Matie Sɛbɛ 15
15
A FARƖSƖ NƖBƐ NƖ A BA TẼKORĨ YƐRƖ̃SƖ
(Mar 7.1-13)
1A ala ɩ̃ baar, a Jerujalɛm *Farɩsɩ nɩbɛ nɩ a *ƴɛr-kpɛn-bɔɔnbɔ wɩ na a *Jeeju sɛ̃ ɩ̃ soor ʋ:
2“Bõ ɩ a fʋ *par-tuurbe ma sãwna a sɩ tẽkorɩ̃ nɩ-bɛrɛ ƴɛrɩ̃sɩ a lɛ? A-na-ɩ a bala dɩrɛ a dɩb, ba maa pɛw a ba nur a mɩnɛ a puorfʋ ƴɛrɩ̃ na yel wa.” 3A Jeeju mɩ lɩɛb soor ba:
“Ɩ̃ a nyɩmɩ, bõ ɩ a nyɩ ma de a nyɩ tẽkorɩ̃ ƴɛrɩ̃sɩ sãw nɩ a *Naaŋmɩn ƴɛr-kpɛn? 4A-na-ɩ a Naaŋmɩn ƴɛrɩ̃ yelʼã: ‘Yɔnɔ a fʋ sãa nɩ a fʋ mã,’ ɩ̃ lɛ yel: ‘A ʋlɔ na tʋrɔ a ʋ sãa mɩɩ a ʋ mã, a *sɛw na a ba na kú ʋ.’ 5Ɩ̃-cɛ a nyɩmɩ, nyɩ yelʼã, áa nɩrɛ wa yel a ʋ sãa, mɩɩ a ʋ mã, áa bom lɛ ʋ naa dãa sũo nɩ ba, á ʋ de na kʋ a Naaŋmɩn, 6áa nɩrɛ ʋlɔ ma lɛ tɛrɛ sɔr na sũo a ʋ sãa nɩ a ʋ mã go wa. A nɔhɔ̃ nyɩ ma de a nyɩ tẽkorɩ̃ ƴɛrɩ̃ sãw nɩ a Naaŋmɩn ƴɛrɩ̃ bar. 7Nyɩna bɛbɛlbɛ naa! A Naaŋmɩn ƴɛr-hiere Ejayi dãa na sɩrɩ̃ tɛrɛ yel-mɩ̃ɛ a mɩnɛ ʋ na dãa yel a nyɩ ɩnɛ:
8‘Nʋɔr tɛw a nɩbɛ basɩmɛ ƴɔnɔ nɩ ma,
ɩ̃-cɛ a ba suur jãa nɩ ma na.
9A ba puorfʋ ba na puoro ma ma tɛrɛ par wa,
ɩ̃ a ba jaanfʋ ba na jaana a nɩbɛ
ɩ na a nɩbɛ ƴɛrɩ̃sɩ tɛw.’ ”
A YELE ALA NA TƲƆRƆ SÃWNA A NƖRƐ
(Mar 7.14-23)
10A *Jeeju bʋɔlʼã a nɩbɛ ba jaa a ba wɩ a ʋ sɛ̃, ʋ yel ba:
“Nyɩ́ cɛl wõ a ƴɛrɩ̃ nanɩ. 11Aa ɩ a ala na kpɛɛrɛ a nɩrɛ nʋɔr pʋɔ ɩ̃ sãwna ʋ wa, ɩ̃-cɛ a ala na yire a nɩrɛ nʋɔr pʋɔ, ala sãwna ʋ.” 12Ɩ̃ a mɩnɛ ʋ na ƴɛr a lɛ baar, a ʋ *par-tuurbe taw na ta ʋ ɩ̃ yel ʋ:
“Fʋ bɔ̃w ka a mɩnɛ fʋ na ƴɛrɛ a lɛ, a cɛ na a Farɩsɩ nɩbɛ mɩɩ?” 13A Jeeju yel ba:
“A tɩɛ lɛ a ɩ̃ saa juu Sãa na ma sɛl wa, na vʋ̃ɔ na. 14Nyɩ́ bar ba be! Jɔn ɩ̃ tawra taa. Ɩ̃ a ala ɩ a jɔ̃w tawra na a jɔ̃w, ba jaa ayi na lo na bɔw kpolo pʋɔ.” 15A Pɩɛr de na a ƴɛrɩ̃ ɩ̃ yel ʋ:
“Man sɩ a sʋkpa naa par.” 16A Jeeju yel:
“Nyɩmɩ mɩ, nyaa tɛrɛ a yɛ̃ na bɔ̃w a par wa? 17Nyaa bɔ̃w ka a bom lɛ na kpɛɛrɛ a nɩrɛ nʋɔr pʋɔ ma suu na a puorɩ̃, ɩ̃ lɛ lɩɛb yi a sãɓanɩ̃ wa? 18Ɩ̃-cɛ a ala na yire a nɩrɛ nʋɔrɩ̃ yi na a ʋ suur pʋɔ; ala sãw na a nɩrɛ. 19A-na-ɩ a tɩɛrɩ̃-faar, a nɩrɛ kúfʋ, a pɔɔ-kpee nɩ a dab-kpee ganifʋ, a pebfʋ, a jufʋ, a mɩl-taa, nɩ a korfʋ, 20ala yire a nɩrɛ suur pʋɔ sãwna ʋ. Ɩ̃-cɛ a dɩb dɩfʋ nɩ a nu-dɛɛr ala a puorfʋ ƴɛrɩ̃ na ciire ma sãwna nɩrɛ wa.”
