Mateo 15
15
Blematsɛmɛ a tsɔɔmi
(Marko 7.1-13)
1Kɛkɛ nɛ mlaa tsɔɔli kɛ Farisifo ɔmɛ nɛ je Yerusalem ɔ ba Yesu ngɔ ba de ke: 2“Mɛni he je nɛ o kaseli ɔmɛ tɔɔ nikɔtɔmɛ amɛ a kɔ ɔmɛ a nɔ ɔ? Ejakaa a fɔ we a dɛ loko a yeɔ ni.” 3Se e he nɔ nɛ e de mɛ ke: “Mɛni he je nɛ nyɛ hu nyɛɛ kɛ nyɛ blema kɔ ɔmɛ tɔɔ Mawu kita a nɔ ɔ? 4Ejakaa Mawu ke: ‘Buu o tsɛ kɛ e nyɛ,’ nɛ: ‘Nɔ nɛ gbiɛɛ e tsɛ loo e nyɛ ɔ, a maa gbe lɛ!’ 5Se nyɛɛ lɛɛ nyɛ deɔ ke: Nɔ tsuaa nɔ nɛ ma de e tsɛ loo e nyɛ ke: ‘Nɔ́ nɛ jinɛ o ma na ngɛ ye dɛ mi ɔ, i kɛ ke Mawu’ ɔ, lɛɛ e ko pa bu e tsɛ loo e nyɛ hu. 6Nɛ nyɛ blema kɔ ɔmɛ a he ɔ, nyɛ kua Mawu kita a. 7Osatotsɛmɛ! Niinɛ nɛ Yesaia gba ngɛ nyɛ he ke:
8‘Ma nɛ ɔ kɛ a nya buu mi;
Se a tsui tsɛ̃ e he kɛ je ye he kɛ ho lokoo ya.
9Se yakatsuaa a jaa mi ɔ nɛ,
Ejakaa a tsɔɔ tsɔɔmihi nɛ ji nimli a kitahi.’ ”
Nihi nɛ bleɔ nɔmlɔ
(Marko 7.14-23)
10Nɛ Yesu tsɛ asafo ɔ kɛ ba nɛ e de mɛ ke: “Nyɛɛ bu tue nɛ nyɛɛ nu sisi! 11Pi nɔ́ nɛ yaa nɔ nya mi ɔ nɛ bleɔ nɔmlɔ; se mohu nɔ nɛ jee nɔ nya mi ɔ, lɔ ɔ lɛ bleɔ nɔmlɔ.”
12Kɛkɛ nɛ e kaseli ɔmɛ ba e ngɔ ba de lɛ ke: “O le kaa benɛ Farisifo ɔmɛ nu kikɛmɛ a munyu nɛ ɔ ɔ, e pee mɛ tai ɔ?” 13Se e he nɔ ke: “Tso tsuaa tso nɛ pi ye hiɔwe Tsɛ ɔ nɛ ma a, a maa hia. 14Nyɛ ko di a se! Hɛ yuyuili nɛ tsɔɔ hɛ yuyuili a blɔ ji mɛ; nɛ ke hɛ yuyuilɔ ngɛ hɛ yuyuilɔ blɔ tsɔe ɔ, mɛ ni enyɔ ɔ tsuo a maa nɔ muɔ mi.” 15Nɛ Petro he nɔ nɛ e de lɛ ke: “Tsɔɔ wɔ abɛ nɛ ɔ sisi!” 16Nɛ Yesu ke: “Anɛ nyɛ hu nyɛ li ni kɛ mwɔɔ? 17Anɛ nyɛ kpa we si kaa nɔ́ tsuaa nɔ́ nɛ yaa nɔ nya mi ɔ, muklii mi e sɛɛ nɛ a jeɔ woɔ agbotso mi lo? 18Se nihi nɛ jee nya mi jee kpo ɔ, tsui mi a jee nɛ kɔlɔ ɔmɛ lɛ bleɔ nɔ ɔ nɛ. 19Ejakaa tsui mi nɛ susumi yayahi, nɔmlɔ gbemi, gba puɛmihi, ajuama bɔmihi, jumihi, lakpa odase yemihi kɛ musu bɔmihi jee. 20Enɛ ɔmɛ ji nihi nɛ bleɔ nɔmlɔ; se dɛ nɛ a fɔ we loko a yeɔ ni ɔ, lɔ ɔ ble we nɔ.”
