Ñwaè' Maêk 7
7
1Bèe Farìsi ba ŋgǎa ryɛ'ni mncir mo' ce a m vʉ̌ à rla' Jɛ̀rusalɛ̀m a m vʉ à ryɛ Jisòs. 2Wowèe a m yɛ àmbò ŋgǎa yɛ'ni yì buu mo' a ce ye byee nè mmbo msii. 3Bèe Farìsi ba Jus wɛɛwɛ a ka' tɛ sù'si mmbo àmbò ndèe wâp bta à m ba ka', a ye yuu ka'. 4A ka' vʉ efa ntaa, a ku su'si mmbo wɛɛ ka' ye yuu. Wowèe a ker tʉr ndèe mò' foŋ ce wâp bta a m kwe, a lɛ nè wowèe, àmbò àde' wowèe a su'sì mndoŋ ba mkìŋ, ker ba bkaŋ à njǐ yɛɛnì. 5Bèe Farìsi ba ŋgǎa ryɛ'ni mncir a bipshì nè Jisòs enɛ̂, “Ŋgǎa yɛ'ni yò buu a lɛ̀ ndèe visèe bta ka', a ce ye buu nè mmbo msii njokɛ?” 6Jisòs à beesì nè wowèe enɛ̂, “Àsayà ce ŋwɛ̀ ncep ntuu Nyʉ̀ à m làa yuu mini kuu wèe ce ŋgǎa mbo'ni àmbò a m saŋ enɛ̂,
‘Bèe ca a ku ce yu'ni nè mɛ̀ ba nè cùu.
Yap mntee yi yu ànjìsàp ese mɛ̀.
7Wowèe a ce gèe rloo nè mɛ̀ à cicì,
njobè' a ce yɛ'ni bèe mncir ce à lɛ̀ ba bèe.’
8Wèe à mà' ncir Nyʉ̀ a lor ba ndèe to'.” 9E m làa nè wowèe enɛ̂, “Wèe tʉr njì bfee à rkani mncir Nyʉ̀ tɛ wèe bo lòr yè ndèe to'. 10Musìs à m làa enɛ̂, ‘Yu'ni nè yò ta ba yò mâ.’ A ker laa enɛ̂, ‘Ŋwɛ̀ ce e ka' cɛp yì ta kɛ̀ yì ma ɛ̀, banɛ a be yʉ ŋgàŋ.’ 11Wèe ce làa weenɛ ŋwɛ̀ à ka' lor yuu ce e ba jà' yì ma ba yì ta àgho, laa enɛ, ‘Yuu ce mɛ̀ tʉr ce mɛ̀ ba jà' wɛ̀ àgho nà, yu Kobàn’, ce yi yu enɛ̂, ‘Mɛ̀ fa nè Nyʉ̀,’ 12wèe ker byemi enɛ e ja' yì ma ba yì ta àgho ka'. 13Wěe gee wa'a, banɛ wèe à lòr yè ndèe a siŋsi mncir Nyʉ̀ àgho. Ku' buu mò' yu foŋ àmbò bca, ce wěe ke gèe.”
14Jisòs à m ker kɛ' ku' bèe ce a m ba àfo a laa nè wowèe enɛ̂, “Yu'shi nè bòŋboŋ. 15Yuu ce yi ke niŋ njep ŋwɛ̀, yi ke gèe ŋwɛ̀ e ba jàpri à bsii Nyʉ̀ ka'. Yuu ce yi ke gèe ŋwɛ̀ e ba jàpri à bsii Nyʉ̀ yu ba yuu ce yi fʉʉ enjep ye. 16Ŋwɛ̀ ce e ka' tʉr btù', ŋgàŋ yu'.”
