Mateo 13
13
Nidulɔ ɔ he abɛ ɔ
(Marko 4.1-9; Luka 8.4-8)
1Jamɛ a ligbi ɔ nɔ nɔuu ɔ, Yesu je we ɔ mi nɛ e ya hi si ngɛ wo ɔ nya. 2Asafo babauu ba bua a he nya ngɛ e ngɔ, nɛ lɔ ɔ he ɔ, e ya sɛ lɛ ko mi nɛ e ya hi si, nɛ asafo ɔ tsuo daa si ngɛ wo ɔ nya. 3Nɛ e tu munyuhi fuu kɛ tsɔɔ mɛ ngɛ abɛhi a mi, nɛ e ke: “Oʼɛ, ni dulɔ ko pue nɔ kɛ ho ni dumi ya. 4Nɛ benɛ e ngɛ due ɔ, ekomɛ ya pue blɔ he, nɛ lohwe pɛlitsɛmɛ ba ba kukuɔ. 5Nɛ ekomɛ hu ya pue tɛ sahi a nɔ he nɛ a nɛ́ zu fuu ngɛ; nɛ amlɔ ɔ, akɛnɛ a nɛ́ zu nɛ mi kuɔ he je ɔ, a puɛ mla, 6se benɛ pu te si ɔ, a sã, nɛ akɛnɛ a be poku ko he je ɔ a ngla. 7Nɛ ekomɛ hu ya pue miohi a kpɛti, nɛ mio ɔmɛ te si nɛ a gbe tso ɔmɛ. 8Se ekomɛ hu ya pue zugba kpakpa nɔ, nɛ a wo yiblii, eko lafa, eko nyingmi ekpa, kɛ eko nyingmi etɛ. 9Nɔ nɛ ngɛ tue ɔ, e nu.”
Nɔ́ nɛ he je nɛ Yesu bu abɛhi
(Marko 4.10-12; Luka 8.9-10)
10Nɛ e kaseli ɔmɛ ba e ngɔ ba bi lɛ ke: “Mɛni he je o kɛ mɛ ngɛ munyu tue ngɛ abɛhi a mi ɔ?” 11Se e he nɔ nɛ e de mɛ ke: “Ejakaa nyɛɛ lɛɛ a ngɔ hiɔwe matsɛ yemi ɔ mi laami sane ɔmɛ ngɔ ha nyɛ ke nyɛɛ le, se mɛɛ lɛɛ a kɛ hi me. 12Ejakaa nɔ tsuaa nɔ nɛ ngɛ nɔ́ ko ɔ, a ma ha lɛ nɛ e na kɛ be nɔ; se nɔ tsuaa nɔ nɛ be nɔ́ ko tsɔ ko ɔ, bɔɔ nɛ e ngɛ ɔ tete a ma kpɔ ngɛ e dɛ. 13E nɛ ɔ he je nɛ i kɛ mɛ tuɔ munyu ngɛ abɛhi a mi ɔ nɛ, ejakaa a ngɛ hyɛe se a nɛ́, nɛ a ngɛ nue se a nui, nɛ a nɛ́ sisi hulɔ. 14Nɛ Yesaia gbami ɔ ba mi ngɛ a he, nɔ́ nɛ deɔ ke:
‘Numi ɔ nyɛ maa nu lɛɛ, se nyɛ be sisi nue;
Nɛ nami ɔ nyɛ maa na lɛɛ, se nyɛ be se kɔe.
15Ejakaa kikɛmɛ a ma nɛ ɔ tsui ti,
Nɛ a tue wa,
Nɛ a ma a hɛngmɛ;
Konɛ a ko hyɛ nɔ kɛ a hɛngmɛ,
Nɛ a ko nu nɔ kɛ a tue,
Nɛ a tsui hu ko na sisi,
Nɛ a kpale nɛ a tsa mɛ.’
