Matie Sɛbɛ 25
25
A PƆSABIL PIE SƲKPA
1“A ʋna daarʼãa pʋɔ, a saa juu fãw nɔɔ wɔ̃ na taa nɩ a pɔsabil pie na de a ba lãpar, yi cenʼɩ̃ a pɔw sɩrɛ tuorfʋ jie. 2A ba pʋɔ, anuu be na be ɩ a dãbolo ɩ̃ a anuu ɩ a yɛ̃ deme. 3A-na-ɩ a dãbolo bala de na a ba lãpar ɩ̃ ma tɛrɛ a kãa cenʼɩ̃ wa. 4Ɩ̃-cɛ a yɛ̃ deme de na a ba lãpar, ɩ̃ mɩ tɛrɛ a kãa nɩ a butulsɩ lãa cenʼɩ̃. 5Ɩ̃ a mɩnɛ a sɩrɛ na kama a wɩfʋ, a gʋ̃ɔ nyɔw ba na ba jaa a ba gur.
6“A lɛ a wɩɛr na po jɛ̃ taa, ba wõ na a nɩrɛ na wuur yel: ‘Nyɩ́ nyɛ a sɩrɛ na waara. Nyɩ́ ir cen na tuor ʋ.’ 7A lɛ, a pɔsabil bala ba jaa jaw na gbɛɛrɛ a ba lãpar. 8A dãbolo bala yelʼã a yɛ̃ deme: ‘Nyɩ́ pʋr a nyɩ kãa fɩ̃ɩ ƴɔ̃w sɩ, a-na-ɩ a sɩ lãpar kpiine na.’ 9A yɛ̃ deme yel ba: ‘Aa tʋɔrɔ tara sɩ nɩ a nyɩmɩ wa. Nyɩ́ cen a ƴaƴaba jie na da.’ 10A lɛ a dãbolo bala na cere a dafʋ jie, a sɩrɛ ta na, ɩ̃ a bala na gbɛɛrɩ̃ lãa na kpɛ nɩ a sɩrɛ a kulfʋ fɛtɩ die pʋɔ, ɩ̃ a ba kpal a pan. 11A ɩ na fɩ̃ɩ a pɔsabil bala na cɛ ta ŋmeere a pan yele nɩ: ‘Nɩ-kpɛ̃ɛ! Nɩ-kpɛ̃ɛ! Yuo sɩ a pan.’ 12Ɩ̃-cɛ a sɩrɛ yel ba: ‘Yel-mɩ̃ɛ ɩ̃ yele nyɩ, Maa bɔ̃w nyɩ wa.’ ”
13Ɩ̃ a *Jeeju pãa yel ba:
“Ala-ɩ̃-sɔ nyɩ́ jʋʋrɔ, a-na-ɩ nyaa bɔ̃w a *Nɩbɛ Bie waa bibir nɩ a daar wa.
A TƲ̃TƲNBƆ ATA SƲKPA
(Lu 19.11-27)
14“A na mɩ wɔ̃ na taa nɩ a nɩrɛ na bʋɔrɔ ʋ cen a yɔfʋ jie, ɩ̃ bʋɔl a ʋ tʋ̃tʋnbɔ naa ʋ de a ʋ yele kʋ ba. 15Ʋ kʋ na a bõ-ƴen a sɛlmɛ bie kɔɔr anuu, ɩ̃ kʋ a ƴen sʋbɔ kɔɔr ayi, ɩ̃ mɩ kʋ a kãw kʋbaa, tu nɩ a mɩnɛ a ba yɛ̃ na be, ɩ̃ pãa cen a ʋ yɔfʋ jie. 16A tʋtʋnɔ ʋlɔ na pɔw a sɛlmɛ bie kɔɔr anuu cenʼã a jie naan na ƴabʼɩ̃, ɩ̃ pɔw a dɔɔlaa a kɔɔr anuu mɩ. 17A lɛ mɩ, a ʋlɔ na pɔw a sɛlmɛ bie kɔɔr ayi, ʋ ƴabʼɩ̃ na pɔw a dɔɔlaa a kɔɔr ayi mɩ. 18Ɩ̃-cɛ a ʋlɔ na pɔw a sɛlmɛ bie kʋbaa, ʋ cenʼã na tuu bɔw, ɩ̃ ũu a ʋ nɩ-kpɛ̃ɛ libie.
