Mateo 12
12
Hejɔɔmi Ligbi ɔ he sane
(Marko 2.23-28; Luka 6.1-5)
1Jamɛ a be ɔ mi ɔ Yesu ya gu blɛfo mgmɔhi a mi ngɛ Hejɔɔmi Ligbi ɔ nɔ; nɛ hwɔ ye e kaseli ɔmɛ, nɛ a bɔni blɛfo ɔ kpɔmi kɛ kpemi. 2Se benɛ Farisifo ɔmɛ na a, a de lɛ ke: “Oʼɛ, o kaseli ɔmɛ ngɛ nɔ nɛ a ngmɛ́ blɔ kaa a peɔ ngɛ Hejɔɔmi Ligbi ɔ nɔ ɔ pee.” 3Se e de mɛ ke: “Anɛ nyɛ kane we nɔ nɛ David pee benɛ hwɔ ye lɛ kɛ nihi nɛ kɛ lɛ ngɛ ɔ? 4Bɔ nɛ e sɛ Mawu we ɔ nɛ e ya ye hɛ mi mami abolo nɛ e dɛ blɔ kaa lɛ loo nihi nɛ kɛ lɛ ngɛ ɔ yeɔ ɔ, kaa ja osɔfɔ ɔmɛ kɛkɛ ɔ? 5Aloo nyɛ kane we ngɛ Mlaa a mi kaa Hejɔɔmi Ligbi ɔmɛ a nɔ ɔ, osɔfohi bleɔ Hejɔɔmi Ligbi ɔ ngɛ sɔlemi we ɔ nɛ a yi fɔ ɔ? 6Jeha nɛ ɔ i ngɛ nyɛ dee ke: nɔ́ nɛ pe sɔlemi we ɔ ngɛ hiɛ ɔ. 7Se kaa nyɛ le nɔ́ nɛ ji: ‘Mɔbɔ nami i hlaa se pi bɔ’ ɔ sisi jinɛ, nyɛ be ninɛmɛ nɛ yi fɔ ɔ fɔ bue. 8Ejakaa Hejɔɔmi Ligbi ɔ nyɔmtsɛ ji Nɔmlɔ Bi ɔ.”
Nyumu ko nɛ nine kake gbo ɔ
(Marko 3.1-6; Luka 6.6-11)
9Nɛ e je lejɛ ɔ nɛ e ya sɛ a kpe he ɔ. 10Nɛ oʼɛ, nyumu ko ngɛ lejɛ ɔ nɛ e nine kake gbo. Nɛ a bi lɛ ke: “Anɛ e da blɔ kaa a tsaa nɔ ngɛ Hejɔɔmi Ligbi ɔ nɔ lo?” A de enɛ ɔ benɛ pee nɛ e ya po e nya? 11Se e de mɛ ke: “Nyɛ ti mɛnɔ nɛ ngɛ to kake, nɛ ke e ya nɔ muɔ mi ngɛ Hejɔɔmi Ligbi ɔ nɔ ɔ, nɛ e be e he pɛtɛe nɛ e je lɛ? 12Anɛ nɔmlɔ he jua wɛ babauu pi to lo? Lɔ ɔ he ɔ e da blɔ kaa a peɔ kpakpa ngɛ Hejɔɔmi Ligbi ɔ nɔ.” 13Kɛkɛ nɛ e de nyumu ɔ ke: “Kpa o nine ɔ mi!” Nɛ e kpa mi, nɛ e kɛ kake ɔ sɔ. 14Enɛ ɔ he ɔ Farisifo ɔmɛ je kpo ya so e yi nɔ, bɔ nɛ a maa pee nɛ a kpata e hɛ mi.
Mawu tsɔlɔ nɛ e hia
15Se benɛ Yesu kpa enɛ ɔ si ɔ, e sa e he si kɛ je lejɛ ɔ. Nɛ nihi babauu nyɛɛ e se, nɛ e tsa mɛ tsuo, 16nɛ e bɔ mɛ kɔkɔ ke a ko ha nɛ a nu e he; 17benɛ pee nɛ nɔ nɛ gbalɔ “Yesaia de ɔ nɛ ba mi ke:
18“Oʼɛ, ye tsɔlɔ nɛ i hla a,
Ye suɔlɔ nɛ ye klaa naa e he tsui ɔ,
I kɛ ye mumi ɔ maa to e nɔ,
Nɛ e maa fiɛ kojomi ngɔ tsɔɔ majeli ɔmɛ.
19E be pɛe, nɛ e be ngmlaa kpae hulɔ,
Nɛ nɔ ko be e gbi nue ngɛ magbɛ ɔmɛ a nɔ
20Gla nɛ a kɔ ɔ, e be kue,
Nɛ kane mi tako nɛ ngɛ tsoe suhi ɔ e be gbee,
Kɛ maa su be nɛ e ma ha kojomi maa su kunimi yemi mi.
