Mateo 26
26
A so Yesu yi nɔ
(Marko 14.1-2; Luka 22.1-2; Yohane 11.45-53)
1Benɛ Yesu gbe munyu nɛ ɔmɛ kulaa tumi nya a, e de e kaseli ɔmɛ ke: 2“Nyɛ le kaa e piɛ ligbi enyɔ nɛ a yeɔ Hetsɔmi ɔ, nɛ a ma je Nɔmlɔ Bi ɔ ngɔ ha nɛ a sɛu lɛ.”
3Lɛ be ɔ mi ɔ, osɔfo nikɔtɔma amɛ kɛ mlaa tsɔɔli ɔmɛ kɛ ma nikɔtɔma amɛ ya bua a he nya ngɛ osɔfo nɔkɔtɔma nɛ a tsɛɛ lɛ Kaiafa a mɔ ɔ mi. 4Nɛ a ya so bɔ nɛ a maa pee nɛ a nu Yesu ga mi nɛ a gbe lɛ; 5se a ke: “Pi ngɛ Hejɔɔmi ligbi ɔ nɔ, konɛ basabasa peemi nɛ ko ba ma a mi.”
A pɔ Yesu nu ngɛ Betania
(Marko 14.3-9; Yohane 12.1-8)
6Benɛ Yesu ngɛ Betania ngɛ Simon, tsitsɛ ɔ, we ɔ mi ɔ, 7yo ko hɛɛ alabastro tɔ kɛ e mi nu kɛ e he via nɛ he jua wa kɛ ba e kasa nya, nɛ benɛ e hii si ngɛ niyeni si ɔ, e plɛ ngɔ pue e yi mi. 8Se benɛ e kaseli ɔmɛ na a, a mi mi wo la nɛ a de ke: “Kɛ ji yaka ni puɛmi nɛ ɔ sisi kɛɛ? 9Ejakaa nu kɛ e he via nɛ ɔ, jinɛ a ma nyɛ jua sika fuu nɛ a ngɔ ha ohiafohi.” 10Se benɛ Yesu na enɛ ɔ ɔ, e de mɛ ke: “Mɛni he je nyɛ ngɛ yo ɔ nya dooe? E tsu nitsumi saminya ha mi. 11Ejakaa ohiafo ɔmɛ ɔ, nyɛɛ kɛ mɛ ngɛ daa, se imi lɛɛ, pi daa nɛ i kɛ nyɛ maa hi si. 12Ejakaa nu kɛ e he via nɛ ɔ nɛ e plɛ ngɔ pue ye nɔmlɔ tso ɔ nɔ nɛ ɔ, e pee ngɔ to ye pumi. 13Niinɛ, i ngɛ nyɛ dee ke: He tsuaa he nɛ a maa fiɛ Sane Kpakpa nɛ ɔ ngɛ, ngɛ je mi tsuo ɔ, a maa wo nɔ́ nɛ yo nɛ ɔ pee nɛ ɔ hu tã ma ngɔ kai lɛ.”
Yuda kplɛɛ kaa e maa tsɔɔ Yesu se blɔ
(Marko 14.10-11; Luka 22.3-6)
14Kɛkɛ nɛ ni nyɔngma kɛ enyɔ ɔmɛ a kpɛti nɔ kake nɛ a tsɛɛ lɛ Yuda Iskariot ɔ pue nɔ kɛ ho osɔfo nikɔtɔma amɛ a ngɔ ya, 15nɛ e ya de mɛ ke: “Mɛni nyɛ ma ha mi, nɛ ma je lɛ ngɔ wo nyɛ dɛ mi?” Nɛ a kane sika hiɔ yi nyingmi etɛ ngɔ ha lɛ. 16Nɛ kɛ je jamɛ a be ɔ nɔ ɔ, e hla e he blɔ konɛ e ngɔ lɛ ngɔ wo a dɛ mi.
