Matie Sɛbɛ 14
14
A JÃ-BATII KŨU
(Mar 6.14-29, Lu 9.7-9)
1A ʋna daarʼãa a *Ɛrɔdɩ na ɩ a Galile jamana wõ na a *Jeeju ƴɛrɩ̃ 2ɩ̃ yel a ʋ tʋ̃tʋnbɔ:
“A Jã-Batii nɩ a nanɩ. Ʋ irʼã a kũu pʋɔ, ala-ɩ̃-sɔ ʋ tɛrɛ a fãgã tʋnɔ nɩ a nɔ-kofʋ tʋmɔ a lɛ.”
3-4A-na-ɩ a Jã dãa na yel a Ɛrɔdɩ áa ƴɛr-kpɛn ma kʋ ʋ sɔr ʋ na faa a ʋ yɛbɛ Fɩlɩpɩ pɔw Ɛrɔdɩya kul wa. Ala-ɩ̃-sɔ a Ɛrɔdɩ ƴɔ̃w na a ba nyɔw a Jã lũ ƴɔ̃w a kasu pʋɔ. 5Ʋ dãa na bʋɔrɔ ʋ kú ʋ, ɩ̃-cɛ dãbɩ̃ɛ nyɔw ʋ na a nɩbɛ ɩnɛ, a-na-ɩ ba bɔ̃w ka a Jã ɩ na a Naaŋmɩn ƴɛr-hiere.
6A mɩnɛ a Ɛrɔdɩ dɔwfʋ bibir fɛtɩ na ta, a Ɛrɔdɩya bi-pɔw sɛ na a bɩnɛ a ba nii-sɔw, a nʋ̃ɔ nyɩrɩ̃ nyɔw a Ɛrɔdɩ, 7ʋ ir pɔ yelʼɩ̃, á ʋ na kʋ na a poole a bom lɛ ʋ na sʋɔrɔ ʋ. 8Ɩ̃ a mɩnɛ a poole mã na kpãa ʋ baar, ʋ cenʼã na yel a Ɛrɔdɩ á ʋ ƴɔ̃w a Jã-Batii juu a lagbaal pʋɔ kʋ ʋ. 9A jamana suur sãw, ɩ̃-cɛ a ʋ pɔfʋ ʋ na pɔ a ʋ lãa-dɩrbɛ nii-sɔw saa, ʋ sɔw, 10ɩ̃ ƴɔ̃w a ba cen na ŋmaa a Jã juu a kasu pʋɔ. 11Ba wɩ nɩ na a Jã juu a lagbaal pʋɔ kʋ a poole, ʋ de kʋ a ʋ ma. 12A Jã *par-tuurbe cenʼã na de a kũu ũu, ɩ̃ pãa cen na man a Jeeju a ala na ta.
A DABSƖ TURE ANUU NA ꞌWƆB A BURU ANUU
(Mar 6.30-44, Lu 9.10-17, Jã 6.1-14)
13A mɩnɛ a *Jeeju na wõ a ala na ta a Jã, ʋ yi na cen na kpɛ a gbor nɩ a ʋ *par-tuurbe á ba cen na sɔɔlɩ̃ a wɛkar pʋɔ a man gaan. Ɩ̃ a mɩnɛ a nɩbɛ na wõ a lɛ, ba yi na a ba ten pʋʋr lara a man gbẽgbere bɩɛrɛ ʋ. 14A mɩnɛ a Jeeju na ta a man gaan ʋ nyɛ na a nɩ-yaw, a nãw nyɔw ʋ, ʋ kpaar a bala na ɩ a baalsɩ.
15A lɛ a jaanʋɔr na ta a ʋ par-tuurbe taw na ta ʋ ɩ̃ yel:
“Wɛkar pʋɔ sɩ be, ɩ̃ a mɔtɔ̃w mʋrɔ. Wɛl a nɩbɛ bar a ba cen a tẽw pʋɔ na da a bõ-dɩraa.” 16Ɩ̃-cɛ a Jeeju yel ba:
“Aa sɛw a ba na cen wa. Nyɩ mɩ̃ɛ, nyɩ́ kʋ ba a bõ-dɩraa.” 17A ba yel ʋ:
“Saa tɛrɛ bom ka, ɩ̃ a ala ma ɩ bur-bie anuu nɩ jɩmɛ ayi tɛw wa.” 18A Jeeju yel ba:
“Nyɩ́ de wa nɩ kʋ ma ka”, 19ɩ̃ yel a nɩbɛ á ba jɛ a mʋ̃ɔ juu. Ʋ de na a buru anuu nɩ a jɩmɛ ayi ala, dʋɔ ꞌwuoro nɩ a saa juu puorʼɩ̃ a Naaŋmɩn, ɩ̃ ŋma a buru kʋ a ʋ par-tuurbe a ba de po a nɩbɛ. 20A ba jaa bõ-ƴene-ƴene ꞌwɔbʼã pi, ɩ̃ a par-tuurbe nɩɩr a bõ-ŋmara ala na cɛ sɛw pur pie-nʼayi. 21A bala na ꞌwɔb a buru na ta na dabsɩ ture anuu, ɩ̃ a pɔɔbɔ nɩ a bibiir ma be tɔ wa.
