Matie Sɛbɛ 9
9
A GBƐR A JEEJU NA KPAAR
(Mar 2.1-12, Lu 5.17-26)
1A *Jeeju lɛ lɩɛbʼã kpɛ a gbor pʋɔ gãw a man, ɩ̃ kul a ʋ tẽw.
2Ba ɓɔw na gbɛr nɩ a ʋ gaajie wɩ nɩ a ʋ sɛ̃. Ɩ̃ a mɩnɛ ʋ na nyɛ a ƴɔ̃w-nyãa ba na tɛrɛ, ʋ yelʼã a gbɛr:
“Ɩ̃ bie, tɛrɛ nũɔ! Ɩ̃ de na a fʋ maal-faar bar kʋ fʋ!” 3Ɩ̃ a *ƴɛr-kpɛn-bɔɔnbɔ ŋmɛɛ yele na taa:
“A daba na tʋrɔ na a Naaŋmɩn,” 4a Jeeju bɔ̃w a ba tɩɛrɩ̃sɩ ɩ̃ yel ba:
“Bõ ɩ a nyɩ tɛrɛ a tɩɛrʋ̃-faar a nyɩ sube pʋʋr a lɛ? 5Buor ɩ̃ yɔw gãw ɩ̃ na yel: ‘A fʋ maal-faar de na bar kʋ fʋ’ mɩɩ ‘A fʋ ir cere?’ 6Ɩ̃-cɛ ɩ̃ bʋɔrɔ na nyɩ bɔ̃w áa *Nɩbɛ Bie tɛrɛ na a tʋɔfʋ a tẽw pʋɔ na de a nɩbɛ maal-faar bar ba.” Ɩ̃ ʋ yelʼã a gbɛr:
“Ir de a fʋ gaajie kule nɩ,” 7ʋ ir kule. 8A mɩnɛ a nɩbɛ na nyɛ a lɛ, dãbɩ̃ɛ nyɔw ba na, a ba pɛwrɛ a Naaŋmɩn a mɩnɛ ʋ na kʋ a nɩbɛ a ʋna tʋɔfʋ bʋrɔ.
A MATIE A JEEJU NA BƲƆL
(Mar 2.13-17, Lu 5.27-32)
9A lɛ a *Jeeju na yi a be ɩ̃ cere, ʋ nyɛ na a daba na jɛ a lãpo defʋ jie a ba bʋɔlɔ a Matie, ʋ yel ʋ:
“Ir wa tuure ma!” ɩ̃ ʋ ir cen na tuure ʋ. 10Ɩ̃ a mɩnɛ ba na jɛ a dɩb pulẽe a Matie yir pʋɔ, a lãpo-dierbe nɩ a maal-faar deme yaw wɩ na lãa jɛ nɩ a Jeeju nɩ a ʋ *par-tuurbe. 11A mɩnɛ a *Farɩsɩ nɩbɛ na nyɛ a lɛ, ba yelʼã a ʋ par-tuurbe:
“Bõ ɩnɛ a nyɩ jãjaana lãa dɩrɛ nɩ a lãpo-dierbe nɩ a maal-faar deme?” 12A lɛ a Jeeju na wõ a ala, ʋ yel ba na:
“Aa ɩ a bala na kpɛmɛ, bala ɩ̃ bʋɔrɔ a dɔɔtɔrɔ wa, ɩ̃-cɛ a baalsɩ ɩ̃ ma bʋɔrɔ ʋ. 13Nyɩ́ cen na jaan a Naaŋmɩn ƴɛr-bir nanɩ par na yel: ‘Maa bʋɔrɔ baar lofʋ wa, ɩ̃-cɛ a nã-bɔ̃wfʋ ɩ̃ bʋɔrɔ.’ A-na-ɩ maa wa a nɩ-torisɩ bʋɔlfʋ wa, ɩ̃-cɛ a maal-faar deme bʋɔlfʋ ɩ̃ wa.”
A JEEJU NA IRE A NƲƆR LŨFƲ PAR
(Mar 2.18-22, Lu 5.33-39)
14A Jã-Batii *par-tuurbe taw na ta a *Jeeju ɩ̃ soor ʋ:
“Bõ ɩnɛ a sɩmɩ nɩ a *Farɩsɩ nɩbɛ ma lũ a nʋɔr, ɩ̃-cɛ a fʋ par-tuurbe maa lũ wa?” 15A Jeeju yel ba:
“Nyɩ tɩɛrʼã bɔ̃w ka a bala ba na bʋɔl a kul-taa jie, ba na tʋɔ na kono a lɛdaar a kul-taa sʋbɔ na cãa be nɩ ba mɩ? Ɩ̃-cɛ a daar nɔɔ ta na a ba ir a kul-taa sʋbɔ cenʼɩ̃, ɩ̃ a ba pãa lũ a nʋɔr. 16Nɩrɛ ma diere cẽcen paalaa sɛbɛ nɩ kpar-kʋraa bɔw wa, a-na-ɩ ʋ na taw na a kparʋ, ɩ̃ a ʋ ɓerfʋ na nyɩrɩ̃ na bɛlɩ̃. 17Nɩrɛ ma mɩ diere dã-paalaa ƴɔnɔ a dʋʋ jaw pʋɔ wa, a-na-ɩ a ʋ na wɛlʼã, a dãa deer, a jaa sãw. Ɩ̃ a dʋʋ paalaa pʋɔ ba ma mɩ ƴɔ̃w a dã-paalaa, a ba jaa ayi nyɔɔr taa.”
