Matie Sɛbɛ 18
18
A ƲLƆ NA Ɩ A KPƐ̃Ɛ
(Mar 9.33-37, Lu 9.46-48)
1A ʋna daarʼãa pʋɔ a *par-tuurbe wɩ na a *Jeeju sɛ̃ na sooro ʋ:
“Ala ɩ̃ ɩ a kpɛ̃ɛ a saa juu fãw pʋɔ?” 2Ʋ bʋɔl a bibile ʋ wa ɩraa a ba nii-sɔw, 3ɩ̃ ʋ yel:
“Yel-mɩ̃ɛ ɩ̃ yele nyɩ, a ala ma ɩ nyɩ lɩɛbʼã wɔ̃ taa nɩ a bibiir basɩmɛ wa, nyaa tʋɔrɔ kpɛɛrɛ a saa juu fãw pʋɔ fɩ̃ɩ wa. 4Ala-ɩ̃-sɔ a ʋlɔ na lɩɛb wur a ʋ mɩ̃ɛ, ɩ̃ wɔ̃ a bibile na kaarɩ̃, ʋlɔ ɩ a kpɛ̃ɛ a saa juu fãw pʋɔ. 5Ɩ̃ a ʋlɔ na sɔw de a bibile kãw a nɔhɔ̃ a ɩ̃ ɩnɛ, a maa ʋ sɔw de a lɛ.
A YELE ALA NA YƆNƆ A NƖBƐ A TULE PƲƆ
(Mar 9.42-48, Lu 17.1-2)
6“A bibile ʋlɔ na ƴɔ̃w ma a nyãa, a ala ɩ a nɩrɛ wa maal ʋ na ʋ lo a tule pʋɔ, a ala ɩ ba lũ na a nɛ-kpɛ̃ɛ ƴɔ̃w ʋ a nyɩɩmɩ, ɩ̃ ɓɔw ʋ lɔb ƴɔ̃w a man pʋɔ ʋ mʋr kpi, a na cãa na sa ʋ. 7Nabier na ta na a tẽw na nɩbɛ jie, a mɩnɛ a ba maal-bie na saa a nɩŋmɛɛ loro a tule pʋɔ. A sɩrɩ̃ na sɛw a ana maal-bie na be, ɩ̃-cɛ nabier na ta na a ʋna nɩrɛ jie na saa.
8“A ala ɩ a fʋ nuu, mɩɩ a fʋ gbɛr ɩ̃ ƴɔnɔ fʋ a tule pʋɔ, fú ŋmaa ʋ lɔb bar, a-na-ɩ a sa na a fʋ na kpɛ a baafʋ pʋɔ nɩ a nu-gãw, mɩɩ a gbɛ-gãw, gãw a nur ayi nɩ a gbɛɛ ayi fʋ na tɛrɛ, ɩ̃ a ba lɔb fʋ ƴɔ̃w a vũu ʋlɔ pʋɔ na ma tɛrɛ a kpiinfʋ wa. 9Ɩ̃ a ala mɩ ɩ a fʋ mimir ƴɔnɔ fʋ a tule pʋɔ, ꞌlow ʋ lɔb bar, a-na-ɩ a sa na a fʋ na kpɛ a baafʋ pʋɔ nɩ a mimi-gãw, gãw a mimie ayi fʋ na tɛrɛ, ɩ̃ a ba lɔb fʋ ƴɔ̃w a wɛfʋ vũu pʋɔ.
A PƐR NA BƆR SƲKPA
(Lu 15.3-7)
10“Nyɩ́ tɛrɛ nyɩ mɩ̃ɛ kɔ̃ wa kpɛrɛ bile bõ-ƴen a bibiir basɩmɛ pʋɔ wa. Ɩ̃ yele nyɩ na a ba sɩ-tʋnɩsɩ na be a saa juu ma ɩraa na a ɩ̃ saa juu Sãa nii-sɔw a daar a jaa. [ 11A-na-ɩ a *Nɩbɛ Bie wa na na faa a bala na dãa bɔr.]
12“Bõ nyɩ tɩɛr? A ala ɩ a nɩrɛ tɛrɛ na a piir kʋbaa, ɩ̃ a bõ-ƴen wa bɔr, ʋ kɔ̃ bar a kʋbaa-for-bir bala a be a tãw juu ɩ̃ suu cen na bɔ a ʋlɔ na bɔr wa mɩɩ? 13Ɩ̃ a ala ɩ ʋ wa nyɛ ʋ na, yel-mɩ̃ɛ ɩ̃ yele nyɩ, ʋ ma cɩlɛ nɩ ʋ na gãw a kʋbaa-for-bir bala na ma bɔr wa. 14A lɛ a be a nyɩ saa juu Sãa nii-sɔw. ꞌWaa mɩ bʋɔrɔ a bibile bõ-ƴen ʋ wa bɔr a basɩmɛ pʋɔ wa.
A YƐBƐ WA MAAL A FÃA
15“A ala ɩ a fʋ yɛbɛ wa maal fʋ na a fãa, cen fʋ yẽ na miil ʋ a ʋ fãa. A ʋlɔ wa sɔw, fʋ pɔw na a fʋ yɛbɛ. 16Ɩ̃-cɛ a ʋlɔ wa jaar, taw nɩrɛ kãw mɩɩ nɩbɛ ayi lɛ cenʼɩ̃, a mɩnɛ a ƴɛrɩ̃sɩ a jaa na yi a nɩbɛ ayi mɩɩ nɩbɛ ata bala jie. 17A ʋlɔ wa cãa jaar a ba ƴɛrɩ̃, fú yel kʋ a *duo-puorbo. Ɩ̃ a ʋlɔ wa mɩ cãa jaar a duo-puorbo ƴɛrɩ̃, fú de ʋ ʋ wɔ̃ taa nɩ tɩɩb sʋbɔ mɩɩ a lãpo-diere.
