Matioo̱ 4
4
Bi̱ tsꞌén kachjatꞌayákón Kjisoo̱
(Markoo̱ 1:12-13; Rkaa̱ 4:1-13)
1Kósꞌe̱ A̱sién Ni̱xtjii̱n Néná kijíjo̱ Kjisoo̱ nangui kixií, tsi̱ꞌe̱ nga xindajín ndiabloo̱ skótꞌayákón.
2Kó nguije yichán ni̱xtjin ko̱jo yichán ni̱xtji̱e̱n nga kisꞌijña kjindiá, kamábojoó. 3Kó xi kjitꞌayákónná jachókoón Kjisoo̱ tsi̱ꞌe̱ nga skótꞌayákón, kó bi̱ katsoó:
–Tsi ja̱koxi̱ nga ndií Néná ji, bo̱a̱ tꞌín ji nga pan ngatama kui ndi̱jo̱o̱.
4Ta̱nga Kjisoo̱ bi̱ katsoó:
–Je kjitꞌa xo̱jo̱n eén Néná nínga bi̱ tsoó: «Jmí tsi ta̱ pan tsí xi kꞌuijñáni ngo xota̱, chjiénrií ngayeje én xi fotjonii̱ tsꞌoa Néná.»
5Kósꞌe̱ xindajín ndiabloo̱ kijíjo̱ Kjisoo̱ na̱xi̱ńdá tsjie Jerusale̱n, kó ki̱a̱ asiénsón nkꞌaa̱ na̱ngo̱xi̱i̱, 6kó bi̱ katsoó:
–Tsi ja̱koxi̱ nga ndií Néná ji, tjajminguí yojòo̱, ngatꞌa̱ je kjitꞌa xo̱jo̱n eén Néná nínga bi̱ tsoó:
Néná sa̱nguíyá ndítsjiee̱ tiña nínga tindyin,
kó tsja ko̱óꞌniúnií,
tsi̱ꞌe̱ nga ngojín ndi̱jo̱ stinguí ndsa̱ki.
7Sꞌe̱ Kjisoo̱ bi̱ katsoó:
–Ti̱ bi̱ ti̱ tsꞌén kjitꞌa xo̱jo̱n eén Néná nínga bi̱ tsoó: «Ka̱májín chjátꞌayékín ji Ndi̱a̱a̱ kui xi Nèe̱.»
8Sꞌe̱ ti̱ kijíjo̱ nguiní xindajín ndiabloo̱ ngo tji̱ngu̱i̱ xi ꞌniú nkꞌa, kó akoó ngayeje ngu̱i̱ndie nínga botíxoma xi tjín nga̱sondiee̱ ko̱jo kjo̱a̱je xi tjiín nga ngo nga ngo, 9kó bi̱ katsoó:
–Ngayeje kui nii̱ xi tsjaa ji, tsi ko̱sintꞌéní tikóo̱ nga si̱ꞌindikínní.
10Kósꞌe̱ Kjisoo̱ bi̱ katsoó:
–Chjéndi̱yáa̱, xindajín Satana̱, ngatꞌa̱ je kjitꞌa xo̱jo̱n eén Néná nínga bi̱ tsoó: «Ndi̱a̱ xi Ne tse̱ xí ti̱ꞌinndikín ji, kó ta̱ kuí tsi xi si̱ꞌinxétꞌée̱.»
11Kósꞌe̱ kui xindajín ndiabloo̱ xín kijí kó katsꞌénkjii̱n yojoo̱ Kjisoo̱, kó ndítsjiee̱ Néná jachókoón Kjisoo̱ xi katsꞌénseén.
Bi̱ tsꞌén ítsꞌi̱yanii̱ Kjisoo̱ nga katsꞌén xaá
(Markoo̱ 1:14-15; Rkaa̱ 4:14-15)
12Kó nga tsintꞌié Kjisoo̱ nga Juaa̱ ndo̱bo̱a̱ya tjiꞌyá, kijíꞌoyá nguiní nangui Ngalilea̱. 13Kó íjñámasien na̱xi̱ńdá Nasare̱t, kó na̱xi̱ńdá Kapernau̱n kijíkꞌíjñá, kui ngu̱i̱ndiee̱ tiña ndáchíkón xi tikón nangui Sabulo̱n ko̱jo Neftali̱ tikón, 14tsi̱ꞌe̱ nga jatjosón ngayeje ni xi katsó nda̱ chji̱ni̱e̱ꞌe̱én Néná xi ꞌmí Isayaa̱ nga bi̱ katsó:
15Nangui Sabulo̱n, ko̱jo nangui Neftali̱,
ndi̱ya xi fíni ndáchíkoón, ngándaá ndejé Jordaa̱n,
nangui Ngalilea̱ nínga tjín xota̱ xi judío̱jín.
