Mattêuse 27
27
Kristûsib pititauninganik Pilâtusemut. Judasib ingminik inuarninganik. Jêsusib kiglisiniartauninganik Pilâtusemut Herôdesemullo. Toᴋotaksaunerartauninganik. Kikiaktortauninganik iluvertauninganiglo.
1ᴋaulermalle ajoᴋertuijoksuit inuillo angajoᴋângit ᴋaggimiolerput Jêsuse pivlugo toᴋotsomavlugo.
2ᴋelaksorlugolo aularutivât, atanerusermullo Pontiuse Pilâtusemut unertujutigivât.
3Jûdasib pititingata tamanna takogamiuk, toᴋomut perᴋungmatsuk: ᴋaᴋialerpok, kênaujallo ipkoa 30 it utertipait ajoᴋertuijoksoarnut angajoᴋânullo.
4Oᴋarlunalo: Idluitulilaukpunga, auk pasijaksaungitok pitinapko.
5Oᴋarput: Tamanna pingilavut, igvit pivat. Kênaujallo ipkoa Gûdib iglunganut egipait, aularporlo ᴋimitsartorlune.
6Ajoᴋertuijoksuille kênaujat tiguvait, oᴋarlutiglo: Idluangilak, ukkua ilivlugit Gûdib iklervinganut, aungmik akkeᴋalaungmatta.
7Kaggimiolerpulle, machaliortublo perorsêvinganik pisivut kênaujanut tâpkonunga, tujormitjat iluverviksanganik.
8Tamanna pivlugo perorsêvik tâmna taijauvok perorsêvingmik auktalingmik, uvlome tikidlugo.
9Tagva nalautaijub Jeremîasib oᴋausingit nalautsivut, oᴋarmat: Kênaujat 30 it tigulaukpait, pisiangojub akkinga, Israêlib ᴋitornganginit pisiarilauktangata;
10Akkiliutigivlugillo machaliortub perorsêvinganut, sorlo Nâlekab oᴋarᴋongmanga.
11Jêsusele atanerusiub sângane nangerpok. Atanerusiublo aperivâ oᴋautivlugolo: Jûdit atanerivâtît? Jêsusible kiovâ: Oᴋartotit.
12Ajoᴋertuijoksuillo angajoᴋâllo pasidlarmatsuk, kiungilak sumiglônet.
13Tagva Pilâtusib oᴋautivâ: Tussangilatît, angijomik pasidlarmatît?
14Kiungilâle oᴋautsemut atautsemullônêt, ataneruserlotauk tataminiadlarpok.
15Aularviksiorangatale, atanerusek iluseᴋarpok, parngnanairsimavingmêtut ilangat, inuit pijomajangat, aularᴋolugo.
16Taipsomanele assinginit uivêluartomik parngnanairsimavingmêtoᴋarpok, Barrabasemik atilingmik.
17Katimangmattalo, Pilâtusib oᴋautivait: Kina uvamnut aulartitaukovisiûk? Barrabaselônêt Jêsuselônêt. Kristûsemik taijak?
18Nalunginamigit, idluigosungnermut tagvunga pitilaungmatsuk.
19Kiglisiniarviublo iksivautangane iksivalertilugo, nuliangata oᴋautjaujartorᴋovâ: Idluartok una allaruk; unnuak sinnaktomavlunga tâmna pivlugo angijomik ikpigilaukpunga.
20Ajoᴋertuijoksuille angajoᴋâllo tiliorpait, Barrabasemik ᴋenungârᴋovlugit, Jêsusele Toᴋotauᴋovlugo.
21Tagva atanerusiub kiovlunalo oᴋautivait: ukkua maggûk neliangnik aulartitserᴋovisingâ? Oᴋarput: Barrabasemik.
22Pilâtusib oᴋautivait: ᴋanok Jêsuse pijaksarivigô, Kristûsemik taijâk? Ilûnatik oᴋarput: Kikiaktortaule saningajolingmut.
23Ataneruserle oᴋarpok: Sumîgle idluitulilauᴋâ? Niplialualerpulle oᴋarlutiglo: Kikiaktortaule!
24Pilâtusele takogame sulinginerminik, uivêlivalliatuinarmattale, imermik tigusivok, agganalo ubvarpait inuit takoane, oᴋarlunalo: Pasijaksaungilanga idluartub tâpsoma aunganut; ilipse pijase.
25Tagva inugasaksuit ilûnatik kiovât oᴋarlutiglo: Aunga uvaptingnut pilerle ᴋitorngaptingnullo.
26Barrabase tagva aulartipâ tâpkonunga; Jêsusele aklunânut isaᴋajauᴋovâ, unertujutigilâllo, kikiaktortaukovlugo.
27Tagva atanerusiub sorsuktuksangita Jêsuse âpât iglomut kiglisiniarvingmut, sorsuktuksallo ilûnaita tagvunga atautsemut ᴋaiᴋovait.
28Annorairtipâllo, uliksoarmiglo aupaluktamik kapitipât.
29Niaᴋôtiksamiglo nuvutsiariktunik kakilautilingmik pergaivut, niaᴋoanullo ilivlugo, suvlulingmiglo ajaupiserpât aggangitigut talerpingitigut, sêrᴋortorvigivlugolo mitautigivât oᴋarlutiglo: Salutitaulerit, Jûdit ataningat!
30Ketserarpâllo, ajaupiarlo suvlulik tiguvât, tâpsomungalo niaᴋoa annaulerpât.
31Mitautigijarêramitsuglo, uliksoak tâpsomangat pêrpât, annorânginik nangmininginik atitidlugo, aularutivâllo, kikiaktorniardlugo.
32Anileramiglo, inuk naipipât Zirênemiok, Sîmonemik atilik; tâmna aksorôtivât, kikiaktortauviksanganik erᴋsuktidlugo.
