Matie Sɛbɛ 19
19
A PƆW DIW-BARFƲ ƳƐRƖ̃
(Mar 10.1-12)
1A mɩnɛ a *Jeeju na baar a ana jaanfʋ, ʋ yi na a Galile wɩɛr ɩ̃ cen na ta a Jude wɩɛr nʋɔr a Jʋrdɛ̃ man gaan. 2A nɩ-yaw tuure ʋ na ʋ kpaar a wʋlɩ̃sɩ deme a be.
3A *Farɩsɩ nɩbɛ ŋmɛɛ taw na ta ʋ, bɩɩrɛ ʋ yele nɩ:
“Sɔr be na be a nɩrɛ na tʋɔ diw a ʋ pɔw bar bom kãw ɩnɛ lɛ mɩɩ?” 4Ʋ mɩ lɩɛb soor ba:
“Nyaa ꞌwuor nyɛ a mɩnɛ a na yel a Naaŋmɩn Sɛbɛ pʋɔ wa? Áa korĩ-cɛ jaa a ʋlɔ na ɩ a Yel-mɩɛrɛ mɛ ba na a daba nɩ a pɔw, 5ɩ̃ yel, áa ala ɩnɛ a daba na barʼã a ʋ sãa nɩ a ʋ mã, ɩ̃ mar taa nɩ a ʋ pɔw a ba lɩɛb ɩ nɩ-bõ-ƴen. 6A lɛ, baa lɛ cãa ɩ ayi go wa, ɩ̃-cɛ nɩ-bõ-ƴen ba ɩ. Ala-ɩ̃-sɔ, a nɩrɛ ʋ taa wa ŋmara a ala a Naaŋmɩn na ɓã taa bar wa.” 7A Farɩsɩ nɩbɛ lɛ soor ʋ:
“Ɩ̃ bõ ɩnɛ a Mowisi ƴɔ̃w sɩ a sɩ ma kʋ a pɔw a diwfʋ sɛbɛ ɩ̃ pãa diw ʋ bar?” 8A Jeeju yel ba:
“A Mowisi kʋ nyɩ na a sɔr a nyɩ ma diw a nyɩ pɔɔbɔ bar, a-na-ɩ a nyɩ sube kpɛmɛ na. Ɩ̃-cɛ a korĩ-cɛ, aa dãa be a lɛ wa. 9Ɩ̃ yele nyɩ na, a ala ɩ a nɩrɛ diw na a ʋ pɔw bar na ma maala a burbur wa, ɩ̃ lɩɛb kul a pɔw kpee, ʋ maalʼã fãa.”
10A ʋ *par-tuurbe yel ʋ:
“A ala ɩ lɛ a be a daba nɩ a ʋ pɔw jie, a kulfʋ barfʋ sa na.” 11A Jeeju yel ba:
“Aa ɩ a dabsɩ ba jaa ɩ̃ tʋɔrɔ sɔwrɔ a ƴɛrɩ̃ naa wa, ɩ̃-cɛ a bala tɛw a Naaŋmɩn na kʋ a tʋɔfʋ. 12A-na-ɩ a ŋmɛɛ be na be a ba dɔw ba a ba ab, a ŋmɛɛ mɩ be be a ɩ nɩbɛ ɩ̃ maal ba a ba ab, ɩ̃ a ŋmɛɛ mɩ jɛ a lɛ a saa juu fãw ɩnɛ. A ʋlɔ na tʋɔrɔ sɔwrɔ, ú sɔw.”
A JEEJU NƖ A BIBIIR
(Mar 10.13-16, Lu 18.15-17)
13Ɩ̃ ba wɩ nɩ na a bibi-bil a *Jeeju sɛ̃, a ʋ dɔɔl ba a nuu sɩɩrʼɩ̃ a Naaŋmɩn ƴɔ̃w ba, ɩ̃-cɛ a ʋ *par-tuurbe gala ba na. 14A Jeeju lɩɛb yel ba:
“Nyɩ́ bar a bibiir a ba wa a ɩ̃ sɛ̃. Nyɩ taa mɔ̃wnɔ ba bar wa, a-na-ɩ a bala na wɔ̃ a ba kaarɩ̃, bala sɔ a saa juu fãw.” 15Ɩ̃ a mɩnɛ ʋ na dɔɔl ba a nur baar, ʋ irʼã a be cen.
