Matie Sɛbɛ 22
22
A KUL-TAA FƐTƖ SƲKPA
(Lu 14.15-24)
1A *Jeeju lɛ nyɔw na ɩ̃ lɔbɔ a sʋkpar ƴɛrɛ nɩ ba. 2Ʋ yelʼã: “A saa juu fãw wɔ̃ na taa na a jamana na gbɛɛrɩ̃ a ʋ bi-daba kul-taa fɛtɩ. 3Ʋ tʋ̃ na a ʋ tʋ̃tʋnbɔ a ba cen na yel a bala ʋ na dãa bʋɔl a fɛtɩ ɩnɛ, ɩ̃-cɛ baa bʋɔrɔ a wɩfʋ wa. 4Ʋ lɛ tʋ̃ a tʋ̃tʋ̃-kpeesɩ a ba cen na yel a bala ʋ na bʋɔl a fɛtɩ ɩnɛ: ‘A ma ɩ̃ gbɛɛrɩ̃ na baar. Á ɩ̃ kú na a nadɛɛ nɩ a dʋn karɩ̃sɩ ɩ̃ mɩ cɔɔrɩ̃ a yele a jaa baar. Á ba wa a fɛtɩ jie.’ 5Ɩ̃ aa bá ba wa, a ba jaar Ɩ̃ cere a ba tʋmɔ jie; a bõ-ƴen cenʼã a ʋ puo pʋɔ, ɩ̃ a kãw cen a ʋ ƴab jie, 6ɩ̃ a ŋmɛɛ nyɔɔr a tʋ̃tʋnbɔ bala, kpow ba ɩ̃ kú. 7Ala-ɩ̃-sɔ a jamana nyɛ a suur, ɩ̃ tʋ̃ a ʋ sɔdaalsɩ a ba cen na mɩ kú a bana nɩ-kʋrbɔ, ɩ̃ su a ba tẽw bar, 8ɩ̃ pãa yel a ʋ tʋ̃tʋnbɔ: ‘Ɩ̃ gbɛɛrɩ̃ na a fɛtɩ dɩb baar, ɩ̃-cɛ a bala ɩ̃ na bʋɔl ma sɛw na dɩ wa. 9Ala-ɩ̃-sɔ, nyɩ́ cen a nɩbɛ tɔlfʋ jiir, ɩ̃ a nɩrɛ lɛ nyɩ na nyɛrɛ, nyɩ́ bʋɔl ʋ ʋ wa a fɛtɩ jie.’ 10A tʋ̃tʋnbɔ bala yi na cen a sɔɛ pʋʋr ɩ̃ kaal a nɩbɛ ba jaa ba na nyɛ, a nɩ-sono na a nɩ-kpansɩ, a fɛtɩ die sɛw na a nɩbɛ na wɩ a dɩb dɩfʋ.
11“A jamana kpɛ na a die pʋɔ ʋ ꞌwuor a dɩb-dɩrbɛ kãa, ɩ̃ ʋ nyɛ na daba kãw be na ma su a fɛtɩ kparʋ wa, 12ʋ yel ʋ: ‘Ɩ̃ baraa, mɩnɛ fʋ ɩ ɩ̃ kpɛ a ka ɩ̃ ma su a fɛtɩ kparʋ wa?’ A daba sine. 13A jamana yel a ʋ tʋ̃tʋnbɔ: ‘Nyɩ́ nyɔw ʋ, lũ a gbɛɛ na a nur, lɔb ʋ bar a yẽw a libe pʋɔ, a jie ʋlɔ a nɩbɛ na kono nyɩrɛ na a nyɩmɛ.’ 14A-na-ɩ a bala ba na bʋɔl waa na, ɩ̃ a bala ba na vɛl ir pabʼã.”
