Matie Sɛbɛ 20
20
A DƖVƐ̃ TƖƖR PUO TƲ̃TƲNBƆ SƲKPA
1“A-na-ɩ a saa juu fãw wɔ̃ na taa nɩ a da-yi-kpɛɛrɛ na yi a dʋ̃ꞌwʋlɩ̃ ɓaaraa bʋɔrɔ a tʋ̃tʋnbɔ ƴɔnɔ a ʋ dɩvɛ̃ tɩɩr puo pʋɔ. 2Ɩ̃ a mɩnɛ ʋ na nyɛ ba, a ba sɔr taa a libie ala na sɛw nɩ a bibir bõ-ƴen tʋn, ʋ ƴɔ̃w ba na a ba cen a ʋ puo pʋɔ. 3Ʋ lɛ yi na a mɩnɛ a mɔtɔ̃w na pur duoro, na ʋ lɛ nyɛ a nɩbɛ ŋmɛɛ a ba ɩraa a daa pʋɔ a pɔrɔ, 4ʋ yel ba: ‘A nyɩmɩ mɩ, nyɩ́ cen a dɩvɛ̃ tɩɩr puo pʋɔ ɩ̃ ɩ̃ na ya nyɩ na a ala na sɛw nyɩ,’ 5a ba cen. A ʋna yi-kpɛɛrɛ lɛ yi na a mɔtɔ̃-tuo nɩ a mɔtɔ̃w gɔrfʋ daar lɛ maal a lɛ go. 6A mɔtɔ̃w balfʋ daar, ʋ lɛ yi na nyɛ a nɩŋmɛɛ a ba ɩraa, ʋ soor ba: ‘Bõ ɩ a nyɩ ɩraa a ka a mɔtɔ̃w jaa a pɔrɔ?’ 7A ba yel ʋ: ‘A-na-ɩ saa tɛrɛ tʋn wa.’ Ʋ yel ba: ‘A nyɩmɩ mɩ, nyɩ́ cen a ɩ̃ dɩvɛ̃ tɩɩr puo pʋɔ.’
8“A lɛ a jaanʋɔr na ta, a yi-kpɛɛrɛ yelʼã a ʋlɔ na ꞌwuoro a ʋ tʋmɔ á ʋ bʋɔl a tʋ̃tʋnbɔ ɩ̃ ya ba. A ʋ de nĩe ya a par-pɔɔrbɔ, wa ta nɩ a bala na dãa de nĩe cen. 9A bala na bɩɛr cen a mɔtɔ̃w balfʋ daar, ba mɩ pɔw na a bibir bõ-ƴen yar nɩ a dʋ̃ꞌwʋlɩ̃ deme. 10Ɩ̃-cɛ a mɩnɛ ʋ na ya wa ta a dãdãw nɩbɛ, ba tɩɛrʼã beeka a ba yar na gãw na a lɛ, ɩ̃-cɛ a bala mɩ, a ʋna yar bõ-ƴen ba mɩ pɔw ba jaa. 11A lɛ ba na pɔw a ba libie baar, ba hũhune na a yi-kpɛɛrɛ 12yele nɩ: ‘A basɩmɛ na bɩɛr wɩ, a lɛɛr-bõ-ƴen tʋn ba tʋ̃ ɩ̃ a fʋ ya ba a sɩ jɛ̃ tar, ɩ̃-cɛ a sɩmɩ, a mɔtɔ̃w jaa sɩ tʋ̃ a tʋn a mɔtɔ̃w wõ sɩ.’ 13Ɩ̃ a yi-kpɛɛrɛ yelʼã a kãw: ‘Ɩ̃ baraa! Maa bɛlɩ̃ fʋ wa. Aa ɩ a nɔhɔ̃ sɩ dãa sɔr taa wa? 14De a fʋ ben cere nɩ. A nʋmɔ ma na ɩ̃ na kʋ a ʋlɔ na bɩɛr cen a mɩnɛ ɩ̃ na mɩ kʋ fʋ. 15Maa tɛrɛ sɔr na maalʼɩ̃ a ɩ̃ yele a mɩnɛ ɩ̃ na ƴɔ̃w nyãa wa? Mɩɩ nyuur fʋ tɛrɛ a ɩ̃ pʋ-pɩlaa ɩnɛ?’ ”
16Ɩ̃ a *Jeeju pãa yel:
“A nɔhɔ̃ a nɔɔ wɔ̃. A par-pɔɔrbɔ nɔɔ ɩ na a ni-dierbe, ɩ̃ a ni-dierbe lɛ ɩ a par-pɔɔrbɔ.”
