Mateo 14
14
Yohane Baptisilɔ ɔ gbenɔ
(Marko 6.14-29; Luka 9.7-9)
1Jamɛ a be ɔ mi ɔ amlaalo Herode nu Yesu he sane; 2nɛ e de e sɔmɔli ɔmɛ ke: “Yohane, Baptisilɔ ʼi; lɛ nɛ te si kɛ je gbeje, lɔ ɔ he nɛ he wami ɔmɛ ngɛ ni tsue ngɛ e mi nɛ ɔ nɛ.”
3Se Herode nu Yohane nɛ e fi lɛ, nɛ e wo lɛ tsu mi ngɛ Herodia, e nyɛmi Filipo yo ɔ he; 4ejakaa Yohane de lɛ ke: “E dɛ́ kaa o ngɔɔ lɛ.” 5Nɛ jinɛ e hla kaa e gbe lɛ, se e ya ye asafo ɔ gbeye, ejakaa a buu Yohane gbalɔ. 6Benɛ a ngɛ Herode fɔmi ligbi yee ɔ, Herodia biyo ɔ ba do ngɛ ni ɔmɛ a hɛ mi, nɛ e pee Herode fɛu. 7Lɔ ɔ he ɔ, e ka kita kɛ wo lɛ si ke nɔ́ tsuaa nɔ́ nɛ e ma bi lɛ ɔ e ma ha lɛ. 8Nɛ e nyɛ wo lɛ ga nɛ e ba de ke: “Ngɔɔ Yohane, Baptiɔilɔ ɔ, yi ngɔ fɔ ka mi ha mi ngɛ hiɛ ɔ!” 9Nɛ e dɔ matsɛ ɔ; se e kitahi nɛ e ka amɛ, kɛ nihi nɛ kɛ lɛ hii si ngɛ niyeni si ɔ he je ɔ, e fa ke a ngɔ ha lɛ. 10Nɛ e tsɔ nɛ a ya po Yohane yi ngɛ tsu ɔ mi. 11Nɛ a ngɔ e yi ngɔ fɔ ka mi kɛ ba, nɛ a ngɔ ha yiheyo ɔ, nɛ e kɛ ya ha e nyɛ. 12Nɛ Yohane kaseli ɔmɛ ba nɛ a ba wo e gbogboe ɔ nɛ a ya pu, nɛ a ho nɛ a ya de Yesu.
Yesu ha nimli akpe enuɔ niyeni
(Marko 6.30-44; Luka 9.10-17; Yohane 6.1-14)
13Se benɛ Yesu nu ɔ, e gu lɛ mi kɛ je lejɛ ɔ kɛ ho nga nɔ he ko banee ya. Nɛ benɛ asafo ɔmɛ nu ɔ, a je ma amɛ a mi nɛ a nyɛɛ nane kɛ nyɛɛ e se. 14Nɛ benɛ Yesu je kpo ɔ e ba na asafo babauu, nɛ e muklii mi sã lɛ ngɛ a he, nɛ e tsa a kpɛti hiɔtsɛmɛ ɔmɛ.
15Nɛ benɛ su gbɔkuɛ ɔ, e kaseli ɔmɛ ba e ngɔ ba de lɛ ke: “Nga nɔ ji hiɛ ɔ, nɛ je ngɛ jɔe; je asafo ɔ blɔ nɛ a ya ma amɛ a mi nɛ a ya he niyeni.” 16Se Yesu de mɛ ke: “E hia we kaa a ya, nyɛ nitsɛmɛ nyɛ ha mɛ ni nɛ a ye.” 17Se a de lɛ ke: “Abolo enuɔ kɛ lo enyɔ pɛ wa ngɛ ngɛ hiɛ ɔ!” 18Nɛ e de mɛ ke: “Nyɛ kɛ ba ha mi ngɛ hiɛ ɔ!” 19Nɛ e fa asafo ke a hi si ngɛ nga a nɔ. Nɛ e kukuɔ abolo enuɔ kɛ lo enyɔ ɔ, nɛ e hyɛ hiɔwe nɛ e gbaa nɔ, nɛ e kuɔ mi, nɛ e ngɔ ha e kaseli ɔmɛ, nɛ e kaseli ɔmɛ ngɔ ha asafo ɔ. 20Nɛ mɛ tsuo a ye nɛ a tɔ, nɛ a kukuɔ bibli nɛ piɛ ɔ ngɔ wo kusii nyɔngma kɛ enyɔ mi nɛ a hyi tɔtɔɔtɔ. 21Ninli nɛ ye ɔ maa su nyumuhi akpe enyɔ, e slɔ yihi kɛ jokuɛwi.
