Mateo 27
27
Yesu ngɛ Pilato hɛ mi
(Marko 15.1; Luka 23.1-2; Yohane 18.28-32)
1Benɛ je na a, osɔfo nikɔtɔma amɛ kɛ ma nikɔtɔma amɛ tsuo so Yesu yi nɔ, konɛ a gbe lɛ. 2Nɛ a fi e nine nɛ a kpaka lɛ kɛ ho ya ha amlaalo Pontio Pilato.
Yuda gbenɔ
(Bɔfo 1.18-19)
3Benɛ Yuda, nɔ nɛ tsɔɔ Yesu se blɔ ɔ, na kaa a bu Yesu fɔ ɔ, e pia e he, nɛ e kpale sika yi nyingmi etɛ ɔ ya ha osɔfo nikɔtɔma amɛ kɛ nikɔtɔma amɛ ekohu, 4nɛ e ke: “I pee yayami kaa i tsɔɔ muɔ nɛ yayami ko be e he ɔ se blɔ.” Se mɛ lɛɛ a ke: “Lɔ ɔ pi wa he sane ko; mo nitsɛ hyɛ nɔ!” 5Nɛ e ya sake sika a ngɔ pue si ngɛ sɔlemi we ɔ, nɛ e pue nɔ kɛ ho nɛ e ya wo e kuɛ kpa.
6Osɔfo nikɔtɔma amɛ ya kukuɔ sika hiɔ ɔ, nɛ a ke: “E dɛ́ kaa a kɛ woɔ nito he ɔ; ejakaa muɔ yi ni ʼi.” 7Nɛ a ya da nɛ a kɛ he buɛ puɛlɔ ɔ abɔɔ ɔ, konɛ a pu nibwɔhi ngɛ lejɛ ɔ. 8Lɔ ɔ he ɔ a tsɛɛ jamɛ a abɔɔ ɔ Muɔ abɔɔ kɛ mwɔnɛ.
9Kɔlɔ ɔ ha gbalɔ Yeremia munyu ɔ ba mi ke: “Nɛ a ngɔ sika hiɔ yi nyingmi etɔ ɔ, nɛ ji jua nɛ Israelbi ɔmɛ wo ɔ, 10nɛ a kɛ he buɛ puɛlɔ ɔ abɔɔ ɔ, kaa bɔ nɛ Nyɔmtsɛ ɔ de mi ɔ.”
Pilato bi Yesu munyu
(Marko 15.2-5; Luka 23.3-5; Yohane 18.33-38)
11Nɛ a kɛ Yesu ba da amlaalo ɔ hɛ mi, nɛ amlaalo ɔ bi lɛ ke: “Mo ji Yudafo ɔmɛ a matsɛ ɔ lo?” Nɛ Yesu de lɛ ke: “Ja o de ɔ nɛ.” 12Se benɛ osɔfo nikɔtɔma amɛ kɛ nikɔtɔma amɛ ngɛ e nya poe ɔ, pe je we nya. 13Kɛkɛ nɛ Pilato bi lɛ ke: “Anɛ o nui sanehi sɔuu nɛ a kɛ ngɛ o nɔ puee nɛ ɔ?” 14Se e pui e nya mi kulaa; nɛ amlaalo ɔ nya kpɛ e nitsɛ nitsɛ?
A bu Yesu gbenɔ fɔ
(Marko 15.6-15; Luka 23.13-25; Yohane 18.39—19.16)
15Se daa, ke e su nyami ligbi ɔ nɔ ɔ, amlaalo ɔ ngmɛɛ pamino kake nɛ asafo ɔ suɔ he haa mɛ. 16Se lɛ be ɔ mi ɔ, a ngɛ pamino ku ko nɛ a tsɛɛ lɛ Baraba. 17Lɔ ɔ he ɔ, benɛ asafo ɔ ba bua a he nya a, Pilato bi mɛ ke: “Mɛnɔ he nyɛ suɔ kaa ma ngmɛɛ ha nyɛ: Baraba, loo Yesu nɛ a tsɛɛ lɛ Kristo ɔ?” 18Ejakaa Pilato le kaa ninye he nɛ a ngɔ lɛ ha a nɛ.
