Mateo 16
16
Okadi ko bimi
(Marko 8.11-13; Luka 12.54-56)
1Nɛ Farisifo ɔmɛ kɛ Sadukifo ɔmɛ ba ba da lɛ nɛ a bi lɛ ke e tsɔɔ mɛ hiɔwe okadi ko? 2Se e he nɔ nɛ e de mɛ ke: “Gbɔkuɛ mi ɔ nyɛ deɔ ke: ‘Je mi ma tsɔ, ejakaa hiɔwe tsu.’ 3Nɛ mɔtu ɔ nyɛ deɔ ke: ‘Mwɔnɛ hiɔmi maa nɛ; ejakaa hiɔwe tsu nɛ e hɛ mi ha.’ Osatotsɛmɛ, nyɛ le hiɔwe je nihi a mi bumi, se yi nɔ omɛ a he okadi ɔmɛ ɔ lɛɛ nyɛ nyɛ we nɛ nyɛɛ bu lo? 4Yi nɔ bimɛ yayamihi kɛ gba puɛli ngɛ okadi hlae, se a be mɛ okadi ko hae, ja gbalɔ Yona okadi ɔ.” Nɛ e si mɛ nɛ e pue nɔ kɛ ho.
Farisifohi kɛ Sadukifo ɔmɛ a ma sasɛ ɔ
(Marko 8.14-21)
5Nɛ benɛ e kaseli ɔmɛ yaa wo ɔ se ɔ, a hɛ je nɔ kaa a maa hɛɛ abolo. 6Yesu de mɛ ke: “Nyɛɛ hyɛ nɛ nyɛ hɛ hi nyɛ he nɔ ngɛ Farisifohi kɛ Sadukifo ɔmɛ a mɛ sasɛ ɔ he!” 7Se a tu he munyu ngɛ a kpɛti ke: “Abolo nɛ wa hɛɛ we ɔ he je!” 8Se nɛ Yesu na le ja a, e ke: “Nyɛ nɛ nyɛ hemi kɛ yemi pi, mɛni he je nyɛ ngɛ munyu tue ngɛ nyɛ kpɛti kɛ abolo nɛ nyɛ hɛɛ we ɔ he je ɔ? 9Nyɛ nɛ nihi a nya kɛ mwɔɔ, nɛ nyɛ pa kai we nimli akpe enuɔ ɔ kɛ abolo enuɔ ɔ kɛ kusiihi abɔ nɛ nyɛ kukuɔ ɔ? 10Aloo nimli akpe eywiɛ ɔ kɛ abolo ‘kpaago ɔ kɛ kusiihi abɔ nɛ nyɛ kukuɔ ɔ? 11Kɛ ji lɛ kɛɛ ne nyɛ nɛ́ nya kaa pi abolo he je nɛ i ngɛ nyɛ dee ke nyɛ hɛ nɛ hi nyɛ he nɔ ngɛ Farisifohi kɛ Sadukifo ɔmɛ a ma sasɛ ɔ he ɔ?” 12Jeha nɛ ɔ a kɔ se kaa pi abolo ma sasɛ ɔ he je nɛ e ke, a hɛ nɛ hi a he nɔ ɔ, se mohu Farisifohi kɛ Sadukifo ɔmɛ a tsɔɔmi ɔ he je.