16Se nyɛɛ lɛɛ a gbaa nyɛ hɛngmɛ ɔmɛ, kaa a ngɛ nɔ hyɛe, kɛ nyɛ tue ɔmɛ, kaa a ngɛ nɔ nue. 17Ejakaa niinɛ, i ngɛ nyɛ dee ke, gbali kɛ dali fuu hla nɛ a na nihi nɛ nyɛ ngɛ nae nɛ ɔ, nɛ a ya nɛ́, aloo nɛ a nu nihi nɛ nyɛ ngɛ nue nɛ ɔ, nɛ a ya nui.”
Yesu tsɔɔ nidulɔ ɔ he abɛ ɔ sisi
(Marko 4.13-20; Luka 8.11-15)
18“Jeha nɛ ɔ nyɛɛ lɛɛ nyɛɛ bu ni dulɔ ɔ he abɛ ɔ tue. 19Nɔ tsuaa nɔ nɛ nuɔ mɛtsɛ yemi ɔ he munyu ɔ nɛ e kɔ we se ɔ, nɔ yayami ɔ baa ba saa nɔ́ nɛ a du ngɛ e tsui ɔ mi ɔ. Nɔ nɛ ɔ ji nɔ́ nɛ a du ngɛ blɔ tue ɔ nɛ. 20Se nɔ́ nɛ a du ngɛ tɛ sa nɔ ɔ, lɛ ji nɔ nɛ nuɔ munyu ɔ nɛ e heɔ amlɔ kɛ bua jɔmi; 21se akɛnɛ e be poku ngɛ e mi ɔ, e hii si be bɔɔ kɛkɛ; nɛ ke haomi loo yi wami ba ngɛ munyu ɔ he ɔ, e kɛ we kɛkɛ ɔ e nane kpataa. 22Se nɔ́ nɛ a du ngɛ miohi a kpɛti ɔ, lɛ ji nɔ nɛ nuɔ munyu ɔ, se je nɛ ɔ mi he nya gbami kɛ nihi fuu a he mlɔɔmi ɔ gbee munyu ɔ, nɛ e wui yiblii. 23Se nɔ́ nɛ a du ngɛ zugba kpakpa nɔ ɔ, lɛ ji nɔ nɛ nuɔ munyu ɔ nɛ e kɔɔ se, nɛ e pa woɔ yiblii hulɔ, nɛ e baa, nɔ ko lafa, nɔ ko hu nyingmi ekpa, kɛ nɔ ko hu nyingmi etɛ.”
Hu ɔ he abɛ ɔ
24Yesu bu mɛ abɛ kpa ko hu nɛ e ke: “Hiɔwe matsɛ yemi ɔ ngɛ kaa nyumu ko nɛ duɔ dumi ni kpakpahi ngɛ e ngmɔ mi. 25Se benɛ ni ɔmɛ hwɔ si ɔ, e he nyɛlɔ ko ba ba du hu kɛ futu ngma a, nɛ e je. 26Se benɛ e puɛ nɛ e wo yiblii ɔ, kɛkɛ nɛ hu ɔ hu yi je kpo. 27Wetsɛ ɔ webi ɔmɛ ba e ngɔ ba bi lɛ ke: ‘Nyɔmtsɛ, anɛ pi dumi ni kpakpahi nɛ o du ngɛ o ngmɔ ɔ mi ɔ lo? Jije hu nɛ ɔmɛ je mɔ?’ 28Se e de mɛ ke: ‘Henyɛlɔ ko lɛ pee enɛ ɔ nɛ.’ Nɛ e webi ɔmɛ de lɛ ke: ‘Lɛɛ o suɔ kaa waa ya nɛ wa ya hia lo?’ 29Se e ke: ‘Dɛbi, eko ɔ alinɔ hu ɔmɛ a hiami mi ɔ, nyɛ maa hia ngma a hu ngɔ futu mi. 30Nyɛ ha enyɔ ɔ tsuo nɛ wa kɛ ya si ngma kpami be ɔ, nɛ ngma kpami be ɔ, ma de ngma kpali ɔmɛ ke: Nyɛ bua hu ɔ nya kekle, nɛ nyɛɛ fi konɛ a sã; se ngma a lɛɛ nyɛ bua nya ngɔ wo ye gba a mi.’ ”
Sinapi wu ɔ he abɛ ɔ
(Marko 4.30-32; Luka 13.18-19)
31E bu mɛ abɛ kpa ke: “Hiɔwe matsɛ yemi ɔ ngɛ kaa sinapi wu nɛ nɔ ko kɛ̃ nɛ e ya du ngɛ e ngmɔ mi; 32e ji dumi nihi tsuo a kpɛti nyafii kulaa, se ke e puɛ ɔ, e kle pe pui bahi tsuo, nɛ e peɔ tso, nɛ hiɔwe lohwe pɛlitsɛmɛ baa ba peɔ tsuhi ngɛ e kɔni ɔmɛ a mi.”