Yesu kɛ e kaseli ɔmɛ ye Hetsɔmi niyeni ɔ
(Marko 14.12-21; Luka 22.7-14; 22.21-23; Yohane 13.21-30)
17Se akpiti nyami ligbi ɔmɛ a mi kekle ligbi ɔ nɔ ɔ, kaseli ɔmɛ ba Yesu ngɔ ba bi lɛ ke: “Jije o suɔ kaa wa ya dla ha mo nɛ o ya ye Hetsɔmi ɔ ngɛ?” 18Nɛ e ke: “Nyɛɛ ya ma a mi nɛ nyɛ ya de asimasi ke: ‘Tsɔɔlɔ ɔ ke: Ye be ɔ su ta; o we ɔ mi i kɛ ye kaseli ɔmɛ maa ye Hetsɔmi ɔ ngɛ.’ ” 19Nɛ e kaseli ɔmɛ ya pee bɔ nɛ Yesu de mɛ ɔ, nɛ a dla Hetsɔmi ni ɔ ngɔ to.
20Se benɛ e su gbɔkuɛ ɔ, e kɛ ni nyɔngma kɛ enyɔ ɔ ya hi si ngɛ niyeni ɔ he. 21Nɛ benɛ a ngɛ ni ɔ yee ɔ, e ke: “Niinɛ, i ngɛ nyɛ dee ke: Nyɛ ti nɔ kake maa tsɔɔ ye se blɔ.” 22Nɛ e dɔ mɛ saminyɛ, nɛ a bɔni lɛ bimi kakaaka ke: “Nyɔmtsɛ, imi lo?” 23Se e he nɔ ke: “Nɔ nɛ nine nɛ kɛ ye nine kpee ngɛ ka a mi ɔ, lɛ nɔuu lɛ e maa tsɔɔ ye se blɔ ɔ nɛ. 24Nɔmlɔ Bi ɔ ma gbo kaa bɔ nɛ a ngma ngɛ e he ɔ mohu; se musu tloo jamɛ a nɔmlɔ ɔ nɛ tsɔɔ Nɔmlɔ Bi ɔ se blɔ ɔ; afani nɛ a na we a nɛ a fɔ jamɛ a nɔmlɔ ɔ.” 25Nɛ Yuda e se blɔ tɔsslɔ ɔ, he nɔ ke: “Anɛ imi lo, Rabi?” E de lɛ ke: “Ja o de ɔ nɛ!”
Nyɔmitsɛ niyeni ɔ sisitomi
(Marko 14.22-26; Luka 22.15-20)
26Se benɛ a ngɛ ni ɔ yee ɔ, Yesu kɛ̃ abolo, nɛ e gbaa nɔ nɛ e kuɔ mi, nɛ e ngɔ ha e kaseli ɔmɛ nɛ e ke: “Nyɛ he nɛ nyɛɛ ye! Enɛ ɔ ji ye nɔmlɔ tso ɔ nɛ.” 27Nɛ e wo kplu ɔ, nɛ e na si, nɛ e ngɔ ha mɛ nɛ e ke: “Nyɛ tsuo kulaa nyɛɛ nu enɛ ɔ eko! 28Ejakaa enɛ ɔ ji ye muɔ nɛ ji somi ɔ nɔ ɔ nɛ a plɛ pue si ngɛ nihi fuu a he ha yayami pami. 29Se i ngɛ nyɛ dee ke: Kɛ je nɛ ɔ nɔ kɛ yaa nɛ ɔ ɔ, i be wai tso yiblii nɛ ɔ eko nue hu, kɛ maa su ligbi nɛ i kɛ nya maa nu lɛ ehe ngɛ Tsaatsɛ matsɛ yemi ɔ mi.” 30Nɛ benɛ a la yi jemi la ko ɔ, a je kpo kɛ ho Nuyoku ɔ nɔ ya.
