Hesekiel 34
34
1Nalekablo oᴋausingata tikipânga, oᴋarlune:
2Inûb erninga, mianersijut Israêleme nelautaivigikit, nelautailerit, mianersijullo oᴋautikit: Imâk oᴋarpoᴋ Nâlegaᴋ Nâlegaujoᴋ: Kapianarmêk mianersijut Israêleme nangminermingnik nerrititsijut! Mianersijut nerripkaijuksaungilât saukanîk?
3Tunnoᴋ nerrivase, merᴋunginiglo annorâᴋarpose, ᴋionijut toᴋopase; saukalle nerripkalungilase.
4Sangêtut nakoᴋsitingilase, ᴋanimajullo inûlilungilase, aᴋᴋunaᴋsimajullo mangipsertulungilase, ᴋêmâtisimajullo utertilungilase, tamartullo ᴋenilungilase, aksorornermullo takopsoajuinermullo aulapase.
5Siamarsimavullo mianerijeᴋangimatta: nerᴋiksaulerpullo nergjutinut tamainut naternamêtunut, siamangavlutiglo.
6Saugakka arvertartuinarput ᴋaᴋᴋaᴋsuit akorngane, ᴋaᴋᴋanelo poᴋtojune tamaine: ilâ, saugakka siamangalauᴋput nunaᴋsoarme ilûnâne, apertsortoᴋangilarlo ᴋenertoᴋangilarlo tâpkoninga.
7Tamanna pivlugo Nâlekab oᴋausinga tusarsiuk, ilipse mianersijôjose.
8Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, saugakka pinasuartaungmatta nerᴋiksauᴋovlugit nergjutinut naternamêtunut tamainut mianersijoᴋangimat, mianersijullo saugakka ᴋeningimagit, mianersijullo nangminermingnik nerrititsingmatta saugakkalo nerritinagit;
9Tamanna pivlugo Nâlekab oᴋausinga tusarsiuk, ilipse mianersijôjose;
10Imâk oᴋarpoᴋ Nâlegaᴋ Nâlegaujoᴋ: Ahâk, mianersijut sâdlaromârpakka; saugakkalo tâpkoa agganginit tigujomârpakka, nerripkaijungnaititsomârpakkalo saukamnik: mianersijullo nerrititsijungnailârput nangminermingnik; saugakkalo piulijomârpakka tâpkoa ᴋaninginit, nerᴋiᴋsaujungnaiᴋovlugit tâpkonunga.
11Imâk oᴋarmat Nâlegaᴋ Nâlegaujoᴋ: Ahâk, uvanga nangmineᴋ, ilâ uvanga, saugakka ᴋeneromârpakka mianerijomârlugillo.
12Sorlo mianersijub saukane akornganêtub saukane ᴋenermagit uvlorme siamangavigijangine, taimak saugakka ᴋeneromârivakka, piulijomârpakkalo nunanit tamainit siamangavigilauᴋtanginit uvlorme nuvujalingme tâᴋtolingmelo.
13Tikiutijomârpakkalo inôᴋatigêksoarnit, katersoromârlugillo nunanit, tikiutijomârlugillo nunamingnut; nerripkaromârpakkalo Israêlib ᴋaᴋᴋaᴋsoangine, kôngnelo, nunanelo tamaine nunaᴋarviojune.
14Nerripkaromârpakka nerrinasugvingne piojune, Israêliblo ᴋaᴋᴋangine poᴋtojune mianerijaujomârput; tagvane aᴋopijomârput mianerijauvingme piodlartome, nerrinasugvingnelo ᴋoiglaunartune nerrijomârput Israêlib ᴋaᴋᴋangine.
15Uvanga nangmineᴋ saugakka nerripkaromârpakka, aᴋopititsomârpakkalo, oᴋarpoᴋ Nâlegaᴋ Nalegaujoᴋ.
16Assiomalauᴋtoᴋ ᴋeneromârpara, ᴋemâtitaujoᴋ tikiutijomârpara, aᴋᴋunaᴋsimajorlo mangipseromârpara, ᴋanimajorlo nakoᴋsititsomârpara: ᴋoinijullo sôngojullo nungutsomârpakka; nerripkaromârpakka idluartomik.
17Ilipselo saugakka, imâk oᴋarpoᴋ Nâlegaᴋ Nâlegaujoᴋ: Ahâk, erᴋartuijomârpunga saugarmut saugauᴋatinullo, sauᴋanut angusalungnut tuktungajunullo angusalungnut.
18Suglugivisiûk nerrinasugvik piojok nerrivigivlugo, nerrinasugviub amiakoa tullerarapsiûk? imerluselo imermik issungitomik amiakoa sujugapsiuk itikapsingnût?
19Saugakkale nerrivut itikapse tullerartanganit, imerpullo itikapse sujuktanginit.
20Tamanna pivlugo imâk Nâlekab Nâlegaujub oᴋautivait: Uvanga, ilâ uvanga, erᴋartuijomârpunga nergjutinik ᴋoinijunik nergjutiniglo sallôjunik.
21Senerarmikapse tuingmiluselo, sangêtullo nakjungmigarlugit siamartigapsigik;
22Tamanna pivlugo saugakka piulijomârpakka, pinasuartaujungnaiᴋovlugit; erᴋartuijomârpungalo saugarmut saugauᴋatinullo.
23Mianersijuksarlo atausiojoᴋ tâpkonunga makititsomârpara, tâpsomalo nerripkalârpait, tagva kivgara Davide; tâpsoma nerripkalârpait, mianersijuksauvorlo tâpkoninga.
24Uvangalo Nâlegaujunga Gudeojomavunga tâpkonunga, kivgaralo Davide angajoᴋaulârpoᴋ tâpkonunga, uvanga Nâlegaujunga taimak oᴋarpunga.
25Angeᴋatigêngnermiglo ulapirᴋsautelingmik angeᴋatigijomavakka, ômajullo erᴋsinartut nunamit pêjaromavakka; terliklutiglo nunaᴋaromârput sunaᴋajuitome, siniktarlutiglo napârtolingme.
26Saimauseromârpakkalo tâpkoalo ᴋaᴋᴋamalo avatânêtut; silaluᴋojijomârpungalo neliuningine; suarutseraromârpok saimanartolingnik.
27Napârtorlo naternamêtoᴋ paungatâlârpoᴋ, nunalo saᴋᴋêlârpoᴋ perortuminik, inuillo nunatik nunagilârpait terliklutik; ᴋaujijuksaulârpullo uvangaugama Nâlegaᴋ, nangmautât navgorêrupko, piulilugillo kipalotitingita agganginit.
28Pinasuaraksaujungnairomârpullo kingorngane nelojunut, nunablo nergjungita nerrijaksaringilait; terliklutigle nunaᴋaromârput, kinamullônêllo erᴋsititaujomângilat.
29Nuilertitsijomârpungalo tâpkonunga perortomik nertortaujutiksamik, kângnartoᴋsoarmullo nuname nungutaujungnairomârput, nangmariaᴋarungnairomârpullo nelojut mitauteᴋarninginik kingorngane.
30Kaujijuksaulârpullo uvanga Nâlegaujunga Gudigijangat tâpkonanêgama, tâpkoalo, Israêlib ᴋitorngangit, inuᴋotigigapkit, oᴋarpoᴋ Nâlegaᴋ Nâlegaujoᴋ.
31Ilipselo saugakka, nerrinasugvima saugangit, inôvose, uvangalo Gudigivapsinga, oᴋarpoᴋ Nâlegaᴋ Nâlegaujoᴋ.
ទើបបានជ្រើសរើសហើយ៖
Hesekiel 34: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.