Genesis 49
49
Uqallaguiqsaaġutiŋich Jacob-gum Iġñimiñun
1Jacob ququaġniġaich iġñiġutiini suli uqallakłuni, “Katillagitchi avalluŋa, uqautiniaġivsi qanuq piñiaqtilaavsiññik sivuniksrami:
2“Qaisitchi atautchimuglusi suli naalaġniḷusi, iġñiġutiiŋich Jacob.
Naalaġnisiuŋ aapaksi Israel.
3“Reuben, aŋayukłiq iġñiġa, suaŋŋatigigikpiñ
Suli miqłiqtuqqaaġa aŋutiġuqama,
Qutchiksuaguniqtauruaq suli saŋŋiñiqtauvluni iġñipayaamniñ.
4Qaiḷḷiqpakłuni ulittuatun ittutin,
Aglaan nuimaruaguniqtauniaŋitchutin,
Siñiqatigiŋavlugu nukaġaġa
Suli salumaiḷiŋagiñ aapavich siñigviŋa.
5“Simeon-lu Levi-ḷu aniqatigiiksuk.
Savikpaktiŋ atuġuugaich qinnautikun.
6Piqasiutiniaŋitchuŋa nalunaqtuakun uqaqsaqpagnik,
Naaggaunnii iḷauluŋa kasimaniŋiññi,
Qanuq tuqutchisuuruk iñugnik uumisuutikun
Suli anniusiġaġigaich immuliviich aŋusalluŋich qilluusiqługich.
7Piaġiiḷḷiuġutauli qinnautiŋak, qanukkii suaŋapiaġataqtuq,
Suli qinnautaagnun, qanukkii naglikkutaipiaġataqtuk.
Siamitinniaġikka sumupayauraq nunaŋani Israel.
Suŋnamulliqaa aullaqtinniaġikka akunġanni iñuŋisa.
8“Judah, aniqatiikpich nanġaġniaġaatin.
Tigummisuugitin akiḷḷiuruat iliŋnun quŋusiŋisigun.
Aniqatiitin punniaqtut sivuġaġnun.
9 #
Nu 24.9; Rev 5.5. Judah ittuq lion-tun,
Tuqułługu pisaġinnikhuni aasii utiġmivḷuni sisiŋanun.
Isivsalaaqhuni suli nalaqsraaqhuni.
Kia unnii alapisaaqsausiitkaa.
10Judah-m tigummiñiaġaa umialguruam ataniġnaqutaa,
Suli kiŋuvaaŋich atanniqsimanniguuniaqtut.
Nunaqpauruat qaġġirriñiaqtut ilaanun nanġautauruanik;
Suli pullutiŋ sivuġaanun kamakkutiqaġlutiŋ.
11Pitugaġigaa kakaktiayaani grape-gich napaaqtuayaaŋannun,
nakuuniqtauruamun napaaqtuayaamun.
Iġġuġaġigaich annuġaani auktun kaviqsigiruamun wine-mun.
12Irraŋik taaqsiłhaaġaktuk wine-min,
Kigutiŋich qatisiłhaaġaqtut immugmin.
13“Zebulun iñuuniaġniaqtuq taġium siñaani.
Ilaani immam siñaa uqqiyviuniaqtuq umiaqpagnun.
Nunaŋa aktiginiaqtuq tikiḷġataġlugu Sidon.
14“Issachar nakuułhaaŋitchuq kakaktimiñ
Nalaruamiñ isivsalaaŋavluni akunġagni nanmauttak.
15Aglaan qiñiġaa unaŋuiqsiaġvigiksilaaŋanik
Suli nunaraaġikł̣uni.
Tavraasii kurraqłuni akigaġaġigaa nanmani
Nunurirauvluni savagaqtuq kivgauruatun.
16“Dan qaukłiuniaqtuq iñugmiñun.
Irrusiqaġniaqtut allatun maŋŋuġiraŋisun Israel.
17Dan anayaġniaqtuq nimiġiatun saniġaani apqutim,
Tuqunaliktun nimiġiatun saniġaani aullayaam,
Kiiññiktuaq tuttuqpaum kimmiŋanik,
Usiaqsiqsuaq katakkumiñaqsivḷugu kiŋunmun.
