Matie Sɛbɛ 7
7
A ƳƐRƖ̃SƖ ƳƆ̃WFƲ
(Lu 6.37-38,41-42)
1“Nyɩ taa koro nɩrɛ wa, a mɩnɛ a Naaŋmɩn kɔ̃ wa guor a nyɩ ƴɛrɩ̃ wa. 2A-na-ɩ a Naaŋmɩn nɔɔ guorʼã a nyɩ ƴɛrɩ̃ a mɩnɛ nyɩ na mɩ guoro a nɩbɛ ƴɛrɩ̃sɩ, ɩ̃ a bom lɛ nyɩ na de mana nɩ a yele, a ʋna bom a Naaŋmɩn na mɩ de manɩ̃ a nyɩ ben. 3Bõ ɩ a fʋ ꞌwuoro a mobir na be a fʋ yɛbɛ mimir pʋɔ ɩ̃ ma tɩɛrɛ nɩ a dakpur na be a fʋ mimir pʋɔ wa? 4Mɩnɛ fʋ na tʋɔ ɩ ɩ̃ yel a fʋ yɛbɛ: ‘Ɩra lɛ, ɩ̃ pɛɛl fʋ mobir na be a fʋ mimirɩ̃’ ɩ̃-cɛ a dakpur cãa be a fʋ mimir pʋɔ? 5Fʋ ɩ na bɛbɛlɛ! A sɛw na fʋ de nĩe ir a dakpur na be a fʋ mimir pʋɔ baar, ɩ̃ pãa tʋɔ nyɛ a mɩnɛ fʋ na ɩrɛ ɩ̃ pɛɛlɛ a mobir na be a fʋ yɛbɛ mimirɩ̃.
6“Nyɩ taa de a Naaŋmɩn yel-ciirsɩ ƴɔnɔ a baar wa a mɩnɛ a ba nɔɔ wa lɩɛb dʋ̃ nyɩ wa. Ɩ̃ nyɩ taa mɩ de a nyɩ yel-sono na kpɛmɛ a dafʋ lɔbɔ ƴɔnɔ a dor a mɩnɛ a ba nɔɔ wa nɛbɛ nɩ gbɛɛ wa.
A YELE SƲƆRFƲ A NAAŊMƖN JIE
(Lu 11.9-13)
7“Nyɩ́ sʋɔrɔ, ɩ̃ ba na kʋ nyɩ na. Nyɩ́ bʋɔrɔ, ɩ̃ nyɩ na nyaa na. Nyɩ́ ŋmeere a pan, ɩ̃ ba na yuo nyɩ na. 8A-na-ɩ a nɩrɛ lɛ na sʋɔrɔ, ʋ na pɔw na, ɩ̃ a ʋlɔ na bʋɔrɔ, ʋ na nyɛ na. A ʋlɔ mɩ na mɩ ŋmeere, ba na yuo ʋ na a pan. 9Sãa buor be ka a nyɩ pʋɔ a ʋ bie wa sʋɔr ʋ a bõ-son, ʋ de kubir kʋ ʋ? 10Mɩɩ a jɩm ʋ sʋɔr ʋ, ʋ nyɔw waab kʋ ʋ? 11A nyɩmɩ na ɩ a nɩ-faar ɩ̃ bɔ̃w a yel-sono kʋrɔ a nyɩ bibiir, wa yele nɩ a nyɩ Sãa na be a saa juu, ʋ kɔ̃ kʋ a bala na sʋɔrɔ ʋ a yel-sono wa?
12“A bom jaa lɛ nyɩ na bʋɔrɔ a nɩbɛ ba maal kʋ nyɩ, nyɩ́ mɩ maal a lɛ kʋ ba. A-na-ɩ a Mowisi ƴɛr-kpɛn nɩ a ƴɛr-hierbe ƴɛrɩ̃sɩ par nɩ a lɛ.
A SƆƐ AYI ƳƐRƖ̃
(Lu 13.24)
13“Nyɩ́ de a sɔr ʋlɔ na yire a dɔ̃dɔr nɔ-bile pʋɔ, a-na-ɩ a dɔ̃dɔr nɔ-yalaa be na be, a ʋ sɔr mɩ yɔw ɩ̃ cere a wɛfʋ jie, ɩ̃ a yaw jie de na a ʋna sɔr. 14Ɩ̃-cɛ a dɔ̃dɔr nɔ-bile be na be, a ʋ sɔr mɩ kpɛmɛ a defʋ, ɩ̃ cere a baafʋ pʋɔ, ɩ̃ a bala na nyɛ a ʋna sɔr, baa jɛ̃ bom wa.