A JEEJU NA CERE A KƲ̃Ɔ JUU
(Mar 6.45-52, Jã 6.15-21)
22A jie naan a *Jeeju ƴɔ̃w na a ʋ *par-tuurbe a ba kpɛ a gbor pʋɔ de nĩe gãwna ʋ a man gaan, ɩ̃ ʋ wɛlɛ a nɩbɛ bara. 23Ɩ̃ a mɩnɛ ʋ na wɛl ba bar baar, ʋ do na a tãw lõkor pʋɔ sɔɔlɩ̃, sʋɔrɔ a Naaŋmɩn. A jaanʋɔr ta na pɔw ʋ a be a ʋ yẽ, 24ɩ̃-cɛ a gbor ʋlɔ dãa na cen jãa nɩ a gbẽgbere, a kʋ̃ɔ cara dama ʋ, a-na-ɩ sɛsɛb fure na tuoro ba. 25A nɔraa kuon daar a Jeeju cere na a kʋ̃ɔ juu wɩɛrɛ a ʋ par-tuurbe sɛ̃. 26A lɛ ba na nyɛ ʋ, ʋ cere a kʋ̃ɔ juu a lɛ, a nyɩrɩ̃ na dama ba a ba yel:
“Kpɩɩn ʋ!” ɩ̃ wuure a dãbɛ̃-wuurfʋ. 27Ɩ̃ a jie naan a Jeeju yel ba:
“Nyɩ́ bar nyãa! Maa ʋ. Nyɩ taa ɩ a dãbɩ̃ɛ nyɔw nyɩ wa.” 28A Pɩɛr yel ʋ:
“Nɩ-kpɛ̃ɛ, a ala ɩ fʋ̃ʋ ʋ, ɩ ɩ̃ mɩ cen a kʋ̃ɔ juu wɩ a fʋ sɛ̃.” 29A Jeeju yel ʋ:
“Wa!” a Pɩɛr yi a gbor pʋɔ cere a kʋ̃ɔ juu wɩɛrɛ a Jeeju sɛ̃. 30Ɩ̃-cɛ a mɩnɛ ʋ na nyɛ a sɛsɛb ʋ fure, dãbɩ̃ɛ nyɔw ʋ na, ʋ nyɔw ɩ̃ mʋrɔ a kʋ̃ɔ pʋɔ, ɩ̃ wuur yel:
“Nɩ-kpɛ̃ɛ, faa ma!” 31A jie naan a Jeeju turʼã a nuu nyɔw nɩ ʋ ɩ̃ yel:
“A fʋna ƴɔ̃w-nyãa pabaa sʋbɔ naa, bõ ɩ a fʋ baalɩ̃?” 32Ɩ̃ a mɩnɛ ba na kpɛ a gbor pʋɔ baar, a sɛsɛb ŋmaa na. 33A bala na be a gbor pʋɔ lo na gburĩ a dume puoro nɩ ʋ, yele nɩ:
“Fʋ sɩrɩ̃ na ɩ a Naaŋmɩn Bie.”
A JEEJU NA KPAAR A JENEJARƐ-TẼW WƲLƖ̃SƖ DEME
(Mar 6.53-56)
34A lɛ ba na gãw a man baar, ba ta na á Jenejarɛ-tẽw. 35Ɩ̃ a mɩnɛ a ʋna tẽw nɩbɛ na nyɛ ʋ bɔ̃w ka a *Jeeju ʋ, ba tʋ̃ na yel a ten cẽcen deme ba jaa, a ba wɩ nɩ a wʋlɩ̃sɩ deme ba jaa, 36ɩ̃ sʋɔrɔ ʋ a ʋ bar ba a ba sɩɩr a ʋ cẽcen nʋɔr tɛw, ɩ̃ a bala ba jaa na sɩɩr, ba kpaarʼã.
Đang chọn:
Matie Sɛbɛ 14: BNT93
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Le Nouveau Testament en langue birifor © Alliance Biblique au Burkina Faso, 1993.
