Hesekiel 33
33
1Nalekablo oᴋausingata tikipânga, oᴋarlune:
2Inûb erninga, inôᴋativit ᴋitorngangit oᴋarvigikit, oᴋautikillo: Saviksoaᴋ tikiutikupko nunat ilanganut, nunablo inungita angutit ilangat tigupatsuk udjertortingortilugolo:
3Tâpsomalo saviksoaᴋ tikilertoᴋ nunamut takoguniuk tiptulausijarune, inuit kamasârlugit;
4Tagva neliat tusarune tiptulautib nipinganik, kamananelo, saviksoarlo tikipat pêjarlugolo, tagva tâpsoma aunga niaᴋominêtsomârpoᴋ.
5Tiptulautib nipinga tusaraloarpâ kamatsangilarle, tâpsoma aunga tâpsomanêlârpoᴋ tagva; kamalaurunele tarnine piulinajarpâ.
6Udjertortible saviksoaᴋ tikilertoᴋ takopago, tiptulausijaranelo, inuillo kamasârtaungikunik, saviksoarlo tikilerpat innuillo ilangat pêjarlugo; tâmna pêjartauvoᴋ idluitulinermine, aungale akkilertauᴋojomârpara udjertortib agganginut.
7Mânale, inûb erninga, udjertortingortipagit Israêlib ᴋitornganginut; taimaimat oᴋauseᴋ ᴋanimnit pijoᴋ tusaruk, kamasârkillo uvamnit.
8Idluitomut oᴋaruma: Idluitotit toᴋojuksauvotit, igvillo oᴋangikuvit idluitulijoᴋ alingisâromavlugo apᴋotiminit; idluitoᴋ tâmna toᴋolârpoᴋ idluinermine, aungale akkilertauᴋojomârpara aggangnut.
9Idluitorle alingisârungne sanguᴋovlugo apᴋotiminit, sangungipallo; tâmna toᴋolârpoᴋ idluinermine, igville tarnît piulivat.
10Igvillo, inûb erninga, Israêlib ᴋitorngangit oᴋautikit: Oᴋarpakpose imâk: Tappanivut idluinivullo uvaptingnêput, iluludlarpogut tâpkonane; ᴋanoelingaluta inôjuksauvitâ?
11Oᴋautikit: Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, idluitulijub toᴋunga ᴋuviagingilara; idluitulijorle sâgiangârune apᴋotigijaminit inôvlunelo: sâgiaritse, sâgiaritse apᴋotigijapsingnit idluitunit: sôᴋ toᴋojomavisê, ilipse Israelib ᴋitorngangît?
12Igvillo, inûb erninga, inôᴋativit ᴋitorngangit oᴋautikit: Idluartûb idluarningata piulinialungilâ uvlorme idluitulivigijangane, idluitûblo idluinine katagutiginialungilâ uvlorme sâgiarvigijangane idluitulinerminit: idluartûblônêt inôjutiginialungilâ uvlorme idluitulivigijangane.
13Idluartoᴋ oᴋautigupko inôjuksaugame: idluarnine sungertutigiguniuk idluitulilunelo, idluartulinerijangita neliallônêt erᴋaumajaunialungilaᴋ, idluitulinerijanganele piniarnerijangane toᴋojuksauvoᴋ.
14Amalo, idluitoᴋ oᴋautigupko: Toᴋojuksauvotit taima; sâgiarune idluinerminit, piniarlunelo perᴋojaujomik idluartomiglo;
15Idluitûb akkêngaivigijime ᴋailauᴋtanga utertikuniuk, aᴋsârnigarijane tunilermiguniuk, arvertarune inôgutaujut maligaksauᴋojangine, idluitulitailivlune; inôjuksauvoᴋ toᴋojuksaunanelo.
16Idluituliningita piniarnerijangita neliallônêt erᴋaumajauniangilaᴋ; piniarpoᴋ perᴋojaujomik idluartomiglo; inôjuksauvoᴋ ilâ.
17Inôᴋativille ᴋitorngangit oᴋarpaᴋput: Nâlekab apᴋotinga naggolungilaᴋ: tâpkoale apᴋotingit naggolungilat.
