Ñwaè' Maêk 6
6
1Jisòs à m lǒ à to' anà, a du fa yě là'. Ŋgǎa yɛ'ni yì buu a du fa yě mbuu. 2À ka' ba nyʉ̀ mmbomntaa Nyʉ̀, e kɛ' a ce yɛ'ni bèe mbe ndàp rloo. Bèe ce a m yu', a m bɛ̀ɛŋger, a laa enɛ̂, “Ŋwɛ̀ ca à gèe njɛ̀ɛ ryɛ'nì ca efɛ? A njɛ̀ɛ bfee kɛ ce a m fa nè ye wa'a? E gèe njɛ̀ɛ mfà' mghagha' ca à njɛ̌ɛ kɛ? 3Mbò a ye kapintà ce muu Mɛ̀ɛri a? Mbò e yu nfʉr Jɛ̂ms, ba Josès, ba Jud ker ba Saimʉ̀n a? Mbò bjar vi a yu sèe wowèe àfa a?” A ka' làa wa'a, a kani ye. 4Jisòs à laa nè wowèe enɛ̂, “A ke yu'ni nè ŋwɛ̀ ncep ntuu Nyʉ̀ à bdì' wɛɛwɛ, geewa'a bèe efa yě là', ba yì ndap, a ke yu'ni nè ye ka'.” 5Àtà e m ba gee mfà' mghagha' fa yě là' ka'. E m ku naa mi mmbo mbendù ŋgǎa byaŋ mʉcàr, wowèe a ke'sè. 6E m ba nè rgha'nì-ŋwɛ̀ à ryɛ enɛ bèe a byemi ka'. E m nàti, a ce kar à mla' mo', a ce yɛ'ni bèe blǎa Nyʉ̀.
7E m kɛ' bèe ce ncòp-baa-à-rrʉ̀ʉ ce e m ce nà, a tuu wowèe a baa a baa, a fa wowèe ŋger enɛ wowèe a ce fʉr byʉ' bbebep enjep bèe. 8E m làa nè wowèe enɛ a ku lor ba mbàŋ, a fa lòr byee, ba bàa ba mbàa ka'. 9E m làa nè wowèe enɛ àtà a yar blaba', geewa'a, a fa yar bcɛ̀' à nyǒr bbaa ka'. 10E m làa nè wowèe enɛ̂, “Wèe à ka' du niŋ ka' mbe ndàp yǐ fɛ ɛ̀, wèe ku cu ba mbo caar, ba' à nfè' ce wèe be fʉʉ efa rla' anà. 11Wèe à ka' niŋ à rla', a ke' koni wèe, kɛ̀ yu'shi yuu ce wèe ce làa ka', wèe kashì nfʉ̀nfʉ efa me mkùu à to' anà, duse, à rdùŋshi enɛ wowèe a gèe yuu bebep.” 12Wowèe a dû, a ce fè'shi nè bèe enɛ a kupse, ma' yàp buu bbebep. 13Wowèe a m fʉshi ku' byʉ' mnyʉ̌mkà' enjep bèe, a ker yo' ŋgǎa byaŋ magòr nè mgʉr, wowèe a ke'sè.
14Bèe a m ce suŋ àmbò Jisòs gòr, ŋkʉʉ Hɛròd à yu'. Bèe mò' a m ce làa enɛ a Jǒn ŋwɛ̀ bàptir bèe ce e fʉʉ efa rkwe, a mbùu ce e tʉr ŋger à rgèe njɛ̀ɛ buu bghagha' ca wa'a. 15Bèe mo' a m ce laa yap enɛ a Àlajà; bèe mo' enɛ a ŋwɛ̀ ncep ntuu Nyʉ̀ ce e yu àmbò ŋgǎa ncep ntuu Nyʉ̀ ce entòmbì nà. 16Hɛròd à ka' yu' wa'a, a laa enɛ̂, “Jǒn ce mɛ̀ m tee ye tu nà, à fʉʉ efa rkwe.” 17Hɛròd ca à m ba ŋwɛ̀ ce e m tuu bèe, a du a koo Jǒn, a kur, a fa ye mbe shaŋ àtu Hɛ̀rodìyà ce e m ba ŋgwa nfʉr yì ce Felêp. 18Jǒn à m banì laa nè Hɛròd enɛ̂, “Ncir yi byemi enɛ à fap ŋgwa nfʉrò beesì à yò ka'.” 19Hɛ̀rodìyà à ka' yu', a baa Jǒn sê. E m ròo à ryʉ Jǒn, geewa'a njì yi buu, 20njobè' Hɛròd à m ce wɛp Jǒn. E m yi enɛ Jǒn yu ŋwɛ̌ nyɛɛnì, a ker ba ŋwɛ̌ nrara, a ce tɛ'shi ye. Jǒn à m ce làa yuu, yi ce fa Hɛròd ŋgɛ' sê, geewa'a, e ku ce kòŋ à ryu' yuu ce e m ce làa.
