Matioo̱ 2
2
Bi̱ tsꞌén kijíkatsijee̱n já kjínkoón ndí ndí Kjisoo̱
1Nguije katsen Kjisoo̱ ki̱a̱ Bele̱n, ndí na̱xi̱ńdá xi chji̱a̱ni nangui Judea̱, ni̱xtjin nga atíxoma nda̱ re Erodee̱ ngayeje kui na̱xi̱ńdaá, jachó na̱xi̱ńdá Jerusale̱n já kjínkón xi kjindibáni xtji̱e̱e̱n nínga fotjo tsꞌueé, 2kó bi̱ katsó nga asíyá:
–Ñá tikón re tsi̱ꞌe̱ xota̱ judío̱ xi je katsee̱n. Ngatꞌa̱ kamáyá ji̱n nga jatjo ńñoo, xtji̱e̱e̱n nínga fotjo tsꞌueé, kuíni nga jéꞌe niꞌándikón ji̱n.
3Nga tsintꞌié kuí nii̱ nda̱ re Erodee̱ achichí nda̱ kamaá kui ko̱jo ngayeje xota̱ na̱xi̱ńdá Jerusale̱n. 4Kó nguije ítikó ngayeje já nguito̱ko̱o̱ chináꞌmii̱ ko̱jo já chji̱ni̱e̱kjo̱a̱kitii̱ na̱xi̱ńdaá, asíyaá ñání bo̱a̱ nga katsen Kristoo̱. 5Kó kui jaá bi̱ katsoó:
–Bele̱n boá nínga katsen, ndí na̱xi̱ńdá xi chji̱a̱ni nangui Judea̱, ngatꞌa̱ bo̱a̱ tsꞌén ítꞌa xo̱jo̱n nda̱ chji̱ni̱e̱ꞌe̱én Néná nga bi̱ katsoó:
6Kó ji Bele̱n, ndí na̱xi̱ńdá xi chji̱a̱ni nangui Judea̱,
jijín xi ꞌniú chichí ji
ngu̱i̱jii̱n xtitjón xi chji̱a̱ni nangui Judáa̱.
Ngatꞌa̱ kꞌi̱e̱ kjo̱tjojii̱n ngo xi ko̱si̱e̱ntjón,
xi ku̱i̱e̱jeén ndi̱ya xota̱ na̱xi̱ńdána xi chji̱a̱ni Israe̱l.
7Kósꞌe̱ Erodee̱ tsíchji̱a̱ꞌmajo já kjínkoón, kó asíyá cha̱n cha̱a̱n kui jaá ni̱xtjin nga kamáyá ńñoo, 8kó katsanguiya kui jaá ndí na̱xi̱ńdá Bele̱n, kó bi̱ katsoó:
–Tanguínjnú ki̱a̱, kó tasíyájnú ngayeje ni kjo̱a̱a̱ kui ndií, kó nguije xcha̱jnú tꞌíyajnúꞌun tsi̱ꞌe̱ nga ko̱jo an kjuíntsꞌendikón an nga.
9Kó kui jaá nguije tsintꞌieé nda̱ ree̱, kijí. Kó ńño xi kamábe nga jatjo ki̱a̱a̱ kijítjoón, ngaskande nga kasasien kui ńñoo nínga tikón kui ndií. 10Nga kamábe kui ńñoo achichí tsja kamaá. 11Kó nga tsꞌasꞌien ngu̱i̱yaa̱ kamábe ndí ndií ko̱jo na̱ Riyaa̱ na̱aa̱n ndií, kó asién tikoó kui jaá, kó katsꞌéndikón kó iskjíxꞌá koxa̱a̱ kó tsꞌaxié ni xi ndyi̱yaꞌaa̱ ndií:
Ngo xi yaꞌaa̱ to̱nsinié, ngo xi yaꞌaa̱ nisije̱n xi niꞌánkjién nga niꞌándikón Néná, ko̱jo ngo xi yaꞌaa̱ ndásíje̱n chjí xi ꞌmí mirra̱. 12Kó ngu̱i̱jin ńjñaá kui jaá kiꞌmíyaá nga nguiti̱ ki̱a̱jín ko̱e̱je̱ nínga tikón nda̱ re Erodee̱, kósꞌe̱ kje̱ꞌe ndi̱ya kijí nga kijí nguiní nanguii̱.
