̃. 26A ala ɩ̃ ɩ a kũusɩ irfʋ ʋ, nyaa ꞌwuor a Mowisi sɛbɛ pʋɔ a jie ʋlɔ na mana a Tɩ-bile a vũu na ꞌlere ƴɛrɩ̃, a mɩnɛ a Naaŋmɩn na yel a Mowisi wa? ‘Maa ɩ̃ ɩ a Abʋraham nɩ a Ɩjakɩ nɩ a Jakɔb Naaŋmɩn.’ 27ꞌWaa ɩ kũusɩ Naaŋmɩn wa, nɩ-mimie Naaŋmɩn ʋ ɩ. Nyɩ tɩɩ na nyɩrɩ̃ bɔr.”
A ƳƐR-KPƐ̃W ƲLƆ NA Ɩ A KPƐ̃Ɛ
(Mat 22.34-40, Lu 10.25-28)
28A *ƴɛr-kpɛn-bɔ̃wnɔ kãw dãa na wõ a mɩnɛ ba na cɩɩrɛ taa, ɩ̃ mɩ nyɛ a mɩnɛ a *Jeeju na tɩɩr a sɔwfʋ nɩ yɛ̃, ɩ̃ na ʋ taw ta ʋ ɩ̃ soor
“A ƴɛr-kpɛn a jaa pʋɔ, buor ɩ̃ ɩ a bõ-kpɛ̃ɛ?” 29A Jeeju yel:
“A ʋlɔ na ɩ a kpɛ̃ɛ ɩ na: ‘*Ɩsɩrayɛl nɩbɛ, nyɩ́ cɛlɛ! A Nɩ-kpɛ̃ɛ na ɩ a sɩ Naaŋmɩn, ʋlɔ ʋ yẽ tɛw ɩ̃ ɩ a Nɩ-kpɛ̃ɛ. 30Nʋnɔ a Nɩ-kpɛ̃ɛ na ɩ a fʋ Naaŋmɩn nɩ a fʋ suur ʋ jaa, nɩ a fʋ pʋɔ ʋ jaa, nɩ a fʋ tɩɛrʋ̃ ʋ jaa, nɩ a fʋ fãgã ʋ jaa.’ 31Nyɛ a ʋlɔ na tuure: ‘Nʋnɔ a fʋ tɔ sʋbɔ a fʋ mɩ̃ɛ kaarɩ̃.’ Ƴɛr-kpɛ̃w ma be be na lɛ gãw a ƴɛr-kpɛn asɩmɛ wa.”
32A ƴɛr-kpɛn-bɔ̃wnɔ yel ʋ:
“Jãjaana, a vɩɛlɛ na. Yel-mɩ̃ɛ fʋ yel áa Naaŋmɩn ɩ na bõ-ƴen tẽtẽ, á Naaŋmɩn kpee ma be ɩ̃ a ala ma ɩ a ʋlɔ tɛw ʋ wa. 33A Naaŋmɩn fʋ na nʋnɔ nɩ a fʋ suur ʋ jaa, nɩ a fʋ tɩɛrʋ̃ ʋ jaa, nɩ a fʋ fãgã ʋ jaa, nɩ a fʋ tɔ sʋbɔ fʋ na nunɔ a fʋ mɩ̃ɛ kaarɩ̃, a ala gãw na a dʋn ba jaa fʋ na ma kú lo nɩ a baar, kʋ a Naaŋmɩn, ɩ̃ su a vũu a dɩ, nɩ a baar-lo-yele a jaa.”
34A Jeeju nyɛ̃ na a mɩnɛ ʋ na ƴɛrʼɩ̃ a kpaarfʋ ɩ̃ yel ʋ á ꞌwaa jãa nɩ a Naaŋmɩn fãw wa. A ala na yi tɔ, nɩrɛ ma lɛ ꞌla soor ʋ soorfʋ wa.
