Matie Sɛbɛ 21
21
A JEEJU YO-YIFƲ A JERUJALƐM KPƐFƲ DAAR
(Mar 11.1-11, Lu 19.28-40, Jã 12.12-19)
1A lɛ ba na pɩɛlɛ a Jerujalɛm ba ta na a Bɛfaje-tẽw na be a *Olivi-tɩɩr tãw juu, a *Jeeju tʋ̃ a ʋ *par-tuurbe ayi 2ɩ̃ yel ba:
“Nyɩ́ cen a tẽ-bile ʋlɔ na be a nii-sɔw, ɩ̃ a mɩnɛ nyɩ na kpɛɛrɛ nyɩ na nyɛ na a bʋ̃ɔ ba na lũ bar, ʋ ɩraa nɩ a ʋ bile. Nyɩ ꞌlor ba, wa nɩ kʋ ma. 3A nɩrɛ wa soor nyɩ, nyɩ yel ʋ, áa Nɩ-kpɛ̃ɛ ɩ̃ bʋɔrɔ, ɩ̃ a jie naan ʋ na bar nyɩ na a nyɩ waara.” 4A ala maalʼã a lɛ, a na ɩ a ala a Naaŋmɩn ƴɛr-hiere na dãa yele:
5“Nyɩ́ yel a *Sɩ̃ɔ-tẽw nɩbɛ:
Nyɩ́ nyɛ a nyɩ jamana na waara a nyɩ sɛ̃!
Su-ɓaar sʋbɔ ʋ, ɩ̃ do a bʋ̃ɔ juu,
a bʋ̃-bile a bʋ̃ɔ na dɔw.”
6A Jeeju par-tuurbe cen na maal a ala ʋ na man ba. 7Ba taw na a bʋ̃ɔ nɩ a ʋ bile wa nɩ a ʋ sɛ̃, ɩ̃ de a ba cẽcene dɔɔl a ba jur, ʋ do jɛ. 8A nɩ-yayaw yɛrɛ na a ba kparsɩ pɔwrɔ a sɔr, ɩ̃ a nɩŋmɛɛ ŋmara a tɩɩr wulbie yɛrɛ pɔwrɔ a sɔr. 9A nɩbɛ bala na de a Jeeju nĩe nɩ a bala na tuure, cɩlɛ na pɛwrɛ nɩ ʋ: “Davɩtɩ Bie, *Oojana!” “A Nɩ-kpɛ̃ɛ Naaŋmɩn ú be nɩ a ʋlɔ na waara nɩ a ʋ yuor!” “A Naaŋmɩn na be a saa juu, Oojana!”
10Ɩ̃ a mɩnɛ a Jeeju na kpɛ a Jerujalɛm, a tẽw dama na ʋ jaa, a ba sooro:
“Ala nɩ a nanɩ?”, 11a nɩ-yaw bala yel:
“A Naaŋmɩn ƴɛr-hiere Jeeju ʋ, a ʋlɔ na yi a Najarɛtɩ-tẽw a Galile wɩɛr.”
A JEEJU NA KPƐ A NAAŊMƖN YIR PƲƆ
(Mar 11.15-19, Lu 19.45-48, Jã 2.13-22)
12A *Jeeju kpɛ na a Naaŋmɩn puor-yir kpɛ̃ɛ pʋɔ ɩ̃ diw a bala ba jaa na ƴaba nɩ a bala na daara a yele a be, mɩ cãgbalɩ̃ nɩ a bala na tɛwrɛ a libie tabalsɩ bar, nɩ a bala na ƴaba a naŋmama dakɔɔr, 13ɩ̃ yel ba:
“A sɛbʼã a Naaŋmɩn Sɛbɛ pʋɔ: ‘A ɩ̃ yir na dɩ na a Naaŋmɩn puor-yir kpɛ̃ɛ,’ ɩ̃-cɛ a nyɩ de ʋ maal ʋ ɩ nyanyube sɔɔlɩ̃fʋ jie.”