21Fɛŋ yi m lò a yɛɛti mbe nfè' ce Hɛròd à m kɛ' ŋkà' yi nòŋ ce a m bi ye. E m be běe bgòrgòr embe yě nto', ba bsoogɛ̀ ce bgòrgòr, ba bòo mlii mo' ce à ŋgǒŋ Galèlê. 22Muu Hɛ̀rodìyà ce njeŋwɛ̀ à m vʉ̀ a bii bii, nyòr à boŋ Hɛròd ba bèe ce a m vʉ̀ ŋkà'. Awɛ Hɛròd à làa nè muu ana enɛ̂, “Wɛ̀ ka' bipshi ka' njɛ̀ɛ kɛ ce wɛ̀ kòŋ, m ku fa nè wɛ̀.” 23E m ye lè', a laa enɛ̂, “Wɛ̀ ka' bipshi ka' njɛ̀ɛ kɛ, m ku fa nè wɛ̀, ka' nto'nì efa ya ŋgòŋ.” 24Muu ca à dû, a bipshi nè yì ma enɛ̂, “M be bipshi ba kɛ?” Yì ma à beesì nè ye enɛ̂, “Tu Jǒn ŋwɛ̀ bàptir bèe.” 25Muu anà à ku caŋ a kʉti, a du a laa nè ŋkʉʉ enɛ̂, “M ce kòŋ enɛ à fa mɛ̀ tu Jǒn ŋwɛ̀ bàptir bèe njep kaŋ sè'ni.” 26Mlù mi koo ŋkʉʉ sê, à ka' ba njobè' e m ye lè' à bsii bèe ce a m vʉ̀ ŋkà' nà, e moo à rshè làr. 27E m ku tuu ŋwɛ̀ soogɛ̀ enɛ e du vʉ nè tu Jǒn. E du mbe shaŋ, a tee tu ese Jǒn, 28a vʉ àgho njep kaŋ, a fa nè muu anà, e fa nè yì mâ. 29Ŋgǎa yɛ'ni buu Jǒn à ka' yu' wa'a, a du a lor gʉ̀ʉ a tuŋ.
30Ŋgǎa ntuu Jisòs a m kʉti a yɛ ye, a suŋ ye buu ce wowèe a m gèe, ker ba buu ce wowèe a m dù a yɛ'ni bèe. 31Bèe a ce vʉ̀ magòr, ŋgǎa ntuu Jisòs a ke' tʉr njì à rye yuu ka'. Jisòs à laa nè wowèe enɛ̂, “Sèe du à dì' mo' ce bèe a yu ka' tɛ wèe lʉshi mʉcàr.” 32Wowèe a niŋ mbe keŋ, a du à dì' ce bèe a m ba ka'. 33Bèe a yɛ àmbò wowèe a ce dù, a riŋ wowèe, a fʉʉse efa mla' wɛɛwɛ, a caŋse a du a ba' à dì' anà entombì. 34Jisòs à ka' kù fʉʉ embe keŋ, a yɛ ku' bèe àwǎa rò, a koosimnse nè bèe anà magòr njobè' wowèe a m ba àmbò njèe ce yi buu ŋwɛ̀ rcìŋ wa'a. E kɛ' a ce yɛ'ni wowèe ku' buu.