Ma sasɛ ɔ he abɛ ɔ
(Luka 13.20-21)
33E bu mɛ abɛ kpa ke: “Hiɔwe matsɛ yemi ɔ ngɛ kaa ma sasɛ nɛ yo ko ngɔ nɛ e kɛ hɔ ma sowe etɛ mi kɛ ya su be nɛ lɛ tsuo sa.”
Yesu kɛ abɛhi tsɔɔ ni
(Marko 4.33-34)
34Abɛhi a mi Yesu gu kɛ tu munyu nɛ ɔmɛ tsuo kɛ tsɔɔ asafo ɔmɛ, nɛ abɛhi a mi sɔuu kɛkɛ e kɛ mɛ tuɔ munyu ngɛ; 35konɛ nɔ́ nɛ gbalɔ ɔ de ɔ ne ba mi ke:
“Ma bli ye nya ngɛ abɛhi a mi;
Ma fiɛ nihi nɛ a ngɔ laa kɛ je je mi sisije ɔ.”
Yesu tsɔɔ hu ɔ he abɛ ɔ sisi
36Kɛkɛ nɛ Yesu je asafo ɔmɛ blɔ nɛ e sɛ we ɔ mi. Nɛ e kaseli ɔmɛ ba e ngɔ ba de lɛ ke: “Tsɔɔ wɔ ngmɔ ɔ mi hu ɔ he abɛ ɔ sisi.” 37Nɛ e he nɔ nɛ e de mɛ ke: “Dumi ni kpakpahi a dulɔ ɔ ji Nɔmlɔ Bi ɔ; 38ngmɔ ɔ ji je nɛ ɔ mi; dumi ni kpakpa amɛ ji matsɛ yemi mi bimɛ ɔmɛ; hu ɔ ji nɔ yayami ɔ bimɛ ɔmɛ; 39he nyɛlɔ nɛ du mɛ ɔ ji abosiami; ngma kpami be ɔ ji je nɛ ɔ nyagbe ɔ nɛ, nɛ ngma kpali ɔmɛ ji hiɔwe bɔfo ɔmɛ. 40Jeha nɛ ɔ bɔ nɛ a buaa hu ɔ nya nɛ a kɛ la sãa a, ja nɔuu a maa pee ngɛ je nɔ nyagbe mi. 41Nɔmlɔ Bi ɔ maa tsɔ e bɔfo ɔmɛ nɛ a ma bua nane kpatami nihi tsuo kɛ nihi nɛ tsuɔ mlaa kuami ni ɔmɛ a nya kɛ maa je e matsɛ yemi ɔ mi, 42nɛ a maa ngɔ mɛ ngɔ wo la abolo tsu ɔ mi; lejɛ ɔ ya fomi kɛ lungu nya kpemi maa hi. 43Nɛ dali ɔmɛ ma kpɛ kaa pu ngɛ a tsɛ matsɛ yemi ɔ mi. Nɔ nɛ ngɛ tue ɔ, e nu!”