14Ɩ̃ a jɔn nɩ a gbɛɛ taw na ta ʋ a be a Naaŋmɩn puor-yir kpɛ̃ɛ pʋɔ ʋ kpaar ba. 15Ɩ̃-cɛ a mɩnɛ a Naaŋmɩn *baar-lo-nɩ-bɛrɛ nɩ a *ƴɛr-kpɛn-bɔɔnbɔ na nyɛ a ana nɔ-kofʋ tʋmɔ ʋ na maala, ɩ̃ mɩ wõ a mɩnɛ a bibiir na cɩlɛ a Naaŋmɩn puor-yir kpɛ̃ɛ pʋɔ puoro nɩ ʋ, á Davɩtɩ Bie, á *Oojana, a tɔ ba na, 16a ba soor ʋ:
“Fʋ wonaa na a ala a bibiir na yele?” A Jeeju sɔw, ɩ̃ soor ba:
“Nyaa dãa ꞌwuor a Naaŋmɩn Sɛbɛ pʋɔ a mɩnɛ a na yel: ‘Fʋ ƴɔ̃w na a bibi-bil nɩ a bi-pɩɩlsɩ a ba na tʋɔ pɛwrɛ fʋ’ wa mɩɩ?” 17Ɩ̃ ʋ bar ba na ɩ̃ yi a tẽw pʋɔ, cen a Betani na gã a be.
A JEEJU NA PƆ ƳƆ̃W A FƖGƖ TƖƐ
(Mar 11.12-14,20-24)
18A dʋ̃ꞌwʋlɩ̃ ɓaaraa, a mɩnɛ ʋ na lɩɛb cere a tẽw pʋɔ, a kɔ̃ nyɔw ʋ na, 19ʋ nyɛ a fɩgɩ tɩɛ ʋ ɩraa a sɔr nʋɔr, ʋ taw ta ɩ̃ nyɛ ʋ tɛrɛ a vɛɛ tɛw, ʋ yel a tɩɛ:
“Fʋ kɔ̃ lɛ tɛrɛ wɔmɔ fɩ̃ɩ go wa!” A jie naan a fɩgɩ tɩɛ ko ʋ jaa ɩraa. 20A ʋ *par-tuurbe nyɛ a lɛ, a nɔɛ ko ba, a ba soor ʋ:
“Mɩnɛ a fɩgɩ tɩɛ wa ɩ ɩ̃ ko a jie naan a lɛ?” 21A *Jeeju yel ba:
“Yel-mɩ̃ɛ ɩ̃ yele nyɩ, a ala ɩ̃ ɩ nyɩ tɛrɛ na a ƴɔ̃w-nyãa, ɩ̃ ma baala wa, aa ɩ a ala ɩ̃ na maal a fɩgɩ tɩɛ tɛw nyɩ na maala wa, ɩ̃-cɛ nyɩ na ma tʋɔ na yel a tãw naa, á ʋ aw cen na lo a man kʋ̃ɔ pʋɔ, ɩ̃-cɛ a na ma maalʼã a lɛ. 22A bom jaa lɛ nyɩ na sʋɔrɔ a Naaŋmɩn jie na a ƴɔ̃w-nyãa nyɩ na pɔw na.”