Yesu gba Petro kuami ngɔ to
(Marko 14.27-31; Luka 22.31-34; Yohane 12.36-38)
31Kɛkɛ nɛ Yesu de mɛ ke: “Nyɔ nɛ ɔ mi ɔ, ye he sane ma ha nyɛ tsuo nyɛ nane ma kpata; ejakaa a ngma ke: ‘Ma fia tohyɛlɔ ɔ nɔ, nɛ to asafo ɔ maa gbɛ fia.’ 32Se ye si temi ɔ se ɔ, ma sɛ nyɛ hlami kɛ maa ya Galilea.” 33Se Petro he nɔ nɛ e de lɛ ke: “Ke ni ɔmɛ tsuo a nane ma kpata a, imi lɛɛ ye nane be kpatae gblegbleegblee.” 34Yesu de lɛ ke: “Niinɛ, i ngɛ mo dee ke: Nyɔ nɛ ɔ mi nɔuu, loko kungwɔ ma kpã nɔ ɔ, o ma kpa ngɛ ye si etɛ.” 35Petro de lɛ ke: “Ke i kɛ mo ma gbo tete po ɔ, i be kpae ngɛ o se!” Jã nɔuu kaseli ɔmɛ tsuo hu de.
Yesu ya sɔle ngɛ Getsemane
(Marko 14.32-42; Luka 22.39-46)
36Jeha nɛ ɔ Yesu kɛ mɛ ba he ko nɛ tsɛɛ lejɛ ɔ Getsemane; nɛ e de e kaseli ɔmɛ ke: “Nyɛɛ hi si ngɛ hiɛ ɔ, konɛ ma ya nɛ ma ya sɔle.” 37Nɛ e ngɔ Petro kɛ Zebedeo bimɛ nyumuhi enyɔ ɔ ngɔ piɛ e he nɛ e ywlɛ ho e he nɛ e hao. 38Kɛkɛ nɛ e de mɛ ke: “Ye klaa ngɛ haoe kɛ maa su gbenɔ mi po; nyɛɛ hi si ngɛ hiɛ ɔ nɛ nyɛɛ kɛ mi nɛ fɔ nyɔ!” 39Nɛ e ya e hɛ mi bɔɔ nɛ e ngɔ e hɛ mi ngɔ bu si, nɛ e sɔle ke: “Tsaatsɛ, ke e maa hi ɔ, ha nɛ kplu nɛ ɔ be ye he kɛ ho; se kɛ̃ ɔ, pi bɔ nɛ imi i suɔ, se mohu bɔ nɛ mo o suɔ.”
40Nɛ benɛ e ba kaseli ɔmɛ a ngɔ ɔ, e na kaa a hwɔ mahɛ; nɛ e de Petro ke: “Anɛ nyɛ nyɛ we nɛ nyɛɛ kɛ mi nɛ fɔ nyɔ ngmlɛfia kake pɛ lo? 41Nyɛɛ fɔ nyɔ nɛ nyɛɛ sɔle, konɛ nyɛ ko sɛ ka mi; mumi ɔ ngɛ kplɛɛ e mohu, se he lo ɔ gbede.”
42E pue nɔ kɛ ho ekohu nɔ nɛ ji si enyɔ, nɛ e ya sɔle ke: “Tsaatsɛ, ke kplu nɛ ɔ be nyɛe ye he bemi kɛ ho kaa ja i nu ɔ, a pee bɔ nɛ o suɔ.” 43Nɛ benɛ e ba a, e na kaa a hwɔ mahɛ ekohu; ejakaa nyɔ gbe mɛ.
44Nɛ e kpale si mɛ kɛ ho ekohu, nɛ e ya sɔle nɔ nɛ ji si etɛ, nɛ e tu jamɛ a munyu ɔ nɔuu. 45Kɛkɛ nɛ e ba e kaseli ɔmɛ a ngɔ, nɛ e de mɛ ke: “Nyɛɛ lɛɛ nyɛ he mi jɔ nyɛ nɛ nyɛ ngɛ mahɛ hwɔe nɛ ɔ? Oʼɛ, ngmlɛfia a su ta, nɛ a maa ngɔ Nɔmlɔ Bi ɔ ngɔ wo yayami peeli a dɛ mi. 46Nyɛɛ te si, nyɛ ha waa ho; oʼɛ, nɔ nɛ maa tsɔɔ ye se blɔ ɔ su si ta.”
