Matioo̱ 3
3
Bi̱ tsꞌén íni̱jmi Jua̱ Bautistaa̱ eén Néná
(Markoo̱ 1:1-8; Rkaa̱ 3:1-9,15-17; Juaa̱ 1:19-28)
1Kui ni̱xtjinján jachó Jua̱ Bautistaa̱ nga íni̱jmi eén Néná ki̱a̱ nangui kixí xi tikón nangui Judea̱, 2nga bi̱ katsó:
–Tiꞌankꞌoyajnú yojojnú kjo̱a̱a̱ ni xi ndajínkjiꞌi xi ndyi̱niꞌánjnú, ngatꞌa̱ Néná je ko̱tíxoma.
3Ngatꞌa̱ kuí ni xiꞌbi̱ xi tsíchji̱a̱ nda̱ chji̱ni̱e̱ꞌe̱én Néná xi ꞌmí Isayaa̱ nga bi̱ katsó:
Ndaꞌyáa ngo nda̱ xi kjandayá nangui kixií xi bi̱ tsó:
«Tꞌíjñandajnúu̱ ndi̱ya̱á Ndi̱a̱a̱,
tiꞌankixi̱jnú ndi̱ya̱á kui.»
4Ńjño xi tsajá Juaa̱ tsja̱a̱ cho̱toꞌoyitsꞌen kamándani kó ngo tji̱xin íkjá ndáyaá, kó chjo̱bo̱a̱ ko̱jo ntsjién xi ꞌbé nguindie kꞌijñáján xi iskjinie. 5Kó jataxie xota̱ xi chji̱a̱ni na̱xi̱ńdá Jerusale̱n, ngayeje xi chji̱a̱ni nangui Judea̱ ko̱jo ngayeje nangui xi chji̱a̱ni nínga tikón ndejé Jordaa̱n, 6kó Juaa̱ atíndá kui xotaa̱ ngu̱i̱jii̱n ndejé Jordaa̱n, kó kui xotaa̱ ki̱a̱ katsóya jeé.
7Nga kamábe Juaa̱ nga achichí má xota̱ fariseo̱ ko̱jo xota̱ saduseo̱ xi jachó nínga tsꞌénbotíndá, bi̱ katsoó:
¡Xota̱ xi ja̱ kon ye̱ kónjnú! ꞌYá xi bo̱a̱ katsójnú nga ka̱ma ku̱i̱yojnúu̱ kjo̱a̱xcha̱án Néná xi je kjimatiñaa̱. 8Tasá tiꞌánjnú ni xi ko̱kó nga je kiniꞌánkꞌoyajnú yojojnú, 9kó ngata̱ bi̱jín tsꞌén fojintakónjnú:
«Tji̱e̱e̱ nda̱ xi ꞌmí Abraa̱n ndokjo̱a̱ ñá.» Ngatꞌa̱ xiyájnúꞌun nga tsi Néná xi mejeén ngaskande kui ndi̱jo̱o̱ ka̱ma sa̱ꞌín xota̱ tji̱e̱e̱ Abraa̱n. 10Kó ti̱ je tikónnda jachaa̱ tsi̱ꞌe̱ nga ko̱tie yaá ndeskande ja̱ma̱a̱, ngatꞌa̱ ngayeje yá xi jmí to xi nda tsjájín, bichá kó ngu̱i̱jin ndiꞌíján bichijmijin. 11An, nga ja̱koxi̱ ndójoa xí botindá an tsi̱ꞌe̱ nga si̱ꞌankꞌoyájnú yojojnú kjo̱a̱a̱ xikótsꞌen tindyiónjnú, ta̱nga xi jaskan an ndibá, tjín ngasee̱ ngaꞌniú, kó nde tsoboájínna nga an kjuínjóo̱ tji̱xíndieé, kó kuí boá xi A̱sién Ni̱xtjii̱n Néná ko̱jo ndiꞌí xi ko̱tíndánijnú. 12Je tsꞌényaꞌa ngu̱i̱ya tsja ni xi sa̱ꞌíntsjie to ndso̱ko̱a̱n ṉño̱paa̱n nga xín sa̱ꞌínkjaꞌa xtjieé. Kó kjo̱a̱ꞌátjó to ndso̱ko̱a̱n ṉño̱paa̱n ngu̱i̱ndie nínga xi̱ndyiá, kó ku̱i̱ꞌítí xtjieé ngo ngu̱i̱jii̱n ndiꞌí xi jmí ni̱xtjin kꞌo̱.
Bi̱ tsꞌén kastindá Kjisoo̱
(Markoo̱ 1:9-11; Rkaa̱ 3:21-22)
13Kósꞌe̱ Kjisoo̱ jatjoni nangui Ngalilea̱ kó kijí nínga tikón ndejé Jordaa̱n tsi̱ꞌe̱ nga ki̱a̱ Juaa̱ ko̱tíndá. 14Ta̱nga Juaa̱ kamámejénjiín, kó bi̱ katsoó:
–Jí xi ko̱tindení katsaki, kó a ta̱sá ji kjoéꞌe̱chinní.
15Kó Kjisoo̱ bi̱ katsoó:
–Teꞌéndié ji ngotꞌe̱, ngatꞌa̱ chjiéngá si̱ꞌankjatjosón ngayeje ni xi kixi̱ nguindyi̱ko̱n Néná.
Kósꞌe̱ Juaa̱ atíndá Kjisoo̱. 16Kó nguije kastindá Kjisoo̱, jataxie ngu̱i̱jin ndójoaa̱, kó katjoxꞌa ndiꞌakꞌajmiján kó kamábe nga jatjajen A̱sién Ni̱xtjii̱n Néná nga ja̱ kjiꞌi tójo má kjiꞌi, kó kjindiboánié Kjisoo̱. 17Kó kandaꞌyá ngo nda̱ ndiꞌakꞌajmiján xi bi̱ katsó:
–Kuí xiꞌbi̱ xi ndí tjóna, ꞌniú tsjatjínna kjo̱a̱a̱ kui.
Đang chọn:
Matioo̱ 3: MAIX
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014