Markuse 8
8
4,000 it tatamnartomik nerrititauninginik. Farisêerit nelunaikutamik tautugomaninginik. Farisêerit pudjusautinganik. Tautungitub âᴋiktauninganik. Kigligiutjinermik Kristusemik.
1Uvlune tamakonane inuit nerᴋiksaᴋangitut unuktut tagvanêngmatta, Jêsusib illiniartine ingminut ᴋaiᴋovait, oᴋautivlugit:
2Inuit ukkua ilapsugidlarpakka nerᴋiksaᴋaratik uvlunik pingasunik uvamnêngmatta;
3Nerritinagit aulartikupkit, perlidlarajarmatta angergarlutik apᴋome. Illangit ᴋaningitomit pingmatta.
4Illiniartingita kiovât: Nakit ᴋaᴋᴋôjaᴋsiniarpitâ tamâne inuᴋangitome, ukkua kâgungnairutiksanginîk?
5Apersorpaillo: Kapsinik ᴋaᴋᴋôjaᴋarᴋisê? Kiovât: 7 nik.
6Inugasaksuillo ikterᴋovait nunamut. Kaᴋᴋôjallo ukkua 7 it tiguvait, Kujalivlunelo avgorpait, illiniartiminut tunivlugit, inungnut ukkoninga manijerᴋovlugit; inungnullo tagva manivait.
7Mingeritjaniktauᴋ ikitunik peᴋarivut; tâpkoa pivlugit ᴋujaligivok, manijauᴋongmivlugillo.
8Nerrivut tagva, kâgungnairlutiglo, amiakullo katilerpait, amârgaujat 7 it tattadlugit.
9Nerrilauᴋtullo 4,000 iovut; aularᴋolerpaillo tâva.
10Tuavidlunelo illiniartine illagilugit umiarmut ikivoᴋ, Dalmanutablo erᴋânut pivlune.
11Farisêerillo anilutik apersûteᴋatigigiarlugolo ôktorlugolo, takotitserᴋojomavâllo nelunaikutamik ᴋilangmit.
12Anernermigullo anersaumivlune oᴋarpoᴋ: Kinguvângoᴋatigêt ukkua sôᴋ nelunaikutamik takojomavât? Ahamarik oᴋautivapse: Kinguvângoᴋatigêt ukkua nelunaikutamik tunitjivioniatsangilat.
13Tâva ᴋemakpait, umiarmullo ama ikivoᴋ, ikârdlunelo utimut.
14Kaᴋᴋôjamiglo neksarlutik puigulauᴋput, umiarmelo atusênarmik ᴋaᴋᴋôjaᴋarput.
15Perᴋovaillo oᴋarlune: Nâlagitse, udsertorluselo Farisêerit pudjusautinganik, Herôdesiblo pudjusautinganik.
16Issumertorpâllo, ingmingnut oᴋarlutik: Taimak pivâtigut, ᴋaᴋᴋôjamik neksalaunginapta.
17Jêsusiblo tamanna tukkisigamiuk, oᴋautivait: Sôᴋ ᴋaᴋᴋôjaᴋanginise siaklerutigivisiûk? sulle tukkisingilase silatusinaselô? sullelo mangaitunik ômateᴋarᴋisê?
18Ijeᴋarluse takolungilasê, siuteᴋarluse tussangilasê, erᴋainaselônêt ipsomingâ?
19Kaᴋᴋôjat tellimat avgorapkit inugasaksoarnut 5,000 inut, amârgaujat ᴋapsit amiakovinernik tattalauᴋpisigîk torᴋorlugillô? Kiovât: 12 it.
20Kaᴋᴋôjallo 7 it avgorapkit inugasaksoarnut 4,000 inut, amârgaujat ᴋapsit amiakovinernik tattalauᴋpisigîk torᴋorlugillô? Kiovât: 7 it.
21Tagva oᴋautivait: Sôᴋ tukkisingilasê?
22Betsaidamullo pivoᴋ. Atsivullo tautungitomik tâpsomunga, aktortauᴋovlugolo tuksiarvigivât.
23Tautungitorlo aggangitigut tiguvâ, tessiorlugolo iglugasait silatânut, ijîgiglo ᴋetserarlugik, aggangminullo aktorlugo aperivâ: Sumîk takovêt?
24Uidlunelo oᴋarpoᴋ: Inuit pisuktut takovakka sorlo napârtut.
25Ijîgiglo ama aktorivak aggangminut, amalo takoᴋomilugo; âᴋiktaulerporlo tâva, tamaita tautugungnalerdlugit.
26Angerarᴋovâlo oᴋarlune: Iglugasangnut iterniarnak, iglugasangmiuniglônêt taimak oᴋautjiniarnak.
27Jêsuselo aularpoᴋ illiniartingillo, iglugasangnut Zesarêab Filippusib iglugasaksoangita erᴋanêtunut. Ingergarlutiglo illiniartine aperivait oᴋarlune: Inuit kinaunasugivângâ?
28Kiovât: Illangita Johaneseonasugivâtit baptiterijoᴋ; illangitale Elîaseonasugivâtit; ama illangita nelautaijullônêt illangat.
29Oᴋautivaillo: Ilipsele kinaunasugivisingâ? Pêtrusib kiovâ oᴋarlune: Kristuseovotit.
30Inerterpaillo unipkângojomanane inungnut.
31Ajoᴋertulerpaillo: Inûb Erninga âniatitaujariaᴋarpoᴋ angijomik, ajaktortaujariaᴋarlunelo angajoᴋânut ajoᴋertuijoᴋsoarnullo, aglangniglo illisimajunut, toᴋotaulunelo, uvluglo pingajuangne makitsomârivoᴋ.
32Angigunagillo tamattominga oᴋarpoᴋ. Pêtrusiblo ingminut pitipâ, inerterlugo taimailerᴋonago.
33Keviardlunele illiniartine takunârpait, Pêtruselo inerterpâ oᴋarlune: Tunumnut pît, Sâtanase; Gûdib pingit issumaginginangne, inuit pingit kissêta.
34Inuillo illiniartinelo ᴋaiᴋovait ingminut, oᴋautivlugit: Uvamnik maligomajoᴋ issumaminik piniarane, seningajoliksaminik (kappiasûtiksaminiglônêt) nangmarle maliklungalo.
35Inôserminik ivlersijub assiojijomârpâ; inôserminigle assiojijub pivlunga oᴋautsillo tussarnertut pivlugit assiojiniangilâ.
36Inûb suksarivaûk, silaᴋsoaᴋ ilûnât piksarsiarigalloaruniuk, tarniga asserorpât?
37Ubvalo sumîk inuk tunijijungnarᴋâ tarnime satûtiksanganîk?
38Uvamnigle oᴋautsimniglo kangusuktoᴋ kinguvângoᴋatigêne tâpkonane assiniartune ajortulijunelo, tâmna Inûb Erningatatauᴋ kangugijomârpâ, tikikune atâtame ânanauningane, Engelit hailigit illagilugit.
ទើបបានជ្រើសរើសហើយ៖
Markuse 8: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.