21Nɛ e biɛ ɔ nɔ majeli ɔmɛ maa ngɔ a hɛ ngɔ fɔ.”
Yesu kɛ Beelzebul
(Marko 3.20-30; Luka 11.14-23)
22Kɛkɛ nɛ a kɛ nɔ ko nɛ mumi yayami ngɛ e mi nɛ ji hɛ yuyuilɔ kɛ amuɛti tsuo ɔ ba e ngɔ; nɛ e tsa lɛ, nɛ hɛ yuyuilɔ nɛ ji amuɛti hulɔ ɔ tu munyu nɛ e hyɛ nɔ. 23Nɛ asafo ɔ tsuo nyɛ kpɛ a he nɛ a de ke: “Anɛ pi David bi ɔ ji nɛ ɔ?” 24Se benɛ Farisifo ɔmɛ nu ɔ, a ke: “Pi yaka nɛ nɔ nɛ ɔ ngɛ mumi yayamihi hiae ɔ, se mumi yayamihi a tsɛ Beelzebul ɔ he wami nyɛ ʼi.” 25Se nɛ Yesu na a juɛmi ɔ, e de mɛ ke: “Matsɛ yemi tsuaa matsɛ yemi nɛ gbaa woɔ lɛ nitsɛ e he ɔ, e ywia; nɛ ma tsuaa ma aloo we tsuaa we nɛ gbaa woɔ lɛ nitse e he ɔ, e dɛ si. 26Nɛ ke satan hia satan a, e gba wo lɛ nitse e he; lɛɛ kɛ e matsɛ yemi ɔ maa pee kɛ da si kɛɛ? 27Nɛ ke imi ɔ, Beelzebul he wami nya i hiaa mumi yayamihi ngɛ ɔ, nyɛ bimɛ nyumu ɔmɛ ɔ, mɛnɔ he wami nya a hiaa mɛ ngɛ? Lɔ ɔ he ɔ mɛ nɔuu a maa kojo nyɛ. 28Se ke imi lɛɛ, Mawu Mumi ɔ nya i hiaa mumi yayami ɔmɛ ngɛ ɔ, lɔ ɔ lɛɛ pe Mawu matsɛ yemi ɔ na nyɛ nɛ ɔ nɛ.
29“Kɛ maa pee kɛɛ nɛ nɔ ko ma nyɛ he walɔ we mi nɛ e sɛ nɛ e ya ha e nihi, kaa ja e fi he walɔ ɔ lolo loko e ma nyɛ e we ɔ mi ni ha.
30“Nɔ nɛ be ye blɔfami ɔ, e te si ngɔ wo mi; nɛ nɔ nɛ kɛ mi bua we nya a, e ngɛ gbɛe kɛ ngɛ fiae. 31Lɔ ɔ he ɔ, i ngɛ nyɛ dee ke: A maa ngɔ yayami kɛ musu bɔmi tsuo ngɔ pa nimli: se Mumi ɔ he musu bɔmi ɔ, a kɛ be nimli pae. 32Nɛ ɔ tsuaa nɔ nɛ maa tu munyu ko ngɔ si Nɔmlɔ Bi ɔ, a kɛ maa pa lɛ; se nɔ tsuaa nɔ nɛ maa tu munyu ngɔ si Mumi Klɔuklɔu ɔ, a kɛ be lɛ pae ngɛ je nɛ ɔ mi aloo je nɛ maa ba a mi.”
Tso kɛ e yiblii
(Luka 6.43-45)
33“Nyɛ ha tso ɔ nɛ pee kpakpa nɛ e wo yiblii kpakpahi; aloo nyɛ ha tso ɔ nɛ pee tso yaya nɛ e wo yiblii yayahi; ejakaa tso yiblii a kɛ leɔ tso. 34Nyɛ sinɔhi a nina! Kɛ maa pee kɛɛ nɛ nyɛ nɛ nyɛ ji nimli yayamihi ɔ, nyɛ ma nyɛ munyu kpakpa maa tu? Ejakaa nɔ́ nɛ hyi tsui kɛ be nɔ ɔ, lɔ ɔ nɔuu nya deɔ. 35Nɔmlɔ kpakpa jeɔ ni kpakpahi kɛ jee e tsui mi juetli kpakpa a mi; nɛ nɔmlɔ yayami hu jeɔ ni yayahi kɛ jee e tsui mi juetli yaya a mi.