A JEEJU GBƐƐ ATA ƳƐRƖ̃ A Ʋ KŨU ƖNƐ
(Mar 10.32-34, Lu 18.31-34)
17A lɛ a *Jeeju na duoro a Jerujalɛm, ʋ ŋmaa na a ʋ *par-tuurbe pie-nʼayi kpee ɩ̃ mana kʋrɔ ba cere nɩ:
18“Nyɩ́ nyɛ, sɩ duoro na a Jerujalɛm, ɩ̃ ba na nyɔw na a *Nɩbɛ Bie ƴɔ̃w a Naaŋmɩn *baar-lo-nɩ-bɛrɛ nɩ a *ƴɛr-kpɛn-bɔɔnbɔ nuu pʋɔ, ɩ̃ a bala, ba na ƴɔ̃w na a ba na kʋ ʋ, 19ɩ̃ taw ʋ cenʼɩ̃ na kʋ a nɩ-bʋlsɩ a ba na la ʋ, ɩ̃ fɔb v nɩ a kpaarsɩ, ɩ̃ kpa ʋ a nɩ-kʋ-daa juu, ɩ̃-cɛ a bibie ata pʋɔ v na lɛ irʼã a kũu pʋɔ.”
A KPƐ̃Ɛ ƖFƲ A NAAŊMƖN BIBIIR JIE
(Mar 10.35-45)
20A Jebede pɔw taw na a v bi-dabsɩ cenʼɩ̃ a *Jeeju sɛ̃, ɩ̃ lo gburĩ a dume bʋɔrɔ ʋ sʋɔr ʋ bom. 21A Jeeju soor v:
“Bõ fʋ bʋɔrɔ?” Ʋ yel:
“A ɩ̃ bi-dabsɩ ayi basɩmɛ fʋ na nyɛ, sɔw a bõ-ƴen na jɛ a fʋ dʋrɩ̃ loor ɩ̃ a kãw a fʋ gʋbaa loor a lɛdaar fʋ na ɩrɛɛ a jamana.” 22A Jeeju yel ba:
“Nyaa bɔ̃w a ala nyɩ na sʋɔrɔ wa. Nyɩ na tʋɔ na nyu nɩ a ŋman tuo ʋlɔ ɩ̃ na wa nyuure nɩ mɩɩ?” A ba yel á ɔɔ, á ba na tʋɔ na. 23A Jeeju lɛ yel ba:
“Nyɩ na sɩrɩ̃ na nyu nɩ a ɩ̃ ŋman tuo ʋlɔ; ɩ̃-cɛ a ɩ̃ dʋrɩ̃ nɩ a ɩ̃ gʋbaa loor jɛfʋ, aa ɩ maa sɛw na tɩɩr wa. A na ɩ na a bala ɩnɛ a ɩ̃ Sãa na gbɛɛrɩ̃.”
24A lɛ a *par-tuurbe pie ŋmɛɛ na wõ a ala, nyuur nyɔw ba na a ba yɛɛr ayi bala ɩnɛ. 25A Jeeju bʋɔl ba ba jaa ɩ̃ yel:
“Nyɩ bɔ̃w ka a ten bʋrɔ bʋrɔ jamansɩ ma fɛrɛ na a ba nɩbɛ, ɩ̃ a ba nɩ-bɛrɛ ma fule ba. 26Ɩ̃ aa ɩ lɛ a na wɔ̃ a nyɩ jie wa. Ɩ̃-cɛ a nɩrɛ ʋlɔ na ɛ̃ɛ bʋɔrɔ v ɩ a kpɛ̃ɛ a nyɩ pʋɔ, v sɛw na na ɩ a nyɩ tʋ̃tʋnɔ, 27ɩ̃ a ʋlɔ na bʋɔrɔ v ɩ a dãdãw sʋbɔ, v sɛw na na ɩ a nyɩ gbãgbaa. 28A-na-ɩ a *Nɩbɛ Bie ma mɩ wa a ba na tʋnɔ kʋrɔ v wa, ɩ̃-cɛ v wa na na tʋnɔ kʋrɔ a nɩbɛ ɩ̃ naa v tɩɩr a v baafʋ tɛ̃w nɩ a nɩ-yaw baafʋ ɩ̃ faa ba.”
A JEEJU NA KPAAR A JƆN AYI
(Mar 10.46-52, Lu 18.35-43)
29A mɩnɛ ba na yire a Jeriko-tẽw pʋɔ, a nɩ-yaw tuure v na. 30Jɔn ayi jɛ na be a sɔr nʋɔr, ɩ̃ a mɩnɛ ba na wõ áa *Jeeju ɩ̃ tɔlɔ, ba wuure na yele nɩ:
“Nɩ-kpɛ̃ɛ yaa! *Davɩtɩ Bie wee! Bɔ̃w sɩ nãw!” 31Ɩ̃ a nɩbɛ tana ba yele nɩ á ba sine gɔn, ɩ̃-cɛ a ba jaar ɩ̃ wuure nɩ kpɛ̃w:
“Nɩ-kpɛ̃ɛ yaa! Davɩtɩ Bie wee! Bɔ̃w sɩ nãw!” 32A Jeeju ɩraa, ɩ̃ bʋɔl ba soor:
“Bõ nyɩ bʋɔrɔ ɩ̃ maal nyɩ?” 33a ba yel:
“Nɩ-kpɛ̃ɛ, maal a sɩ mimie a nyɛrɛ,” 34a nãw nyɔw a Jeeju, v sɩɩr a ba mimie, a ba lɛ nyɛrɛ a jie naan ɩ̃ tuure ʋ.
Đang chọn:
Matie Sɛbɛ 20: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