A JEEJU TƲƆFƲ YIFƲ JIE
(Mar 11.27-33, Lu 20.1-8)
23A *Jeeju kpɛ na a Naaŋmɩn puor-yir kpɛ̃ɛ pʋɔ ɩ̃ jaana a nɩbɛ, ɩ̃ a *baar-lo-nɩ-bɛrɛ na a Jufisɩ ni-dierbe wɩ na na soor ʋ:
“Tʋɔfʋ buor fʋ maala na a yele asɩmɛ? Ala ɩ̃ kʋ fʋ a tʋɔfʋ ʋlɔ?” 24A Jeeju yel ba:
“Ɩ̃ na mɩ soor nyɩ na bom bõ-ƴen. A nyɩmɩ wa kʋ ma a sɔwfʋ, ɩ̃ na mɩ miil nyɩ na a tʋɔfʋ buor ɩ̃ na maala na a yele asɩmɛ. 25A Jã-Batii kʋ̃ɔ mʋrfʋ, nyɩnɛ ʋ yi? A Naaŋmɩn jie ʋ mɩɩ a nɩbɛ jie ʋ?” A ba nyɔw ɩ̃ pɛrɛ ƴɔnɔ taa yele na:
“A sɩmɩ yel á Naaŋmɩn jie ʋ yi, ʋ na soor sɩ na, ɩ̃-cɛ mɩnɛ saa tɩɛrɛ ʋ wa? 26A sɩmɩ lɛ yel ʋ, á nɩbɛ jie ʋ yi, sɩ jɔrɔ na a nɩbɛ dãbɩ̃ɛ, a-na-ɩ ba jaa sɔw na de ʋ ʋ ɩ a Naaŋmɩn ƴɛr-hiere.” 27A ba yel a Jeeju:
“Saa bɔ̃w wa.” A Jeeju mɩ lɩɛb yel ba:
“A maa mɩ, maa mɩ yele nyɩ a tʋɔfʋ buor ɩ̃ na maala na a yele asɩmɛ wa.”
A BI-DABSƖ AYI SƲKPA
28“Mɩnɛ nyɩ tɩɛr a ƴɛrɩ̃ nanɩ pʋɔ? Daba dãa na be be na tɛrɛ bi-dabsɩ ayi. Ʋ wa taw na ta a dãdãw sʋbɔ ɩ̃ yel ʋ: ‘Ɩ̃ bi-daba, cen na tʋ̃ a tʋmɔ a dɩvɛ̃ tur puo pʋɔ a dɩnaa.’ 29Ʋ yel: ‘Maa tʋɔrɔ cere wa.’ Ɩ̃ a fɩ̃ɩ pʋɔ ʋ lɩɛbʼã a tɩɛrʋ̃ ɩ̃ cen a puo pʋɔ. 30A sãa lɛ taw ta a gbɛɛ ayi sʋbɔ ɩ̃ mɩ yel. Ʋ a lɛ. Ʋ yel á ‘ɔɔ,’ á ʋ na cenʼã, ɩ̃ ma cen wa. 31Buor sʋbɔ ɩ̃ maal a ʋ sãa pʋ-tɩɛrʋ̃?” A bana Jufisɩ ni-dierbe yel áa dãdãw sʋbɔ ʋ. A *Jeeju yel ba:
“Yel-mɩ̃ɛ ɩ̃ yele nyɩ, a lãpo-dierbe na a pɔw-baar diere nyɩ na a nĩe a Naaŋmɩn fãw pʋɔ. 32A-na-ɩ a Jã wɩ na a nyɩ sɛ̃ miil nyɩ a torfʋ sɔr, ɩ̃ a nyaa tɩɛrɛ ʋ wa, ɩ̃-cɛ a bala na ɩ a lãpo-dierbe na a pɔw-baar, bala tɩɛrɛ v. Ɩ̃ a mɩnɛ nyɩ na nyɛ a ala, nyaa mɩ lɩɛb a nyɩ yɛ̃ ɩ̃ tɩɛrɛ v wa.”