18“Utaqqiuqtuŋa annaunmik, Ataniiq.
19“Gad aŋuyagniaġaat tigligayuktit,
Aglaan saquluni aquliraġniaġaich.
20“Asher-m nunaŋa nauriñiaqtuq niqigiksuanik.
Niqiksraqaqtitchiñiaqtuq niqigiyumiñaqtaŋiñik umialgum.
21“Naphtali tuttu-tun ittuq paŋaliktuaqtuatun,
Ivaaqaqtuaq piññaġnaqtuanik nuġġaġnik.
22“Joseph ittuq siiġñirruġiksuatun napaaqtuayaatun saniġaani kuugauram,
aasii qisiksiutiŋi nauqpakhutiŋ akpakługu katchi. #49.22 Joseph ittuq pamiqsaŋaitchuatun kakaktitun saniġaani kuugauram, pamiqsaaguŋaitchuaq nuġġaq maniñaaŋani qimiqqam.
23Akiḷḷiŋisa aŋuyakkaat qinnautikun
Suli aquliraqługu pisiksimigniglu qaġrumigniglu.
24Aglaan pisiksiŋa aulalaitchuq iigusimaruaq
Suli pisiksuqsiñiaqtuq
Suaŋŋataagun Sapiġñaqtuam God-iŋata Jacob,
Imnaiḷiqirauruakun, Munaqsriruam Israel-mik.
25Aapavsi God-iŋata ikayuqtuaġaatin,
Sapiġñaqtuam God-im quviasuusiqsuġaatin
Quvianaqtuamik sialugmik takpagmaŋŋa
Suli itiruanik immanik samaŋŋa ataaniñ nunam,
Quviasaaġusiaġivlugich iñugiaktuat pamiqsaat suli miqłiqtut,
26Quviasaaġusiaŋich aapakpiñ kamanałhaaqtut,
Quviasaaġusiusiaġilugich utuqqauruat iġġich,
Quvianaqtuatsuli sut isuksraiḷaaniñ qimiqqaniñ.
Taapkuatuq quviasaaġutit tunŋalich niaquanun Joseph,
Qauŋanun ilaaguaqtauŋaruam ilimigun aniqatiimiñiñ.
27“Benjamin ittuq iqsiñaqtuatun amaqqutun.
Uvlaami tuqutchiraqtuq aŋuramiñik aasii niġivlugich; anaqamman aasii autaaqługich piññaktaani.”
28Tavra ukua qulit malġuuruat (12) maŋŋuurut Israel-mi, suli tavra taamna aapaŋata uqallaguiqsaaġutaa quviasaaġun iluaqtuaguŋaruq iġñillaamiñun.
Tuqumman Suli Iḷuviġmarruŋ Jacob
29Tavraasii Jacob-gum piraksriġñiġaich iġñiġutiini, “Tavra iḷḷatiniaqtuŋa iḷamnun tuquŋaruanun, iḷuviġisigivsiŋa aapagma irviannun qaiġusugmun nunaŋaniittuamun Ephron Hit-miuguruam, 30#Gn 23.3-20.Machpelah-mi kiluani Mamre-m nunaŋani Canaan. Abraham-gum tauqsiŋaraŋa taamna qaiġusuk suli nuna Ephron-miñ iḷuvvivigisukługu. 31#Gn 25.9, 10; Gn 35.29.Tavruŋa iḷuviŋaraat Abraham suli tuvaaqataa Sarah; tavruŋa iḷuviŋammigaat Isaac suli tuvaaqataa Rebekah; tavruŋaptauq iḷuviŋammiraġa Leah. 32Nunalu qaiġusuglu tavraniittuak tauqsiaguŋaruk Hit-miuguruaniñ. Taamuŋa iḷuviquruŋa.” 33#Ac 7.15.Jacob naatchiḷġataqami piraksriqsuutimiñik iġñimiñun, nallatqiŋaruq aasii aniġniġiŋaruq iḷativluni kiŋuniimiñun.
Đang chọn:
Genesis 49: INUPIAQ
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)