Ñwaè' Maêk 8
8
1À m ba à mnòŋ anà, ma kʉr bèe yi ker vʉ a kaari, a ke' koni yuu ye ka'. Jisòs à kɛ' ŋgǎa yɛ'ni yì buu a laa nè wowèe enɛ̂, 2“M ce koosimnse nè bèe ca sê, wèr wowèe à cu à mnǒŋ btaar, wowèe a ke' koni yuu ye ka'. 3M ka' kʉsi wowèe à mlà' nè njè, wowèe a du gwe njè à nduunjì. Wèe mo' efa wǎp mʉ a vʉ̀ efa njìsàp sê.” 4Ŋgǎa yɛ'ni yì buu a beesì nè ye enɛ̂, “Brɛ̌d yi be ka' lò efɛ à ntee rìŋ ca, ce àde' yi ghɛɛtè à ryaŋ wowèe?” 5Jisòs à bipshì nè wowèe enɛ̂, “Wèe tʉr brɛ̌d bsɛ'?” Wowèe a beesì enɛ̂, “Wèr tʉr brɛ̌d sàambâ.” 6Awɛ e laa bèe anà a cutè à nshè. E lor brɛ̌d sàamba cà, a yoŋshi Nyʉ̀, a bɛ'shi a fa nè ŋgǎa yɛ'ni yì buu a gapshì nè bèe anà. 7Wowèe a m tʉr mʉ nca foŋ. E yoŋshì Nyʉ̀, a fa nè ŋgǎa yɛ'ni yì buu enɛ a gapshi nè bèe anà foŋ. 8Wowèe a ye a yu', a baashi bbɛbɛ' ce vi m bɛti, vi ruu à mŋkàa sàambâ. 9Bèe ce a m ye, a m ba àmbò ncʉ̀kì kyèe. E laa wowèe a dusè, 10e niŋ mbe keŋ a ŋgǎa yɛ'ni yì buu wèe, a tuu à mbèp Dàlmànutà.
11Bèe Farìsi a m vʉ̀, a ce taase Jisòs. Wowèe a m ce ròo à rmòoshi ye, awɛ a laa nè ye enɛ e duŋshi wowèe ncòo embe bùu. 12E shoo, a laa enɛ̂, “Bèe e lùuni a ce ròo mncǒo bghagha' wa'a njokɛ? Ài', m suŋ wèe mɛnɛ àde' m duŋshì ncòo nè bèe ca ka'.” 13E ma'shì wowèe, a niŋ mbe keŋ, a tuu nèŋguu rò.
14Ŋgǎa yɛ'ni buu Jisòs a m lèse à rlòr brɛ̂d, a ku tʉr ba ntu' brɛ̌d mo'sir mbe keŋ. 15Jisòs à ciisì nè wowèe enɛ̂, “Lòr nè nfè' nè yis bèe Farìsi ba yì Hɛròd.” 16Wowèe a kɛ' a ce làa fa wǎp mʉ enɛ̂, “E làa wa'a njobè' sèe à ba vʉ nè brɛ̌d ka'.” 17Jisòs à m yi yuu ce wowèe a ce làa. A laa nè wowèe enɛ̂, “Wèe ce làa fa wěe mʉ enɛ wèe tʉr brɛ̌d ka' njokɛ? Wèe à be riŋ buu ka' a? Wà' wèe à be riŋ mbùu efa gho ka' a? Wà' ku ba ntèe-tu a? 18Wèe à tʉr mmir, a ke' ce yɛ buu ka' a? A tʉr btù', a ke' ce yu' buu ka' a? Kɛ̀ yu ba enɛ wèe ce kuushi buu ka' a? 19À nfè' mɛ̀ m bɛ'shi mtu' brɛ̌d tâ, a fa nè bèe ncʉ̀kì ta nà, wowèe a m ye, wèe a kwɛ' bbɛbɛ' à mŋkǎa bsɛ'?” Wowèe a beesì enɛ̂, “Wèr à m kwɛ̀' à mŋkàa ncòp-baa-à-rrʉ̀ʉ.” 20E ker bipshi nè wowèe enɛ̂, “À nfè' mɛ̀ m fa mntu' brɛ̌d sàamba nè bèe ncʉ̀kì kyèe nà, wowèe a m ye, wèe à kwɛ' bbɛbɛ' à mŋkǎa bsɛ'?” Wowèe a beesì enɛ̂, “Wèr à m kwɛ̀' bbɛbɛ' à mŋkàa sàambâ.” 21Awɛ Jisòs à laa nè wowèe enɛ̂, “Banɛ wèe à be riŋ mbùu efa yuu ce m ce làa ka' a?”
