Solid Joys ShqipSample

Dy lloj kundërshtimesh ndaj Jezusit

Mbreti Herod, kur dëgjoi këto fjalë u shqetësua, dhe mbarë Jerusalemi bashkë me të. (Mateu 2:3)

Jezusi i shqetëson njerëzit që nuk duan ta adhurojnë Atë dhe sjell kundërshtim për ata që duan ta adhurojnë. Mund të mos jetë kjo pika kryesore në mendjen e Mateut, por është rrjedhoja e pashmangshme e shpalosjes së historisë.

Në këtë histori, ka dy lloj njerëzish, të cilët nuk duan ta adhurojnë Jezusin.

Lloji i parë janë ata që thjesht nuk bëjnë asgjë me Jezusin. Ai është askushi për ta. Ky grup përfaqësohet në fillim të jetës së Jezusit nga krerët e priftërinjve dhe skribët. Mateu 2:4 thotë: “Dhe, pasi i mblodhi të gjithë kryepriftërinjtë dhe skribët e popullit, (Herodi) u kërkoi ku duhet të lindte Krishti.” Kështu ata i treguan dhe kaq: pastaj iu kthyen punës si normalisht. Heshtja e plotë dhe mosveprimi i udhëheqësve është e habitshme, nën dritën e madhështisë së asaj që po ndodhte.

Vër re se Mateu 2:3 thotë: “Por mbreti Herod, kur dëgjoi këto fjalë u shqetësua, dhe mbarë Jerusalemi bashkë me të.” Me fjalë të tjera, po përhapeshin fjalë që dikush kish thënë se Mesia kishte lindur. Mosveprimi nga ana e kryepriftërinjve është tronditës: pse nuk shkuan me dijetarët? Ata nuk kanë interes. Ata nuk kanë pasion për ta gjetur Birin e Perëndisë dhe për ta adhuruar Atë.

Lloji i dytë i njerëzve, të cilët nuk duan ta adhurojnë Jezusin, janë ata që ndihen shumë të kërcënuar prej Tij. Në këtë histori, ky është Herodi. Ai është tepër i frikësuar–aq sa komploton, gënjen dhe pastaj kryen një gjenocid, thjesht për ta hequr qafe Jezusin.

Po kështu edhe sot, këto dy lloj kundërshtimesh do të ngrihen kundër Krishtit dhe adhuruesve të Tij: shpërfillja dhe armiqësia. Shpresoj vërtet që ti të mos jesh në ndonjërin prej këtyre grupeve.

Nëse je i krishterë, lejo që kjo Krishtlindje të jetë koha kur ti mediton mbi kuptimin dhe çmimin që ka adhurimi dhe ndjekja e Mesias.