Yo ko hemi kɛ yemi
(Marko 7.24-30)
21Nɛ Yesu je lejɛ ɔ nɛ e pue nɔ kɛ ho Tiro kɛ Zidon ni ɔmɛ a mi ya. 22Nɛ oʼɛ, Kanaanyo ko nɛ je lejɛ ɔ ni ɔmɛ a mi nɔuu ɔ ba kpa ngmlaa wo lɛ ke: “Naa mi mɔbɔ, Nyɔmtsɛ, David Bi; ye bi yo ngɛ nɔ nae kɛ mumi yayami.” 23Se e pui e nya mi. Nɛ ekaseli ɔmɛ ba ba kpa lɛ pɛɛ, nɛ a de lɛ ke: “Wo lɛ blɔ nɛ e ho, se e ngɛ ngmlaa kpae kɛ ngɛ wa se nyɛɛ!” 24Se e he nɔ ke: “Israel we tohi nɛ laa amɛ a ngɔ kɛkɛ a tsɔ mi.” 25Se yo ɔ ba ba kpla si ngɛ e hɛ mi nɛ e ke: “Mawetsɛ, pee he eko ha mi!” 26Se e he nɔ ke: “E dɛ kaa a ngɔɔ bimɛ abolo ɔ sakee fɔɔ he haa gbehi a bimɛ.” 27Se e ke: “Mawetsɛ, e ngɛ mi ja mohu; se tse gbehi a bimɛ ɔmɛ hu yeɔ bibli nɛ pueɔ a nyɔmtsɛ ɔmɛ a kplɔɔ ɔ sisi ɔ eko!” 28Kɛkɛ nɛ Yesu he nɔ nɛ e de lɛ ke: “Oo, yo, o hemi kɛ yemi kle! A pee ha mo kaa bɔ nɛ o ngɛ hlae ɔ!” Nɛ a tsa e bi yo ɔ ngɛ jamɛ a ngmlɛfia a nɔ nɔuu.
Yesu tsa nihi fuu
29Nɛ Yesu je lejɛ ɔ kɛ ba Galilea Wo ɔ nya. Nɛ e kuɔ kɛ ya yoku ɔ nɔ nɛ e ya hi si ngɛ lejɛ ɔ. 30Nɛ asafo babauu ba e ngɔ nɛ a hɛɛ nihi nɛ a hule kɛ hɛ yuyuili kɛ amuɛtihi kɛ glɔtsɛmɛ kɛ ni kpahi fuu; nɛ a kɛ mɛ ba pue Yesu nane nya; nɛ e tsa mɛ. 31Nɛ asafo ɔmɛ a nya kpɛ a he, benɛ a na kaa amuɛti ɔmɛ ngɛ munyu tue, nɛ glɔtsɛmɛ ɔmɛ a he mi wa mɛ, nɛ nihi nɛ a hule ɔmɛ ngɛ nyɛɛ, nɛ hɛ yuyuili ɔmɛ ngɛ nɔ hyɛe ɔ, nɛ a wo Israel Mawu ɔ hɛ mi nyami.
Yesu ha nimli akpe eywiɛ niyeni
(Marko 8.1-10)
32Yesu tsɛ e kaseli ɔmɛ kɛ ba nɛ e ke: “Ye muklii mi ngɛ mi sae ngɛ asafo ɔmɛ a he, kaa mwɔnɛ ji ligbi etɛ nɛ a kɛ mi hi si, nɛ a be nɔ́ ko nɛ a maa ye; nɛ i sume kaa ma wo mɛ blɔ kɛ hwɔ nɛ eko ɔ klibi ya po mɛ ngɛ blɔ ɔ nɔ.” 33Nɛ e kaseli ɔmɛ bi lɛ ke: “Jije wa ma na abolo nɛ hiɛ fuu ngɛ ngɛ nga nɛ ɔ nɔ, bɔ nɛ maa su asafo babauu nɛ ɔ nya?” 34Nɛ Yesu bi mɛ ke: “Abolo enyɛmɛ nyɛ ngɛ?” A de lɛ ke: “Kpaago, kɛ lo tsɔwi bɔɔ ko.” 35Nɛ e fa asafo ɔmɛ ke a hi si ngɛ zugba mi. 36Nɛ e kukuɔ abolo kpaago ɔ kɛ lo ɔmɛ, nɛ e na si, nɛ e kuɔ mi, nɛ e ngɔ ha e kaseli ɔmɛ nɛ e kaseli ɔmɛ kɛ ha asafo ɔ. 37Nɛ mɛ tsuo a ye nɛ a tɔ; nɛ a kukuɔ bibli nɛ piɛ ɔ kusii kpaago nɛ a hyi tɔtɔɔtɔ. 38Nɛ nihi nɛ ye ɔ a nya ji nyumuhi akpe eywiɛ, e slɔ yi kɛ jokuɛwi. 39Nɛ benɛ e wo asafo ɔ blɔ ɔ, e sɛ lɛ mi, nɛ e ba Magdala ni ɔmɛ a mi.
Đang chọn:
Mateo 15: DAN77
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dangme New Testament © United Bible Societies, 1977.
