Markuse 9
9
Kristusib ânanausijauninganik. Illisimailingajub âᴋiktauninganik. Aniaminik makinerminiglo Jêsusib nelautaininganik. Oᴋâlaninganik piojorijuinermik sinaungajutiksaujuniglo.
1Oᴋautivaillo: Ahamarik, oᴋautivapse, nangertut ovane illangita toᴋo ôngniangilât, Gûdib nâlegauvinganik pitsartovlune tikitomik takoᴋâratik.
2Uvlut pingasujortut kingorngatigut Jêsusib Pêtruselo, Jakôbuselo, Jôhanneselo ingminut pitipait, ingmigolivlugillo ᴋaᴋᴋamut ᴋingiktomut majorarᴋatautipait, ânanausivlunelo sângane.
3Annorângillo ᴋaumaridlarlutik ᴋaᴋᴋorsidlarput aputitut (ᴋaᴋorsaijut nunamêtut taimak ᴋaᴋortigijomik piniarlutik saperput).
4Elîaselo Môseselo saᴋᴋerpik tâpkonunga, Jêsuselo oᴋaᴋatigivâk.
5Petruselo Jesusemut oᴋarpoᴋ: Rabbi (ajoᴋertuijoᴋ), tamânêtsainarominarpoᴋ; pingasunik igloliolerta, ilingnut atautsemik, Môsesemullo atautsemik Elîasemullo atautsemik.
6Oᴋautsinele ᴋaujimangilait, ᴋoaᴋsâramik.
7Nuvujarlo ᴋaivoᴋ uliklugillo. Nippelo nuvujamit tussartauvoᴋ, oᴋarlune: Tagva Ernera nagliktara, tâmna nâlegaksarivase.
8Tagvainarlo, avatimingnut takosaramik, inuksingilat, Jêsuse kissiat takovât.
9Kaᴋᴋamille atersâramik, Jêsusib inerterpait, takojamingnik oᴋautjerᴋonagit kimullônêt, Inûb Erninga toᴋungajunit makeᴋârtinago.
10Oᴋauseᴋ tamanna ilumigivât ingmingnullo apersûtivlutik: Kanoᴋ tagva toᴋungajunit makinêᴋ?
11Apersulerpâllo oᴋarlutik: Sôᴋ aglangnik illisimajut oᴋarᴋât: Elîase tikerᴋârtuksauvôᴋ?
12Kiovaillo oᴋautivlugit: Ahaila, Elîase tikerᴋartuksaugalloarpoᴋ, tamaitalo idluarsitilugit; taimaktauᴋ Inûb Erninga angijomik kappiasuktitaujariaᴋarpoᴋ nachogijaulunelo, sorlo aglaksimangmat.
13Oᴋaupapsele: Elîase tikitsarêrpoᴋ, issumamingnullo piniarvigilauᴋpât, sorlo taimna pivlugo aglaksimangmat.
14Illiniartinelo tikinamigit, inugasaksuit takovait, aglangniglo illisimajut ilumavait apersorniktut taipkoninga.
15Tagvainarlo inuit ilûnatik takogamitsuk, kakkilâdlarput, aivigivlugolo salutipât.
16Aglangniglo illisimajut aperivait: Kanoᴋ tâpkoninga apersornikisê?
17Inugasaksuit illangata kiovlune oᴋautivâ: Ajoᴋertuijoᴋ, ernera tamaunga âpara ilingnut, anerneᴋartoᴋ oᴋajuitomik.
18Tâpsoma tigulerangamiuk aulajârtidlarpâ, ᴋapoalidlalerporlo, nêrᴋolâlarmelo tijilerpoᴋ. Illiniartitit oᴋaᴋatigilauᴋpakka anititaukovlugo, ajorpâlle.
19Kiovâle oᴋarlune: Tata! ukkua okpingitut kinguvângoᴋatigêt, ᴋanoᴋ sivitutigijomik najoriaᴋarpapsê? ᴋanorlo sivitutigijomik ᴋenuevigijariaᴋarpapsê? Kaisiuk uvamnut.
20Apâllo tâpsomunga. Tagvainarlo anernerub oᴋajuitub takogamiuk, aulajârtidlarpâ, nunamullo ochovoᴋ aksakâlarmelo ᴋapoalidlalilarmelo.
21Jêsusiblo atâtanga aperivâ: Kanga taimailerᴋâ? Oᴋarpoᴋ: Nutaraunerminit.
22Unuktuniglo ochotipâ ikomamullo imermullo toᴋonasuarlugo. Sapingikuville, nâpkigilertigut ikajorlutalo.
23Jêsusible oᴋautivâ; Okperungnaruvit; okpertomut ajornartoᴋangilaᴋ sumik.
24Tagvainaᴋ sorutsib atâtanga niplialerpoᴋ ᴋugviordlune oᴋarlunelo: Okperpunga, nagliktoᴋ Nâlegaᴋ, okpinginimnit piulinga.