A POLBIL-NÃA ƳƐRƖ̃
(Mar 10.17-31, Lu 18.18-30)
16Daba kãw taw na ta a *Jeeju ɩ̃ soor ʋ:
“Jãjaana, bõ-son buor ɩ̃ na maal wa pɔw a baa-kɔ̃-tɛw?” 17A Jeeju lɩɛb soor ʋ:
“Bõ ɩ a fʋ sooro ma a bõ-son ɩnɛ? Bõ-ƴen tɛw ɩ̃ ɩ a son. Ɩ̃-cɛ a fʋ̃ʋ bʋɔrɔ fʋ pɔw a baafʋ, fú jɔrɔ a ƴɛr-kpɛn.” 18Ʋ soor ʋ, á abõ? A Jeeju yel ʋ:
“Taa kʋrɔ nɩrɛ wa, taa gana nɩ pɔɔ-kpee wa, taa jure wa, taa ŋmara a jir-kara ƴɔnɔ a nɩrɛ wa, 19ƴɔnɔ a fʋ sãa nɩ a fʋ mã, ɩ̃ nʋnɔ a fʋ tɔ-sʋbɔ a fʋ kaarɩ̃.” 20A polbile yel ʋ:
“Ɩ̃ maalʼã a ala a jaa fɛw. Ɩ̃ bõ lɛ cɛ ma go?” 21A Jeeju yel ʋ:
“A fʋ̃ʋ bʋɔrɔ fʋ ɩ a cɛcɛ, cen na woor a fʋ yele da, de a libie po a nãw deme, ɩ̃ wa tuure ma, ɩ̃ fʋ na pɔw na a na-yele a saa juu.” 22A mɩnɛ a polbile na wõ a ana ƴɛrɩ̃sɩ, a ʋ suur sãw ʋ na, ʋ cere, a-na-ɩ naaba ʋ ɩ.
23Ala-ɩ̃-sɔ a Jeeju yel a ʋ *par-tuurbe:
“Yel-mɩ̃ɛ ɩ̃ yele nyɩ, a kpɛmɛ na a naaba na kpɛɛrɛ a saa juu fãw pʋɔ. 24Ɩ̃ lɛ yele nyɩ na, a yɔw na a nyʋɔmɩ na tɔlɔ a mɩsɩn bɔw pʋɔ gãw a naaba na kpɛɛrɛ a Naaŋmɩn fãw pʋɔ.” 25A lɛ a ʋ par-tuurbe na wõ a ala, a ba nɔɛ nyɩrɩ̃ na ko ba a ba yel:
“A ala ɩ lɛ ʋ, ala na tʋɔ pɔw a faafʋ?” 26A Jeeju ꞌwuor ba ɩ̃ yel ba:
“A kpɛmɛ na a nɩbɛ jie, ɩ̃-cɛ a Naaŋmɩn jie bom ma kpɛmɛ wa.” 27A Pɩɛr yel ʋ:
“Nyɛ a sɩmɩ, sɩ barʼã a yele a jaa ɩ̃ tuure fʋ; bõ sɩ nɔɔ wa pɔw?” 28A Jeeju yel ba:
“Yel-mɩ̃ɛ ɩ̃ yele nyɩ, a tẽ-paalaa daar, a lɛ a Nɩbɛ Bie nɔɔ jɩnɛɛ a ʋ yo-yifʋ naa-dakɔw juu, a nyɩmɩ mɩ na tuure ma, nyɩ nɔɔ mɩ jɛ na a naa-dakɔɔr pie-nʼayi jur nyɩ jaa, ɩ̃ guoro a *Ɩsɩrayɛl bal pie-nʼayi ƴɛrɩ̃sɩ. 29Ɩ̃ a bala ba jaa na bar a ba yie, a ba yɛɛr, a ba yɛ-pɔɔbɔ, a ba saanba, a ba mã nʋmɔ, a ba bibiir mɩɩ a ba por, ba nɔɔ pɔw na a dɔɔlaa gbɛɛ kʋbaa, ɩ̃ cãa lɛ pɔw a baa-kɔ̃-tɛw. 30Ɩ̃-cɛ a yaw jie na ɩ a ni-dierbe nɔɔ ɩ na a par-pɔɔrbɔ, ɩ̃ a bala na ɩ a par-pɔɔrbɔ nɔɔ lɛ ɩ na a ni-dierbe.”
Đang chọn:
Matie Sɛbɛ 19: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