Yesu nyɛɛ wo hɛ mi
(Marko 6.45-52; Yohane 6.15-21)
22Nɛ amlɔ ɔ Yesu tsɛ̃ e kaseli ɔmɛ a yi se nɛ a sɛ lɛ mi nɛ a sɛ e hlami kɛ ya wo ɔ se je, konɛ e wo asafo ɔmɛ blɔ lolo. 23Nɛ benɛ e wo asafo ɔmɛ blɔ ɔ, e kuɔ yoku ɔ, lɛ e nɔ kake, nɛ e ya sɔle. Se benɛ je jɔ ɔ, lɛ e nɔ kake too e ngɛ lejɛ ɔ? 24Se lɛ ɔ su wo ɔ kpɛti mo, nɛ oslɔke ɔmɛ ngɛ lɛ ɔ hɛɛe, ejakaa e ngɛ kɔɔhiɔ kpee. 25Se makɛ ngmlɛ eywiɛ mi ɔ, Yesu nyɛɛ wo ɔ hɛ mi kɛ ba a ngɔ. 26Nɛ benɛ e kaseli ɔmɛ na lɛ nɛ e nyɛɛ wo ɔ hɛ mi ɔ, a tsui po, nɛ a de ke: “Kpade ʼi!” Nɛ a kɛ gbeye kpa ngmlaa. 27Se amlɔ ɔ, Yesu wo e nya nɔ nɛ e de mɛ ke: “Nyɛ na tsui, ami ʼi; nyɛ ko ye gbeye!” 28Se Petro he nɔ nɛ e de lɛ ke: “Mawetsɛ, ke mo ʼi ɔ, fa mi konɛ ma nyɛɛ nyu ɔ hɛ mi kɛ ba o ngɔ,” 29Nɛ Yesu de lɛ ke: “Ba!” Nɛ Petro je lɛ ɔ mi, nɛ e nyɛɛ nyu ɔ hɛ mi kɛ yaa Yesu ngɔ. 30Se benɛ e na kaa kɔɔhiɔ ɔ ngɛ fiae huu ɔ, e ye gbeye nɛ e bɔni mumi, nɛ e kpa ngmlaa ke: “Mawetsɛ, he mi!” 31Nɛ amlɔ ɔ Yesu kpa e nine mi nɛ e pɛtɛ e he, nɛ e de lɛ ke: “Mo nɛ o hemi kɛ yemi pi, mɛni he je o je nguane?” 32Nɛ benɛ a sɛ lɛ ɔ mi ɔ, kɔɔhiɔ ɔ jɔɔ fiami. 33Nɛ nihi nɛ ngɛ lɛ ɔ mi ɔ ba ba ja lɛ de ke: “Niinɛ, Mawu bi ji mo!”
Yesu tsa hiɔtsɛmɛ ngɛ Genesarɛt
(Marko 6.53-56)
34Nɛ benɛ a po wo ɔ, a ba Genesarɛt zugba a nɔ. 35Nɛ benɛ lejɛ ɔ tsɛmɛ na kaa Yesu ʼi ɔ, a tsɔ kɛ ya lejɛ ɔ ni ɔmɛ a mi tsuo, nɛ a ya ngɔ hiɔtsɛmɛ tsuo kɛ ba e ngɔ; 36nɛ a ba kpa lɛ pɛɛ wawɛɛ kaa e ha a na e tade ɔ nya a he kɛkɛ nɛ a ta: nɛ nihi abɔ nɛ ta he ɔ tsuo he wa mɛ kulaa.
Đang chọn:
Mateo 14: DAN77
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dangme New Testament © United Bible Societies, 1977.