A OROM JAMAN-KPƐ̃Ɛ LÃPO ƳƐRƖ̃
(Mar 12.13-17, Lu 20.20-26)
15A ala ɩ̃ baar, a *Farɩsɩ nɩbɛ cenʼã na guor taa a mɩnɛ ba na ɩrɛ ɩ̃ lɩɛbɛ nyɔwrɔ a *Jeeju na a ʋ ƴɛrɩ̃sɩ. 16Ba tʋ̃ na a ba *par-tuurbe ŋmɛɛ na a *Ɛrɔdɩ nɩbɛ, a ba cen na yel a Jeeju:
“Jãjaana, sɩ bɔ̃w ka fʋ ɩ na a yel-mɩ̃ɛ sʋbɔ ɩ̃ mɩ jaana a nɩbɛ a Naaŋmɩn sɔr na yel-mɩ̃ɛ. Faa ꞌwuoro a nɩbɛ kpee kpee wa, a-na-ɩ fʋ maa ꞌwuor a ala a nɩrɛ na ɩ wa. 17Yel sɩ a ala fʋ na tɩɛrɛ. Sɔr be na be a sɩ na ya a lãpo kʋ a Orom jaman-kpẽɛɛ, mɩɩ sɔr ma be be wa?” 18Ɩ̃ a mɩnɛ a Jeeju na bɔ̃w a ba tɩɛrɩ̃-faar, ʋ yel ba na:
“Nyɩna poe ayi deme naa, bõ ɩnɛ nyɩ bʋɔrɔ nyɩ bɩɩr ma a lɛ? 19Nyɩ́ ir a libir ʋlɔ ba na ma ya a Orom jaman-kpɛ̃ɛ ɩ̃ je-kãa.” A ba ir, wɩ na kʋ ʋ, 20ʋ soor ba:
“Ala nii-sɔw na ala yuor ɩ̃ be tɔ?” 21A ba yel:
“A Orom jaman-kpɛ̃ɛ ʋ.” Ʋ yel ba:
“Ala-ɩ̃-sɔ, nyɩ́ kʋrɔ a Orom jaman-kpɛ̃ɛ a ala na ɩ a Orom jaman-kpɛ̃ɛ ben, ɩ̃ mɩ kʋrɔ a Naaŋmɩn a ala na mɩ ɩ a Naaŋmɩn ben.” 22A mɩnɛ ba na wõ a ala, a nʋɔr ko ba na, a ba bar ʋ ɩ̃ cere.
A KŨU-PƲƆ-IRFƲ ƳƐRƖ̃ MANFƲ
(Mar 12.18-27, Lu 20.27-40)
23A ʋna bibir bõ-ƴen naa pʋɔ, a *Saduse nɩbɛ na ma yel áa kũu-pʋɔ-irfʋ ma be be wa, taw na ta a *Jeeju ɩ̃ man ʋ a nɔhɔ̃:
24“Jãjaana, a Mowisi dãa na yel sɩ, áa nɩrɛ wa kul a pɔw, ɩ̃ ma dɔw a bie wa, ɩ̃ kpi, á v yɛbɛ sɛw na na de a kpɩ̃ɩ-pɔw dɔw a bibiir a v yɛbɛ yuor ɩnɛ. 25Yɛɛr anuu-nʼayi dãa na be ka a sɩ sɔ̃w. A dãdãw sʋbɔ kulʼã a pɔw, ɩ̃ ma dɔw a bie wa, ɩ̃ kpi ɩ̃ bar a kpɩ̃ɩ-pɔw, a ʋ yɛbɛ de kul. 26A lɛ a mɩ wɔ̃ na a ʋ tuuraa, na a gbɛɛ ata sʋbɔ, wa ta na a ba jaa anuu-nʼayi, 27ɩ̃ a pɔw wa bɩɛr kpi.” 28A Saduse nɩbɛ bala pãa soor a Jeeju:
“A kũusɩ irfʋ daar wa ta, ala na sɔ a pɔw? A-na-ɩ a ba jaa dãa na tɛrɛ v.” 29A Jeeju yel ba:
“Nyɩ bɔrʼã, a-na-ɩ nyaa bɔ̃w a Naaŋmɩn Sɛbɛ ƴɛrɩ̃sɩ par na a Naaŋmɩn tʋɔfʋ wa. 30A kũusɩ wa ir a kũu pʋɔ, a dabsɩ na a pɔɔbɔ ma lɛ kule taa wa, ɩ̃-cɛ ba na be na be wɔ̃ taa na a saa juu sɩ-tʋnɩsɩ. 31Ɩ̃-cɛ a ala ɩ̃ ɩ a kũu-pʋɔ-irfʋ ƴɛrɩ̃ v, nyaa dãa ꞌwuor a ƴɛr-bir ʋlɔ a Naaŋmɩn na yel nyɩ a v Sɛbɛ pʋɔ wa mɩɩ? Ʋ yelʼã: 32‘Maa ɩ̃ ɩ a Abʋraham, na a Ɩjakɩ, na a Jakɔb Naaŋmɩn.’ A Naaŋmɩn ma ɩ nɩ-kpɩmɛ Naaŋmɩn wa. Nɩ-mimie Naaŋmɩn ʋ ɩ.” 33A lɛ a bana nɩ-yaw na wõ a v jaanfʋ, nʋɔr ko ba na.