19Se benɛ Pilato hii si ngɛ kojomi sɛ ɔ nɔ ɔ, e yo tsɔ kɛ ha e ngɔ ba de lɛ ke: “O kɛ dalɔ nɛ ɔ ko ye sane ko; ejakaa e he je ɔ, ye he hia mi babauu ngɛ nlami mi mwɔnɛ.”
20Se osɔfo nikɔtɔma amɛ kɛ nikɔtɔma amɛ wo asafo ɔmɛ a yi mi ke, a bi Baraba mohu, nɛ a gbe Yesu. 21Lɔ ɔ he ɔ amlaalo ɔ he nɔ nɛ e de mɛ ke: “Mɛ ni enyɔ ɔmɛ akpɛti mɛnɔ he nyɛ suɔ kaa ma ngmɛɛ ha nyɛ?” Nɛ a ke: “Baraba.” 22Pilato bi mɛ ke: “Lɛɛ mɛni ma pee Yesu nɛ a tsɛɛ lɛ Kristo ɔ he mɔ?” Mɛ tsuo a ke: “Ha nɛ a sɛu lɛ!” 23Nɛ amlaalo ɔ bi ke: “Mɛni yayami e pee?” Se enɛ ɔ mohu ha a kpa ngmlaa wawɛɛ ke: “Ha nɛ a sɛu lɛ!” 24Se benɛ Pilato na kaa e nyɛ we he nɔ́ ko nɛ e pee, se mohu basabasa ngɛ hlae nɛ maa te si ɔ, e ngɔ nyu nɛ se fɔ e dɛ ngɛ asafo ɔ hɛ mi, nɛ e ke: “Imi lɛɛ i yi dalɔ nɛ ɔ muɔ he musu; nyɛ, nyɛ sane ʼi!” 25Nɛ ma a tsuo he nɔ ke: “E muɔ nɛ ba waa kɛ wa bimɛ a nɔ!” 26Kɛkɛ nɛ e ngmɛɛ Baraba he ngɔ ha mɛ; se Yesu ɔ, e ha a fia lɛ kplibi nɛ e ngɔ lɛ ngɔ ha nɛ a ya sɛu.
Aslaafo ɔmɛ ye Yesu he fɛu
(Marko 15.16-20; Yohane 19.2-3)
27Kɛkɛ nɛ amlaalo ɔ aslaafo ɔmɛ ngɔ Yesu kɛ ho kojomi he ɔ ya, nɛ a ya bua aslaafohi a kuu ɔ tsuo nya kɛ ba e he; 28nɛ a je e he tade ɔmɛ, nɛ a ngɔ tade tsu klɔii ko ngɔ wo lɛ; 29nɛ a pee mio jlasi ngɔ fi e yi, nɛ a kɛ paplo ha lɛ nɛ e hɛɛ ngɛ e hiɛ ɔ nine mi, nɛ a kpla si ngɛ e hɛ mi nɛ a ye e he fɛu ke: “Wa nga mo oo, Yudafohi a matsɛ!” 30Nɛ a la lada ngɔ pue e nɔ, nɛ a he paplo ɔ ngɛ e dɛ nɛ a ngɔ fia e yi kpɛti. 31Nɛ benɛ a ye e he fɛu ta a, a je tade klɔii ɔ ngɛ e he, nɛ a ngɔ lɛ nitse e tade ɔmɛ ngɔ wo lɛ, nɛ a kpaka lɛ kɛ ho konɛ a ya sɛu.
Yesu sɛumi
(Marko 15.21-32; Luka 23.26-43; Yohane 19.17-27)
32Se benɛ a yaa a, a na nyumu Kireneno ko nɛ a tsɛɛ lɛ Simon, nɛ a nyɛ e nɔ ke e wo e sɛumi tso ɔ. 33Nɛ benɛ a su he nɛ a tsɛɛ lejɛ ɔ Golgota nɛ e sisi ji “Yikoklodonya” a, 34a ngɔ wai nɛ a kɛ duɔ futu mi ha lɛ ke e nu; se benɛ e tso hyɛ ɔ, e sume kaa e nuu.