A KIRISI NA Ɩ A DAVƖTƖ YÃW NƖ A Ʋ NƖ-KPƐ̃Ɛ
(Mat 22.41-46, Lu 20.41-44)
35A *Jeeju nyɔw na ɩ̃ jaana a nɩbɛ be a Naaŋmɩn puor-yir kpɛ̃ɛ pʋɔ yele:
“Mɩnɛ ɩ̃ ɩ a *ƴɛr-kpɛn-bɔɔnbɔ ma yel áa Davɩtɩ bie a *Kirisi ɩ? 36A Davɩtɩ mɩ̃ɛ a Naaŋmɩn Sɩɛ dãa tɔw ʋ yel:
‘A Nɩ-kpɛ̃ɛ Naaŋmɩn yelʼã a ɩ̃ Nɩ-kpɛ̃ɛ:
Jɛ a ɩ̃ dʋrɩ̃ loor wa ta nɩ a daar ʋlɔ
ɩ̃ nɔɔ ƴɔnɔ a fʋ sama-deme a fʋ pulẽe.’
37A Davɩtɩ mɩ̃ɛ buɔlɔ ʋ na a ʋ Nɩ-kpɛ̃ɛ. Mɩnɛ ʋ na lɛ tʋɔ ɩ a ʋ bie?”
A nɩ-yaw cɛlɛ na a Jeeju ƴɛrɩ̃sɩ a nʋmɔ ba.
A ƳƐR-KPƐN-BƆƆNBƆ YO-BƆFƲ
(Mat 23.1-36, Lu 20.45-47)
38Ʋ mɩ dãa na jaana ba yele:
“Nyɩ́ gu nyɩ mɩ̃ɛ a *ƴɛr-kpɛn-bɔɔnbɔ ɩnɛ, na ma su a cẽcẽ-bɛrɛ yʋɔrɔ nɩ, bʋɔrɔ nɩ a nɩbɛ ba jaa ba puoro ba a dar pʋɔ. 39Ba nʋ na a nii-sɔw jaajiir a ba *puorfʋ yie pʋʋr, mɩ nʋ nɩ a nɩ-bɛrɛ dakɔɔr jur jɩnaafʋ a fɛtɩsɩ jie. 40Bala ɩ̃ ma bɛlɛ a kpɩ̃ɩ-pɔɔbɔ yele fara dɩrɛ, ɩ̃ ma bɔ̃w nɩ sʋɔr a Naaŋmɩn kamʼɩ̃ bʋɔrɔ a nɩbɛ ba ꞌwuoro ba. Ƴɛrɩ̃ na dɔɔlʼã a ba juumɩ, bɛrmɛ.”
A LIBIE A KPƖ̃Ɩ-PƆW NA DE KƲ A NAAŊMƖN
(Lu 21.1-4)
41A *Jeeju jɩnaa na a libie ƴɔ̃wfʋ jie par, ɩ̃ ꞌwuoro a mɩnɛ a nɩbɛ na waara nɩ a libie ƴɔnɔ. A tɛraa deme yaw jie ƴɔnɔ na libie yayaw. 42Kpɩ̃ɩ-pɔw, na nyɛrɛ nãw, wɩ na ƴɔ̃w libi-kure ayi na wɔ̃ tama ayi kaarɩ̃, na ma tara warbir wa. 43A Jeeju bʋɔl a ʋ *par-tuurbe na ʋ yel ba:
“Yel-mɩ̃ɛ ɩ̃ yele nyɩ, a kpɩ̃ɩ-pɔw na na nyɛrɛ a nãw, ƴɔ̃w na gãw a bala ba jaa na ƴɔnɔ a libie a libie ƴɔ̃wfʋ jie. 44A-na-ɩ a bala ba jaa, a ala ba na dɩ ɩ̃ cɛ ba ƴɔ̃w, ɩ̃-cɛ a pɔw ʋlɔ nɩ a ʋ nãw jaa, ʋ ƴɔ̃w na a ala a jaa ʋ na dãa tɛrɛ bin, gu nɩ a ʋ mɩ̃ɛ.”
Đang chọn:
Markɩ Sɛbɛ 12: BNT93
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