A ƳƐR-KPƐ̃W ƲLƆ NA Ɩ A KPƐ̃Ɛ
(Mar 12.28-34, Lu 10.25-28)
34Ɩ̃ a lɛ a *Farɩsɩ nɩbɛ na wõ áa *Jeeju kpalʼã a *Saduse nɩbɛ nʋɔr, ba tiw na taa guor taa, 35ɩ̃ ir bõ-ƴen na ɩ a *ƴɛr-kpɛn-bɔ̃wnɔ, a v bɩɩr a Jeeju. Ʋ soor v na:
36“Jãjaana, a ƴɛr-kpɛn pʋɔ, buor ɩ̃ ɩ a kpɛ̃ɛ?” 37A Jeeju yel v:
“‘Fʋ na nʋnɔ na a Nɛ-kpɛ̃ɛ na ɩ a fʋ Naaŋmɩn na a fʋ suur v jaa, na a fʋ baafʋ v jaa, na a fʋ tɩɛrʋ̃ a jaa.’ 38A nanɩ ɩ̃ ɩ a ƴɛr-kpɛ̃w na ɩ a kpɛ̃ɛ na a dãdãw. 39A tuuraa mɩ wɔ̃ na a lɛ: ‘Fʋ na nʋnɔ na a fʋ tɔ-sʋbɔ a fʋ mɩ̃ɛ kaarɩ̃.’ 40A basɩmɛ ayi pʋɔ a Mowisi ƴɛr-kpɛn na a Naaŋmɩn ƴɛr-hierbe jaanfʋ a jaa yi.”
ALA BI-DABA A KIRISI Ɩ?
(Mar 12.35-37, Lu 20.41-44)
41A mɩnɛ a *Farɩsɩ nɩbɛ na kpaarɩ̃ taa, a *Jeeju soor ba na a nɔhɔ̃:
42“Bõ nyɩ tɩɛr a *Kirisi ʋ ɩ? Ala bie ʋ?” A ba yel, áa Davɩtɩ bie ʋ. 43Ʋ yel ba:
“A ala ɩ lɛ ʋ, mɩnɛ a ɩ a Davɩtɩ na dãa sɛw na a Naaŋmɩn Sɩɛ lɛ tʋɔ bʋɔl ʋ a ʋ Nɩ-kpɛ̃ɛ? 44A-na-ɩ a Davɩtɩ sɛbʼã a ʋ sɛbɛ pʋɔ:
‘A Nɩ-kpɛ̃ɛ Naaŋmɩn yelʼã a ɩ̃ Nɩ-kpɛ̃ɛ:
Jɛ a ɩ̃ dʋrɩ̃ loor, wa ta na a lɛ ɩ̃ nɔɔ
ƴɔnɔ a fʋ sama-deme a fʋ pulẽe.’
45A ala ɩ a Davɩtɩ bʋɔlɔ ʋ na a ʋ Nɩ-kpɛ̃ɛ, mɩnɛ ʋ na tʋɔ lɛ ɩ a ʋ bie?”
46Nɩ-bõ-ƴen ma lɛ tʋɔ ƴɛrʼɩ̃ a Jeeju wa. Ɩ̃, wa nyɔw na a ʋna bibir, nɩrɛ kãw ma lɛ ꞌla soor ʋ bom go wa.
Đang chọn:
Matie Sɛbɛ 22: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
