Matie Sɛbɛ 24
24
A NAAŊMƖN PUOR-YIR KPƐ̃Ɛ WƐLFƲ
(Mar 13.1-2, Lu 21.5-6)
1A mɩnɛ a *Jeeju na yi a Naaŋmɩn puor-yir kpɛ̃ɛ pʋɔ ɩ̃ cere, a v *par-tuurbe taw na ta v, na ba miile ʋ a mɩnɛ ba na mɛ a Naaŋmɩn yir v vɩɛlɛ. 2A Jeeju yel ba:
“Nyɩ nyɛ na a asɩmɛ a jaa? Yel-mɩ̃ɛ ɩ̃ yele nyɩ, kubir kãw kɔ̃ lɔɔ tʋɔ ɩraa dɔɔl a v tɔ sʋbɔ juu wa. A na wɛlʼã a jaa.”
A WON ALA NƆƆ TARA
(Mar 13.3-13, Lu 21.7-19)
3Ɩ̃ a mɩnɛ a *Jeeju na do jɛ a *Olivi-tɩɩr tãw juu, a v *par-tuurbe taw na ta v ba yẽ ɩ̃ sooro v:
“Man sɩ a dabor a yele ala nɔɔ tara, ɩ̃ jɩbaa buor na miile a fʋ lɩɛb-wafʋ nɩ a tẽw baarfʋ daar.” 4A Jeeju yel ba:
“Nyɩ́ tɛrɛ nyɩ mɩ̃ɛ a mɩnɛ a nɩrɛ kɔ̃ wa bɛlɩ̃ nyɩ wa. 5A-na-ɩ a nɩ-yaw nɔɔ wa na nɩ a ɩ̃ yuor, na ba yele nɩ a bala ɩ a *Kirisi, ɩ̃ ba na bɛlɩ̃ na a nɩ-yaw. 6Nyɩ na wõ na a jɛb ƴɛrɩ̃sɩ nɩ a ten nɩdaa damfʋ, ɩ̃ nyɩ taa wa ɩ a dama nyɩ wa, a-na-ɩ a sɛw na a na ta a lɛ, ɩ̃-cɛ a kɔ̃ ɩ a tẽw baarfʋ daar sɛr wa. 7A tẽw na nɩbɛ nɔɔ irʼã jɛbɛ nɩ a tẽ-kpee nɩbɛ, ɩ̃ a jamana kãw na mɩ irʼã jɛbɛ nɩ jaman-kpee. A tẽw nɔɔ miine na a ji-bʋrɔ bʋrɔ, ɩ̃ a kɔ̃ kpee nɔɔ lo na. 8Ɩ̃-cɛ a ana yele a jaa na wɔ̃ na taa nɩ a walfʋ na nyɔw a pɔw.
9“A ʋna daarʼãa, ba na nyɔw nyɩ na ƴɔ̃w a hʋɔlfʋ pʋɔ ɩ̃ kúrɔ nyɩ, ɩ̃ a ten a jaa na mɩ ꞌlaar nyɩ na a ɩ̃ ɩnɛ. 10A lɛdaar mɩ, a nɩ-yaw na barʼã a puorfʋ, ɩ̃ ꞌlaar taa cile nɩ taa a ba sama-deme jie. 11A ƴɛr-hierbe yaw na mɩ wa na na ŋmara a jirsɩ, bɛlɛ nɩ a nɩ-yaw. 12A bier maalfʋ na dɔɔlɔ taa, na saa na a nɩ-yaw nʋfʋ naa ɓãa, 13ɩ̃-cɛ a ʋlɔ na tɛrɛ a su-varkpara ɩraa nɩ wa ta nɩ a baarfʋ daar nɔɔ pɔw na a faafʋ. 14A tẽw ʋ jaa nɔɔ wõ na a Naaŋmɩn fãw ƴɛr-son naa, ʋ ɩ a yel-mɩ̃ɛ manfʋ a ten nɩbɛ ba jaa jie, ɩ̃ a baarfʋ daar pãa ta.