A TƲ̃TƲ̃-BEBE SƲKPA
(Mar 12.1-12, Lu 20.9-19)
33“Nyɩ́ cɛlɛ a sʋkpa ƴen sʋbɔ. Yi-kpɛɛrɛ kãw dãa na be be na sɛl a dɩvɛ̃ tur a ʋ puo pʋɔ ɩ̃ wɔw pɔw kolĩ, ɩ̃ mɩ tuu a bɔw ʋ ɩ a tur ala wɔmɔ nɛbfʋ jie, mɩ mɛ na a yel-gure jaajie, ɩ̃ pãa de a tʋ̃tʋnbɔ ƴɔ̃w a puo pʋɔ ɩ̃ cen jie kãw. 34Ɩ̃ a mɩnɛ a tɩ-wɔmɔ daar na ta, a yi-kpɛɛrɛ tʋ̃ na a ʋ tʋ̃tʋnbɔ a ba cen a po-ꞌwuorbo bala jie na de a ʋ tɩ-wɔmɔ wa na kʋ ʋ. 35Ɩ̃-cɛ a po-ꞌwuorbo nyɔɔr ba na, fɔb a ƴen sʋbɔ, ɩ kú a kãw, ɩ̃ lɔb a bõ-ƴen na kubie. 36Ʋ lɛ tʋ̃ a ʋ tʋ̃tʋnbɔ ŋmɛɛ na waa gãw a dãdãw deme, ɩ̃ a ba lɛ maal ba a lɛ go. 37A ala ɩ̃ baar, ʋ pãa na tʋ̃ a ʋ bi-daba ɩ̃ yel: ‘Ba na jɔ na a ɩ̃ bi-daba.’ 38Ɩ̃ a mɩnɛ a po-ꞌwuorbo na nyɛ a bi-daba, ba yelʼã taa: ‘Nyɩ́ nyɛ a ʋlɔ na ɩ a gã-diere. Nyɩ́ ɩ a sɩ kú ʋ bar, ɩ̃ tɛrɛ a ʋ gãw.’ 39Ɩ̃ ba nyɔw ʋ na, taw yi na a puo pʋɔ, ɩ̃ kú ʋ.” 40Ɩ̃ a *Jeeju soor ba:
“A lɛ a puo sʋbɔ nɔɔ lɩɛbɛ waara, bõ ʋ na maalʼɩ̃ a po-ꞌwuorbo bala?” 41A ba yel ʋ:
“A bana nɩ-bebe, a ba baarfʋ daar na hierʼã. Ɩ̃ ʋ na de na a dɩvɛ̃ tur puo kʋ a nɩ-kpeesɩ na sɔwrɔ kʋrɔ ʋ a ʋ wɔmɔ a yomo a jaa.” 42A Jeeju lɛ soor ba:
“Nyaa dãa ꞌwuor nyɛ a mɩnɛ a na sɛb a Naaŋmɩn Sɛbɛ pʋɔ wa?
‘A kubir ʋlɔ a dacin-mɩɛrbɛ na dãa jaar bar
lɩɛbʼã ɩ a dacin gbɛr kubir kpɛ̃ɛ. A Nɩ-kpɛ̃ɛ
maalʼã a lɛ, a sɩ na nyɛ a nyɩrɩ̃ vɩɛlɛ.’
43Ala-ɩ̃-sɔ ɩ̃ yele nyɩ na, ba na ir nyɩ na bar a Naaŋmɩn fãw pʋɔ, ɩ̃ cɛ bar kʋ a nɩ-kpeesɩ na maala a Naaŋmɩn pʋ-tɩɛrʋ̃. [ 44Ɩ̃ a ʋlɔ nɔɔ loro a kubir ʋlɔ juu, ʋ na ŋmɛrʼã pũpurĩ, ɩ̃ a ʋlɔ juu a kubir ʋlɔ nɔɔ loro, ʋ na pũpurĩ ʋ na, ʋ lɩɛb ɩ a tãbuulĩ.”]
45Ɩ̃ a lɛ a *baar-lo-nɩ-bɛrɛ na a *Farɩsɩ nɩbɛ na wõ a Jeeju sʋkpar, ba bɔ̃w na ka a bala ʋ ƴɛrɛ, 46ɩ̃ bʋɔrɔ a sɔr a ʋ nyɔwfʋ, ɩ̃-cɛ a dãbɩ̃ɛ nyɔw ba a nɩ-yaw ɩnɛ, a-na-ɩ a ba jaa de na a Jeeju ʋ ɩ a Naaŋmɩn ƴɛr-hiere.
Đang chọn:
Matie Sɛbɛ 21: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