33Tagvungalo, Golgatamik (imaipok: naiᴋovinertalingmik) atilingmut, tikinamik,
34Kasilinartomik, sungarmik akusimajomik, imertinasuarpât; tamannalo ôᴋamauk, imeromangilâ.
35Kikiaktorêramitsugle, annorângit avikpait, imerautigivlugillo; aglait nalautsilerᴋovlugit, oᴋautaumajut nalautaijomut: Annorâkka ingmingnut avikpait, uliksoaralo imerautigivât.
36Tagvanalo iksivalerdlutik udsertorpât.
37Niaᴋungatalo ᴋolânut toᴋungata pitjutânik aglaksimajomik nipititsivut, imaitunik: Tâmna Jêsuseovok, Jûdit ataningat.
38Illagivlugolo inuartuk kikiaktorpakit, aipanga talerpiata tungânut, aipâle saumiata tungânut.
39Tagvûnale arvertartut mitautigivât ileᴋetamârlutiglo.
40Oᴋarlutiglo: Gûdib iglunganik asseroijotit, ama sanavlugo uvlune pingasune, ilingnik piulidlarit! Gûdib ernerikpatit, saningajolingmit akᴋarit!
41Taimâktauk ajoᴋertuijoksuit, aglangniglo ilisimajut, angajoᴋâllo mitautigivât, oᴋarlutiglo:
42Assiminik ikajulaukpok, ingminigle ikajorungnangilak. Israêlitit atanerikpatsuk, saningajolingmit mâna akᴋarle, tagva okperijomavavut.
43Gûde tatigingmago, tâpsoma piuliliuk mâna, ᴋuviagiguniuk. Oᴋalaungmat: Gûdib Ernerivânga.
44Inuartuktauk kikiaktortaumaᴋatîᴋita taimâk mitautigivâk.
45Stundillo 6 inganit nuname ilûnâne tâᴋtoksôlerpok, stundit 9 ingat tikidlugo.
46Stundillo 9 ingane Jêsuse nipperᴋortovlune oᴋarpok: Eli, Eli lama asabtani! Imaipok: Gûdiga, Gûdiga, sôk ᴋemakpingâ?
47Ilangitale, tagvane nangertut, tamanna tussaramitsuk, oᴋarput: Elîase ᴋaiᴋovâ.
48Erinesuklunalo taipkoa ilangat aᴋpangerpok, niperᴋumiglo tigusivok; ᴋasilinartomullo misuklugo, ajaupiamut kapomitarpâ, imertilâllo.
49Assingille oᴋarput: ovatsiaro, takunârta, Elîasib piulijartormangâgo!
50Jêsusele ama nipperᴋortovlune pivok, anernangerdlunalo.
51Ahâglo, tagva katimaviksûb upkoᴋsoanga alikpok maggolivlune, pikangat ununga tikidlune.
52Nunalo sajukpilâdlarpok, ᴋairtullo ᴋopludlarput, iluvîllo angmarterput, unuktullo siniktut (toᴋungajut) timingit makiput.
53Iluvernillo anivut (Jêsusib) makiningata kingorngagut, iglugasaksoarnullo ivjornaitunut pivut, sakᴋerlutiglo unuktunut.
54Sorsuktuksalle angajoᴋângata ilangitalo, Jêsusemik udjertortut, nuna sajukpilâdlartok takogamitsuk, tatamnartullo assingit, kakilângadlalerput, oᴋarlutiglo: Âhamarik, Gûdib tâmna Ernerivâ!
55Tagvanalo Arnaᴋarivok unuktunik, Jêsusemik maliksimajunik Galilêamit, kivgartulauktunik tâpsominga, alivasiktomit takunârtunik.
56Tâpkoa ilangat tagva Marîa Magdalena, Marîalo, Jâkob Josesiblo anânangak, Zebedeûsiblo ernîkita anânangak.
57Unnulermalle angut akluitok tikipok Arimatîamit, Jôsefemik atilik; tâmnatauk Jêsusib ilinniartigivâ.
58Tâpsoma Pilâtusemut aivlune, Jêsusib timinganik tuksiarvigivâ. Tagva Pilâtusib tunijauᴋovâ tâpsomunga.
59Jôsefiblo Jêsusib timinga tiguvâ, uvineruksajamik sutjôngitomik imuserdlugo.
60Iluverᴋotiminullo nutâmut ilivâ, ᴋairtomut sanajauᴋolauktaminut; ujaraksoarmiglo aksaᴋârtitsilune iluviub pânganut, aularpok.
61Marîale Magdalêna, Marîalo tâpsoma assia tagvanêtuk, iluvek sângavlugo iksivavuk.
62Uvluble opalungaijarviub tugliane ajoᴋertuijoksuit Farisêerillo ilûnatik Pilâtusemut tikiput,
63Oᴋarlutiglo: Atanek, erᴋaivogut, uivêtok imna oᴋalaungmat sulle inôvlune: Uvluk pingajuangne makilârpunga.
64Tamanna pivlugo iluvinga udjertortaukoleruk, uvluk pingajuak tikidlugo, ilinniartiminut tigliktaukonago, oᴋarᴋonagillo inungnut toᴋungajunit makisimajomik; uivêriklernek kingorlerpâk ajornersauᴋonago sivorlermit.
65Pilâtusib oᴋautivait: Udjertortuksaᴋarpose tagva; ainiaritse, issumapsingnik udjertortauᴋolersiuk.
66Ailerput, iluverlo udjertortauᴋovât udjertortunut, ujaraᴋsoarlo nalunaikuserdlugo.
ទើបបានជ្រើសរើសហើយ៖
Mattêuse 27: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.