16Xota̱ xi kisꞌińdo jñoó, je kamábe ngo ndiꞌí xi je,
ngo ndiꞌí je katsꞌéntsijee̱n ngayeje xota̱ xi kisꞌińdojñójo̱ kjo̱a̱bo̱yaa̱.
17Ngaskande koó kjiꞌa ítsꞌi̱yanii̱ Kjisoo̱ nga íni̱jmi eén Néná, kó bi̱ katsó:
–Tiꞌankꞌoyajnú yojojnú, ngatꞌa̱ Néná je tsá ko̱tíxoma.
Kjisoo̱ bi̱ tsꞌén tsíchji̱a̱a̱ nijón já xí tsoboá tji̱o̱
(Markoo̱ 1:16-20; Rkaa̱ 5:1-11)
18Kó nga tsoꞌbá Kjisoo̱ tꞌa ngu̱i̱ndio xi tikón nangui Ngalilea̱, kamábe jó já xí ntsꞌi̱e̱ ma xkjín, nda̱ xi ꞌmí Ximoo̱ kui xi ti̱ Pé kiꞌmií nga ko̱jo ntsꞌi̱e̱ kui nda̱a̱ kui xi ꞌmí Jandree̱ nga nda̱ꞌya ndyi̱mején ngu̱i̱jin ndáchíkoón, ngatꞌa̱ xá tji̱o̱ katsꞌén kui jaá. 19Kó Kjisoo̱ bi̱ katsoó:
–Ndibátjinguijnúꞌun, kó an xí sa̱ꞌinjnúꞌun nga ta̱sá xota̱ xi kꞌuitíkójnú xikoó tsi tji̱o̱ xi ko̱ndo̱bo̱a̱jnú.
20Sꞌe̱ kui jaá ti̱kjiꞌa índomasien nda̱ꞌyaa̱, kó kijítji̱nguii̱ Kjisoo̱.
21Kó ngu̱i̱chí boaꞌá kijí Kjisoo̱, sꞌe̱ kamábe nguiní ngui jó já xí ntsꞌi̱e̱ máa xkjín, nda̱ xi ꞌmí Sandiyaá ko̱jo ntsꞌi̱e̱ kui nda̱a̱ xi ꞌmí Juaa̱, ndií nda̱ xi ꞌmí Sebedeoo̱, nga jó kui jaá ko̱jo na̱ꞌmii̱ ngo ngu̱i̱ya tjotso je síndo nínga ndyi̱kjóyajin nda̱ꞌyaa̱. Ndibátjinguijnúꞌun katsó Kjisoo̱. 22Kó kui jaá índomasien tjotso jee̱ ko̱jo na̱ꞌmii̱, sꞌe̱ kijítji̱nguii̱ Kjisoo̱.
Kjisoo̱ bi̱ tsꞌén akóyá ko̱jo katsꞌéndaya kjín xota̱
(Rkaa̱ 6:17-19)
23Kó Kjisoo̱ kijí ngayeje na̱xi̱ńdá xi chji̱a̱ni nangui Ngalilea̱, nga akóyá éntjatsi̱e̱e̱ Néná ki̱a̱ ndiꞌa nínga ndokjo̱a̱ eén Néná, kó íni̱jmi kjo̱a̱a̱ nínga botixómá Néná ko̱jo katsꞌéndaya ngayeje xota̱ xi tjiín ngo chiꞌin ko̱jo xi oo̱n. 24Kó tajñání nga kandaꞌyá ni xi katsꞌén Kjisoo̱, ngayeje ngu̱i̱ndie xi chji̱a̱ni nangui Siria̱, kó tsanguínjoo̱ ngayeje xota̱ xi tjiín ngo chiꞌin, ngayeje xi oo̱n, ko̱jo xi tjíjii̱n a̱sién ni̱xtjin xi ndajín, ko̱jo xi tjiín kjo̱a̱ndasen, ko̱jo xi tjiín chiꞌin ꞌmeya, ko̱jo xi majín fí, kó Kjisoo̱ katsꞌéndaya kui xotaa̱. 25Kó achichí má xota̱ xi kijítji̱nguii̱ xi chji̱a̱ni nangui Ngalilea̱, Ndekápoli̱, Jerusale̱n, Judea̱ ko̱jo ngayeje ngu̱i̱ndie xi síndo tꞌa ndejé Jordaa̱n.
Đang chọn:
Matioo̱ 4: MAIX
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014