18“Yel-mɩ̃ɛ ɩ̃ yele nyɩ, a ala nyɩ na mɔ̃w bar a ka a tẽw pʋɔ, na mɩ mɔ̃w na a saa juu, ɩ̃ a ala nyɩ na sɔw bar a sɔr a ka a tẽw pʋɔ, a sɔr mɩ be na be a saa juu.
19“Ɩ̃ lɛ yele nyɩ na go, a ala ɩ a nyɩ pʋɔ, nɩbɛ ayi tɛrɛ na nɔ-bõ-ƴen a ka a tẽw pʋɔ, sʋɔrɔ nɩ a bom lɛ, a ɩ̃ Sãa na be a saa juu na maalʼã kʋ ba. 20A-na-ɩ a jie a nɩbɛ ayi mɩɩ a nɩbɛ ata na duo taa nɩ a ɩ̃ yuor, ɩ̃ mɩ be na be a ba sɔ̃w.”
A TƲ̃TƲNƆ NA MA BAR A Ʋ TƆ SƲBƆ SAN WA
21A Pɩɛr taw na ta a *Jeeju ɩ̃ soor ʋ:
“Nɩ-kpɛ̃ɛ! A ɩ̃ yɛbɛ wa maal ma a fãa, gbɛɛ amɩnɛ ɩ̃ na de bar kʋ ʋ? A na ta na gbɛɛ anuu-nʼayi mɩɩ?” 22A Jeeju yel ʋ:
“Maa yel fʋ a gbɛɛ anuu-nʼayi wa dɛ, ɩ̃-cɛ a na ta na a gbɛɛ anuu-nʼayi jiir lɩjaata-nɩ-pie. 23Ala-ɩ̃-sɔ a saa juu fãw wɔ̃ na taa nɩ a jamana na gbɛɛrɛ a libie a ʋ tʋ̃tʋnbɔ jie. 24Ɩ̃ a lɛ ʋ na nyɔw a gbɛɛrɩ̃fʋ, ba wɩ nɩ na a daba na tɛrɛ ʋ a san a ture ture kʋbaa. 25Ɩ̃-cɛ a ʋna daba naa, ꞌwaa tɛrɛ bom na ya a san wa, ala-ɩ̃-sɔ a ʋ nɩ-kpɛ̃ɛ yel a ba da ʋ, nɩ a ʋ pɔw, nɩ a ʋ bibiir nɩ a yele a jaa ʋ na tɛrɛ, ya a ʋ san. 26A tʋ̃tʋnɔ ʋlɔ lo na gburĩ a dume a ʋ nɩ-kpɛ̃ɛ nii-sɔw ɩ̃ yel ʋ: ‘Taa nyɛ suur wa. Bar a ɩ fɩ̃ɩ, ɩ̃ ɩ̃ na ya fʋ na,’ 27a nãw nyɔw a ʋ nɩ-kpɛ̃ɛ ʋ de ʋ bar, ʋ cere nɩ a ʋ san.
28“A daba ʋlɔ yi na tuorʼɩ̃ a ʋ lãa-tʋnɔ ƴen sʋbɔ na tɛrɛ ʋ a san bile. Ʋ nyɔw ʋ na, ɩ̃ cɩm ʋ a kɔkɩ-jile ɩ̃ yel: ‘Ya ma a ɩ̃ libie.’ 29A ʋ lãa-tʋnɔ lo na gburĩ a dume ɩ̃ yel ʋ: ‘Taa nyɛ suur wa. Bar a ɩ fɩ̃ɩ, ɩ̃ ɩ̃ na ya fʋ na.’ 30Ɩ̃-cɛ ꞌwaa sɔw wa, ɩ̃ nyɔw ʋ cenʼɩ̃ pɔw a kasu pʋɔ, ʋ be a be lɛɛ wa ta nɩ a lɛdaar ʋ na ya a ʋ san a jaa. 31A lɛ a ʋ lãa-tʋnbɔ ŋmɛɛ na nyɛ a ala na maal, a ba sube nyɩrɩ̃ na sãw ba, a ba cen na man a ba nɩ-kpɛ̃ɛ a ala a jaa na maal, 32a nɩ-kpɛ̃ɛ bʋɔl a tʋ̃tʋnɔ ʋlɔ ɩ̃ yel ʋ: ‘Fʋna nɩsaa fãa naa! Ɩ̃ dãa na bar fʋ a fʋ san a jaa, a-na-ɩ fʋ sʋɔr ma na. 33A sɛw na a fʋ naa mɩ dãa bɔ̃w a fʋ lãa-tʋnɔ nãw ɩ̃ bar ʋ, a mɩnɛ ɩ̃ na dãa bɔ̃w fʋ a nãw ɩ̃ bar fʋ.’ 34Ɩ̃ a ʋ nɩ-kpɛ̃ɛ nyɛ na a suur ɩ̃ ɩ a ba mɩ nyɔw ʋ pɔw a kasu pʋɔ, a ba kpãa ʋ lɛɛ wa ta nɩ a lɛdaar ʋ na ya a ʋ san a jaa.”
35Ɩ̃ a Jeeju yel ba:
“A lɛ a ɩ̃ Sãa na be a saa juu nɔɔ mɩ maal a nyɩ jie, a ala ma ɩ a nyɩmɩ nyɩ jaa fɛw de na a nyɩ yɛɛr maal-faar bar kʋ ba a nyɩ sube pʋʋr wa.”
Đang chọn:
Matie Sɛbɛ 18: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
