Solid Joys ShqipShembull

Jezusi i njeh delet e Tij

“Delet e mia e dëgjojnë zërin tim, dhe unë i njoh.” (Gjoni 10:27)

Jezusi i njeh të tijtë. Çfarë kuptimi ka kjo?

Gjoni 10:3 është një varg paralel që lidhet ngushtë me Gjoni 10:27. Atje thuhet: “Delet e dëgjojnë zërin e tij, dhe ai i thërret delet e tij me emër dhe i prin jashtë.”

Prandaj, kur Jezusi thotë: “Unë i njoh,” do të thotë se Ai i njeh ato me emër; domethënë, Ai i njeh thellë dhe individualisht. Ato nuk janë dele anonime mes tufës.

Gjoni 10:14-15 na siguron një ide tjetër: “Unë jam bariu i mirë, dhe i njoh të miat dhe njihem nga të miat, ashtu siç më njeh Ati mua dhe unë e njoh Atin.”

Ekziston një ngjashmëri reale mes mënyrës se si Jezusi e njeh Atin e Tij në qiell dhe mënyrës se si Ai i njeh delet e Tij. Jezusi e sheh veten në Atin dhe Ai e sheh veten në dishepujt e Tij.

Në njëfarë mase Jezusi dallon karakterin e tij në dishepujt e tij. Ai dallon vulën e tij mbi delet. Kjo i bën ato të dashura për të.

Jezusi është si bashkëshorti që pret bashkëshorten e tij në aeroport dhe sheh çdo person që zbret nga avioni. Kur ajo shfaqet, ai e njeh, ia dallon tiparet. Ai sheh në sytë e saj reflektimin e lumtur të dashurisë së tij. Ai gjen kënaqësi tek ajo dhe ajo është e vetmja që ai e përqafon.

Apostulli Pal e tha kështu: “Megjithatë themeli i fortë i Perëndisë qëndron i patundur, dhe ka këtë vulë: ‘Zoti i njeh të vetët’” (2 e Timoteut 2:19).

Vështirë se e mbitheksojmë privilegjin e jashtëzakonshëm që të njihemi personalisht, me dashuri dhe thellë nga Biri i Perëndisë. Kjo është një dhuratë e çmuar për të gjitha delet e Tij, dhe brenda saj gjejmë ndjenjë, bashkësi të thellë dhe personale, si dhe premtimin e jetës së përjetshme.