36“Se i ngɛ nyɛ dee ke, yaka munyu tsuaa yaka munyu nɛ nimli tuɔ ɔ, a maa bu he akɔɔtaa ngɛ kojomi ligbi ɔ nɔ. 37Ejakaa o munyu ɔmɛ a mi a maa je kɛ wo mo nguɔ, nɛ o munyu ɔmɛ a mi a maa je kɛ bu mo fɔ.”
Farisifo ɔmɛ ngɛ okadi hlae
(Marko 8.11-12; Luka 11.29-32)
38Kɛkɛ nɛ mlaa tsɔɔli kɛ Farisifo ɔmɛ a ti ni komɛ he nɔ nɛ a de ke: “Tsɔɔlɔ, wa ngɛ o nine nya okadi ko hlae nɛ waa hyɛ.” 39Se Yesu he nɔ nɛ e de mɛ ke: “Yi nɔ bi yayahi kɛ gba puɛli ngɛ okadi hlae; se a be mɛ okadi ko hae, kaa ja gbalɔ Yona okadi ɔ. 40Ejakaa bɔ nɛ Yona ye nyɔ kɛ pia ligbi etɛ ngɛ wo mi lo ngua a muklii mi ɔ, jã Nɔmlɔ Bi ɔ maa ye nyɔ kɛ pia ligbi etɛ ngɛ zugba a muklii mi. 41Ninive nyumu ɔmɛ maa te si ngɔ wo kikɛ yi nɔ bi nɛ ɔmɛ ngɛ kojomi ɔ mi, nɛ a maa bu mɛ fɔ; ejakaa a tsake a tsui ngɛ Yona fiɛmi ɔ nya; nɛ oʼɛ, nɔ́ nɛ pe Yona ngɛ hiɛ ɔ. 42Leneyi (Wo yi je) manye ɔ maa te si ngɔ wo kikɛmɛ a yi nɔ bi nɛ ɔmɛ ngɛ kojomi ɔ mi, nɛ e maa bu mɛ fɔ; ejakaa e je zugba a nyagbe he ba bu Salomo ni lemi ɔ tue; nɛ oʼɛ, nɔ́ nɛ pe Salomo ngɛ hiɛ ɔ.”
Mumi yayami ɔmɛ a sekpalemi
(Luka 11.24-26)
43“Se mumi yayami ɔ, ke e je nɔmlɔ mi ɔ, e ya nyɛɛ he gbigblihi hlaa he jɔɔmi, se e nɛ́ eko. 44Nɛ e deɔ ke: ‘Ma kpale ye se kɛ ya ye we he nɛ i je ɔ.’ Nɛ ke ba a, e naa kaa e fɔɔ si gu, nɛ a bɛɛ mi, nɛ a dla mi. 45Kɛkɛ ɔ, e yaa nɛ e ya ngɔɔ mumi kpahi kpaago nɛ ji mumi yayamihi pe lɛ kɛ piɛɛ e he; nɛ a baa ba hii lejɛ ɔ; nɛ jamɛ a nɔmlɔ ɔ nyagbe si himi ɔ plɛɔ yayami pe kekle nɔ ɔ. Ja nɔuu e maa ba mi ngɛ yi nɔ yaya nɛ ɔ hu he.”
Yesu nyɛ kɛ enyɛmimɛ nyumu ɔmɛ
(Marko 3.31-35; Luka 8.19-21)
46Yesu kɛ asafo ɔmɛ ngɛ nɔ ngɛ munyu tue nɔuu kɛkɛ nɛ oʼɛ, e nyɛ kɛ e nyɛmimɛ ɔmɛ ba da agbo ɔ nya; a ngɛ hlae nɛ a kɛ lɛ maa tu munyu? 47Nɛ nɔ ko ba de lɛ ke: “Oʼɛ, o nyɛ kɛ o nyɛmimɛ ɔmɛ daa si ngɛ agbo ɔ nya ngɛ hlae nɛ a kɛ mo maa tu munyu.” 48Se e he nɔ nɛ e de nɔ nɛ ba de lɛ ɔ ke: “Mɛnɔ ji ye nyɛ, nɛ mɛnɔmɛ ji ye nyɛmimɛ ɔmɛ?” 49Nɛ e je e nine ngɔ tsɔɔ e kaseli ɔmɛ nɛ e ke: “Ne, ye nyɛ kɛ ye nyɛmimɛ ɔmɛ! 50Ejakaa nɔ tsuaa nɔ nɛ peɔ Tsaatsɛ nɛ ngɛ hiɔwe ɔ suɔmi nya ni ɔ, lɛ nɔuu ji ye nyɛmi nyumu kɛ ye nyɛmi yo kɛ ye nyɛ.”
Đang chọn:
Mateo 12: DAN77
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dangme New Testament © United Bible Societies, 1977.
