Hesekiel 46
46
1Imak oᴋarpoᴋ Nâlegaᴋ Nâlegaujoᴋ: Avaluliorsimajub ilulliub itertarvinga ununga sângajoᴋ parngnanairsimajuksauvoᴋ uvlut 6 suliaᴋarviosût nâvlugit; sabbatemele upkoêraksauvoᴋ, taᴋᴋêlablo uvlungane upkoêraksauvoᴋ.
2Angajoᴋâᴋsoarlo itertuksauvoᴋ silatânit itertarviub torᴋsukatângagut, nangertuksauvlunelo itertarviub iglernaujangane, ajoᴋertuijullo atuineruterijuksauvut tunergutiksanganik ôtaksamik tunergutiksanginiglo ulapᴋosertaujutiksanik; tâmnale tuksiartuksauvoᴋ itertarviub iglernaujangane, anijuksauvorlo tagva; itertarvigle upkoartaujuksaungilaᴋ unnuᴋârtinago.
3Inuillo tuksiartuksauvut itertarviub upkoangane Nâlekab sângane sabbatinelo taᴋᴋêlarnelo.
4Tunergutiksarlo ôtaksaᴋ angajoᴋâᴋsub tunergutiksarijanga Nâlekamut sabbatine imaiput: saugâranik 6nik ᴋanoetoᴋangitunik sauᴋamiglo parngnermik ᴋanoetoᴋangitomik;
5Tunergutiksarlo nerᴋiksaᴋ imaituksauvoᴋ: êfamik atausermik saugarmut parngnermut, saugârangnullo tunijungnartanga maliklugo, orᴋsumiglo hinemik êfamut atausermut.
6Taᴋᴋêlablo uvlungane tunitjijuksauvoᴋ tuktuvangmik angusalormik ᴋanoetoᴋangitomik, saugârangniglo 6nik, saugarmiglo parngnermik; tâpkoatauᴋ ᴋanoetoᴋartuksaungilat;
7Atuinaruterijuksauvorlo tunergutiksamik nerᴋiksamik êfamik tuktuvangmut, êfamiglo saugarmut parngnermut, saugârsungnullo pijungnartanga maliklugo, orᴋsumiglo hinemik êfamut atausermut.
8Angajoᴋâᴋsoarlo iterangat itertuksauvoᴋ itertarviub torᴋsukatângagut, tamaunatsainarlo anijuksaugivoᴋ,
9Nunable inungit Nâlekab sânganôrpatta uvloᴋsiorvioᴋojaujune, itertoᴋ itertarvikut taggardlerkut tuksiariartorlune anijuksauvoᴋ itertarvikut seᴋinerdlerkut, itertorlo itertarvikut seᴋinerdlerkut anijuksauvoᴋ itertarvikut taggardlerkut; utertuksaungilaᴋ itertarvingmut itervigijaminut, sivumuatsainarlunele anijuksauvoᴋ.
10Angajoᴋâᴋsoarlo iterune, tâpkoa akornganêdlune itertuksauvoᴋ, aniguniglo aniᴋatigijaksarivait.
11Uvloᴋsiorvingnelo uvloᴋsiorviksoarnelo tunergutiksaᴋ nerᴋiksaᴋ imaituksauvoᴋ: êfamik tuktuvangmut, êfamiglo saugarmut parngnermut, saugârsungnullo pijungnartanga maliklugo, orᴋsumiglo hinemik êfamut atausermut.
12Angajoᴋâᴋsoarlo tunergumik ôtaksamik tunergumiglônêt ulapᴋosertaujutiksamik kajungernerminit tunitjijomagune Nâlekamut, upkoêrutjaujuksauvoᴋ itertarvingmik ununga sângajomik, tunergullo ôtaksaᴋ tunergullo ulapᴋosertaujutiksaᴋ atuinarutitaksarivâ sorlo sabbatine pivangmat; anijuksauvorlo tagva; anigêrpallo itertarvik parngnanairsortaujuksauvoᴋ.
13Kaut tamât saugârsungmik jârelingmik atautsimik ᴋanoetoᴋangitomik atuinaruterijuksauvotit tunergutiksamik ôtaksamik Nâlekamut; uvlât tamât tamanna pigiaraksarivat.
14Uvlâllo tamât tâpsomunga ilautitsijuksauvotit tunergutiksamik nerᴋiksamik, tagva êfab pingasôjortolimajub pingasôjortoanik, ilaᴋartilugo orᴋsumik hinib pingasôlimajub pingajuanik, senaugatsiab akkûtiksanganik; tamanna tunergut nerᴋiksaᴋ Nâlekamut sorairtuksaungitoᴋ perᴋojaᴋ soᴋosingitoᴋ maliklugo.
15Taimak saugârsuk, tunergullo nerᴋiksaᴋ, orᴋsorlo atuinarutitaksarivât uvlât tamât, tunergutiksauᴋovlugo ôtaksamik sorailungitomik.
16Imâk oᴋarpoᴋ Nâlegaᴋ Nâlegaujoᴋ: Angajoᴋâᴋsub ernerme ilangit pilitsivigikpagit piliunik, tamakkoa kingormgutivait, erningita piksarivait; kingormgujijôvlutik perᴋutigivait.
17Kingormgutijamele ilanga tunikpago kivgame ilanganut, tâpsoma pigijaksarivâ jâre kivgaujungnaiviksaᴋ tikidlugo; taipsomanele utertuksauvoᴋ angajoᴋâᴋsoarmut; tâpsoma kingormgutijanga erningita kissimik perᴋutigijaksarivait.
18Angajoᴋâᴋsoarlo inuit kingormgutijanginit tigusijuksaungilaᴋ, pigijanginik aᴋsârlugit; ernine tunitjivigijaksarivait kingormgutijaksanik perᴋutiminit; inuᴋotikka siamarᴋonagit perᴋutimingnit.
19Tikiutivânga tagva itervingmut itertarviub senianêtomut, ajoᴋertuijut igloarsunginut ivsornaitunut, avunga sângajunut; ahâglo, iniksaᴋarpoᴋ tunuane.
20Oᴋautivângalo: Iniksaᴋ tamanna tagva ajoᴋertuijut igavigijaksarijangat tunergutiksamik pasijaksairutiksamik tunergutiksamiglo ajortoêrutiksamik, igavigijaksarijangat tunergutiksamik nerᴋiksamik; âtsijariaᴋarᴋonagit tâpkoninga avaluliorsimajomut silardlermut, inuit ivsornaititauᴋonagit.
21Tikiutilerivânga ama avaluliorsimajomut silardlermut, ingerartilungalo avaluliorsimajub terreᴋunginut sitamanut, ahâglo, avaluliorsimajub terreᴋungine tamaine avaluliorsimajoᴋarivoᴋ.
22Avaluliorsimajub terreᴋungine sitamane attajunik avaluliorsimajoᴋarpoᴋ, talertut 40tut tukimut, talertullo 30tut senimut: tâpkoa sitamat terreᴋunêtut adsigêktomik ôktûteᴋarput.
23Tâpkoalo avatingine senasimajoᴋarpoᴋ, tâpkoa sitamat avatingine, senasimajullo atâne avatâne igaviksat senamavut.
24Oᴋautivângalo tagva: Tamadja igavit, kivgartortut iglome igavigijaksarijangit inuit tunergutinginik.
ទើបបានជ្រើសរើសហើយ៖
Hesekiel 46: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.