35Nfè' à m kɛ̀' a ce càa, ŋgǎa yɛ'ni yì buu a vʉ̂, a laa nè ye enɛ̂, “Sèe yu à njìsàp efa mla', nyʉ̀ à ce coo. 36Làa tɛ wowèe a duse à mla' ce mi yu àtʉtʉ, ba mì ce mi yu à mŋkʉ̀, dù yuu byee, ye.” 37Jisòs à beesì a laa nè wowèe enɛ̂, “Fa nè wowèe yuu tɛ a ye.” Wowèe a beesì enɛ̂, “Banɛ wèr lor bàa mbǎa bbaa, du yuu brɛ̌d àgho nè wowèe a?” 38Jisòs à laa nè wowèe enɛ̂, “Wèe tʉr brɛ̌d yi sɛ'? Dù fyɛ' ka nè.” Wowèe a ka' dù fyɛ', a laa nè ye enɛ̂, “Wèr tʉr brɛ̌d tâ, ba nca baa.” 39E laa enɛ wowèe a laa tɛ bèe anà a cute à mjɛɛ à bkʉr à bkʉr. 40Wowèe a lâa, bèe anà a cutè à bkʉr à bkʉr. Bkʉr mo' bèe rjèe rjèe; bkʉr mo' bèe mta mtâ. 41E lor brɛ̌d tâ, ba nca baa cà, a ke' mbe bùu, a yoŋshi Nyʉ̀, a bɛ'shi brɛ̂d, a fa nè ŋgǎa yɛ'ni yì buu enɛ a gapshi nè bèe anà, a ceeshi nca anà foŋ a gapshi nè wowèe. 42Ŋwɛ̀ wɛɛwɛ à ye, a yu'. 43Ŋgǎa yɛ'ni yì buu a baashì bbɛbɛ' brɛ̌d ba btete nca, vi ruu à mŋkàa ncòp-baa-à-rrʉ̀ʉ. 44Mmbaŋrù ce a m ye byee anà a m ba bèe ncʉ̀kì tâ.
45Jisòs à m ku laa nè ŋgǎa yɛ'ni yì buu enɛ a niŋ mbe keŋ, tuu nèŋguu rò entombì, tɛ e laasi bèe anà. 46E ka' làasi wowèe wɛɛ a ko' mbe rtùu à rgèe rloo. 47À ka' ba à mbùuŋkùr, keŋ à ba mbe ntee rdip, Jisòs à ba nje waa ŋkʉ̀ mimŋgi'. 48E yɛ àmbò ŋgǎa yɛ'ni yì buu a ce ni'ni nè keŋ, njobè' fu' yi m ce càa magòr. À ka' ba à mʉ ŋgàptʉ', e du a wǎp mbùu, a ce jɛ̀r mbendù rdip, a ce ròo càa wowèe. 49Wowèe a ka' yɛ àmbò e ce jɛ̀r mbendù rdip, a ce kwa'shi enɛ a nyir, a warse, 50njobè' wowèe wɛɛwɛ a m yɛ ye, a ce wɛp. E ku laa nè wowèe à nfè' anà enɛ̂, “Kur nè ntee, a mɛ̀, fa wɛp nè ka'.” 51E niŋ a cu a wowèe mbe keŋ, awɛ fu' cà yi teetì. Wowèe a bɛɛŋgèr sê, 52njobè' wowèe a m be riŋ àmbò Jisòs à m gèe, a ka' nyaŋ ku' bèe ca nè brɛ̌d tâ, ba nca baa ka'.
53Wowèe a ka' tuu nèŋguu rò, a cʉʉ keŋ àwǎa rò, a ba sè'ni ba à ŋgǒŋ Gɛ̀nɛsarɛ̀t. 54Jisòs à ka' ku fʉʉ embe keŋ, bèe a yɛ ye, a rîŋ. 55E m ce jɛ̀r à dì' anà, bèe a ce yu' fà dì' e yu, byɛ'se ŋgǎa byaŋ, vʉ àgho, yɛ ye. 56Bdì' wɛɛwɛ ce e m dù, kɛ̀ à mlà' mkɛ'ŋkɛ' ba à mla' mŋgòrŋgòr ɛ̀, bèe a vʉ̀ nè ŋgǎa byaŋ à ntaa, ce bu' mmbo nè ye enɛ e ku ma'shi tɛ a joo ka' yi cùu cɛ̀'. Ŋgǎa byaŋ wɛɛwɛ ce a m jòo ye a m ke'sè.
Đang chọn:
Ñwaè' Maêk 6: LNT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Limbum New Testament © Bible Society of Cameroon, 2003.
