Matie Sɛbɛ 23
23
A JUFISƖ NI-DIERBE YO-BƆFƲ
(Mar 12.38-39, Lu 11.43,46, 20.45-46)
1A ala ɩ̃ baar, a *Jeeju ƴɛrɛ na na a nɩbɛ ba jaa na a ʋ *par-tuurbe, 2ɩ̃ yel:
“A *ƴɛr-kpɛn-bɔɔnbɔ na a *Farɩsɩ nɩbɛ de na a Mowisi ƴɛr-kpɛn jaanfʋ jaana nyɩ. 3Ala-ɩ̃-sɔ a bom jaa lɛ ba na yele nyɩ, nyɩ́ sɔw ɩ̃ maala, ɩ̃-cɛ nyɩ taa wa tɔɔnɔ ba wa, a-na-ɩ ba ma ƴɛrɛ na ɩ̃ maa maala wa. 4Ba ma lũ na a to-bɛrɛ, ɩ̃ ma ɓɔw dɔɔl a nɩbɛ bɔ̃wmɩ, ɩ̃-cɛ baa sɩɩrɛ na a ba nuu fɩ̃ɩ wa. 5Ɩ̃ a ba tʋmɔ a jaa ba na maala, ba ma maala na a nɩbɛ na ꞌwuoro ba. Ba ma maalʼã a ƴɛr-kpɛn wɔ-bɛrɛ#23.5 Ƴɛr-kpɛn wɔ-bɛrɛ: Be ba ma dãa sɛb a Mowisi ƴɛr-kpɛn ŋmɛɛ ƴɔ̃w, a miil á baa hiin wa. lũ ƴɔ̃w a ba diirɩ̃ mɩɩ a ba nurɩ̃, ɩ̃ mɩ ƴɔ̃w a yel-gbɛ̃gbɛɛlsɩ bɛ̃bɛrɛ a ba cẽcen nʋɔr cere na. 6A bala cen a fɛtɩ jie, a ma nʋmɔ ba na a ba na ma jɛ a dakɔɔ-dɩɛlsɩ jur na a nii-sɔw dakɔɔr a ba *puorfʋ yie pʋɔ, a nɩbɛ na tʋɔ nyɛ ba. 7A bala kpɛ a daa pʋɔ, a ma nʋmɔ ba na a nɩbɛ ba jaa na puoro ba, bʋɔlɔ na ba a ‘Jãjaana’. 8Ɩ̃-cɛ a nyɩmɩ, nyɩ taa ɩ a ba bʋɔlɔ nyɩ ‘Jãjaana’ wa, a-na-ɩ nyɩ jaa ɩ na yɛɛr, ɩ̃ bõ-ƴen tɛw ɩ̃ ɩ a nyɩ Jãjaana. 9Ɩ̃ nyɩ taa bʋɔlɔ nɩrɛ a ‘sãa’ ka a tẽw pʋɔ wa, a-na-ɩ Sãa bõ-ƴen nyɩ tɛrɛ, a ʋlɔ na be a saa juu. 10Nyɩ taa mɩ ɩ a ba bʋɔlɔ nyɩ a ‘ni-diere’ wa, a-na-ɩ Ni-diere bõ-ƴen nyɩ tɛrɛ, a ʋlɔ ɩ̃ ɩ a *Kirisi, 11A ʋlɔ na ɩ a kpɛ̃ɛ a nyɩ sɔ̃w na ɩ na a nyɩ tʋ̃tʋnɔ. 12Ɩ̃ a ʋlɔ na bʋɔrɔ a yo-yifʋ, a ʋ yuor na suu na, ɩ̃-cɛ a ʋlɔ na pab a ʋ mɩ̃ɛ, a ʋ yuor na do na.”
A JEEJU NA CAALA A JUFISƖ NI-DIERBE
(Mar 12.40, Lu 11.39-42,44,52, 20.47)
13“Nabier na pɔw na a nyɩmɩ *ƴɛr-kpɛn-bɔɔnbɔ na a *Farɩsɩ nɩbɛ. Nyɩ ɩ na bɛbɛlbɛ! A-na-ɩ nyɩ ma piw na a saa juu fãw tɛɛlɛ a nɩbɛ kpɛfʋ ɩnɛ. A nyɩmɩ mɩ̃ɛ ma kpɛɛrɛ wa, ɩ̃ ma mɩ bara a bala na bʋɔrɔ a ba na kpɛ wa.
[ 14“Nabier na pɔw na a nyɩmɩ ƴɛr-kpɛn-bɔɔnbɔ na a Farɩsɩ nɩbɛ. Nyɩ ma ŋmama na a kpɩ̃ɩ-pɔɔbɔ yele diere a jaa, ɩ̃ ma bɛlɩ̃ puoro kama na, a nɩbɛ na nyɛ nyɩ. Ala-ɩ̃-sɔ nyɩ na pɔw na a kpãafʋ ʋ bɛlɩ̃.]