25Jêsusele takogame, inuit ᴋaijalermatta, anerneᴋ ivjornartoᴋ inerterpâ, oᴋautivlugo: Oᴋajuitoᴋ tussângitorlo anerneᴋ perᴋovagit, anît ômangat, kingornganelo iterungnairlutit ômunga.
26Niplialerpoᴋ tâva, aulajârtidlarmilâllo anivoᴋ. Inuglo tâmna toᴋojotun-ipoᴋ, unuktullo toᴋojoᴋ oᴋautigivât.
27Jêsusible aggangitigut tiguvâ, makitilâllo: makiporlo tâva.
28Iglomullo pingmat, illiniartingita ingmikôrlutik apersorpât: Sôᴋ uvagut anititsungnangilavût?
29Kiovorlo: (Anernerit) taimaitut anititaujungnangilat, kissiane tuksiarnermut nerritailinermullo.
30Tagvangallo aularamik, Galilêa apᴋotigivât, tamattomingale inuit ᴋaujimaᴋojomangilait.
31Illiniartine ajoᴋertorlugit oᴋautivait: Inûb Erninga pititaujomârpoᴋ inuit agganginut, toᴋotsomârpâllo; toᴋotaukpalle, uvluk pingajuangne makitsomârivoᴋ.
32Oᴋautsille ukkua tukkisingilait, apersorlugolo ileragivât.
33Kapernaumullo pigivoᴋ. Iglomêdlunelo aperivait: Sumik apᴋome oᴋaᴋatigêlauᴋisê?
34Niplingilalle. Ingergarlutik ingmingnut oᴋalauramik, nelitik anginerongmangât.
35Ingidlunelo 12 it ᴋaiᴋovait, oᴋautivlugit: Illase sivorliojomajoᴋ kingorliojomârpoᴋ, ilûnatiglo kivgarijomârpât.
36Nutaᴋamik tâva tigusivoᴋ, akornganullo pitipâ erᴋilugolo, oᴋautivaillo:
37Taimaitomik nutaᴋamik illaliortub attimne illaliorivânga, uvamniglo illaliortub, kissima illaliungilânga, uvamnigle tiliklertoᴋ illaliorivâ.
38Jôhannesible oᴋautivâ oᴋarlune: Ajoᴋertuijoᴋ, angutemik takolauᴋpogut atterne Sâtanasinik anititsijomik maligatalo; malingimatigullo, tamanna pivlugo inertilauᴋpavut.
39Jêsusele oᴋarpoᴋ: Inerteraksaringilase. Tatamnartitsijoᴋangilaᴋ attimne, oᴋarnerlûtigisarailungalo pijomik.
40Uvaptingnik akkerartungitub illagivâtigut.
41Ilipsingnigle imertitsijoᴋ imermik, ermgusiarsub imanganik, attimne, Kristusib pigingmase, ahamarik, oᴋautivapse, akkêngaivioniangilaᴋ.
42Uvamnullo okpertut ukkuararsuit illanganik sinaungatitsijomut idluarnersauvoᴋ, serᴋalitsiviub ujaraktanganik ᴋungasingagut nivingaiviogune, egitauvlunelo imarbingmut.
43Aggakpîlle sinaungatikpatit, nakakit. Ilingnut ajunginersauvoᴋ, illakungorlutit inôtsemut iteruvit, maggûngnik aggaᴋarnernit, âniatitsivingmullo ikomamut ᴋamitsuitomut egitaunernit;
44Taingane ᴋuglugiangat toᴋoniangilaᴋ, ikomangallo ᴋaminiangilaᴋ.
45Itikavîllo sinaungatikpatit, nakakit. Ilingnut ajunginersauvoᴋ, tussiaklutit inôtsemut iteruvit, iglugêngnik itigaᴋarnernit, âniatitsivingmullo ikomamut ᴋamisuitomut egitaunernit.
46Taingane ᴋuglugiangat toᴋoniangilaᴋ, ikomangallo ᴋaminiangilaᴋ.
47Ijivîllo sinaungatikpatit, pêruk egidlugolo. Ilingnut ajunginersauvoᴋ, igluinarmik ijeᴋarlutit Gûdib nâlegauvinganut iteruvit, maggûngnik ijeᴋarnernit, âniatitsiviublo ikomanganut egitaunernit.
48Taingane ᴋuglugiangat toᴋoniangilaᴋ, ikomangallo ᴋaminianginivoᴋ.
49Ilûnatik ikomamut tarrêrtitaujariaᴋarput, tunergutiksallo ilûnatik sioraujamut tarrêrtitauvut.
50Sioraujaᴋ ajungidlarpoᴋ; sioraujarle tarriornitsungnairpat, sumût tarriornitinajarpisiûk? Ilipsingne sioraujaᴋaleritse, ullapirsauteᴋaᴋatigêkluselo ilipsingnut.
ទើបបានជ្រើសរើសហើយ៖
Markuse 9: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.