35Nɛ benɛ a sɛu lɛ ɔ, a fɔ sɔ kɛ dla e tade ɔmɛ. 36Nɛ a hi si ngɛ lejɛ ɔ nɛ a bu e he. 37Nɛ a ngma sane nɛ a kɛ fɔ e nɔ ɔ ngɔ mɛtɛ e yi je ke: “Yesu Yudafo ɔmɛ a matsɛ ɔ ji nɛ ɔ nɛ!” 38Lɛ be ɔ mi ɔ, a sɛu ojo fiali enyɔ ngɔ piɛ e he; nɔ kake ngɛ e hiɛ ɔ nɔ, nɛ nɔ kake hu ngɛ e muɔ nɔ? 39Nihi nɛ bee ɔ tu musu bɔmi munyuhi ngɔ si lɛ, nɛ a hwanya a yi, 40nɛ a ke: “Mo nɛ o kuɔ sɔlemi we ɔ nɛ o kpaleɔ fia ligbi etɛ ɔ, he mo nitsɛ o yi wami! Ke Mawu bi ji mo ɔ, jee seumi tso ɔ nɔ kple si koo!” 41Ja nɔuu osɔfo nikɔtɔma amɛ kɛ mlaa tsɔɔli ɔmɛ kɛ nikɔtɔma amɛ ye e he fɛu de ke: 42“Ni kpahi a yiwami e he, se lɛ nitsɛ e nɔ ɔ e nyɛ we nɛ e he. Ke Israel matsɛ ɔ ji lɛ ɔ, ha nɛ e je sɛumi tso ɔ nɔ heja nɛ ɔ kɛ kple si, nɛ wa ma he lɛ ngɔ ye. 43E ke Mawu nɔ e hɛ ngɛ: Ha nɛ e je lɛ koo, ke e ngɛ e he tsui ɔ; ejakaa e de ke: ‘Mawu bi ji mi.’ ” 44Ja nɔuu awi yeli ɔmɛ nɛ a sɛu ngɔ piɛ e he ɔ hu bɔ lɛ ahlua.
Yesu gbenɔ
(Marko 15.33-41; Luka 23.44-49; Yohane 19.28-30)
45Se kɛ je piani ngmlɛ nyɔngma kɛ enyɔ kɛ ya su ngmlɛ etɛ ɔ, diblii wo ngɛ zugba a tsuo nɔ. 46Se ngmlɛ etɛ mi ɔ, Yesu kpa ngmlaa kɛ gbi wawɛɛ ke: “Eli, Eli, lama sabaktani?” E sisi ji: “Ye Mawu, ye Mawu, mɛni he je o kua mi?” 47Se benɛ nihi nɛ daa si ngɛ lejɛ ɔ a kpɛti ni komɛ nu ɔ, a ke: “Elia nɔ nɛ ɔ ngɛ tsɛe ɔ nɛ.” 48Nɛ amlɔ ɔ a ti nɔ kake sa fo nɛ e ya ngɔ wosuma, nɛ e kɛ sɔ da nɛ kua mi, nɛ e ngɔ ma paplo nya ha lɛ ke e nu. 49Se nihi nɛ piɛ ɔ de lɛ ke: “Mlɛ! Ha waa hyɛ kaa Elia maa ba ba je lɛ lo?” 50Nɛ Yesu kpa ngmlaa ekohu kɛ gbi wawɛɛ, nɛ e ngɔ e nya.
51Nɛ oʼɛ, sɔlemi tsu ɔ mi pomi bo ɔ mi gba enyɔ kɛ je hiɔwe kɛ ba ma si, nɛ zugba mimiɛ, nɛ tɛ sahi a mi gba; 52nɛ yɔkɔhi a nya bli, nɛ klɔuklɔubihi nɛ hwɔ mahɛ ɔmɛ a nɔmlɔ tsohi fuu te si; 53nɛ e sitemi ɔ se ɔ, a je kpo kɛ je a muɔ ɔmɛ a mi, nɛ a ya ma klɔuklɔu ɔ mi ya je a he kpo ngɔ tsɔɔ nihi fuu.
