Ñwaè' Maêk 5
5
1Jisòs a ŋgǎa yɛ'ni yì buu wèe a m dù ba' à ŋgòŋ bèe Gɛ̀rasà ce yi m ba nèŋguu rdip rgòr. 2E ka' kù fʉʉ embe keŋ, ŋwɛ̀ mò' ce yʉ' bebep yi m niŋ njep ye à vʉ efa dì' ce a m ce tuŋ bèe, à ryɛ ye. 3Ŋwɛ̀ anà à m ce cu ba à dì' anà. Yi ke' ba àtɛ̀r à rkur ye, ka' nè bkwàŋ ka'. 4A m ce lò kur ye mkoo ba mkùu nè bkwàŋ, e ku ceeshi. Ŋwɛ̀ mò' à ker tʉr ŋger à rkoo ye kur ka'. 5E m ce kar à mndù shè ba à mtùu nètʉ' ba nèmootì a ce war, ker ce shɛshi yì nyor nè blùr. 6E ka' yɛ Jisòs àmbò e nyɛɛ, e caŋ a du a gʉ'shi njep yě tìi, 7a waa, a laa enɛ̂, “Jisòs, Muu Nyʉ̀ embe bùu, yuu ce sò tʉr a kɛ? M ce loo wɛ̀ à rlii Nyʉ̀ enɛ à fa fa mɛ̀ ŋgɛ' ka'.” 8(E m làa wa'a njobè' Jisòs à m làa enɛ̂, “Fʉʉ enjep ŋwɛ̀ ca, wɛ̌ yʉ' bebep.”) 9Jisòs à bipshì nè ye enɛ̂, “Lo rlii a nda?” E beesì enɛ̂, “La rlii a Ncʉ̀kì, njobè' wèr yu àŋgoo.” 10E m bu' mmbo nè Jisòs enɛ e fa jùu wowěe à dì' anà ka'. 11Kʉr ŋkǔnyàm mo' gòr se yi m ba àfo, a ce yeŋger àwǎa rtùu. 12Byʉ' bbebep ca vi bu' mmbo nè Jisòs enɛ̂, “Mà'shi tɛ wèr du niŋ à mʉ̀ ŋkǔnyàm ca, niŋ njep mʉ̀ mo.” 13Jisòs à byemì, byʉ' ca vi fʉʉ enjep ŋwɛ̀ ca, a niŋ njep mʉ̀ ŋkǔnyàm. Ŋkǔnyàm ce yi m ba àmbò ncʉ̀kì baa yi kɛɛtì a suu mbà baa, a gweŋger njep rdip rgòr, a no mdip a kweŋger.
14Ŋgǎa cìŋ ŋkǔnyàm ca a m caŋ, a du a suŋ bèe à là', a ker suŋ nè bèe ce a m ba à mŋkʉ̀, awɛ bèe a dusè à ryɛ yuu ce yi m koni. 15Wowèe a m dù ba', a yɛ Jisòs ba ŋwɛ̀ ce byʉ' mnyʉ̌mkà' vi m niŋ njep ye àŋgoo nà àmbò e cu, a yar bcɛ̀' à nyòr. Vi bfee vi banì kʉti mbo. Wowèe a m wɛp sê. 16Bèe ce a m ba, a yɛ yuu ce yi m koni nè ŋwɛ̀ ca ba ŋkǔnyàm ca a m suŋ nè bèe anà. 17Wowèe a kɛ' a ce bu' mmbo nè Jisòs enɛ e lo efa yap ŋgòŋ dû. 18Jisòs à ka' ce niŋ mbe keŋ, ŋwɛ̀ ce byʉ' mnyʉ̌mkà' vi m fʉʉ enjep ye nà à loo enɛ e be dù a ye. 19E kanì, a laa nè ye enɛ̂, “Dù fa wɛ̌ là' du suŋ yò bèe buu ce Tata à koosimnse a gee nè wɛ̀.” 20Ŋgàŋ à du a ce kar à Mla' ce Rʉ̂ʉ, a ce suŋ buu ce Jisòs à m gèe nè ye. Bèe wɛɛwɛ a bɛɛŋgèr sê.