Petro ye Yesu he odase
(Marko 8.27-30; Luka 9.18-21)
13Se benɛ Yesu ba Kaisaria Filipi ni ɔmɛ a mi ɔ, e bi e kaseli ɔmɛ ke: “Mɛnɔ nihi deɔ ke Nɔmlɔ Bi ɔ ji?” 14Se a de lɛ ke: “Ni komɛ deɔ ke Yohane, Baptisilɔ ɔ ʼi, nɛ ni komɛ hu deɔ ke Elia ʼi, nɛ ni kpahi komɛ deɔ ke Yeremia aloo gbali ɔmɛ a ti nɔ kake ʼi.” 15E bi mɛ ke: “Se nyɛɛ lɛɛ mɛnɔ nyɛ deɔ ke i ji?” 16Petro he nɔ ke: “Mo ji Kristo ɔ, Mawu hɛ kalɔ ɔ, bi ɔ.” 17Nɛ Yesu he nɔ nɛ e de lɛ ke: “A gbaa mo, Simon, Yona bi; ejakaa pi he lo kɛ muɔ nɛ je enɛ ɔ tsɔɔ mo, se mohu Tsaatsɛ nɛ ngɛ hiɔwe ɔ ʼi. 18Nɛ imi hu i ngɛ mo dee ke: Mo ji Petro ɔ nɛ, nɛ kikɛmɛ a tɛ sa nɛ ɔ nɔ ma fia ye safo ɔ ngɔ ma, nɛ gbeje agbo ɔmɛ be nyɛe e nɔ maa ye. 19Nɛ ma ngɔ hiɔwe matsɛ yemi ɔ nya safe ɔmɛ ngɔ ha mo; nɛ nɔ́ tsuaa nɔ́ nɛ o maa fi ngɛ zugba a nɔ ɔ, a maa fi ngɛ hiɔwe; nɛ nɔ́ tsuaa nɔ́ nɛ o maa pɛne ngɛ zugba a nɔ ɔ, a maa pɛne ngɛ hiɔwe.” 20Kɛkɛ nɛ e wo e kaseli ɔmɛ si veveeve ke a ko de nɔ ko ke lɛ ji Yesu, Kristo ɔ.
Yesu tu e gbenɔ kɛ e sitemi he munyu
(Marko 8.31—9.1; Luka 9.22-27)
21Kɛ je jamɛ a be ɔ, nɛ Yesu bɔni e kaseli ɔmɛ tsɔɔmi kaa ja e ya Yerusalem nɛ e ya na amanehlu babauu ngɛ nikɔtɔma amɛ kɛ osɔfo nikɔtɔma amɛ kɛ mlaa tsɔɔli ɔmɛ a dɛ mi, nɛ a gbe lɛ, nɛ ligbi nɛ ji ligbi etɛ ɔ nɛ a tle lɛ si ekohu. 22Nɛ Petro tsɛ lɛ kɛ ya se nɛ e bɔni lɛ kɔkɔ bɔmi ke: “Mawu nɛ ko ha nɛ enɛ ɔ nɛ ba o nɔ, Mawetsɛ, enɛ ɔ ya je ngɛ se lokoo!” 23Se Yesu plɛ e he nɛ e de lɛ ke: “Jee ye nɔ, Satan! O ngɛ ye nane kpatae; ejakaa o susuu we Mawu nihi a he, se nimli a nihi a he mohu o susuu.”
24Kɛkɛ nɛ Yesu de e kaseli ɔmɛ ke: “Ke nɔ ko suɔ kaa e nyɛɛ ye se ɔ, e kua e he nɛ e wo e sɛumi tso ɔ nɛ e nyɛɛ ye se? 25Ejakaa nɔ tsuaa nɔ nɛ hlaa kaa e baa e klaa yi ɔ, e maa laa lɛ; se nɔ tsuaa nɔ nɛ laa e klaa ngɛ ye he ɔ, e nine maa su nɔ. 26Ejakaa mɛni se nɔmlɔ ma na, ke e nine su je mluku ɔ tsuo nɔ, se e laa e klaa a? Aloo mɛni nɔmlɔ ma ngɔ ha nɛ e kɛ kpɔ e klaa? 27Ejakaa nɔmlɔ Bi ɔ maa ba ngɛ e tsɛ nyami ɔ mi kɛ e bɔfo ɔmɛ; nɛ lɛ be ɔ mi ɔ, e maa wo nɔ tsuaa nɔ hiɔ ngɛ e ni tsumi nya. 28Niinɛ, i ngɛ nyɛ dee ke: Ni kome ngɛ nihi nɛ daa si ngɛ hiɛ ɔ nɛ ɔ a kpɛti nɛ a be gboe kɛ yaa su be nɛ a maa na Nɔmlɔ Bi ɔ nɛ e ma ngɛ e matsɛ yemi ɔ mi.”
Đang chọn:
Mateo 16: DAN77
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dangme New Testament © United Bible Societies, 1977.
