Mateo 28
28
Yesu sitemi
(Marko 16.1-10; Luka 24.1-12; Yohane 20.1-10)
1Hejɔɔmi ligbi ɔ nyagbe, benɛ je bɔni nami kɛ ma otsi ɔ kekleekle ligbi ɔ nɔ ɔ, Maria Magdalena kɛ Maria kpa ko ɔ ba yɔkɔ ɔ slaami. 2Nɛ oʼɛ, zugba mimiɛ wawɛɛ, ejakaa Nyɔmtsɛ ɔ bɔfo je hiɔwe kple si, nɛ e ba kpɛne tɛ ɔ kɛ je muɔ ɔ nya kɛ ya se, nɛ e ho hi nɔ. 3Nɛ e hɛ mi kpɛ kaa slaba la, nɛ e tade ɔ hu hiɛ futafuta kaa snoo. 4Gbeye nɛ nu buli ɔmɛ he je ɔ, a he do blibliibli nɛ a plɛ kaa ni gbogboehi.
5Se bɔfo ɔ de yi ɔmɛ ke: “Nyɛɛ lɛɛ nyɛ ko ye gbeye, ejakaa i le kaa nyɛ ngɛ Yesu nɔ nɛ a sɛu ɔ hlae; 6e be hiɛ ɔ, ejakaa e te si, kaa bɔ nɛ e de ɔ. Nyɛɛ ba nɛ nyɛ ba hyɛ he nɛ Nyɔmtsɛ ɔ fɔ si ngɛ ɔ. 7Nɛ nyɛɛ ya esɔ esɔ nɛ nyɛ ya de e kaseli ɔmɛ ke e te si kɛ je gbeje; nɛ oʼɛ, e ngɛ nyɛ hlami sɛe kɛ yaa Galilea; lejɛ ɔ nyɛ maa na lɛ ngɛ; oʼɛ; i de nyɛ.” 8Nɛ a pue nɔ kɛ je nɔpu he ɔ esɔ esɔ kɛ gbeye kɛ nyami babauu, nɛ a hɛɛ fo konɛ a ya sɛɛ ha e kaseli ɔmɛ.
9Nɛ benɛ yi ɔmɛ yaa nɛ a ya sɛɛ ha e kaseli ɔmɛ ɔ, oʼɛ, Yesu kɛ mɛ ba kpe nɛ e ke: “I ngaa nyɛ!” Nɛ a ba nu e nane, nɛ a kpla si nɛ a ja lɛ. 10Kɛkɛ nɛ Yesu de mɛ ke: “Nyɛ ko ye gbeye; nyɛɛ ya nɛ nyɛ ya de ye nyɛmimɛ ɔmɛ konɛ a ya Galilea; se lejɛ ɔ a maa na mi ngɛ.”
Nikɔtɔma amɛ ha buli ɔmɛ nyɔ mi mi
11Se benɛ a yaa a, oʼɛ, buli ɔmɛ a ti ni komɛ ba ma a mi, nɛ a ba sɛɛ nihi nɛ a pee ɔ tsuo kulaa ngɔ tsɔɔ osɔfo nikɔtɔma amɛ. 12Nɛ benɛ a kɛ nikɔtɔma amɛ bɔ gua nɛ a ya da a, a ha aslaafo ɔmɛ sika fuu, 13a ke: “Nyɛ de ke nyɔ mi, benɛ wa hwɔ mahɛ ɔ, lɛ be ɔ mi e kaseli ɔmɛ ba nɛ a ba ju lɛ kɛ ho. 14Nɛ ke amlaalo ɔ nu he ɔ, wɔ nitsɛmɛ wa maa mlɔɔ e hɛ mi, konɛ nyɛ ko na sane.” 15Kɛkɛ nɛ aslaafo ɔmɛ he sika a, nɛ a pee bɔ nɛ a tsɔɔ mɛ ɔ. Nɛ kikɛmɛ a sane nɛ ɔ gbɛ fia ngɛ Yudafo ɔmɛ a kpɛti kɛ ba si mwɔnɛ ɔ.
Yesu je e he kpo tsɔɔ e kaseli ɔmɛ
(Marko 16.14-18; Luka 24.36-49; Yohane 20.19-23; Bɔfo 1.6-8)
16Kɛkɛ nɛ e kaseli nyɔngma kɛ kake ɔ pue nɔ kɛ ho Galilea yoku ɔ nɔ ya he nɛ Yesu tsɔɔ mɛ ɔ. 17Benɛ a na lɛ ɔ a kpla si nɛ a ja lɛ; se ni komɛ je nɔ́. 18Nɛ Yesu ba nɛ e kɛ mɛ ba tu munyu ke: “A ngɔ he blɔ tsuo ngɔ ha mi ngɛ hiɔwe kɛ zugba a nɔ. 19Lɔ ɔ he ɔ rnyɛɛ ya nɛ nyɛ ya pee majemaje tsuo ye kaseli, nyɛɛ baptisi mɛ ngɔ wo Tsɛ ɔ kɛ Bi ɔ kɛ Mumi Klɔuklɔu ɔ biɛ mi, 20nɛ nyɛɛ tsɔɔ mɛ nɛ a ye nihi tsuo kulaa nɛ i de nyɛ ɔ nɔ. Nɛ oʼɛ, i kɛ nyɛ ngɛ daa kɛ yaa su je mi nyagbe.”
Đang chọn:
Mateo 28: DAN77
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dangme New Testament © United Bible Societies, 1977.