21Jisòs à m ker niŋ mbe keŋ, a tuu nèŋguu rò. A ka' bà' njo, ku' bèe a vʉ a kaari àwǎa ròo. 22Ŋwɛ̀ mò' ce a m ce too enɛ Jairòs, ce à m ba ŋwɛ̌ ŋgòr mò' embe ndàp rloo, à vʉ̂, a ka' yɛ Jisòs, a gwe njep yě tìi, 23a bu' mmbo, a laa nè ye enɛ̂, “Muu wà ce muunje ku ba yǐ ŋkwe, vʉ̀ la' mo mmbo mbe yě ndù tɛ e bo kè'se, cu ntèe.” 24Jisòs à du a ye, ku' bèe mò' foŋ a du a yě mbùu, a ce nyòrni, a fate ye.
25Njeŋwɛ̀ mò' à m ba àfo ce e m cu mbe kùu à bfè' ncòp-baa-à-rrʉ̀ʉ. 26E m yɛ ŋgɛ' mbe mmbo ŋgǎa mcɛ̀p magòr, a too mbaa sê, a ke' ke'se ka'. Yaŋ yi ku ce dù ba kùntombì. 27E m yu' nsuŋ Jisòs, a vʉ a niŋ mbe mʉ̀ bèe, a vʉ mbe yě njì, a joo ye cɛ̀', 28njobè' e m làa enɛ̂, “Mɛ̀ ka' ku joo ba yi cɛ̀', m ku ke'se.” 29E ka' jòo cɛ̀' Jisòs, yaŋ ca yi ku borni, e ku yu' nje yě nyòr enɛ e kè'se. 30Jisòs à m ku riŋ enɛ ŋger mo' yi fʉʉ ye enje nyòr, a karsi nyor a laa enɛ̂, “À jòo nda wa bcɛ̀'?” 31Ŋgǎa yɛ'ni yì buu a laa nè ye enɛ̂, “Wɛ̌ yɛ àmbò ku' bèe a ce nyòrni enɛ̂, à bipshì wɛnɛ à jòo nda wɛ̀ lɛ a?” 32Geewa'a e m ku ce fyɛ' à ryɛ ŋwɛ̀ ce e jòo ye anà. 33Njeŋwɛ̀ anà à m rìŋ yuu ce yi m koni ye, a kɛ' a wɛp, a ce kàŋ, a vʉ a gwe njeptii Jisòs, a suŋ yì mini. 34E laa nè ye enɛ̂, “Muu wà, lo rbyemì li gèe wɛ̀ ke'sè. Dù nè rfʉtè-ŋwɛ̀, yò ŋgɛ' à mì.”
35E ka' bii ce làa, bèe mo' embe ndàp Jairòs a vʉ nè ntuu enɛ muu yì à lɛ kwe, e fa kèr fa lɛ Jisòs ŋgɛ' tɛ e vʉ à cicì ka'. 36Jisòs à ka' yu' yuu ce wowèe a ce làa, a laa nè Jairòs enɛ̂, “Fa wɛp ka', kù byemi nè mɛ̀.” 37E m byemi enɛ ŋwɛ̀ mò' du fa yǐ mbùu caa efa Pità ba Jɛ̂ms, ba Jǒn ce e m ba nfʉr Jɛms ka'. 38A ka' bà' à rla' ŋwɛ̌ ŋgòr anà, a yɛ bjep vi ba àfo, bèe a ce warse sê, a ce koosimnse. 39E niŋ mbe ndàp, a laa nè bèe anà enɛ̂, “Wèe ce warse ba kɛ, a ce koosimnse? Muu ca à kwe kwe ka'. E ce buumi buumi.” 40Bèe a vʉshì ye. E fʉshì wowèe wɛɛwɛ njepmbè, a lor tar muu ba ma muu, ba ŋgǎa yɛ'ni yì buu ce a wowèe a m ba, a wowèe a du mbe dì' ce muu anà à m nòŋ. 41E m koo ye à bò, a laa nè ye enɛ, “Tàlità, kumì,” ce mbùu efa gho yu enɛ̂, “Muunje, m ce laa nè wɛ̀, lò mbekì.” 42Muunje anà à ku lo mbekì a ce jɛ̀shi. E m ba bfè' ncòp-baa-à-rrʉ̀ʉ. Bèe a m bɛ̀ɛŋger sê. 43Jisòs à laa nè wowèe enɛ a fa suŋ ŋwɛ̀ mò' ka'. A ker laa nè wowèe enɛ a fa muu anà byee tɛ e ye.
Đang chọn:
Ñwaè' Maêk 5: LNT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Limbum New Testament © Bible Society of Cameroon, 2003.