15“Nabier na pɔw na a nyɩmɩ ƴɛr-kpɛn-bɔɔnbɔ na a Farɩsɩ nɩbɛ. Nyɩ ma yʋɔrɔ na a jiir a jaa a ten a jaa pʋɔ, bʋɔrɔ nyɩ lɩɛb nɩ-bõ-ƴen ʋ puoro a nyɩ kaarɩ̃. Ɩ̃-cɛ a ʋlɔ wa sɔw, nyɩ ma maal ʋ na ʋ ɩ nɩrɛ na sɛw na a wɛfʋ vũu pʋɔ kpɛfʋ, gãw nyɩ gbɛɛ ayi.
16“Nabier na pɔw na a nyɩmɩ tɔtɔɔrbɔ. Nyɩ ɩ na jɔn. Nyɩ ma yelʼã, áa nɩrɛ wa pɔ na a Naaŋmɩn puor-yir kpɛ̃ɛ, áa nyɔwrɔ ʋ wa, ɩ̃-cɛ a ʋlɔ wa pɔ na a sɛlmɛ ʋlɔ na be a Naaŋmɩn puor-yir kpɛ̃ɛ pʋɔ, áa na nyɔw ʋ na. 17Nyɩ ɩ na gẽgemsɩ na jɔn! Buor ɩ̃ ɩ a kpɛ̃ɛ? A sɛlmɛ ʋ mɩɩ a Naaŋmɩn puor-yir kpɛ̃ɛ na lɩɛb ʋ ʋ ɩ a bõ-ciiraa? 18Nyɩ ma lɛ yelʼã, áa nɩrɛ wa pɔ na a baar lofʋ jie, áa nyɔwrɔ ʋ wa, ɩ̃-cɛ a ʋlɔ wa pɔ na a baar-lo-bom, áa na nyɔw ʋ na. 19Nyɩna jɔn naa! Buor ɩ̃ ɩ a kpɛ̃ɛ? A baar-lo-bom ʋ mɩɩ a baar lofʋ jie na maal ʋ ʋ ɩ a bõ-ciiraa? 20Ala-ɩ̃-sɔ, a ʋlɔ na pɔ na a baar lofʋ jie, ʋ pɔ na na a ʋlɔ na a baar-lo-yele a jaa na be a ʋ juu. 21Ɩ̃ a ʋlɔ na pɔ na a Naaŋmɩn puor-yir kpɛ̃ɛ, ʋ pɔ na na a yir na a Naaŋmɩn. 22A ʋlɔ mɩ na mɩ pɔ na a saa juu, ʋ pɔ na na a Naaŋmɩn tẽw na a Naaŋmɩn na be a be.
23“Nabier na pɔw na a nyɩmɩ ƴɛr-kpɛn-bɔɔnbɔ na a Farɩsɩ nɩbɛ. Nyɩ ɩ na bɛbɛlbɛ! Nyɩ ma irʼã a Naaŋmɩn ben a nyɩ jɛɛ-yele pʋɔ, wɔ̃ taa na a sãɓaan na a bir na a gbẽ-vaar, ɩ̃ ma lɛ bar a ala na lɛ ɩ a kpɛ̃ɛ a ƴɛr-kpɛn pʋɔ, wɔ̃ taa nɩ a torfʋ, a son ɩfʋ na a dẽdẽ ɩfʋ. A asɩmɛ ɩ̃ dãa sɛw a maalfʋ, ɩ̃-cɛ a yel-bil pãa tuure. 24Nyɩna tɔtɔɔr-jɔn naa! Nyɩ ma corĩ na a dʋ̃bil bar a nyɩ kʋ̃ɔ pʋɔ, ɩ̃ ma lɛ vɔl a nyʋɔmɩ!
25“Nabier na pɔw na a nyɩmɩ ƴɛr-kpɛn-bɔɔnbɔ na a Farɩsɩ nɩbɛ. Nyɩ ɩ na bɛbɛlbɛ! Nyɩ ma pɛw na a nyɩ ŋman na a nyɩ lakpow puo-sɔw bar, ɩ̃-cɛ a ba pʋʋr, a nyɩ nyanyu-yele na a nyɩ burbur maalfʋ ɩ̃ sɛɛr. 26Fʋna Farɩsɩ nɩ-jɔ̃w naa! Pɛw a fʋ ŋman pʋ̃ɔ sɛr, ɩ̃ fʋ na nyɛ na a puo-sɔw ʋ mɩ vɩɛlɛ.
27“Nabier na pɔw na a nyɩmɩ ƴɛr-kpɛn-bɔɔnbɔ nɩ a Farɩsɩ nɩbɛ. Nyɩ ɩ na bɛbɛlbɛ! Nyɩ wɔ̃ na taa nɩ a yar ba na pã a vɩɛlɛ a ꞌwuorfʋ, ɩ̃-cɛ a pʋ̃ɔ a kũu kɔbɔ nɩ a yel-kpansɩ bʋrɔ bʋrɔ ɩ̃ sɛw. 28A nyɩmɩ, a lɛ nyɩ mɩ wɔ̃. A nɩbɛ nii-sɔw nyɩ wɔ̃ na taa nɩ nyɩ torʼã, ɩ̃-cɛ a nyɩ pʋ̃ɔ, nyɩ sɛw nɩ na a bɛlɩ̃fʋ nɩ a maal-faar.