Juetli nɛ a ngɔ laa a he abɛ ɔ
44“Jeha nɛ ɔ hu, hiɔwe matsɛ yemi ɔ ngɛ kaa juetli nɛ a kɛ laa ngɛ ngmɔ mi, nɛ benɛ nɔ ko ya na a, e ngɔ laa, nɛ lɔ ɔ he bua jɔmi nɛ e na a he je ɔ e ho nɛ e ya jua nihi tsuo nɛ e ngɛ ɔ, nɛ e kɛ he jamɛ a ngmɔ ɔ.”
Adiagba he abɛ ɔ
45“Jeha nɛ ɔ hu, hiɔwe matsɛ yemi ɔ ngɛ kaa guɛ yelɔ ko nɛ ngɛ adiagba saminyawi hlae, 46nɛ benɛ e ya na adiagba kake nɛ he jua wa a, e ho nɛ e ya jua nihi tsuo nɛ e ngɛ ɔ, nɛ e kɛ he.”
Ya a he abɛ ɔ
47“Jeha nɛ ɔ hu, hiɔwe matsɛ yemi ɔ ngɛ kaa ya nɛ afɔ́ ngɛ wo mi nɛ e gbe lo slɔɔtohi tsuo eko; 48nɛ benɛ e hyi ɔ, a sã kɛ ba wo ɔ nya, nɛ a hi si nɛ a bua kpakpa amɛ a nya ngɔ wo plɔhi a mi; se lohi nɛ hi ɔmɛ ɔ a sake pue he. 49Ja nɔuu a maa pee ngɛ je nɛ ɔ nyagbe mi. Hiɔwe bɔfo ɔmɛ maa je kpo maa ba nɛ a maa hla nimli yayami ɔmɛ ngɛ dali ɔmɛ a kpɛti; 50nɛ a kɛ mɛ maa wo la abolo tsu ɔ mi. Lejɛ ɔ ya fomi kɛ lungu nya kpemi maa hi.”
Juetli momo kɛ ehe
51Yesu bi mɛ ke: “Nyɛ na ni nɛ ɔmɛ tsuo nya lo?” A de lɛ ke: “Ee, Mawetsɛ.” 52Se e de mɛ ke: “Lɔ ɔ he ɔ, mlaa tsɔɔlɔ tsuaa mlaa tsɔɔlɔ nɛ a pee lɛ kaselɔ kɛ ha hiɔwe matsɛ yemi ɔ, e ngɛ kaa wetsɛ ko nɛ jeɔ ni hehi kɛ ni momohi kɛ jee e juetli to he ɔ.”
A kua Yesu ngɛ Nazaret
(Marko 6.1-6; Luka 4.16-30)
53Benɛ Yesu gbe abɛ nɛ ɔmɛ a bumi nya a, e je lejɛ ɔ; 54nɛ benɛ e ba lɛ nitse e ma a mi ɔ, e tsɔɔ mɛ ni ngɛ a kpe he ɔ, nɛ e ha a he nya si mɛ nɛ a ke: “Jije nɔ nɛ ɔ ya na ni lemi kɛ he wami ni nɛ ɔmɛ kɛ je? 55Anɛ pi kapitɛ ɔ bi ɔji nɛ ɔ? Anɛ pi e nyɛ nɛ a tsɛɛ Maria a, kɛ e nyɛmimɛ nyumuhi Yakobo kɛ Yose kɛ Simon kɛ Yuda a? 56Nɛ e nyɛmimɛ yi ɔmɛ, anɛ pi waa kɛ mɛ tsuo nɛ ngɛ ɔ? Jije nɔ nɛ ɔ ya na ni nɛ ɔmɛ tsuo kɛ je mɔ?” 57Nɛ e plɛ kpangme ha mɛ. Se Yesu de mɛ ke: “A buu gbalɔ ngɛ he tsuaa he, ja lɛ nitse e ma mi kɛ lɛ nitsɛ e we mi kɛkɛ.” 58Nɛ akɛnɛ a he we yi he je ɔ, e pee we he wami nihi fuu ko ngɛ lejɛ ɔ.
Đang chọn:
Mateo 13: DAN77
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dangme New Testament © United Bible Societies, 1977.