22Wowèe a m vʉ̀ a ba' à rlà' Bɛ̀tsaidà, bèe mo' a vʉ nè nfèp enɛ Jisòs joo ye nè bo tɛ e ke'se. 23E ghashì ye à rkoo a ye a fʉʉ efa là' anà. A ka' dù bà', a ce ye nè mce nje mmìr, a la' mmbo mbe yě ndù, a bipshi nè ye enɛ̂, “À ce yɛ buu sè'ni a?” 24E fyɛ' mbekì, a beesi enɛ̂, “M ce yɛ àmbò bèe a ce jɛ̀shi, a ba àmbò bce wa'a.” 25Jisòs à ker la' ye mmbo nje mmìr, e tuŋsì mmir, a misi a yɛ buu sè'ni bòŋboŋ. 26Jisòs à ma'shì ye enɛ e du mbe yě ndàp, a laa nè ye enɛ e fa kèr dù à mʉ̀ la' ka'.
27Jisòs a ŋgǎa yɛ'ni yì buu wèe a m ce dù à bu' mla' ce mi m ba à to' Sisàriyà Fìlepàï. A ka' dù bà' à nduunjì e bipshì nè wowèe enɛ̂, “Bèe a ce làa enɛ m yu nda?” 28Wowèe a bèesi nè ye enɛ̂, “Bèe mo' a ce làa enɛ à yu Jǒn ŋwɛ̀ bàptir bèe, bèe mo' enɛ à yu Àlajà, bèe mo' enɛ à yu mò' efa ŋgǎa ncep ntuu Nyʉ̀.” 29E ker bipshi nè wowèe enɛ̂, “Yi yu yi kɛ àmbò wèe, wèe ce làa ye weenɛ m yu nda?” Pità à beesì enɛ̂, “A wɛ̀ Krǎis anà.” 30E ciisì nè wowèe enɛ a fa suŋ ŋwɛ̀ mò' enɛ a ye Krǎis anà ka'.
31Jisòs à m kɛ̀' a ce yɛ'ni ŋgǎa yɛ'ni yì buu enɛ Muu Ŋwɛ̀ be kù yɛ ŋgɛ' gòr sê, tɛ bleebèe ba běe bgòrgòr efa ŋgǎa taŋshi taŋshì ker ba ŋgǎa ryɛ'ni mncir a kani ye. A be kè yʉ ye, mnòŋ vi ba btaar, e fʉʉ efa rkwe. 32E m làa buu ca nè wowèe rara sê. Pità à koo ye, a ye a lɛ'sì nyor, a kɛ' a ce lapni ye kuu yuu ce e làa anà. 33Jisòs à beesì nyor a fyɛ' ŋgǎa yɛ'ni yì buu a laa nè Pità enɛ̂, “Lò efa mɛ̌ geŋ, Satàn! Mo mkwà'shì yu ba mǐ ŋwɛ̀, yu mǐ Nyʉ̀ ka'.”
34Jisòs à kɛ' ku' bèe ba ŋgǎa yɛ'ni yì buu a laa nè wowèe enɛ̂, “Ŋwɛ̀ à ka' ce kòŋ à rvʉ̀ fa mɛ̌ mbùu, banɛ ŋgàŋ kani yì nyor, byɛ' yi kìntaa, ce vʉ fa mɛ̌ mbùu. 35Ŋwɛ̀ ce e ka' ce kòŋ à rboŋshi li ryòŋ banɛ ŋgàŋ be bɛ li, ŋwɛ̀ ce e ka' tɛ boŋshi li ryòŋ ka' njo' mɛ̀, banɛ ŋgàŋ be koni li. 36Àde' ŋwɛ̀ konì ba njɛ̀ɛ sɛ' kɛ ce e ka' tʉr buu enjep ŋgòŋ na wɛɛwɛ, bɛ li ryòŋ? 37Yuu ce àde' ŋwɛ̀ fa àtu li ryòŋ yu kɛ? 38Ŋwɛ̀ ce rìtu yi ce koo ye nè mɛ̀, ker ba nè wa blàa embe njɛ̀ɛ nfè' e sè'ni ce bèe a ce kani Nyʉ̀, a ker ce gèe buu bebep na, banɛ rìtu yi be kè koo Muu Ŋwɛ̀ nè ye foŋ mbe nfè' ce e be kè vʉ̀ a bcìndap Nyʉ̀ ce brara wèe nè fòo yì Tâ.”
Đang chọn:
Ñwaè' Maêk 8: LNT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Limbum New Testament © Bible Society of Cameroon, 2003.