A JEEJU NA MANA A JUFISƖ KPÃAFƲ NA WA TARA
(Lu 11.47-51)
29“Nabier na pɔw na a nyɩmɩ *ƴɛr-kpɛn-bɔɔnbɔ nɩ a *Farɩsɩ nɩbɛ. Nyɩ ɩ na bɛbɛlbɛ! Nyɩ ma mɛ na a dacin kolĩ a Naaŋmɩn ƴɛr-hierbe ũufʋ jiir, ɩ̃ ma mɩ yaarɩ̃ a nɩ-torisɩ yar, 30ɩ̃ ma yel: ‘A ala ɩ sɩ dãa na be ka a sɩ sãa-kʋnbɔ daar, sɩ kɔ̃ɔ dãa pɔw ba lãa kú nɩ a Naaŋmɩn ƴɛr-hierbe wa.’ 31A nyɩ ƴɛrɩ̃sɩ miile na áa bala na dãa kú a Naaŋmɩn ƴɛr-hierbe, á ba bibiir nyɩ ɩ. 32Ɩ̃-cɛ nyɩ́ cãa maala a ala a nyɩ sãa-kʋnbɔ na dãa maala, wa baar! 33Nyɩna wɩɩrʼãa! Nyɩ ɩ na dɔ̃pan bal! Mɩnɛ nyɩ na ɩ ɩ̃ tʋɔ faa a nyɩ mɩ̃ɛ a ƴɛrɩ̃ ʋlɔ jie na wa ƴɔnɔ nyɩ a wɛfʋ vũu pʋɔ? 34Ala-ɩ̃-sɔ nyɩ́ nyɛ, ɩ̃ na tʋ̃ na a Naaŋmɩn ƴɛr-hierbe nɩ a nɩsaa kpaarsɩ nɩ a ƴɛr-kpɛn-bɔɔnbɔ a nyɩ jie. Nyɩ na kú na a ŋmɛɛ, ɩ̃ kpa a ŋmɛɛ yaal a nɩ-kʋ-daa juu, ɩ̃ mɩ fɔb a ŋmɛɛ nɩ a kpaarsɩ a nyɩ *puorfʋ yie pʋʋr, ɩ̃ hʋɔlɔ a ŋmɛɛ go yʋɔrɔ nɩ a ten ten. 35Ala-ɩ̃-sɔ, a Naaŋmɩn kpãafʋ na lo na a nyɩ juu a nɩ-torisɩ bala ba jaa nyɩ na kú a tẽw pʋɔ ɩnɛ, wa nyɔw nɩ a nɩ-toraa Abɛl kúfʋ, wa ta nɩ a Barasɩ bie Jakarɩ nyɩ na dãa kú a Naaŋmɩn puor-yir kpɛ̃ɛ nɩ a baar lofʋ jie sɔɔlɩ̃sɔw. 36Yel-mɩ̃ɛ ɩ̃ yele nyɩ, a ana yele a jaa nyɩ na dãa maal, a ba kpãafʋ na lo na a ƴɛ̃ƴɛrɩ̃ nɩbɛ juu.
A JEEJU NA KÕ A JERUJALƐM ƖNƐ
(Lu 13.34-35)
37“A nyɩmɩ Jerujalɛm tẽ-deme na ma kú a Naaŋmɩn ƴɛr-hierbe, ɩ̃ ma lɔb a bala a Naaŋmɩn na tʋ̃ a fʋ jie nɩ a kubie kúrɔ, gbɛɛ amɩnɛ ɩ̃ dãa bʋɔrɔ ɩ̃ kpaarɩ̃ nyɩ ƴɔ̃w a ɩ̃ pulẽe wɔ̃ taa nɩ a mɩnɛ a nʋ̃ɔ na ma kpaarɩ̃ a ʋ bil ƴɔ̃w a ʋ pɩrɛ pʋɔ, ɩ̃ a nyaa sɔw wa. 38Nyɩ́ nyɛ, a nyɩ yir na lɩɛbʼã ɩ dakpolo. 39Ɩ̃ yele nyɩ na, wa nyɔw nɩ a ƴɛ̃ƴɛrɩ̃, nyɩ kɔ̃ lɛ nyɛ ma wa ta nɩ a lɛdaar nyɩ nɔɔ yele: ‘A Naaŋmɩn ú be nɩ a ʋlɔ na de a Nɩ-kpɛ̃ɛ yuor waara nɩ.’ ”
Đang chọn:
Matie Sɛbɛ 23: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