A WƆMƆ BA BƆ̃WNƆ NƖ A TƖƐ
(Lu 6.43-44)
15“Nyɩ́ tɛrɛ nyɩ mɩ̃ɛ a bala na ƴɛrɛ a Naaŋmɩn ƴɛrɩ̃ bɛlɛ nɩ a nɩbɛ. Ba ma wa na a nyɩ jie wɔ̃ taa nɩ piir, ɩ̃-cɛ a ba pʋʋr, ꞌwʋbsɩ ba ɩ. 16A ba maal-bie jie nyɩ na bɔ̃w nɩ ba. A gʋ-tɩɛ ma wɔnɔ a aaraa wa; a gʋ-salaa ma mɩ wɔnɔ a ꞌwɔrɔ wa. 17A tɩ-son wɔnɔ na a bi-sono, a tɩ-kpana mɩ wɔnɔ a bi-kpana. 18A tɩ-son ma tʋɔrɔ wɔnɔ a bi-kpana wa, a tɩ-kpana mɩ ma mɩ tʋɔrɔ wɔnɔ a bi-son wa. 19A tɩɛ lɛ na ma wɔnɔ a bi-son wa, ba na ŋmaa ʋ na ƴɔ̃w a vũu pʋɔ ʋ dɩ. 20Ala-ɩ̃-sɔ a nɩbɛ bala, a ba maal-bie jie nyɩ na bɔ̃w nɩ ba.
A JEEJU NƖ A POE AYI DEME
(Lu 13.25-27)
21“Aa ɩ a nɩrɛ lɛ na tɔɔ bʋɔlɔ ma: ‘A Nɩ-kpɛ̃ɛ! Nɩ-kpɛ̃ɛ!’ ɩ̃ wa kpɛɛrɛ a saa juu fãw pʋɔ wa, ɩ̃-cɛ a ʋlɔ na maala a ɩ̃ Sãa na be a saa juu pʋ-tɩɛrʋ̃, ʋlɔ tɛw kpɛɛrɛ. 22A ʋna bibir nɔɔ tara, a yaw jie na yele ma na: ‘Nɩ-kpɛ̃ɛ! Nɩ-kpɛ̃ɛ! Aa ɩ a fʋ yuor sɩ dãa hiere nɩ a Naaŋmɩn ƴɛrɩ̃ wa? Aa mɩ dãa ɩ a fʋ yuor sɩ dãa diwre nɩ a kɔ̃tɔnsɩ, ɩ̃ mɩ tʋ̃ nɩ a tʋ̃-kpɛn yaw wa?’ 23Ɩ̃-cɛ ɩ̃ na yel ba na cãa pʋɔ: ‘Maa bɔ̃w nyɩ fɩ̃ɩ wa. Nyɩ́ taw yi ma be, a nyɩna maal-fãa deme naa!’
A YIE AYI SƲKPA
(Lu 6.47-49)
24“Ala-ɩ̃-sɔ a nɩrɛ ʋlɔ na cɛlɛ a ɩ̃ ƴɛrɩ̃sɩ ala ɩ̃ na ƴɛr ɩ̃ sɔw maal, ʋ na wɔ̃ na taa nɩ a nɩrɛ na tɛrɛ a yɛ̃ mɛ nɩ a ʋ yir a kʋsɩpan juu. 25A saa wa na yaw, a kʋlsɩ paal, a sɛsɛb mɩ fure dama nɩ a ʋna yir, ɩ̃-cɛ ꞌwaa lo wa, a-na-ɩ a kʋsɩpan juu ba mɛ ʋ. 26Ɩ̃-cɛ a nɩrɛ ʋlɔ na cɛlɛ a ɩ̃ ƴɛrɩ̃sɩ ala ɩ̃ na ƴɛr ɩ̃ ma sɔw maal wa, ʋ na wɔ̃ na taa nɩ a nɩ-dãbol na mɛ a ʋ yir a biire juu. 27A saa wa na yaw, a kʋlsɩ paal, a sɛsɛb mɩ fure dama nɩ a ʋna yir ʋ faa lo, a ʋ lofʋ nyɩrɩ̃ na bɛlɩ̃.”
A JEEJU TƲƆFƲ
28A mɩnɛ a *Jeeju na man a ana ƴɛrɩ̃sɩ baar, nɔɛ ko na a bana nɩbɛ ba jaa na cɛlɛ ʋ 29a-na-ɩ ꞌwaa man a ʋ ƴɛrɩ̃ a wɔ̃ taa nɩ a ba *ƴɛr-kpɛn-bɔɔnbɔ manfʋ wa, ɩ̃-cɛ a ʋ ƴɛrɩ̃ tɛrɛ na a tʋɔfʋ.
Đang chọn:
Matie Sɛbɛ 7: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