18Idluartûb idluarnine allarpargo idluitulilunelo, toᴋojuksauvoᴋ taimailiornermine.
19Idluitûblo idluinine allarpago piniarlunelo perᴋojaujomik idluartomiglo, inôjutigijaksarivâ ila.
20Sullele oᴋarpakpose: Nâlekab apkotinga naggolungilaᴋ. Ilipse, ᴋitorngaujose Israêlimut, idluarsaromavapse ilûnase atunit apᴋotise maliklugit.
21Pijokarporlo aularutijaunipta jâringita 12ingane, taᴋᴋit 10ingata uvlungita tellimangane, anigoijub Jerusalemit tikingmanga, oᴋarlune: Iglugasaksuit piluktauvut.
22Nâlekable aggangita ᴋolangialauᴋpânga unnungme anigoijub tikiningata sivorngane, ᴋaneralo angmarpâ, tikiᴋârtinago uvamnut uvlâkut; ᴋaneralo angmarpoᴋ oᴋâlajungnairomangilangalo.
23Nâlekablo oᴋausingata tikipânga, oᴋarlune:
24Inûb erninga, ipkua nunaᴋartut Israêlib nunangata sunaᴋarungnaitungane oᴋarpakput: Abraha atausiolauᴋpoᴋ, nunalo kingormgutilauᴋpâ: uvagulle unuktôvogut; nunalo tunijauvoᴋ uvaptingnut kingormgutijaksautilugo.
25Tamanna pivlugo oᴋautikit: Imâk oᴋarpoᴋ Nâlegaᴋ Nâlegaujoᴋ: Aulingnik nerrisôngovose, ijiselo arlortipase gudingoapsingnut, kovisiluselo aungmik: nunalo kingormgutijo mavisiûk?
26Saviksoase tatigivase, maᴋojungnartulivose, ilûnaselo ivsornartitsivose inôᴋatipse nulianginik: nunalo kingormgutijomavisiûk?
27Imâk oᴋautijaksarivatit: Imâk oᴋarpoᴋ Nâlegaᴋ Nâlegaujoᴋ: Sorlo mikseᴋârtomik oᴋarama, sunaᴋarungnaitunêtut oggotitaulârput saviksoarmut, naternamêtorlo tunijomalârpara nergjutinut nerrijaksauᴋovlugo, ungaluksoanêtullo ᴋairosungnêtullo toᴋotaujuksauvut nûsilingnartomut.
28Nunalo asserornerlukungortitsomavara tataminiarutiksangortilugolo, piojorijuteᴋarningalo pitsartunerminik sorairtuksauvoᴋ; Israêliblo ᴋaᴋᴋangit inuêrutjaulârput, tagvûna ingerartoᴋarungnaitilugo.
29Kaujijuksaulârpullo uvangaugama Nâlegaᴋ, nuna sunaᴋarungnaitigupko tataminiarutiksangortilugolo, maᴋojungnartuliningit piniarnerijangit tamaita pivlugit.
30Igvillo, inûb erninga, inôᴋativit ᴋitorngangita oᴋautigivâtit ᴋarmait seniane iglullo pângine, oᴋaᴋatigêklutik neliaᴋ inôᴋatiminut, oᴋarlutik: Attê, tusariartolerta oᴋauseᴋ Nâlekamit anijoᴋ ᴋanoelingamangât.
31Ilingnôrpullô inugiartoᴋsuit iluserijangat maliklugo, ingipullo sângne sorlo inuᴋotikka, tusarpullo oᴋauserijarnik, piniarnagille; ᴋanermingnut saᴋᴋêgamik unganersoarmik, ômatingille pijomatudlarnermut torârput.
32Igvillo, ahâk, nipitsiariktub imgerusersoangatut tusarnidlartotut ipotit tâpkonunga, nipliajolijatsiartotut; tusarmatta oᴋausernik piniarnagille.
33Tamannalo neliutilerpat, (ahâk, tikilerpoᴋ,) ᴋaujilârput tagva nelautaijoᴋ akunermingnêlaungmat.
ទើបបានជ្រើសរើសហើយ៖
Hesekiel 33: LIHB08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Labrador Inuttitut Heritage Bible © Canadian Bible Society, 2008.