Hesekiel 47
47
1Utertilerivanga ama iglub upkoanganut, ahâglo, imeᴋ iglub iglernaujangata atânit puilavoᴋ ununga kitânut, iglo ununga sangmimat, imerlo kôkpoᴋ kanunga iglub senerangata talerpiub atânit, tunerguserviub seᴋerngane.
2Anitipângalo itertarvikut taggardlerkut, tesiorpângalo avatâgut silatâgut itertarvingmut silardlermut, itertarvingmut ununga sângajomut; ahâglo, imeᴋ puilavoᴋ seniane talerpingme.
3Angullo tâmna aningmat ununga aklunârmik tigumiarlune, ôktorpait talit 1,000, imakôrtipângalo, imeᴋ kamgamnut tikiutitilugo.
4Ama ôktorivait talit 1,000, imakôrtipângalo, imeᴋ serᴋumnut tikiutitilugo. Amalo ôktorivait talit 1,000, imakôrtipângalo, imeᴋ sibviamnut tikiutitilugo.
5Amalo ôktorpait talit 1,000, sunaubvalo kôk ikârvigijungnangitara: kutjersimangmat, imeᴋ puibjorviojungnarpoᴋ, erᴋangale tutijaujungnangilaᴋ.
6Oᴋautivângalo: Inûb erninga, tamanna takoviûk? Apângalo, utertilungalo kôb sinânut.
7Tagvungalo utersimagama, ahâk, napârtoᴋarpoᴋ unuktovaksoarnik kôb sinîgingne tamangne.
8Oᴋautivângalo: Imeᴋ tamanna kôkpoᴋ ununga kitânut, tikilârporlo naternaᴋsoarmut, imarbingmullo pilârpoᴋ; imarbingmut imeᴋ puilatitaujoᴋ pilârpoᴋ; imerlo atsuililârpoᴋ.
9Omajullo ilûnatik aulajut, nunane tamaine kôk tâpkoa maggûk kôlervigijangine, ômalârput, mingeriaᴋalârporlo unuktovaksoarnik; imeᴋ tamanna tikingmat tamaunga, imarbiublo imanga ajorungnaititaulârpoᴋ; ilûnatiglo kôk tâpkoa maggûk kôlervingine ômalârput.
10Mingeriarniartullo nangilârput sinâne; En-gedemit Eneglaimemut âᴋiksoiviᴋalârput nulluanik; mingeriaᴋtaᴋalârporlo ingmikut piusilingnik imarbiub mingeriangititut, unuktovaksôvlutik.
11Erᴋêgusangille imaᴋsungillo atsuilititaululângilat; tarrioliotsainaromârput.
12Kôblo sinâgingne tamangne perortoᴋaromârpoᴋ napârtunik sunatuinarnik paungalingnik nerrijausûnik, millukatangillo ᴋunoleromângilat, paungangillo katararomângilat; taᴋᴋit tamât paungatâlârput nutânik, imit ivsornaitovingmit pingmatta; paungangillo nerᴋiksaulârput, millukatangillo inûlinalârput.
13Imâk oᴋarpoᴋ Nâlegaᴋ Nâlegaujoᴋ: Tamanna kiglilerviksaulârpoᴋ, tamattomunga nuna avilugo kingormgutijaksautilârpase Israêlib kinguvârêngningit 12 maliklugit; Josefe avgoângnik maggûngnik pijuksauvoᴋ.
14Kingormgutilârivaselo adsigêktomik, aggakka ᴋongmuartilaurapkit tâmna pivlugo, tunijomagapko atâtagilauᴋtapsingnut: nunalo tamanna kingormgutijaksauvoᴋ ilipsingnut.
15Tamadja tagva nunab kiglinga: taggardleᴋ, imarbingmit Hetlonekut Zêdade tikidlugo;
16Hâmat, Berôta, Sîbarim, Damaskusib Hâmatib kiglilerviksâkita akornganêtoᴋ, Hâzere ᴋeterdleᴋ, Hauranib kiglinganêtoᴋ.
17Imarbingmillo kigligijaksarivâ Hâzer-enon Damaskusib kiglinganêtoᴋ, taggânelo avunga Hâmot kigleᴋarpoᴋ. Tamadja kiglinga taggardleᴋ.
18Kiglinga kitdleᴋ, Hauranib Damaskusiblo Gileadiblo, Israêliblo nunanga akorngane, Jordane ituksauvoᴋ; ôktoraksarivase kiglinganit taggardlermit imarbingmut kitânêtomut. Tamanna kiglinga kitdleᴋ.
19Kiglingalo seᴋinerdleᴋ pijuksauvoᴋ Tâmaremit Meribotkâdesib imangit tikidlugit, Egiptenib kônganut, imarbiksoarmullo. Tamadja kiglinga seᴋinerdleᴋ aunga.
20Imarbiksoarlo kigleojuksauvoᴋ kangidleᴋ, kiglemit seᴋinerdlermit Hâmatib nelâ tikidlugo. Tamadja kiglinga kangidleᴋ.
21Taimak nuna avgoaraksarivase ilipsingnut Israêlib kinguvârêngit maliklugit.
22Imaituksauvorlo: imerautigilugo avgulârpase kingormgutijaksautilugo ilipsingnut takorngartanullo nunaᴋartunut akunapsingne, ᴋitorngatârtunut akunapsingne; tâpkoalo ilingavigilârpase sorlo Israêlib ᴋitorngangititut akunapsingne inûlertutitut; tâpkoa kingormgutijaksaᴋartuksauvut ilagiluse Israêlib kinguvârêngita akorngane.
23Imaituksauvorlo: kinguvârêt neliane takorngartaᴋ nunaᴋarune, tagvane tunitjivigilârpase kingormgutijaksanganik, oᴋarpoᴋ Nâlegaᴋ Nâlegaujoᴋ.
ទើបបានជ្រើសរើសហើយ៖
Hesekiel 47: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.