A KANA-TẼW PƆW ƳƆ̃W-NYÃA
(Mar 7.24-30)
21A mɩnɛ a *Jeeju na yi a be, ʋ cenʼã a Tɩɩr nɩ a Sɩdɔ̃-ten nɔɛ. 22Ɩ̃ a Kana-tẽw pɔw kãw na be a be yi na wuure tuoro nɩ ʋ:
“Nɩ-kpɛ̃ɛ yaa! *Davɩtɩ Bie wee! Bɔ̃w ma nãw! A kɔ̃tɔn ire na a ɩ̃ bi-pɔw, a nyɩrɩ̃ wono ʋ.” 23Ɩ̃ a Jeeju ma yel ʋ bom wa. A ʋ *par-tuurbe taw ta ʋ ɩ̃ sʋɔrɔ ʋ a ʋ diw a pɔw bar, a-na-ɩ ʋ wuure na tuure nɩ ba. 24A Jeeju yel:
“A *Ɩsɩrayɛl nɩbɛ na bɔr a piir kaarɩ̃, bala ɩnɛ tɛw ba tʋ̃ ma.” 25Ɩ̃-cɛ a pɔw wa na lo gburĩ a dume a ʋ nii-sɔw ɩ̃ yel:
“Nɩ-kpɛ̃ɛ, sũo ma!” 26A Jeeju yel ʋ:
“Aa vɩɛlɛ a ba na de a bibiir dɩb lɔb ƴɔ̃w a baar wa.” 27A pɔw yel ʋ:
“Nɩ-kpɛ̃ɛ, sɩrɛ jaa ʋ, ɩ̃ má a baar ma dɩrɛ na a dɩb ŋmara ala na loro a ba súɔrbɔ pulẽe.” 28A Jeeju yel ʋ:
“Pɔw, a fʋ yɔ̃w-nyãa bɛrmɛ na. A na maalʼã a fʋ jie a mɩnɛ fʋ na bʋɔrɔ.” Ɩ̃ a daar ʋlɔ pʋɔ a ʋ bi-pɔw kpaarʼã.
A WƲLƖ̃-BƲRƆ BƲRƆ DEME A JEEJU NA KPAAR
29A mɩnɛ a *Jeeju na yi a be, ʋ cenʼã a Galile man nʋɔr ɩ̃ do a tãw jɛ. 30A nɩbɛ yayaw wɩ na a ʋ sɛ̃ tɛrɛ nɩ a gbɛɛ, a ɩ̃gan saansɩ deme, a jɔn, a won, nɩ a wʋlɩ̃sɩ deme ŋmɛɛ yaw go, na bin a ʋ pulẽe, ɩ̃ ʋ kpaar ba. 31A nɩbɛ nʋɔr ko ba a mɩnɛ ba na nyɛ a won a ba ƴɛrɛ, a ɩ̃gan saansɩ deme kpaar, a gbɛɛ cere, ɩ̃ a jɔn mɩ nyɛrɛ, ɩ̃ ba nyɔw na ɩ̃ pɛwrɛ a *Ɩsɩrayɛl Naaŋmɩn.
A DABSƖ TURE ANAAN NA ꞌWƆB A BURU ANUU-NʼAYI
(Mar 8.1-10)
32A *Jeeju bʋɔlʼã a ʋ *par-tuurbe a ba wɩ, ʋ yel ba:
“A nãw nyɔw ma na a nɩbɛ basɩmɛ ɩnɛ, a-na-ɩ ba be nɩ ma na a bibie ata, ɩ̃ baa cãa tɛrɛ dɩb dɩrɛ wa. Maa bʋɔrɔ ɩ̃ bar ba a lɛ nɩ a kɔ̃ wa, a mɩnɛ ba kɔ̃ wa lo sɔr pʋɔ wa.” 33A ʋ par-tuurbe soor ʋ:
“Nyɩnɛ sɩ na tʋɔ nyɛ a bõ-dɩraa a na sɛw a nɩ-par-bʋrɔ na, a ka a wɛkarʼã pʋɔ?” 34A Jeeju lɩɛb soor ba:
“Bur-bie amɩnɛ nyɩ tɛrɛ?” a ba yel:
“Sɩ tɛrɛ na bur-bie anuu-nʼayi, ɓã jɩm-bil ŋmɛɛ.” 35Ʋ ƴɔ̃w na a nɩbɛ a ba jɛ a tene, 36ʋ de a bur-bie anuu-nʼayi nɩ a jɩmɛ, ɩ̃ a mɩnɛ ʋ na puor a Naaŋmɩn ƴɔ̃w, ʋ ŋma na kʋ a ʋ par-tuurbe, a ba de po a nɩbɛ, 37a ba ꞌwɔb pi ba jaa, ɩ̃ cɛ a bõ-ŋmara na cɛ, a par-tuurbe nɩɩr sɛw pur anuu-nʼayi. 38A bala na ꞌwɔb a buru, ba ɩ na dabsɩ ture anaan, ɩ̃ a pɔɔbɔ nɩ a bibiir ma be tɔ wa. 39Ɩ̃ a mɩnɛ a Jeeju na bar a nɩbɛ a ba kul, ʋ kpɛ na a gbor cen a Magadã-tẽw nʋɔr.
Đang chọn:
Matie Sɛbɛ 15: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
