Markɩ Sɛbɛ 11
11
A JEEJU KPƐ NA A JERUJALƐM
(Mat 21.1-11, Lu 19.28-40, Jã 12.12-19)
1A lɛ ba na pɩɛlɛ a Jerujalɛm na ba tara a Bɛfaje nɩ a Betani na be a *Olivi-tɩɩr tãw loor, a *Jeeju tʋ̃ na a ʋ *par-tuurbe ayi 2ɩ̃ yel ba:
“Nyɩ́ cen a tẽw ʋlɔ na be a nyɩ nii-sɔw. Nyɩmɩ wa tɔ̃ɔ ta kpɛ, nyɩ na nyɛ na bʋ̃-bile kãw nɩrɛ na ma do a ʋ juu sɛr wa, a ba lũ bar. Nyɩ́ ꞌlor ʋ wa nɩ. 3A ala ɩ a nɩrɛ wa soor nyɩ na a bõ nɩ a ala nyɩ na maala a lɛ, nyɩ́ yel ʋ, a Nɩ-kpɛ̃ɛ ɩ̃ bʋɔrɔ ʋ, ɩ̃ ʋ na bar nyɩ na a jie naan a nyɩ taw ʋ lɩɛb wa nɩ a ka.”
4Ba cenʼã na nyɛ bʋ̃-bile a ba lũ be a yẽw pan nʋɔr a sɔr pʋɔ, a ba ta ꞌlor. 5A nɩbɛ bala na dãa be a be ŋmɛɛ soor ba na:
“Bõ ɩnɛ nyɩ ꞌloro a bʋ̃-bile?” 6A ba man a mɩnɛ a Jeeju na dãa yel, a ba bar ba a ba cen. 7Ba taw na a bʋ̃-bile cenʼɩ̃ a Jeeju sɛ̃, na ba yɛr a ba cẽcene dɔɔl a ʋ juu, a Jeeju do jɛ. 8Nɩ-yaw yɛrʼã a ba cẽcene a sɔr juu, a ŋmɛɛ kar a vɛɛ a por pʋɔ pɩɛrɩ̃ pɔw a sɔr. 9A nɩbɛ bala na dãa de a Jeeju nĩe nɩ a bala na tuure ʋ cɩlɛ na yele nɩ:
“*Oojana, a Nɩ-kpɛ̃ɛ Naaŋmɩn ú be nɩ a ʋlɔ na waara nɩ a ʋ yuor!” 10“A Naaŋmɩn ú be nɩ a jamana tẽw ʋlɔ na waara, na ɩrɛɛ a sɩ sãa-kʋmɔ Davɩtɩ ben.” “A Naaŋmɩn na be a saꞌlon iin, Oojana!”
11A Jeeju cenʼã na kpɛ a Naaŋmɩn puor-yir kpɛ̃ɛ pʋɔ be a Jerujalɛm. A mɩnɛ ʋ na ꞌwuor a yele a jaa kolĩ na tuor, ʋ yi na cere a Betani nɩ a ʋ par-tuurbe pie-nʼayi, a-na-ɩ a wɩɛr dãa na faa ba.
A FƖGƖ TƖƐ A JEEJU NA PƆ ƳƆ̃W
(Mat 21.18-19)
12A dɩvɩɛ bio, a mɩnɛ ba na yi a Betani ɩ̃ de a sɔr cere, kɔ̃ nyɔw na a *Jeeju. 13Ʋ gbã na nyɛ tɩɛ kãw ba na bʋɔlɔ fɩgɩ, ʋ tɛrɛ vɛɛ, ʋ cen na ꞌwuor a ala ɩ̃ ɩ ʋ na nyɛ na wɔmɔ a ʋ juu. Ɩ̃ a lɛ ʋ na taw pɩɛl a tɩɛ, va-jaala tɛw ʋ nyɛ, a-na-ɩ aa dãa ɩ a fɩgɩ wɔ̃fʋ daar wa. 14Ʋ yel a fɩgɩ tɩɛ:
“Aa be a nɩrɛ na lɛ ꞌwɔb a fʋ wɔmɔ wa!”
A ʋ par-tuurbe wõ a ala ʋ na yel.
A ƳAƳABSƖ A JEEJU NA DIW BAR A NAAŊMƖN YIR
(Mat 21.12-17, Lu 19.45-48, Jã 2.13-22)
15Ba ta na a Jerujalɛm, a *Jeeju kpɛ a Naaŋmɩn puor-yir kpɛ̃ɛ pʋɔ, na ʋ nyɔw ɩ̃ diwre a ƴaƴabsɩ nɩ a bala na daara a yele a ƴaƴabsɩ jie a be. Ʋ cãgbalɩ̃ na a libi-tɛwrbɛ tabalsɩ lɔb, cãgbalɩ̃ nɩ a naŋmam-daarba dakɔɔr bar, 16ɩ̃ ma kʋrɔ nɩrɛ sɔr ʋ na de bom tɔl yi nɩ a Naaŋmɩn puor-yir kpɛ̃ɛ pʋɔ wa. 17Ʋ jaana na a nɩbɛ yele:
“A sɛbʼã a Naaŋmɩn Sɛbɛ pʋɔ a ba na bʋɔlɔ na a ɩ̃ yir a ta-ten nɩbɛ ba jaa *puorfʋ yir, ɩ̃-cɛ nyɩ de ʋ na maal ʋ lɩɛb ɩ nyanyube sɔɔlɩ̃fʋ jie.”