19“A kamʼã ɩ̃-cɛ a tʋ̃tʋnbɔ nɩ-kpɛ̃ɛ lɛ wa, naa ʋ gbɛɛrɛ a libie ala ʋ na dãa kʋ ba. 20A ʋlɔ na dãa pɔw a sɛlmɛ bie kɔɔr anuu, ʋ ta na kpɛ, ɩ̃ de a kɔɔr anuu na ɩ a dɔɔlaa kʋ a nɩ-kpɛ̃ɛ, ɩ̃ yel ʋ: ‘Nɩ-kpɛ̃ɛ, fʋ dãa na kʋ ma a sɛlmɛ bie kɔɔr anuu. Nyɛ! Ɩ̃ pɔw na a dɔɔlaa a kɔɔr anuu mɩ.’ 21A ʋ nɩ-kpɛ̃ɛ yel ʋ: ‘Fʋ maalʼã vɩlaa. Fʋ ɩ na tʋ̃tʋ̃-dẽdẽ nɩ nɩ-son. A mɩnɛ fʋ na ɩ a dẽdẽ a yel-bil maalfʋ pʋɔ, ɩ̃ na ƴɔ̃w fʋ na a yel-bɛrɛ ꞌwuorfʋ pʋɔ. Wa mɩ pɔw a ɩ̃ nʋɔ̃.’ 22A ʋlɔ na mɩ dãa pɔw a sɛlmɛ bie kɔɔr ayi, ʋ mɩ ta na kpɛ ɩ̃ yel: ‘Nɩ-kpɛ̃ɛ, fʋ dãa na kʋ ma a sɛlmɛ bie kɔɔr ayi. Nyɛ! Ɩ̃ pɔw na a dɔɔlaa a kɔɔr ayi mɩ.’ 23A ʋ nɩ-kpɛ̃ɛ yel ʋ: ‘Fʋ maalʼã vɩlaa. Fʋ ɩ na tʋ̃tʋ̃-dẽdẽ nɩ nɩ-son. A mɩnɛ fʋ na ɩ a dẽdẽ a yel-bil maalfʋ pʋɔ, ɩ̃ na ƴɔ̃w fʋ na a yel-bɛrɛ ꞌwuorfʋ pʋɔ. Wa mɩ pɔw a ɩ̃ nʋɔ̃.’ 24Ɩ̃-cɛ a ʋlɔ na dãa pɔw a sɛlmɛ bie kʋbaa, ʋ mɩ ta na kpɛ, ɩ̃ yel: ‘Nɩ-kpɛ̃ɛ, ɩ̃ bɔ̃w fʋ na. A fʋ ƴɛrɩ̃ kpɛmɛ na, a-na-ɩ fʋ ma ŋma na a ci ala fʋ na maa bʋr wa, ɩ̃ ma mɩ nɩɩr a wɔmɔ ala fʋ na maa yaarɩ̃ a bie wa. 25Dãbɩ̃ɛ nyɔw ma na, ɩ̃ de a fʋ libie cenʼɩ̃ na ũu. Nyɛ! De a fʋ libie nʋɔr.’ 26A ʋ nɩ-kpɛ̃ɛ yel ʋ: ‘Fʋna tʋ̃tʋ-fãa naa, tõtol sʋbɔ fʋ ɩ! Fʋ bɔ̃w na bɔ̃w ka ɩ̃ ma ŋma na a ci ala ɩ̃ na ma bʋr wa, ɩ̃ mɩ nɩɩr a wɔmɔ ala ɩ̃ na maa yaarɩ̃ a bie wa. 27Fʋ na bɔ̃w a lɛ, a dãa na sɛw a fʋ naa de a ɩ̃ libie kʋ a ƴaƴaba ʋ ƴaba nɩ, a maa wa wa, ɩ̃ de a ɩ̃ libie nɩ a dɔɔlaa. 28Nyɩ́ faa a ʋ sɛlmɛ bie kʋbaa, kʋ a ʋlɔ na tɛrɛ a tur. 29A-na-ɩ a nɩrɛ ʋlɔ na tɛrɛ, ba na lɛ kʋ ʋ na dɔɔl, a waa. Ɩ̃-cɛ a ʋlɔ na ma tɛrɛ wa, ɩ̃ saarɩ̃ tɛrɛ a fɩ̃ɩ, ba na faa na a fɩ̃ɩ ala ʋ na tɛrɛ. 30Nyɩ́ nyɔw a tʋ̃tʋ̃-pɔrɔ na, lɔb bar a yẽw a libe pʋɔ. A be ba na kono, nyɩrɛ nɩ a nyɩmɛ.’
