Marko 13
13
Hesus ta anunsiá destrukshon di tèmpel
(Mateo 24:1-2; Lukas 21:5-6)
1Ora Hesus tabata sali for di tèmpel, un di su disipelnan a bis'É: ‘Maestro, mira e piedranan ei; mira e edifisionan ei!’ 2Hesus a kontestá: ‘Bo ta para mira e edifisionan grandi ei? Niun piedra lo no keda na su lugá; lo basha tur abou!’
E señalnan ku mester bini promé ku e fin yega
(Mateo 24:3-28; Lukas 21:7-24)
3Ora Hesus tabata sintá riba Seru di Oleifi, ku kara pa tèmpel i nan tabata nan so, Pedro, Hakobo, Huan i Andreas a puntr'É: 4‘Bisa nos: ki dia e kosnan akí lo sosodé? Na kua señal nos por mira ku tempu a yega pa tur e kosnan akí tuma lugá?’ 5Hesus a kuminsá splika nan: ‘Tene kuidou, no laga niun hende gaña boso. 6Hopi lo bin usa mi nòmber i bisa: “T'ami t'E!”, i nan lo gaña hopi hende. 7No bira sobresaltá ora boso tende di guera i rumor tokante guera; e kosnan akí mester sosodé, ma lo no ta e fin ainda. 8Nashon lo lanta kontra nashon, reino kontra reino; lo tin temblor na diferente lugá i lo tin temporada di mizeria di hamber.#13:8 hamber; otro manuskrito tin: hamber i lantamentu E kosnan akí lo ta kuminsamentu di dolónan di parto.
9Boso mes tene kuidou! Nan lo entregá boso den man di outoridatnan i bati boso den snoa. Boso lo mester aparesé dilanti di gobernante i dilanti di rei pa mi motibu, pa asina boso ta un testimonio pa nan. 10Pasobra promé ku e fin yega, mester prediká e bon notisia na tur nashon. 11Ora nan kohe boso prezu i hiba boso dilanti di tribunal, no preokupá boso di antemano kiko boso mester bisa; ora e momento yega, bisa numa loke boso haña pa bisa e ora ei. Pasobra no ta boso ta bisa nada e momento ei, ma ta Spiritu Santu!#Mateo 10:17-20; Lukas 12:11-12 12Ruman lo laga mata ruman. Tata lo hasi meskos ku nan yu. Yu lo rebeldiá kontra nan mayornan i laga mata nan. 13Tur hende lo odia boso pa mi motibu, ma esun ku perseverá te na final lo keda salbá!#Mateo 10:22
14Ora boso mira e “kos repugnante ku ta trese destrukshon”#Daniel 9:27; 11:31; 12:11; 1 Makabeonan 1:54; 6:7 poné kaminda e no mester ta (komprondé bon kiko esaki ke men, lesadó), habitantenan di Hudea, hui e ora ei bai den seru. 15Esun ku ta sintá riba su dak di kas, no pèrdè tempu baha bai kohe nada den kas. 16Esun ku ta den kunuku, no bira bèk bai kohe paña.#Lukas 17:31 17Ai di e muhénan na estado i di e mamanan ku tin yu na lechi den e dianan ei! 18Resa pidi Dios pa e huimentu no tuma lugá den wenter, tempu di friu, 19pasobra e mizeria grandi di e dianan ei lo ta mas ku mundu a yega di weta, for di e momento ku Dios a krea mundu#Daniel 12:1; Revelashon 7:14 te awor akí! Un mizeria grandi asina lo no bini hamas atrobe. 20Si Dios no a hasi e tempu ei mas kòrtiku ningun hende lo no a skapa, ma Dios a hasi e tempu mas kòrtiku pa motibu di esnan ku El a skohe.
21Anto ora un hende bisa boso: “Mira! Ata e Mesias aki!” òf: “Ata e Mesias aya,” no ker'é. 22Lo lanta hende ku ta pretendé di ta e Mesias i di ta profeta; nan lo mustra señal i nan lo hasi milager pa asina desviá, si ta posibel, asta e eskohidonan di Dios. 23Tene kuidou! Mi a konta boso tur kos di antemano!
Binida di e Yu di hende
(Mateo 24:29-31; Lukas 21:25-28)
24E dianan ei, despues di e gran mizeria,
skuridat lo tapa solo,#Isaías 13:10; Yoel 2:10,31; 3:15; Revelashon 6:12
i luna lo no bria mas,#Isaías 13:10; Ezekiel 32:7; Yoel 2:10; 3:15
25streanan lo kai for di shelu,#Isaías 34:14; Revelashon 6:13
i podernan selestial lo tambaliá.#Yoel 2:10
26E ora ei lo mira e Yu di hende bini riba nubia,#Daniel 7:13; Revelashon 1:7 ku gran poder i gloria. 27Lo E manda angel reuní su eskohidonan for di e kuater skinanan di mundu, for di un ekstremo di mundu te e otro ekstremo.
Siña di e palu di figo
(Mateo 24:32-35; Lukas 21:29-33)
28Siña lo siguiente di palu di figo. Ora su takinan bira moli i su blachinan kuminsá spreit, boso sa ku zomer ta na kaminda. 29Sa anto tambe, ku ora e kosnan akí ta pasando, ku e ta djis tras di porta. 30Mi ta sigurá boso: E kosnan akí lo pasa promé ku e generashon akí pasa bai. 31Shelu i tera lo pasa bai, ma mi palabranan sí lo no pasa bai!
Niun hende no sa e dia ni e ora
(Mateo 24:36-44)
32Niun hende no sa ki dia ta e dia òf ki ora ta e ora, ni angelnan den shelu ni e Yu di hende no sa; Dios Tata so sa esei.#Mateo 24:36 33Tene kuidou, sea alerta! Pasobra boso no sa ki dia e ora lo yega. 34E kos akí ta manera e kaso di un hòmber ku ta bai di biahe laga su kas. E ta laga tur kos den man di su kriánan, ta duna kada un su enkargo i ordená su pòrtir pa keda alerta.#Lukas 12:36-38 35Sea alerta antó, pasobra boso no sa ki ora e doño di kas ta yega. E por yega anochi òf meianochi, mardugá òf mainta trempan. 36Si e doño mester bini diripiente, sòru pa e no haña boso drumí. 37Loke Mi ta bisa boso, Mi ta bisa tur hende: Sea alerta!’
ទើបបានជ្រើសរើសហើយ៖
Marko 13: PBDC13
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Papiamentu Bible with DC © Bible Society in Netherlands Antilles and Aruba, 2012, 2013