17E ka' mà'shi bèe, niŋ mbe ndàp, ŋgǎa yɛ'ni yì buu a bipshì nè ye enɛ ŋgàa anà yu enɛ kɛ lɛ. 18E beesì nè wowèe enɛ̂, “Wee wèe à be riŋ buu foŋ ka' a? Mbò wèe yi weenɛ àde' yuu ce yi ke niŋ njep ŋwɛ̀ yi gee ŋwɛ̀ e bep à bsii Nyʉ̀ ka' ka' a? 19Yi yu wa'a njobè' yi ke niŋ ba njep ntee ka', yi ke niŋ ba njep rbʉ̀, fʉʉ enjo.” E ka' làa wa'a a raasi enɛ byee wɛɛwɛ vi yu bbòŋboŋ à bsii Nyʉ̀. 20E m ker laa enɛ̂, “Yuu ce yi ke fʉʉ enjep ŋwɛ̀, à yì ce e ke gèe ye e ba jàpri à bsii Nyʉ̀. 21Njɛ̀ɛ buu bbebep ca vi ke lò ba enjep ntee: bsàkì, byɛ̀ɛ, nyʉshi bèe, à rkoo ŋgwa ŋwɛ̀ mò' kɛ̀ nduu ŋwɛ̀ mò', 22à rbàŋ mmir à buu, bsàrbuu, mbo'ni, nděe mbembep, ŋko'ndoŋ, mnsa'ni, nàanyor ba blʉr. 23Buu bbebep ca bsìp vi ke fʉʉ enjep ŋwɛ̀, gee ye e ba jàpri à bsii Nyʉ̀.”
24Jisòs à m nàtǐ à àfo, a du à dì' ce rla' Tayà li m ba. E m dù a ba' àfo, a niŋ mbe ndàp, a koŋ enɛ ŋwɛ̀ mò' riŋ enɛ e yu mbo ka'. Geewa'a bèe a ku rîŋ. 25Njeŋwɛ̀ mò' ce nyʉ̀rkà' à m niŋ njep muu yì, à m yu' enɛ Jisòs yu àfo, a vʉ̂, a gwe njep yě tìi. 26Njeŋwɛ̀ anà à m ba ŋwɛ̀ enje jɛɛ. A m bi ye à ŋgǒŋ Sìròfònisìyà. E m bu' mmbo nè Jisòs enɛ e fʉr yʉ' nyʉ̀rkà' ca enjep muu yì. 27Jisòs à laa nè ye enɛ̂, “Mà'shi tɛ a nyaŋ boo entòmbì njobè' yi bòŋ enɛ a lor byee boo ma' nè ŋgwe ka'.” 28Njeŋwɛ̀ ca à beesì enɛ̂, “Yi yu mini wa'a, Tatâ, to ŋgwe yi ke ye mkʉ̀' baa boo ce mi gwèŋger foŋ.” 29Jisòs à laa nè ye enɛ̂, “À ka' ba njo' yuu ce wɛ̀ làa na, yʉ' nyʉ̀rkà' ca yi fʉʉ enjep muu ghò. Dù yo yu.” 30E m kʉti à là', a yɛ àmbò muu yì nòŋ mbe bkuu, yʉ' nyʉ̀rkà' anà yi banì fʉʉ enjep ye.
31Jisòs à m nàtǐ à dì' ce rla' Tayà li m ba nà, a to'ni rla' Sidòn, a caa Mla' ce Rʉ̂ʉ, a du a ba' à rdip rgòr ce à ŋgǒŋ Galèlê. 32Bèe mo' a m vʉ̀ nè ŋwɛ̀ mò' ce e m fuŋre a ke' yi à rlàa yuu bòŋboŋ foŋ ka', a bu' mmbo nè Jisòs enɛ e naa mi mmbo mbendù ŋwɛ̀ anà, ja' ye. 33Jisòs à fʉr ye embe mʉ̀ bèe, a fa ye mntummbo mbà btù', a ce mce, a joo ye rlee àgho, 34a ke' mbe bùu a shoo, a laa nè ye enɛ̂, “Efatà.” Efatà ca yu enɛ, “Mʉ̀'ti.” 35Vi btù' vi mʉ'ŋgèr, rlee li ba'ŋgèr ye, e kɛ' a ce làa yɛɛnì. 36Jisòs à ciisì nè wowèe enɛ a fa suŋ ŋwɛ̀ ka'. E ka' cìisi wa'a wowèe a misì a suŋ bèe gòr. 37Bèe a m bɛ̀ɛŋger sê, a ce làa enɛ̂, “E gèe buu wɛɛwɛ yɛɛnì; e gèe mnfuŋtù' a ce yu' buu, blʉr a ce làa.”
Đang chọn:
Ñwaè' Maêk 7: LNT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Limbum New Testament © Bible Society of Cameroon, 2003.