54Se benɛ aslaafohi lafa a nyatsɛ ɔ kɛ nihi nɛ kɛ lɛ ngɛ Yesu he bue ɔ, na zugba mimiɛmi ɔ kɛ nihi nɛ a pee ɔ, a ye gbeye wawɛɛ, nɛ a ke: “Niinɛ, Mawu bi ji nɛ ɔ nɛ!” 55Se yihi fuu ngɛ lejɛ ɔ nɛ daa si ngɛ se lokoo ngɛ hyɛe; mɛ ji ninɛmɛ nɛ nyɛɛ Yesu se kɛ je Galilea nɛ a sɔmɔɔ lɛ ɔ nɛ; 56a kpɛti ni komɛ ji Maria Magdalena, kɛ Maria nɛ ji Yakobo kɛ Yose nyɛ ɔ, kɛ Zebedeo bimɛ ɔmɛ a nyɛ ɔ.
Yesu pumi
(Marko 15.42-47; Luka 23.50-56; Yohane 19.38-42)
57Benɛ su gbɔkuɛ ɔ, niatsɛ ko nɛ je Arimatia nɛ a tsɛɛ lɛ Yosef ɔ ba, nɛ lɛ hu Yesu kaseli ɔmɛ a ti nɔ kake ji lɛ; 58lɛ lɛ e ya Pilato ngɔ ya kpa lɛ pɛɛ konɛ e ngɔ Yesu gbogboe ɔ ngɔ ha lɛ. Kɛkɛ nɛ Pilato fã ke a ngɔ nɔ gbogboe ɔ ngɔ ha lɛ. 59Nɛ Yosef ngɔ nɔ gbogboe ɔ, nɛ e ngɔ kploba falefale ngɔ blaa lɛ, 60nɛ e kɛ lɛ ya fɔ lɛ nitse e yɔkɔ he nɛ e ha a kpɛ ngɛ tɛsa mi ɔ mi, nɛ e kpɛne tɛ kpetekpleenyɛ kɛ tsi yɔkɔ ɔ nya, nɛ e pue nɔ kɛ ho. 61Se Maria Magdalena kɛ Maria kpã ko ɔ ngɛ lejɛ ɔ, a hii si ngɛ yɔkɔ ɔ he.
Yesu yɔkɔ ɔ he bumi
62Se hedlami-kɛ-tomi ligbi ɔ nɔ je na a, osɔfo nikɔtɔma amɛ kɛ Farisifo ɔmɛ a nya ba bua ngɛ Pilato ngɔ, 63a ke: “Nyɔmtsɛ, wa kai kaa benɛ sisilɔ nɛ ɔ hɛ ngɛ ɔ, e ke: ‘Ligbi nɛ ji ligbi etɛ ɔ e ma te si ekohu.’ 64Lɔ ɔ he ɔ fã nɛ a ya bu yɔkɔ ɔ he saminya kɛ maa su ligbi nɛ ji ligbi etɛ ɔ, konɛ e kaseli ɔmɛ ko ba ju lɛ kɛ ho, nɛ a ya de ma a ke: ‘E te si kɛ je gbeje;’ nɛ sekpɛ sisimi ɔ ba pee yayami pe kekle nɔ ɔ.” 65Pilato de mɛ ke: “Oʼɛ, aslaafohi, nyɛɛ ya nɛ nyɛ ya bu bɔ nɛ nyɛ ma nyɛ.” 66Kɛkɛ nɛ a pue nɔ kɛ ho, nɛ a ya sɔu yɔkɔ ɔ nya, nɛ a ha aslaafo ɔmɛ bu he.
Đang chọn:
Mateo 27: DAN77
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dangme New Testament © United Bible Societies, 1977.