Yesu numi
(Marko 14.43-50; Luka 22.47-53; Yohane 18.3-12)
47Nɛ benɛ e ngɛ munyu ɔ tue kɛ mwɔ ɔ, oʼɛ, Yuda, ni nyɔngma kɛ enyɔ ɔmɛ a kpɛti nɔ kake ɔ, ba, nɛ asafo fuu nɛ je osɔfo nikɔtɔma amɛ kɛ ma nikɔtɔma amɛ a ngɔ ɔ kɛ lɛ nyɛɛ, nɛ a hɛɛ klaate kɛ tsokpotihi. 48Se nɔ nɛ ngɛ e se blɔ tsɔɔe ɔ to mɛ okadi ke: “Nɔ nya he nɛ ma fiɔ ɔ, lɛ ʼi; nyɛɛ nu lɛ!” 49Nɛ amlɔ ɔ e ba Yesu ngɔ ba de ke: “He manye, Rabi,” nɛ e fiɔ e nya he. 50Se Yesu de lɛ ke: “Huɛ, pee nɔ́ nɛ o ma peemi ɔ.” Kɛkɛ nɛ ni ɔmɛ ba tua Yesu nɛ a nu lɛ. 51Nɛ oʼɛ, nihi nɛ kɛ Yesu ngɛ ɔ a ti nɔ kake kpa e nine mi nɛ e hia klaate nɛ e kɛ ja osɔfo nɔkɔtɔma a tsɔlɔ, nɛ e po e tue. 52Kɛkɛ nɛ Yesu de lɛ ke: “Ngɔɔ o klaate ɔ ngɔ to e to he; ejakaa nihi tsuo nɛ hiaa klaate ɔ, klaate nɔuu a kɛ ma kpata a hɛ mi. 53Aloo o susu kaa i be nyɛe Tsaatsɛ pɛɛ ma kpa nɛ amlɔ nɛ ɔ nɔuu e ma ha mi hiɔwe bɔfohi pe asafo nyɔnmga kɛ enyɔ nɛ a ba fã ye he? 54Se lɔ ɔ lɛɛ kɛ maa pee kɛɛ nɛ ngmami ɔmɛ maa ba mi, kaa ja a pee kikɛ ɔ nɔuu?”
55Jamɛ a ngmlɛfia a nɔ nɔuu ɔ, Yesu de asafo ɔ ke: “Imi numi nyɛ ba kaa a nuu ojo fialɔ ko ke klaate kɛ tsokpotihi nɛ ɔ? I hii sɔlemi we ɔ daa nɛ i tsɔɔ ni, nɛ nyɛ nui mi. 56Se a pee enɛ ɔ tsuo konɛ nihi nɛ gbali ɔmɛ ngma a nɛ ba mi.” Kɛkɛ nɛ kaseli ɔmɛ tsuo tu fo si lɛ.