A BÕ-CIIRAA NA SÃWNA A BOM
(Mar 13.14-23, Lu 21.20-24)
15-16“Ala-ɩ̃-sɔ, a lɛdaar nyɩ nɔɔ nyɛrɛ a bõ-ciiraa ʋlɔ na sãwna a bom, na ɩ a ʋlɔ ƴɛrɩ̃ a Naaŋmɩn ƴɛr-hiere Danɩɛl na dãa ƴɛr, ʋ be a ji-ciiraa pʋɔ, a bala na be a Jude wɩɛr pʋɔ bá jɔrɔ duoro a tan jur. (A ʋlɔ na ꞌwuoro a sɛbɛ, ú bɔ̃w bɔ̃w a ƴɛrɩ̃ na par). 17Ɩ̃ a ʋna daarʼãa, a ʋlɔ na be a garɩ̃, ʋ taa bʋɔrɔ ʋ suu a diem a bom defʋ wa, 18ɩ̃ a ʋlɔ na mɩ be a puo pʋɔ, ʋ taa wa lɩɛb kule a kparʋ defʋ wa. 19Nabier na nyɩrɩ̃ na ta a pɔɔ-pʋʋr deme nɩ a bala na tɛrɛ a bi-pɩɩlsɩ a lɛdaar. 20Nyɩ́ sʋɔrɔ a Naaŋmɩn a nyɩ jɔfʋ kɔ̃ wa ta a sɩ̃ɛw mɩɩ a *bibi-ciiraa dayen wa. 21A-na-ɩ a daarʼãa pʋɔ, a won na nyɩrɩ̃ na kpɛmɛ gãw a ala sɩ na bɔ̃w, a tẽw nyɔwfʋ daar wa ta nɩ a ƴɛ̃ƴɛrɩ̃ na, ɩ̃ a kɔ̃ lɔɔ ta a lɛ go wa. 22Nɩrɛ ma be na cɩ̃ɛnɛ, ɩ̃ a ala ma ɩ ba ŋmaa na a bibie ala bar wa. Ɩ̃-cɛ a bala a Naaŋmɩn na vɛl ir ɩnɛ, ʋ na ŋmaa na a bibie ala bar.
23“Ala-ɩ̃-sɔ a nɩrɛ wa yel nyɩ á nyɩ nyɛ a *Kirisi a ka, mɩɩ á beka ʋ be, nyɩ taa wa sɔɔrɔ wa. 24A-na-ɩ a jir-ŋma-Kirisisɩ nɩ a jir-ŋma-ƴɛr-hierbe nɔɔ wa na tʋnɔ a nɔ-kofʋ tʋ̃-bɛrɛ miile nɩ a ba kpɛ̃w, bʋɔrɔ ba bɛlɛ nɩ a bala a Naaŋmɩn na vɛl ir. 25Ɩ̃ nyɩ́ nyɛ, ɩ̃ de na nĩe man kʋ nyɩ.
26“Ala-ɩ̃-sɔ a bala wa yel nyɩ á nyɩ nyɛ ʋ beka wɛkar pʋɔ, nyɩ taa wa cere be wa, mɩɩ a bala wa yel nyɩ á nyɩ nyɛ ʋ a be a sɔɔlɩ̃fʋ jie, nyɩ taa wa sɔwrɔ wa. 27A mɩnɛ a saa nyɩɩlɩ̃fʋ na ma pilpil pɔw a saꞌlon wa nyɔw nɩ a tẽw parɩ̃ wa ta nɩ a tẽw iin, a lɛ a *Nɩbɛ Bie lɛb waa nɔɔ wɔ̃. 28A wɩɛr ʋlɔ a bom na kpi, be a sidume ma loro.
A NƖBƐ BIE LƖƐB-WAFƲ
(Mar 13.24-27, Lu 21.25-28)
29“A mɩnɛ a bibie ala won nɔɔ baara, a jie naan a mɔtɔ̃w na ka na ɓʋrɩ̃, ɩ̃ a cuu ma lɛ caarɛɛ wa. A ŋmarbie na pɔrʼã lo, ɩ̃ a fãgã ala na be a saꞌlon iin na dama na, 30ɩ̃-cɛ a *Nɩbɛ Bie jɩbaa na nyɩrʼã a saꞌlon. A tẽw pʋɔ nɩ-bʋrɔ bʋrɔ ba jaa na waala na, ɩ̃ ba na nyɛ na a Nɩbɛ Bie ʋ yi a saꞌlon waara a dɔ̃dɔrɩ̃sɩ puor nɩ a ʋ fãw nyɩrɩ̃ nyɩnyɩlɛ nɩ. 31Ba na pɛɛlʼã a ɩl kpɛ̃ɛ, ɩ̃ a v sɩ-tʋnɩsɩ na kpaarɩ̃ na a nɩbɛ bala a Naaŋmɩn na vɛl ir a tẽw lõbobo pʋɔ a jaa, wa ta nɩ a saꞌlon bɛwfʋ jie.
A FƖGƖ TƖƐ JAANFƲ
(Mar 13.28-31, Lu 21.29-33)
32“Nyɩ́ bɔ̃w a fɩgɩ tɩɛ jaanfʋ par. A lɛ nyɩ na nyɛ ʋ ʋ tɔbɔ a vaꞌwolo nyɩ ma bɔ̃w ka a susuur daar tara na. 33A lɛ ʋ mɩ, a nyɩmɩ wa nyɛ a yele asɩmɛ a jaa a maala, nyɩ́ bɔ̃w ka a *Nɩbɛ Bie waa daar tara na. 34Yel-mɩ̃ɛ ɩ̃ yele nyɩ, a ƴɛ̃ƴɛrɩ̃ nɩbɛ pʋɔ, ŋmɛɛ kɔ̃ wa kpi wa, wa ta nɩ a ana yele a jaa nɔɔ maala. 35A saꞌlon nɩ a tene na tɔlʼã, ɩ̃-cɛ a ɩ̃ ƴɛrɩ̃ ma tɔlɔ fɩ̃ɩ wa.