A PƆW KPAARFƲ, NƖ A JUFISƖ NƖ-KPƐ̃Ɛ BI-PƆW JAWFƲ
(Mar 5.21-43, Lu 8.40-56)
18A mɩnɛ a *Jeeju na cãa mana ba a ana ƴɛrɩ̃sɩ, a Jufisɩ nɩ-kpɛ̃ɛ ta na ɩ̃ lo gburĩ a dume a ʋ nii-sɔw ɩ̃ yel ʋ:
“Ɩ̃ bi-pɔw kpi na a ƴɛ̃ƴɛrɩ̃ na, ɩ̃ a fʋ̃ʋ waa dɔɔl ʋ a fʋ nuu, ʋ na jaw na.” 19A Jeeju irʼã nɩ a ʋ *par-tuurbe ɩ̃ tuure ʋ. 20Pɔw be na be na tɛrɛ a sɩɛ na ma baara wa, yara nɩ a yaan maalʼɩ̃ yomo pie-nʼayi. Ʋ taw na ta a Jeeju puo-sɔw ɩ̃ sɩɩr a ʋ fu nʋɔr, 21a-na-ɩ ʋ yelʼã a ʋ mɩ̃ɛ: “A maa wa tʋɔ sɩɩr a ʋ fu tɛw, a ɩ̃ sɩɛ na baarʼã.” 22A Jeeju lɩɛb nyɛ ʋ, ɩ̃ yel ʋ:
“Ɩ̃ bi-pɔw, tɛrɛ nʋ̃ɔ! A fʋ ƴɔ̃w-nyãa faa fʋ na,” ɩ̃ a daar ʋlɔ pʋɔ a pɔw sɩɛ baarʼã.
23A mɩnɛ a Jeeju na ta a nɩ-kpɛ̃ɛ ʋlɔ yir, ʋ nyɛ na a ɩl-pɛɛlbɛ nɩ a nɩbɛ na kono maala nɩ a nã-yele, 24ʋ yel:
“Nyɩ́ yi be! A poole ma kpi wa, ɩ̃-cɛ ʋ gurʼã,” a ba laara ʋ. 25A lɛ ba na diw a nɩbɛ bar a yẽw, a Jeeju kpɛ na a diem ɩ̃ nyɔw a poole nuu, ʋ ir. 26A ƴɛrɩ̃ ʋlɔ yɛrʼã pɔw a tẽw ʋ jaa.
A JEEJU NA YUO A JƆN AYI MIMIE
27A mɩnɛ a *Jeeju na yi cere, jɔn ayi wuure na tuure nɩ ʋ yele nɩ:
“*Davɩtɩ Bie yaa! Waalɩ̃ nãw ƴɔ̃w sɩ bɩlɛ!”
28A lɛ a Jeeju na ta a yir kpɛ a diem, a jɔn bala taw na ta ʋ, ʋ soor ba:
“Nyɩ tɩɛrʼã bɔ̃w ka ɩ̃ na tʋɔ na maal nyɩ a lɛ mɩɩ?”
A ba yel:
“Ɔɔ, Nɩ-kpɛ̃ɛ!” 29Ʋ sɩɩr ba a mimie ɩ̃ yel:
“Á maal a lɛ, tu nɩ a nyɩ ƴɔ̃w-nyãa,” 30ɩ̃ a ba mimie yuo na. A Jeeju kpãa ba, kpãkpanʼɩ̃ ba:
“Nyɩ́ tɛrɛ nyɩ mɩ̃ɛ, a nɩrɛ kɔ̃ bɔ̃wnaa wa.” 31Ɩ̃-cɛ ba yi na ƴɛrɛ a ʋ ƴɛrɩ̃, a pɔw a ʋna tẽw ʋ jaa.
A WÕW A JEEJU NA KPAAR
32A mɩnɛ ba na cãa yi cere, ba taw na wõw a kɔ̃tɔn na ire wɩ nɩ a ʋ sɛ̃. 33Ɩ̃ a lɛ a *Jeeju na diw a kɔ̃tɔn bar ʋ yi, a wõw nyɔw na a ƴɛrɩ̃sɩ ɩ̃ ƴɛrɛ, a nɩbɛ nɔɛ ko ba a ba yele taa:
“Saa dãa nyɛ bom nɔhɔ̃ a *Ɩsɩrayɛl-tẽw pʋɔ fɩ̃ɩ wa!” 34Ɩ̃-cɛ a *Farɩsɩ nɩbɛ ʋlɔ yelʼã:
“A kɔ̃tɔn nɩ-kpɛ̃ɛ fãw ʋ diwre nɩ a kɔ̃tɔnsɩ!”
A NƖBƐ NA Ɩ A JEEJU A NÃW
35A *Jeeju cʋbʼã a tẽ-bɛrɛ nɩ a tẽ-bil a jaa jaana a Jufisɩ a ba *puorfʋ yie pʋʋr, hiere nɩ a Naaŋmɩn fãw ƴɛrɩ̃, mɩ kpaara nɩ a wʋlɩ̃-bʋrɔ bʋrɔ deme ba jaa. 36A mɩnɛ ʋ na nyɛ a nɩbɛ na waa, nãw nyɔw ʋ na a-na-ɩ ba ɩ na nɩbɛ na giem, a sube na mɩ sãw wɔ̃ taa nɩ piir na ma tɛrɛ dɔ-cɩɩnaa wa. 37Ʋ yel a ʋ *par-tuurbe:
“A puo bɛrmɛ na, ɩ̃-cɛ a cɩ-ŋmarba ma jɛ̃ bom wa. 38Ala-ɩ̃-sɔ, nyɩ́ sʋɔr a puo sʋbɔ ʋ ƴɔ̃w a tʋ̃tʋnbɔ a ba cen na ŋma a ci.”
Đang chọn:
Matie Sɛbɛ 9: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