A BAARFƲ DAAR ƳƐRƖ̃ GUORFƲ
31“A lɛdaar a *Nɩbɛ Bie na waara nɩ a ʋ yo-yifʋ nɩ a ʋ sɩ-tʋnɩsɩ jaa, ʋ na jɛ na a ʋ yo-yifʋ naa-dakɔw juu, 32ɩ̃ a nɩ-bʋrɔ bʋrɔ ba jaa na duo na taa a ʋ nii-sɔw, ɩ̃ ʋ na ŋma ba na ji-gbulĩsɩ ayi, wɔ̃ taa nɩ a mɩnɛ a dɔ-cɩɩnaa na ma ŋma a piir nɩ a bʋʋr a kpee kpee. 33Ʋ na tɛrɛ na a piir a ʋ dʋrɩ̃ loor, ɩ̃ tɛrɛ a bʋʋr a ʋ gʋbaa loor. 34A ala ɩ̃ baar a jamana na yelʼã a bala na be a ʋ dʋrɩ̃ loor: ‘Ɩ̃ Sãa nɩ-nʋnɩsɩ! Nyɩ́ wa kpɛ a Naaŋmɩn fãw pʋɔ, de a gã-yele ala ba na dãa gbɛɛrɩ̃ a nyɩ ɩnɛ a tẽw nyɔwfʋ daar. 35A-na-ɩ kɔ̃ dãa na nyɔw ma, ɩ̃ nyɩ kʋ ma na a bõ-dɩraa, a kʋ̃ɔ-nyuur mɩ dãa nyɔw ma, a nyɩ kʋ ma a kʋ̃ɔ ɩ̃ nyu. Ɩ̃ dãa na ɩ a saana, a nyɩ de ma kulʼɩ̃ ir ma a saan. 36Ɩ̃ mɩ dãa na tɛrɛ a salĩɓuor, a nyɩ kʋ ma a cẽcen ɩ̃ su, ɩ̃ mɩ dãa ɩ a wʋlɩ̃ a nyɩ wɩ na ꞌwuor ma kãa. Ɩ̃ dãa na be a kasu pʋɔ a nyɩ wɩ sũo ma.’ 37Ɩ̃ a nɩ-torisɩ bala na soor ʋ na: ‘Nɩ-kpɛ̃ɛ, dabor sɩ dãa nyɛ fʋ, a kɔ̃ nyɔw fʋ a sɩ kʋ fʋ a bõ-dɩraa? Mɩɩ a kʋ̃ɔ-nyuur mɩ nyɔw fʋ a sɩ kʋ fʋ a kʋ̃ɔ a fʋ nyu? 38Dabor sɩ dãa nyɛ fʋ, a fʋ ɩ a saana a sɩ taw fʋ kulʼɩ̃ ir fʋ a saan? Mɩɩ a fʋ tɛrɛ a salĩɓuor a sɩ kʋ fʋ a cẽcen a fʋ su? 39Dabor sɩ lɛ nyɛ fʋ, a fʋ ɩ a wʋlɩ̃, mɩɩ a fʋ be a kasu pʋɔ, a sɩ wɩ na ꞌwuor fʋ kãa?’ 40A jamana na yel ba na: ‘Yel-mɩ̃ɛ ɩ̃ yele nyɩ, a mɩnɛ nyɩ na ma maal a ala a ɩ̃ yɛbɛ na nyɩrɩ̃ pab jie, a maa nyɩ ma maal kʋ a lɛ.’
41“Ɩ̃-cɛ a jamana na mɩ yelʼã a bala na be a ʋ gʋbaa loor: ‘Nyɩ́ taw yi ka a ɩ̃ nii-sɔw, nyɩmɩ a Naaŋmɩn na pɔ ƴɔ̃w, naa nyɩ kpɛ a vũu ʋlɔ pʋɔ na ma tɛrɛ a kpiinfʋ daar wa, a vũu ʋlɔ ba na dãa gbɛɛrɩ̃ a Satã nɩ a ʋ sɩ-tʋnɩsɩ ɩnɛ. 42A-na-ɩ a kɔ̃ dãa na nyɔw ma, ɩ̃ nyaa kʋ ma bõ-dɩraa wa. A kʋ̃ɔ-nyuur mɩ dãa na nyɔw ma, ɩ̃ nyaa kʋ ma a kʋ̃ɔ ɩ̃ nyu wa. 43Ɩ̃ dãa na ɩ a saana, ɩ̃ nyaa taw ma kulʼɩ̃ ir ma a saan wa. Ɩ̃ mɩ dãa na tɛrɛ a salĩɓuor, ɩ̃ nyaa kʋ ma cẽcen ɩ̃ su wa. Ɩ̃ dãa na ɩ a wʋlɩ̃, ɩ̃ mɩ dãa be a kasu pʋɔ, ɩ̃ nyaa wɩ ꞌwuor ma kãa wa.’ 44Ɩ̃ a bala mɩ, ba na mɩ soor ʋ na: ‘Nɩ-kpɛ̃ɛ, dabor sɩ dãa nyɛ fʋ a kɔ̃ nyɔw fʋ, mɩɩ a kʋ̃ɔ-nyuur nyɔw fʋ, mɩɩ a fʋ ɩ a saana, mɩɩ a fʋ tɛrɛ a salĩɓuor, mɩɩ a fʋ ɩ a wʋlɩ̃, mɩɩ a fʋ be a kasu pʋɔ, ɩ̃-cɛ a saa wɩ sũo fʋ wa?’ 45A jamana na mɩ yel ba na: ‘Yel-mɩ̃ɛ ɩ̃ yele nyɩ, a mɩnɛ nyɩ na ma dãa maal a ala a ɩ̃ yɛbɛ na nyɩrɩ̃ pab jie wa, a ɩ̃ jie nyaa maal wa.’ 46A bala, ba na cenʼã a kpãafʋ ʋlɔ pʋɔ na ma tɛrɛ a baarfʋ daar wa, ɩ̃-cɛ a nɩ-torisɩ cen a baa-kɔ̃-tɛw pʋɔ.”
Đang chọn:
Matie Sɛbɛ 25: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
