Genesis 50
50
1Joseph aapani parrutiŋagaa, qiaġutiŋaruq suli kunikł̣ugu kiiñaŋagun. 2Tavraasii Joseph piraksriiŋaruq maquliñaiyausiġmarruŋ aapami timaa. 3Malġukipiani (40) uvluni naatchiŋarut, sivisutilaakaaŋa maquliḷḷaiyaiñiġum nalaułługu. Egypt-miuguruat qivġuŋagaat piŋasukipiaq qulini (70) uvluni.
4Qivġusuiġataġmata, Joseph uqallaktuq umialgum qaukłiuraŋiñun, “Kiligiaqsiuŋ uumiŋa umialik: 5#Gn 47.29-31.‘Aapaa tuquaqsiuraqami, unniqsuqłiipkaġaaŋa iḷuviquvluni iḷuvvivigmun itqanaiŋaramiñun nunaŋani Canaan. Aullaqtillaŋŋa iḷuviġiaġlugu aapaga, aasii utiġniaġmiuŋa.’”
6Umialgum kiugaa, “Aullaġlutin iḷuviġiaġuŋ aapan, unniqsuqłiisiktun.”
7Tavra Joseph-gum iḷuviġiaŋagaa aapani. Iluqaġmiŋ umialgum qaukłiuraŋich, utuqqanaaguruat igluani, suli aullarriuruat Egypt-mi aullaqatigiŋaniġaat Joseph. 8Igluqatiŋiḷu, aniqatiiŋisalu, suli aapaŋata igluqatiŋisa iluqaġmiŋ aullaqatigiŋagaat. Kisimiŋ miqłiqtuurat, suli imnaich, nagrulgich suli pamiqsaat uniñŋagaich nunaŋanun Goshen. 9Aŋutit tuttuqpirautinik aksraliktuaġaqłutiŋ suli aŋutit tuttuqpagaqłutiŋ aullaqatigiŋagaat; kanŋuqpauŋarut.
10Tikiññamiŋ palauvaksranik amiġaiqsivigmun Atad-mi kiluani Jordan, qivġuqpaŋaniqsut nipatuvlutiŋ sivisuruami, aasii Joseph-gum qivġuruat piraġausiŋat nalautinŋaniġaa tallimat malġugni uvluni. 11Iñuŋich Canaan tautukkamiŋ iñugnik qivġuruanik Atad-mi, uqaŋarut, “Isumaaġunmi piḷġusikaamiktun Egypt-miut qivġupaluktut!” Tainnamik taamna ini atchiŋaniġaat Abel Mizraim#50.11 Hebrew-guruat uqaluŋisa sivuniŋa Abel Mizraim: “Qivġuġviŋat Egypt-miut.”-mik.
12Tavra Jacob iġñiŋich savaŋarut piraksriusiamiktun; 13#Ac 7.16.timaa Canaan-muutiŋaniġaat suli iḷuviqługu qaiġusugmun Machpelah-mi qavanitchiani Mamre-m nunamun Abraham tauqsiaġiŋaraŋanun Ephron-miñ Hit-miuguruamiñ iḷuvvivigisukługu. 14Iḷuvianikkamiuŋ aapani Joseph-gum, utiŋaruq Egypt-mun piqatigivlugich aniqatiini suli iluqaisa aullaqatigiŋarani iḷuviqsiyyaqami.
Joseph-gum Araŋagaich Sivuuqqatiqaquŋił̣ł̣ugich Aniqatiini
15Joseph-gum aniqatiiŋich ilitchuġikamik aapaktiŋ tuquaniŋatilaaŋanik uqallaktut, “Aasii Joseph-gum uumiginiqpatigut suli akisaġumaalliġḷuni pimaqłuktautiptinnun ilaanun?” 16Tavra uqallautisaqtuqtinŋagaat Joseph, “Aapapta tuquŋaiñŋaġmi, 17uqallautiraatigut apiġitquvlutin, ‘Suliqutigiŋaikkich savamaqłuaŋich iliŋnun aniqatiikpich.’ Suliqutigiŋaiqsigut killukuaġutiptigun, kivgauruagut aapavich God-iŋanun.” Joseph qiaŋaruq tusaakamiuŋ taamna uqaluat.
18Tavraasii aniqatiiŋich qaiŋarut suli pułłutiŋ sivuġaanun. “Uvva uvani sivuġaġniittugut kivgaurugut iliŋnun,” uqallaktut.
19Aglaan Joseph-gum uqallautigai, “Iqsisiqaġnasi; Uvaŋa iḷiyumiñaitchuŋa uvamnik inaanun God-im. 20Sivunniqłusi pigiitchuamik savaŋagaluaqtusi uvamnun, aglaan God-im simmiŋagaa nakuuruamun, annautisaqługich iñugiaktuat iñuggutiŋich iñuich paŋmami iñuuruat pisigivlugu nalautinŋaruaq. 21Sumik sivuuqqatiksraitchusi, qaunaginiaġivsi miqłiqtusiḷu.” Tavra sivuuqqatiqaquŋił̣ł̣ugich uqautigaich uqalulluatanik aksikł̣ugich uummatiŋich.
Tuqumman Joseph
22Joseph iñuuniavsaaŋaniqsuq Egypt-mi piqatigivlugich aapami nanmiñiq iḷaŋi; tallimakipiaq qulitun (110) ukiuqaŋaruq tuqukami. 23Iñuuŋaruq tautugataqługich Ephraim miqłiqtuŋich suli tutaaluuŋich. Iñuuŋammiuq pimaaqtuqługich miqłiqtuŋich Machir-m, iġñiŋata Manasseh-m. 24Uqallautigaich aniqatiini, “Tuquyasiruŋa uvva, aglaan God-im munaġipiaġniaġaasi suli aullatilusi mattumaŋŋa nunamiñ nunamun unniqsuqłiisigiŋaraanun Abraham-mun, Isaac-mun, suli Jacob-mun.” 25#Ex 13.19; Js 24.32; He 11.22.Tavra Joseph apiġiniġai iñuni unniqsuqłiisiliuquvlugich. “Unniqsuqłiisiñŋa,” uqaqtuq, “God-im aullatikpasi taiptumuŋa nunamun, timiga kaluġisigiksi.” 26Tavraasii Joseph tuquŋaruq ukiunikłuni tallimakipiaq qulitun (110). Timaa maquliñaitchuamik immiqł̣ugu aasii kiguunnimuŋagaat Egypt-mi.
Đang chọn:
Genesis 50: INUPIAQ
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)