A NƖBƐ BIE WAA DAAR BIBIR BƆ̃WFƲ
(Mar 13.32-37, Lu 17.26-30,34-36)
36“Nɩrɛ ma bɔ̃w a *Nɩbɛ Bie waa bibir ʋlɔ nɩ a daar wa. A saa juu sɩ-tʋnɩsɩ nɩ a Bie ma mɩ bɔ̃w wa, ɩ̃ a ala ma ɩ a Sãa tɛw ʋ wa. 37A-na-ɩ a mɩnɛ a na dãa be a Nowe daar, a lɛ a na lɛ be a Nɩbɛ Bie waa daar. 38A lɛdaar a kʋ̃ɔ kpɛ̃ɛ na ma dãa wa sɛr wa, nɩbɛ dãa na dɩrɛ nyuure nɩ, kule taa ɩ̃ mɩ ture a ba bi-pɔɔbɔ a ba kule, wa ta nɩ a ʋna bibir a Nowe na kpɛ a gbor kpɛ̃ɛ pʋɔ. 39Baa dãa bɔ̃w bom, wa ta nɩ a ʋna bibir a kʋ̃ɔ kpɛ̃ɛ na wa wob ba ba jaa. A lɛ a na mɩ be a Nɩbɛ Bie waa daar mɩ. 40Dabsɩ ayi na be na a puo pʋɔ, ɩ̃ ba na de na a bõ-ƴen ɩ̃ cɛ a kãw bar. 41Pɔɔbɔ ayi na ƴɛrɛ na a jɔ̃ a nɩɛr juu a ba de a bõ-ƴen ɩ̃ cɛ a kãw bar. 42Ala-ɩ̃-sɔ, nyɩ́ bɔ̃w jʋʋrɔ, a-na-ɩ nyaa bɔ̃w a bibir ʋlɔ a nyɩ Nɩ-kpɛ̃ɛ na waara wa. 43Nyɩ́ bɔ̃wnaa, a ala ɩ a yir sʋbɔ dãa na bɔ̃w a tɩsɔw ʋlɔ daar a nyanyuur nɔɔ waara, ʋ naa dãa na jɛ gu, ɩ̃ kɔ̃ɔ bar ʋ ʋ wa faa kpɛ a ʋ yir pʋɔ wa. 44A lɛ ʋ mɩ a nyɩmɩ mɩ, nyɩ́ bɔ̃w gbɛɛrɩ̃ a nyɩ mɩ̃ɛ, a-na-ɩ a Nɩbɛ Bie na wa na a daar ʋlɔ nyɩ na ma gure ʋ wa.
A TƲ̃TƲ̃-KPEE KPEE SƲKPA
(Lu 12.41-48)
45“Tʋtʋ̃-buor ɩ̃ ɩ a dẽdẽ sʋbɔ na tɛrɛ a yɛ̃? Ʋ ɩ na a ʋlɔ a ʋ nɩ-kpɛ̃ɛ na ƴɔ̃w a ʋ ꞌwuoro a ʋ yir deme kʋrɔ ba a dɩb a daar ʋlɔ na sɛw. 46Nũɔ ma be na a ʋna tʋ̃tʋnɔ jie, a mɩnɛ a ʋ nɩ-kpɛ̃ɛ na lɩɛbɛ waara nyɛrɛ ʋ ʋ maala a lɛ. 47Yel-mɩ̃ɛ ɩ̃ yele nyɩ, a ʋ nɩ-kpɛ̃ɛ na kʋ ʋ na a ʋ yele a jaa ʋ ꞌwuoro. 48Ɩ̃ a ala ɩ a ʋna tʋ̃tʋnɔ ɩ na a nɩ-fãa, ɩ̃ yel a ʋ mɩ̃ɛ á ʋ nɩ-kpɛ̃ɛ kama na, 49ɩ̃ nyɔw a ʋ lãa-tʋnbɔ pɔbɔ, ɩ̃ mɩ dɩrɛ nyuure nɩ a dã-kʋrbɔ, 50a ʋ nɩ-kpɛ̃ɛ nɔɔ wa na a bibir nɩ a daar ʋlɔ ʋ na ma bɔ̃w wa, 51ɩ̃ ŋma ʋ ayi ƴɔ̃w a bɛbɛlbɛ pʋɔ, a ba lãa pɔw a kpãafʋ, a jie ʋlɔ ba na kono nyɩrɛ nɩ a nyɩmɛ.
Đang chọn:
Matie Sɛbɛ 24: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