18A *baar-lo-nɩ-bɛrɛ nɩ a *ƴɛr-kpɛn-bɔɔnbɔ wõ na a ala ɩ̃ na ba bʋɔrɔ a mɩnɛ ba na ɩrɛ ɩ̃ kúrɔ ʋ, a-na-ɩ dãbɩ̃ɛ dãa na nyɔw ba a mɩnɛ a ʋ jaanfʋ na kpaw a nɩbɛ ba jaa nɔɛ.
19A lɛ a jaanʋɔr na ta, a Jeeju nɩ a ʋ *par-tuurbe yi na a ʋna tẽw pʋɔ.
A NAAŊMƖN SƲƆRFƲ NƖ A ƳƆ̃W-NYÃA
(Mat 21.20-22)
20A mɩnɛ ba na tɔl cere a dʋ̃ꞌwʋlɩ̃, a *Jeeju *par-tuurbe nyɛ na a fɩgɩ tɩɛ ʋ ko wa ta nɩ a nyɩbɛ pʋɔ. 21A Pɩɛr tɩɛr yuo a ala na dãa ta, ɩ̃ yel a Jeeju:
“Jãjaana, ꞌwuor nyɛ! A fɩgɩ tɩɛ ʋlɔ fʋ na pɔ ƴɔ̃w, ʋ ko na.” 22A Jeeju yel ba:
“Nyɩ́ tɛrɛ ƴɔ̃w-nyãa a Naaŋmɩn jie. 23Yel-mɩ̃ɛ ɩ̃ yele nyɩ, a ala ɩ̃ ɩ a nɩrɛ yelʼã a tãw na á ú taw yi a ka ɩ̃ cen na lo a man kʋ̃ɔ pʋɔ, ɩ̃ ma baala a ʋ suur pʋɔ wa, ɩ̃ sɔw nɩ puor a ala ʋ na yel áa maal, a na maalʼã kʋ ʋ. 24Ala-ɩ̃-sɔ ɩ̃ yele nyɩ, a bom jaa lɛ nyɩ na wa sʋɔrɔ a Naaŋmɩn jie, nyɩ́ sɔw nɩ puor a nyɩ de na nĩe pɔw, ɩ̃ a na maalʼã kʋ nyɩ. 25Ɩ̃ a lɛ nyɩ na ir ɩraa sʋɔrɔ a Naaŋmɩn, a ala ɩ̃ ɩ nyɩ tɛrɛ na ƴɛrɩ̃ nɩ nɩrɛ, nyɩ́ de bar kʋ ʋ. A lɛ a nyɩ saa juu Sãa na mɩ de na a nyɩ cɛfʋ jiir bar kʋ nyu [ 26Ɩ̃ a ala ɩ nyaa de bar ʋ wa, a nyɩ saa juu Sãa ma mɩ diere a nyɩ cɛfʋ jiir bara kʋrɔ nyɩ wa.”]
NYƖNƐ A JEEJU TƲƆFƲ YI?
(Mat 21.23-27, Lu 20.1-8)
27Ba lɛ ta na a Jerujalɛm, a *Jeeju kpɛ yʋɔrɔ a be a Naaŋmɩn puor-yir kpɛ̃ɛ pʋɔ, a *baar-lo-nɩ-bɛrɛ, a *ƴɛr-kpɛn-bɔɔnbɔ nɩ a ni-dierbe wɩ a ʋ sɛ̃, 28na soor ʋ:
“Nyɩnɛ fʋ pɔw a sɔr maala nɩ a yele asɩmɛ? Ala ɩ̃ kʋ fʋ a sɔr a fʋ maala?” 29A Jeeju yel ba:
“Ɩ̃ na soor nyɩ na soorfʋ bõ-ƴen tɛw. Nyɩmɩ wa kʋ ma a sɔwfʋ, ɩ̃ na man nyɩ na a jie ʋlɔ ɩ̃ na pɔw a sɔr maala nɩ a yele ala. 30A Jã-Batii kʋ̃ɔ mʋrfʋ, nyɩnɛ ʋ yi? A Naaŋmɩn jie ʋ, mɩɩ a nɩbɛ jie ʋ? Nyɩ́ kʋ ma a sɔwfʋ.” 31A ba nyɔw ɩ̃ pɛrɛ ƴɔnɔ taa a ba nɩ̃ɛ, yele:
“A ala ɩ̃ ɩ sɩ yelʼã á Naaŋmɩn jie ʋ yi, ʋ na soor sɩ na á bõ ɩnɛ saa sɔw de a Jã ƴɛrɩ̃ wa? 32Ɩ̃ a ala ɩ̃ ɩ sɩ yelʼã á nɩbɛ jie ʋ yi,” ba dãa na jɔrɔ a nɩbɛ dãbɩ̃ɛ, a-na-ɩ a nɩbɛ ba jaa dãa na de a Jã ʋ sɩrɩ̃ ɩ a Naaŋmɩn ƴɛr-hiere.
33A be jie, a ba yel a Jeeju:
“Saa bɔ̃w wa.”
A Jeeju lɩɛb yel ba:
“A maa mɩ, ɩ̃ kɔ̃ mɩ yel nyɩ a jie ʋlɔ ɩ̃ na pɔw a sɔr maala nɩ a yele ala wa.”
Đang chọn:
Markɩ Sɛbɛ 11: BNT93
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