Yesu ngɛ gua a hɛ mi
(Marko 14.53-65; Luka 22.54-55; 22.63-71; Yohane 18.13-14; 18.19-24)
57Se ninɛmɛ nɛ nu Yesu ɔ kpaka lɛ kɛ ho Kaiafa, osɔfo nɔkɔtɔma a, ngɔ ya, he nɛ mlaa tsɔɔli ɔmɛ kɛ nikɔtɔma amɛ bua a he nyɛ ngɛ ɔ. 58Petro nyɛɛ e se ngɛ lokoo kɛ ba osɔfo nɔkɔtɔma a mɔ ɔ mi, nɛ e ya sɛ lejɛ ɔ nɛ e kɛ sɔmɔli ɔmɛ ya hii si, konɛ e hyɛ bɔ nɛ nyagbe ɔ maa ba ha. 59Osɔfo nikɔtɔma amɛ kɛ nikɔtɔma amɛ kɛ gua a tsuo hla lakpa odase ngɛ Yesu he, konɛ a gbe lɛ; 60se a nɛ eko, pohu lakpa odase yeli fuu ba, se kɛ ɔ a nɛ eko. Pee se ɔ, lakpa odase yeli enyɔ ba 61nɛ a ba de ke: “Nɔ nɛ ɔ de ke: ‘Ma nyɛ Mawu Sɔlemi we ɔ ma kuɔ, nɛ ma fia lɛ ligbi etɛ.’ ”
62Nɛ osɔfo nɔkɔtɔma a te si nɛ e bi lɛ ke: “O be odase nɛ ni nɛ ɔmɛ ngɛ yee ngɛ o he ɔ nya jee?” 63Se Yesu pɛ̃ e nya mi. Nɛ osɔfo nɔkɔtɔma a he nɔ nɛ e de lɛ ke: “I na Mawu hɛ kalɔ ɔ kaa, ke mo ji Kristo, Mawu bi ɔ, de wɔ!” 64Yesu de lɛ ke: “Jã o de ɔ nɛ! Se i ngɛ nyɛ dee ke: Kɛ je be nɛ ɔ kɛ yaa a, nyɛ maa na Nɔmlɔ Bi ɔ kaa e hii si ngɛ he wami ɔ hiɛ ɔ nɔ, nɛ e ma ngɛ hiɔwe bɔku ɔmɛ a mi.” 65Kɛkɛ nɛ osɔfo nɔkɔtɔma a gba e tadehi nɛ e ke: “E bɔ musu! Mɛni wa pa ngɛ odase yeli hlae ya pee ekohu oʼɛ, jeha nɛ ɔ nyɛ nu e musu bɔmi ɔ! 66Kɛ nyɛ susu kɛɛ?” A he nɔ nɛ a ke: “E sa gbenɔ!” 67Kɛkɛ nɛ a la lada ngɔ pue e hɛ mi, nɛ a gba lɛ mahi; nɛ ni komɛ hu fia lɛ ni, 68nɛ a ke: “Kristo, gbaa tsɔɔ wɔ, mɛnɔ ji nɔ nɛ gbe mo ɔ?”
Petro kua Yesu
(Marko 14.66-72; Luka 22.56-62; Yohane 18.15-18; 18.25-27)
69Se Petro hii si ngɛ se lokoo ngɛ kpo ɔ kpɛti; nɛ sɔmɔlɔ yo ko ba e ngɔ ba de lɛ ke: “Mo hu tse o kɛ Yesu, Galiliano ɔ lɛ ngɛ!” 70Se e kua ngɛ mɛ tsuo a hɛ mi, nɛ e ke: “I li nɔ́ nɛ o ngɛ dee nɛ ɔ.” 71Se benɛ e te si kɛ ho kue ɔ si ya a, sɔmɔlɔ yo kpa ko hu na lɛ, nɛ e de nihi nɛ ngɛ lejɛ ɔ ke: “Nɔ nɛ ɔ hu kɛ Yesu Nazareno ɔ lɛ ngɛ.” 72Nɛ e kua ekohu kɛ kitakami ke: “I li nɔmlɔ ɔ.” 73Se pee se bɔɔ ɔ, nihi nɛ daa si ngɛ lejɛ ɔ ba de Petro ke: “Anɔkuale ji kaa, a ti nɔ kake ji mo; ejakaa o munyu tete ngɛ mo si jee!” 74Kɛkɛ nɛ e bɔni gbiɛmi kɛ kita kami ke: “I li nɔmlɔ ɔ!” Nɛ amlɔ ɔ kungwɔ kpa nɔ. 75Nɛ Petro kai Yesu munyu nɛ e tu lɛ ke: “Loko kungwɔ ma kpa nɔ ɔ, o ma kpa ngɛ ye se si etɛ” ɔ. Nɛ e je kpo ya fo ya wawɛɛ.
Đang chọn:
Mateo 26: DAN77
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dangme New Testament © United Bible Societies, 1977.