Bi̱ tsꞌén kijíjo̱ xi xchaá Kjisoo̱ xtji̱e̱e̱n Ejipto̱
13Kó nguije kijí já kjínkoón, ngo ndítsjiee̱ Néná jeꞌechji̱a̱jo ngu̱i̱jin ńjñaá Kosiee̱ kó bi̱ katsoó:
–Ti̱sítji̱n ji kó tiyíje̱ ndií ko̱jo na̱aa̱n, kó tanguínjnú nangui Ejipto̱ kó ki̱a̱ ti̱ndyiónjnú ngaskande nga an xi bo̱a̱ xian an, ngatꞌa̱ Erodee̱ ko̱ngase ndií tsi̱ꞌe̱ nga sa̱ꞌínkꞌién.
14Kó jastjíe̱n Kosiee̱, iskjíbé ndií ko̱jo na̱aa̱n, kó nga jñoó kijíjo̱ nangui Ejipto̱, 15kó ki̱a̱ kisꞌińdo ngaskande nga kꞌien Erodee̱, tsi̱ꞌe̱ nga jatjosón ni xi katsoó Néná nda̱ chji̱ni̱e̱ꞌe̱én nga bi̱ katsó: «Nangui Ejipto̱ tsíchji̱a̱ñáa̱ ndína.»
Bi̱ tsꞌén katsanguiya Erodee̱ nga kiniꞌánkꞌién jákjíndí xi̱xii̱
16Kósꞌe̱ nga kamákjiín Erodee̱ nga tsꞌenṉcha̱jo já kjínkoón, achichí katsꞌénxchán, kó katsanguiya tsi̱ꞌe̱ nga kiniꞌánkꞌién ngayeje jákjíndí xi̱ꞌin xi nguindiee̱ nga jó noó xi síndo ndí na̱xi̱ńdá Bele̱n ko̱jo ngayeje ndí nangui xi síndo tꞌa kui ngu̱i̱ndiee̱, ngatꞌa̱ askosoón ni̱xtjin xikó katsoó kui já kjínkoón. 17Kósꞌe̱ bo̱a̱ tsꞌén jatjosón ni xi katsó nda̱ chji̱ni̱e̱ꞌe̱én Néná xi ꞌmí Jeremíaa̱ nga bi̱ katsó:
18Ngo nda̱ kandaꞌyaá nangui Ramáa̱,
nda̱a̱ xi tsꞌénkjandá ko̱jo xi ni̱ma̱ tjítsó kjo̱a̱a̱ nga on kjimaa̱,
na̱ Rakee̱l boá xi tsꞌénkjandátjé ndií,
kó kamámejénjiín nga kiniꞌándajoo̱n
ngatꞌa̱ je jesón ndií.
19Ta̱nga nguije kꞌien Erodee̱, ngo ndítsjiee̱ Néná tsíchji̱a̱jo Kosiee̱ ngu̱i̱jin ńjñaá ki̱a̱ nangui Ejipto̱, kó bi̱ katsoó:
20–Ti̱sítji̱n, chjábé ji ndií ko̱jo na̱aa̱n kó tꞌenje̱ ji nanguii̱ xota̱ Israe̱l, ngatꞌa̱ je kꞌien ngayeje xi kamámejeén katsꞌénkꞌién kui ndií.
21Kó Kosiee̱ jastjíe̱n kó kijíjo̱ ndií ko̱jo na̱aa̱n ki̱a̱ nangui Israe̱l. 22Ta̱nga nga tsintꞌié Kosiee̱ nga ndií Erodee̱ xi ꞌmí Arkelao̱ tikón ree̱ nangui Judea̱, katsakjónní nga ki̱a̱ ko̱e̱je̱, kó nguije ja̱ bo̱a̱ je katsóyaá Néná ngu̱i̱jin ńjñaá, ta̱sá nangui Ngalilea̱ kijí. 23Kó nga jachó ki̱a̱a̱, ki̱a̱ kisꞌińdo ndí na̱xi̱ńdá Nasare̱t, tsi̱ꞌe̱ nga jatjosón ni xi katsó já chji̱ni̱e̱ꞌe̱én Néná nga bi̱ katsó: Nda̱ xi chji̱a̱ni Nasare̱t kꞌuin.
Đang chọn:
Matioo̱ 2: MAIX
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014